སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བཅུ་དགུ

བློ་བཟང་གི་དབྱིན་ཡིག་གི་ཆུ་ཚད་ཀྱང་སྔར་ལས་བཟང་དུ་ཕྱིན་ཡོད་པ་མ་ཟད། དབྱིན་སྐད་ཐར་ཐོར་རེ་བཤད་རྒྱུར་ཡང་དཀའ་ངལ་མེད་པ་ལྟ་བུ་ཞིག་ཆགས་ཡོད་པ་རེད། ཟླ་ངོ་གསུམ་རིང་གི་གྲུབ་འབྲས་དེ་ནི་དངོས་ནས་བློ་བཟང་ལ་མཚོན་ན་ཡར་རྒྱས་ཤིག་ཏག་ཏག་ཕྱིན་ཡོད་པ་རེད་ལ། དབྱིན་དགེ་མ་ལེས་ན་ཡིས་བློ་བཟང་གི་ཡར་རྒྱས་ཀྱི་རྣམ་པ་དེ་དག་མཐོང་དེ་འོང་དུས་དེ་ལས་ཀྱང་སེམས་ཤུགས་སྤར་བཞིན་ཡོད།

བློ་བཟང་སང་ཉིན་གཅིག་བྱས་ན་འུ་གཉིས་ཀྱི་སློབ་ཁྲིད་མཐའ་མ་དེ་ཆགས་སྲིད་པ་རེད། ཡིན་ཡང་། ཁྱེད་ཀྱི་ལས་ཀ་རེག་མིན་ཐད་དུ་ང་རང་ལ་སེམས་འཁྲལ་ཞིག་འདུག་ཀྱང་། ང་རང་གིས་བྱེད་ཐུབ་པ་དེ་འདྲ་ཡོད་ན་དངོས་ནས་ང་རང་ལ་བཤད་རོགས་བཅས་སྔོན་ཆད་བཤད་མྱོང་བའི་སྐད་ཆ་ཞིག་སླར་ཡང་བློ་བཟང་ལ་བཤད།

བློ་བཟང་གིས། མེད་མེད་མེད། དངོས་ནས་ཁྱེད་རང་གི་ལྷག་བསམ་རྣམ་དག་གིས་ང་རང་ལ་སེམས་འཁུར་གནང་བ་དེར་སེམས་གཏིང་ནས་བཀའ་དྲིན་ཆེ། ང་རང་ལ་མི་རིང་བར་ཟ་ཁང་ཞིག་དུ་ལས་ཀ་རེག་ས་ཡིན། ཁོང་ཚོས་ང་རང་ནམ་ཁོམ་ན་དེ་དུས་ལས་ཀ་བྱེད་དུ་ཡོང་ན་འགྲིག་གི་ཡོད་ཟེར། ཁ་སང་དེ་རིང་ང་རང་གིས་གུང་གསེང་བྱས་དེ་བསྡད་ཡོད་པ་ལས། ལས་ཀ་མ་རེག་པ་དེ་འདྲ་རྩ་ནས་མིན་ན། ཁྱེད་རང་གིས་སེམས་པ་ལྷོད་ལྷོད་གནང་བ་ཡིན་ན་འགྲིག་གི་རེད་ལ། ང་རང་གིས་ཁང་གླ་ཡང་འདུག་རོགས་ཀྱིས་སྤྲད་ཚར་འདུག་ཞེས་ལན་བཏབ།

