སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ཉེར་ལྔ།

ནོར་བུ་བཟང་མོས། རེད། ཁྱེད་རང་གི་གྲོགས་པོ་སངས་རྡོར། ང་རང་གི་ཨ་ཅེ། ཁོང་ཚོས་ཁྱེད་རང་ལ་བཤད་པའི་སྐད་ཆ་དེ་དག་ནི་བདེན་པ་ཡིན་ལ། ང་རང་ཁྱེད་ལ་དགའ་ནས་ལོ་ངོ་གཅིག་ལྷག་འགྲོ་བཞིན་ཡོད་ཀྱང་། ཉིན་མ་དེ་རིང་གི་བར་དུ་འདི་ལྟར། ངོས་སུ་ཕན་ཚུན་གྱི་གདོང་ལ་བལྟས་དེ་སྐད་ཆ་གསལ་བོ་བཤད་པའི་གོ་སྐབས་མ་བྱུང་བར་ལུས་པ་རེད། གལ་སྲིད། ཁྱེད་རང་ལ་དངོས་ནས་བློ་ཐག་མ་ཆོད་པའི་སེམས་ངལ་འདྲ་ཡོད་ན། ངས་ཁྱེད་ཀྱི་བློ་ཐག་ཆོད་རེག་བར་དུ་སྒུག་ངེས་ཡིན་ཟེར་ནས་བློ་བཟང་གི་དྲི་བ་རེ་རེ་ལ་གཟབ་ནན་གྱིས་ལན་རེ་རེ་སྤྲད།

བློ་བཟང་གིས་ནོར་བུ་བཟང་མོས་བཤད་པའི་སྐད་ཆ་རེ་རེ་ནི། མི་ཞིག་གི་སེམས་ཁོང་ནས་ལྷོད་དུ་བཞུར་ཐུབ་པ་རྐྱང་རྐྱང་ལས་མུད་ཐག་ཡན་ཆད་ནས་སྐད་ཆ་བཤད་མཁན་དག་གི་ཚོར་བ་དང་གཏན་ནས་མི་འདྲ་བའི་བསམ་ཚུལ་རྙེད་དུ་བཅུགས་པ་མ་ཟད། བུད་མེད་སུས་ཀྱང་རང་ཉིད་ལ་དགའ་སའི་མི་དེར་སྐད་ཆ་འདི་ལྟར་བཤད་འཕོད་མཁན་བོད་ཀྱི་བུ་མོ་ཉུང་ཉུང་ཡིན་ན། ང་རང་ཅུང་ཙམ་ཧམ་པ་ཆེ་བ་ལྟ་བུ་ཞིག་ཆགས་སོང་དེ། ཡིན་ཡང་། འདི་ནི་ཁྱེད་ཀྱིས་དྲིས་པའི་ལན་དག་སེམས་བསམ་པའི་ལན་ལན་ཞིག་བཏབ་པ་ལས་གཞན་མིན་ཟེར་བའི་སྐད་ཆ་དེ་ནི་སེམས་ནང་དུ་ལྷུང་།

ལྷ་མོའི་སྐུ་བརྟེན་མོ་མ་ཨ་མ་རྒན་མོ་དེས་ལག་དུ་འཕྲེང་བ་ཕུར་ཞོར་དུ། དོན་དག་ག་རེ་ཡིན་ཞེས་ཁོང་གསུམ་ལ་དྲིས། སྐབས་དེར་ནོར་བུ་བཟང་མོའི་ཨ་ཅེ་ཡིས་གཉེན་སྒྲིག་གི་ཆེད་ཡིན་ལགས་ཟེར་ནས་གུས་ཉམས་དང་བཅས་དེ་ལག་ནང་གི་ཁ་བཏགས་དང་ཧིན་སྒོར་ལྔ་བཅུ་མ་དེ་མོ་མ་དེར་ཕུལ།

མོ་མ་རྒན་མོས། ཁྱེད་གཉིས་རང་དབང་རང་འཐད་ཡིན་ནམ། གཉིས་ཀྱིས་མགོ་བོ་ལྷན་གཅིག་དུ་བརྡབས། གཉེན་ཉེ་སོགས་ཀྱིས་བཀག་རྒྱ་མེད་དམ། སླར་ཡང་གཉིས་ཀྱིས་མགོ་བོ་བརྡབས། དེས་ན་བཟང་གི་ཞེས་མིག་བཙུམ་ནས་ཁ་མུར་མུར་ངང་བསྔགས་གསོག་པའི་སྐབས་དེར་དངོས་ནས་ཁང་མིག་ཆུང་ཆུང་དེ་ནི་ཅི་འདྲའི་ལྷིང་འཇག་ཞིག་ཆགས་ཡོད་པ་རེད།

ཚང་མས་སྒོ་རུ་འབུད་ཞོར་དུ་ཐུགས་རྗེ་ཆེ་ལགས་ཟེར་བཞིན། མོ་མ་དེར་གུས་ཚུལ་དང་བཅས་དེ་སྒོ་ཕྱི་རུ་ཐོན། ནོར་བུ་བཟང་མོའི་ངོ་གདོང་ཡོངས་ལ་ནམ་ཡང་བྱུང་མ་མྱོང་བ་ལྟ་བུའི་འཛུམ་མདངས་ཤིག་རྒྱས་ཡོད་པ་མ་ཟད། ཁོ་མོའི་ཨ་ཅེ་ཡི་གདོང་ལ་ཡང་འཛུམ་མདངས་ཤིག་རྒྱས་ཡོད། འོན་ཀྱང་། བློ་བཟང་གི་གདོང་ན་དེ་འདྲའི་ཧ་ལས་པའི་འཛུམ་མདངས་ཤིག་མཐོང་དཀའ་ན་ཡང་། ཁོ་གཉིས་ཀྱི་འཛུམ་མདངས་དང་འགྲོག་ནས་མུ་མཐུད་དུ་ལྷ་རྒྱལ་རིའི་འདབས་ནས་གཙུག་ལག་ཁང་གི་བསྐོར་ལམ་སྙེགས་དེ་འགྲོ་བཞིན་ཡོད།

ལྷ་མོས། བློ་བཟང་། ང་རང་གི་མི་ཚེ་ནང་དུ་རང་གི་མི་ཚེ་ལ་མོ་འདེབས་དུ་སོང་མྱོང་ལ། གཞན་གྱི་ཆེད་དུ་མོ་འདེབས་དུ་ཐེངས་མང་བོ་སོང་མྱོང་ཡོད་ཀྱང་། དེ་རིང་གི་མོ་འདི་འདྲའི་ཡག་པོ་ཞིག་འབབ་པ་དང་གཏན་ནས་འཕྲད་མྱོང་མེད། སྐུ་རིམ་ཞབས་བརྟན་གང་ཡང་མེད་པ་མ་ཟད། མོ་མས་ཀྱང་ཧ་ལས་པའི་འཛུམ་མདངས་ཤིག་དང་བཅས་ཁྱེད་གཉིས་ལ་ཁ་དྲོ། མོ་དངོས་ནས་ཡག་པོ་འདུག མགྱོགས་པོ་ཆང་ས་བརྒྱབ་པ་ཡིན་ན་ཡག་པོ་འདུག་ཟེར་ནས་གསུངས་པ་དེ་རེད། ད་གང་བྱེད་ན་དགའ་ས་རེད།

བློ་བཟང་གིས། ངས་གོང་ནས་ནོར་བུ་བཟང་མོ་ལ་བཤད་ཡོད། ང་རང་ལ་ལས་དོན་ཆེན་པོ་ཞིག་གི་ཆེད་དུ་ལྡི་ལུར་འགྲོ་དགོས་ཡོད། ཉིན་ཁ་ཤས་ལས་མི་འགོར། དེ་ནས་ཕྱིར་ཡོང་ནས་ང་ཚོས་སྐད་ཆ་བཤད་ཆོག

ཉིན་མ་ཁ་ཤས་ཀྱི་རྗེས་སུ་བློ་བཟང་ལྡི་ལུར་སོང་ནས་ནས་ཕྱིར་སླེབས་ཡོད་པ་མ་ཟད། ལྡི་ལུ་ནས་ཕྱིར་སླེབས་ཉིན་གྱི་ཞོགས་པ་དེར་བདེ་གྲོལ་ཚང་ལ་གཡར་བའི་ཧིན་སྒོར་གཅིག་སྟོང་ལྔ་བརྒྱ་དེ་དག་ཕྱིར་སྤྲོད་ཞོར་དུ་ལྡི་ལུ་ནས་ཉོས་པའི་ལག་རྟགས་དེ་ཚོ་སྤྲད་རྗེས་སུ། བླ་འཁྱམས་པ་ལྟར། སྐད་ཆ་ཡང་མང་བོ་ཞིག་བཤད་རྒྱུ་མེད་པར་རང་གི་བསྡོད་གནས་སུ་བྱིན།

ཉིན་མ་དེ་ནས་བཟུང་བློ་བཟང་གིས་ཨ་རག་མང་བོ་ཞིག་འཐུང་བཞིན་ཡོད་ལ། ནོར་བུ་བཟང་མོས་ཀྱང་བློ་བཟང་གི་ངང་ཚུལ་དེ་དག་ལས་ཁོ་མོ་ལ་སྐད་ཆ་བཟང་ངན་གང་ཡང་ད་ལྟའི་འཆར་བཤད་རྒྱུ་མེད་པ་ཤེས་ཀྱང་། དུས་ཚོད་གང་ཡོད་ལ་བློ་བཟང་གི་ནང་དུ་སླེབས་ནས་བློ་བཟང་ལ་འདུག་རོགས་དང་། སྐད་ཆ་འདྲ་མིན་བཤད་རོགས་བྱེད་བཞིན་ཡོད།