བློ་བཟང་ཅུང་ཙམ་གཟུགས་པོ་བདེ་བོ་མེད་པར་ཉལ་ནས་བསྡད་ཡོད་སྐབས། དབྱིན་དགེ་མ་ལེས་ན་མཐའ་མའི་སློབ་ཁྲིད་བྱེད་དུ་ཡོང་དུས། བློ་བཟང་གཉིད་དུ་གཡུར་ནས་བསྡད་ཡོད་སྟབས། ཆུ་ཚོད་ཕྱེད་ཀ་ཙམ་གྱི་རིང་དུ་གཏན་ནས་མ་ཤེས་པར་ལུས་པ་རེད། སྐབས་དེར་དབྱིན་དགེ་མ་ལེས་ན་ཡིས་གློ་ལུད་ཅིག་བརྒྱབ་པ་བསྟུན་བློ་བཟང་གཉིད་ལས་སད་དེ་དབྱིན་དགེ་མ་ལེས་ན་རང་གི་ཉལ་ཁྲིའི་གམ་དུ་ཁ་རོག་གེར་བསྡད་ཡོད་པ་མཐོང་མ་ཐག ཅུང་དོགས་མི་བདེ་བའི་ཚོར་བ་དང་ལྷན་དུ་དགོངས་དག ངས་ཁྱེད་རང་ནང་དུ་འབྱོར་བ་ཡང་ཤེས་མ་སོང་ཟེར་ནས་བཤད།

དབྱིན་དགེ་མ་ལེས་ན་ཡིས། སྐྱོན་ཡོད་པ་མ་རེད། ཁྱེད་རང་གི་ཕུང་བོ་བདེ་བོ་མི་འདུག་གམ། ནད་ཚ་ལྕི་མོ་འདྲ་མིན་ན། སྨན་ཁང་དུ་སོང་ན་ཡག་པོ་མེད་འགྲོ་ཟེར་ནས་དྲིས་དུས།

བློ་བཟང་གིས་དེ་འདྲའི་ཛ་དྲག་ཞིག་མ་རེད་ལགས། དངོས་ནས་ཐུགས་རྗེ་ཆེ་ལགས། ཁྱེད་རང་ག་དུས་འགྲོ་བཞིན་ཡོད་ཅེས་ཕྱིར་དྲིས།

དེ་རིང་ཕྱི་དྲོ་ཆུ་ཚུད་དྲུག་དང་ཕྱེད་ཀའི་རླངས་འཁོར་རེད། ཁྱེད་རང་བདེ་བོ་མེད་པ་ཡིན་ན་ཉལ་ནས་བསྡད་ན་འགྲིག་གི་རེད། ང་བུད་འགྲོ ཕྱི་དྲོ་ཐུག་མིན་མི་ཤེས་སྟབས། ངས་ཁྱེད་རང་ལ་དྲན་རྟེན་ཞིག་འཁྱེར་ནས་ཡོང་ཡོད། འདིའི་སྟེང་དུ་ང་རང་གི་བསྡོད་གནས་ཁ་བྱང་དང་གློག་འཕྲིན་ཁ་བྱང་སོགས་གསལ་བོ་ཞིག་བྲིས་ཡོད། ཡིན་གཅིག་མིན་གཉིས་ལ་ང་རང་ལ་འབྲེལ་བ་བྱེད་རྒྱུ་མ་བརྗེད་ཅིག་ཟེར་ཞོར་དུ་བློ་བཟང་གི་ཉེལ་མགོའི་འགྲམ་དུ་འཇོག་ཞོར་དུ། འདི་ང་རང་རྡ་ས་དང་ཁ་གྱེས་ནས་མ་གཏོགས་ཁ་མ་ཕྱེ་རོགས་བཅས་བཤད།

བློ་བཟང་གི་མགོ་བོ་ཡར་དགྱེ་ཞོར་དུ། ཡ་ལགས། རེད་དེ། ངས་གློག་འཕྲིན་གཏོང་ཤེས་ཀྱི་མེད་པ་ཁྱེད་རང་གི་ཤེས་གསལ་རེད། ད་དུང་། ང་རང་ལ་དབྱིན་ཡིག་ཡང་ཡག་པོ་ཞིག་འབྲི་ཤེས་ཀྱི་མེད་པ་ཁྱེད་རང་གི་ཤེས་གསལ་རེད། ངས་ཚོད་ལྟ་བྱེད་ཆོག་ཟེར་ནས་ལག་རྟགས་གནང་བ་དེར་ཐུགས་རྗེ་ཆེ། ད་ཁྱེད་རང་ལ་ཁོམ་པ་ཞེ་དྲག་ཡོད་རྒྱུ་མ་རེད། ཆུ་ཚོད་གཉིས་གསུམ་ཞིག་མ་གཏོགས་མི་འདུག ཁྱེད་རང་གི་ཅ་དངོས་དེ་དག་བསྡུ་གསོག་རྒྱག་དགོས་ཀྱི་ཡོད་ངེས་རེད། ང་རང་ཕྱི་དྲོ་ཁྱེད་རང་ལམ་འཇུག་བྱེད་དུ་ཡོང་ཁོ་ཐག་ཡིན་ཞེས་བཤད།