བློ་བཟང་གྲྭ་ས་དང་ཁ་གྱེས་ནས་བཟུང་ལོ་གཉིས་གསུམ་ཞིག་འགྲོ་བཞིན་ཡོད་ཀྱང་། གྲྭ་ས་དང་ཁ་གྱེས་པའི་ཕྱིར་ཉིན་དེ་ནས་བཟུང་དེ་ཕ་ཡུལ་དུ་ཡིག་ངག་གང་རུང་ནས་འབྲེལ་བ་བྱུང་མེད། དེ་རིང་ཁོ་ལ་ངོ་ཤེས་ཤིག་བརྒྱུད་དེ་སྡེ་བའི་ནང་གི་ཁྱིམ་ཚང་ཞིག་གི་ཁ་པར་ཨང་གྲངས་རེག་ནས་ཕ་ཡུལ་དུ་ཁ་པར་བཏང་།

ཨ་རོགས། འདི་ཨ་ཕ་དོན་ཁོ་ཚང་ཨེ་རེད། ང་རྡོ་རྗེ་ཚང་གི་བུ་བློ་བཟང་ཡིན། དྲིན་ཆེན་མ། ངེད་ཚང་ལ་སྐད་ཅིག་གཏོང་རོགས་གནོང་ཟེར་ནས་བཤད་དུས།

རེད། དོན་ཁོ་ཚང་རེད། ཁྱེད་རང་གིས་ཁ་པར་གང་ནས་གཏོང་བཞིན་ཡོད།
ངས་རྒྱ་གར་ནས་གཏོང་བཞིན་ཡོད།
ཨོ། ཁྱེད་ཚང་གི་ནང་དུ་ཁ་པར་ཡོད་པ་རེད། ཁྱེད་ཀྱིས་དེར་བཏང་ན་ཐད་ཀར་ཁ་བརྡ་བྱེད་ཐུབ་ངེས།
རེད་དེ། ངས་ཁ་པར་ཨང་གྲངས་མི་ཤེས།

ཅུང་ཙམ་སྒུག་དང་ངས་ཁྱེད་རང་ལ་སྤྲོད་ཆོག་ཟེར་ནས་ཁ་པར་སྣེ་ཡི་བུད་མེད་དེས་བློ་བཟང་ལ་ཁོང་ཚང་གི་ནང་མིའི་ཁ་པར་ཨང་གྲངས་སྤྲད།

ཁ་པར་གྱི་སྡུར་སྒྲ་ལ་ཉན་ཞོར་དུ། བློ་བཟང་གིས་ཁ་པར་ལེན་མཁན་དེ་ནི་སུ་ཡིན་སྲིད། ཨ་མ་ཡིན་ན་ངས་གང་བཤད་སྙམ་བཞིན་པའི་སྐབས་སུ། ཨ་རོགས་ཟེར་ནས་སྐད་ཅིག་གོ་དུས། དེ་ནི་རང་གི་ཕ་རྒན་རྡོ་རྗེ་ཡི་སྐད་ཡིན་པ་ཤེས་ནས། ཨ་ཕ་ང་ཡིན། ཁྱེད་ཚོ་ཚང་མ་བདེ་མོ་ཡིན་ནམ་ཟེར་ནས་དྲིས།

ཕ་རྒན་རྡོ་རྗེ་ཡིས་རང་གི་བུ་བློ་བཟང་ཡིན་པ་ཤེས་ནས། ཡིན། ང་ཚོ་ཚང་མ་བདེ་མོ་ཡིན། ཁྱེད་རང་གི་གནས་ཚུལ་མ་གོ་བར་ལོ་ངོ་གཉིས་གསུམ་འགྲོ་བཞིན་ཡོད་སྟབས། ཨ་མས་ཁྱེད་རང་གི་ཆེད་དུ། རྒྱ་གར་ནས་ཡོང་མཁན་ངོ་ཤེས་མི་ཤེས་གཉིས་ལ་ཁྱེད་རང་གི་གནས་ཚུལ་དྲིས་པ་མ་ཟད། རྒྱུན་དུ་མིག་ཆུ་བཏང་ནས་ཁྱེད་རང་གླེང་བཞིན་ཡོད་པ་རེད། ད་ཁྱེད་རང་གིས་ག་རེ་བྱེད་ཀྱི་ཡོད། གྲྭ་བ་ཡིན་ནམ།