དབྱིན་དགེ་མ་ལེས་ན་ཡིས། ཁྱེད་རང་ཡོང་མ་ཐུབ་ཀྱང་འགྲིག་གི་རེད། གཟུགས་པོ་བདེ་བོ་མེད་པ་ཡིན་དུས། མ་ཡོང་ན་ཡག་པོ་ཡོད་པ་རེད། འོན་ཀྱང་། ཡི་གེ་སྐུར་རྒྱུ་གཏན་ནས་མ་བརྗེད་ཅིག་ཟེར་ཞོར་དུ་ཡར་ལ་བླངས་དེ་འགྲོ་གྲབས་བྱས།

བློ་བཟང་གིས་ཉལ་སའི་ནང་ནས་མགོ་ཡར་དགྱེ་བཞིན་བདེ་མོ། ཕྱི་དྲོ་མཇལ་ཡོང་ཟེར་ནས་ལམ་མཇུག་བྱས།

བློ་བཟང་གིས་ཆམ་ནད་ཀྱང་དེ་འདྲའི་ལྕི་མི་ཞིག་མིན་སྟབས། ཕྱི་དྲོ་ཆུ་ཚོད་དྲུག་པ་ཙམ་ལ་མེག་ལོར་སྲང་བར་དུ་ཁ་བཏགས་གོང་ཁེ་བོ་ཞིག་ཉོས་དེ་དབྱིན་དགེ་མ་ལམ་མཇུག་བྱེད་དུ་རླངས་འཁོར་ས་ཚིགས་སུ་སོང་དུས། གྲྭ་བ་དང་ཨ་ནེ་རེ་ཟུང་། མི་སྐྱ་མི་ཉུང་བ་ཞིག་གིས་དབྱིན་དགེ་མ་ལེས་ན་བསྐོར་ནས་ཁ་བཏགས་འཐེན་བཞིན་ཡོད་པ་མཐོང་མ་ཐག ཁོ་རང་ཅུང་ཙམ་ཧ་ལས་ཞོར་དུ། དབྱིན་དགེ་མ་ལེས་ན་ཡིས་མིག་གི་རིག་སར་བུད།

བློ་བཟང་ཁྱེད་རང་ཡོང་བ་ཐུགས་རྗེ་ཆེ་ཟེར་ནས་མི་དེ་དག་གི་དཀྱིལ་ནས་བློ་བཟང་གི་ཕྱོགས་སུ་ཡོང་དུས། བློ་བཟང་ཅུང་ཙམ་དོགས་མི་བདེ་བའི་ངང་དུ་རང་གི་ཨམ་ཕྲག་ནང་གི་ཁ་བཏགས་དཀར་པོ་དེ་བླངས་ནས་དབྱིན་དགེ་མ་ལེས་ན་ཡི་སྐེ་རུ་སྐོན་དུས། དབྱིན་དགེ་མ་ལེས་ན་ཡིས་བློ་བཟང་གི་སྐེ་རུ་འཐམ་ནས་བློ་བཟང་གི་འགྲམ་པའི་ངོས་འོ་ཞིག་བསྐྱལ་དུས། བློ་བཟང་གི་སྙིང་ཆུང་ཡང་དྲག་དུ་ལྡིང་བ་མ་ཟད། གདོང་ཡང་ཚ་ལམ་མེར་གྱུར་བ་དང་བསྟུན། ཁྱེད་རང་ལམ་སྐབས་སུ་བདེ་ཐང་ཡོང་བར་སྨོན་ཞེས་བཤད།

དབྱིན་དགེ་མ་ལེས་ན་ཡིས་མིག་མཐའ་རུ་མཆི་མ་བསྐོར་ཞོར་དུ། ད་བློ་བཟང་བདེ་མོ་བྱོས། ང་རང་རླངས་འཁོར་དུ་འགྲོ་རྒྱུ་ཡིན། འདི་ལྟར་བསྡད་ན་ང་རང་ངུ་ས་རེད་ཅེས་བཤད་དེ་ཁོ་གཉིས་ལ་བཅེར་བཞིན་པའི་མི་ཚོགས་ཀྱི་གསེང་ནས་འགྲོ་ཞོར་དུ། བློ་བཟང་ཡི་གེ་སྐུར་རྒྱུ་མ་བརྗེད་ཅིག་ཟེར་ནས་མིག་ཆུ་འཕྱི་ཞོར་དུ་རླངས་འཁོར་ནང་དུ་བུད།

བློ་བཟང་ནི་བསམ་རྒྱུ་དྲན་རྒྱུ་མེད་པར་གློ་བུར་དུ། ཨ་ཁ། དབྱིན་དགེ་མ་ལེས་ན་འདིས་བསམ་བཞིན་རང་གི་ནང་དུ་འབྱོར་ནས་མོ་རང་གི་སྤྲད་པའི་ལག་རྟགས་ཀྱི་དེབ་ཆུང་དེའི་ནང་དུ་བལྟས་དུས། འདི་ལྟར་བྲིས་ཡོད་པ་རེད།

བློ་བཟང་ལགས། འདི་ན་མང་བོ་ཞིག་མེད་ཀྱང་། ཁྱེད་རང་གི་ཟླ་གཅིག་གི་ཟས་སོང་ལ་ཞལ་འདེབས་ཙམ་ཞིག་ཡིན། ཁྱེད་རང་ནི་བདག་ལ་མཚོན་ན་སློབ་ཕྲུག་གཞན་དག་མ་འདྲ་བར་དམིགས་བསལ་གྱི་སློབ་མ་ཞིག་ཡིན་ལ། ཁྱེད་རང་ང་གང་དུ་སོང་ཡང་མི་བརྗེད། ངས་ཁྱེད་རང་ལ་བཤད་འདོད་པའི་སྐད་ཆ་ཞིག་ཡོད་ཀྱང་། རྗེས་ཕྱོགས་འཕྲིན་ལམ་ནས་གླེང་ཆོག འོག་གི་འདི་ང་རང་གི་གློག་འཕྲིན་ཁ་བྱང་རེད། ཡིན་གཅིག་མིན་གཅིག་ཡི་གེ་སྐུར་རྒྱུ་མ་བརྗེད་ཅིག ལེས་ན་ནས་ཟླ་ཚེས་ལ་ཞེས་བྲིས་ཡོད་པའི་ཡིག་འབྲི་དེ་དག་ལ་ལྟ་ཞོར་དུ། མོ་རང་གི་དོན་དངོས་སུ་ང་ལ་བཤད་མ་ཐུབ་པའི་སྐད་ཆ་འདྲ་འཁུར་ནས་ཕྱིར་རང་ཡུལ་དུ་ལོག་པ་དེ་ནི་དངོས་ནས་ཡིད་ཕངས་པ་ལའང་སྙམ་ཞོར་དུ། དྲན་རྟེན་དེབ་ཆུང་དེའི་ཁ་བརྒྱབས་དེ། ཧིན་སྒོར་སུམ་སྟོང་དེ་རང་གི་ཨམ་ཕྲག་དུ་འཇུག་ཞོར་དུ་དབུགས་རིང་ཞིག་འཐེན།