བློ་བཟང་གྲྭ་ས་དང་གྱེས་ནས་ལོ་ངོ་གཉིས་གསུམ་ཞིག་འགྲོ་བཞིན་ཡོད་ཀྱང་། ཐ་མག་འཐེན། ཆང་འཐུང་། ཐ་མག་ནག་པོ་འཐེན་པ་སོགས་ལས་ད་དུང་བུད་མེད་ལ་ལུས་འབྲེལ་བཞག་མེད་ཀྱང་། ཐེ་ཚོམ་མེད་པར་ཕ་རྒན་ལ། ང་གྲྭ་བ་མིན། དེང་སང་དམིགས་བསལ་གྱིས་ལས་ཀ་གང་ཡང་མེད་ཅེས་བཤད།

ཕ་རྒན་གྱིས། ང་ཚོས་གོ་བ་ལྟར་ན་ཁྱེད་རང་ད་ལྟ་ཡང་གྲྭ་བ་རེད་ཟེར་གྱི་འདུག དངོས་ནས་ཤོད་དང་། གྲྭ་བ་ཡིན་དང་མིན།

དེ་ལ་གསང་དགོས་དོན་གང་ཡོད། གྲྭ་བ་མིན་ན་ཡིན་ཟེར་དགོས་དོན་མི་འདུག དངོས་ནས་གྲྭ་བ་མིན་ཞེས་ཕ་རྒན་གྱི་སྐད་ཆ་དེར་ཐད་ཀར་ལན་བཏབ།

ཕ་རྒན་གྱིས། ད་ཁྱེད་རང་གི་མིན་ཟེར་ནས་བཤད་དུས། ད་མིན་ནི་ཡིན་རྒྱུ་རེད། དེས་ན་ལས་ཀ་གང་ཡང་མེད་པར་བསྡད་ན་འཚོ་བའི་ཐད་ལ་དཀའ་ངལ་མི་འདུག་གམ། དེང་སྐབས་ས་ཆ་གང་ཞིག་ན་ཡོད།

ཟླ་གཅིག་གི་གོང་བར་དུ་གྲྭ་ས་དང་ཁ་གྱེས་པ་ནས་བཟུང་དེ་ཟ་ཁང་མི་ཉུང་བ་ཞིག་ལ་ལས་ཀ་བྱས་པ་ཡིན། འཚོ་བའི་ཐད་དུ་དཀའ་ངལ་འཕྲད་མ་སོང་། དེང་སང་ཡང་ལས་ཀ་གསར་བ་ཞིག་འཚོལ་བཞིན་པའི་སྒང་ཡིན། ལས་ཀ་རེག་ངེས་རེད། སེམས་འཁྲལ་བྱེད་མི་དགོས་པའི་བསྐོར་ཨ་མ་དང་སྤུན་ཉེ་རིང་དག་ལ་བཤད་རོགས། ད་ལྟའི་འཆར་ང་རང་རྡ་རམ་ས་ལ་ན་ཡོད་ཅེས་རང་གི་ཨ་རྒན་གྱི་དྲི་བ་དག་ལ་ལན་སྤྲད། རྗེས་ཕྱོགས་ངས་ཁྱེད་ཚོ་ལ་ཁ་པར་གཏོང་ངེས་ཡིན་ཟེར་ནས་ཨ་མ་ལ་བཤད་རོགས།

ཕ་རྒན་གྱིས། ཟ་ཁང་གི་གཡོག་པོ་རྐྱང་རྐྱང་བྱས་དེ་བསྡོད་པ་ལས་ཕྱིར་ཕ་ཡུལ་དུ་ཡོང་ནས་འཁོར་བ་ཞིག་བཟུང་དེ་ཕ་མ་ཚོས་མིག་གི་རིག་ས་ཞིག་ནས་བསྡད་ན་ཚང་མ་བློ་བདེ་བོ་རེད་འདོད་ཀི ད་ནི་ཁྱེད་རང་ཆུང་ཆུང་མ་རེད། རང་གིས་བསམ་བློ་ཞིབ་མོ་ཐོངས། འདི་ཕྱོགས་སུ་སེམས་འཁྲལ་མེད། ནང་མི་ཉེ་འབྲེལ་ཚང་མ་བདེ་མོ་རེད།

བློ་བཟང་ཁ་པར་ཁང་ནས་སྒོ་བུད་མ་ཐག ངོ་ཤེས་རྒྱ་མཚོ་རྒྱ་གར་ནུབ་ཀྱི་ཤར་ཕྱོགས་སུ་ལས་ཀ་བྱེད་དུ་སོང་ནས་དེ་རིང་གཞི་ནས་རྡ་སར་འབྱོར་བ་དང་། ཁོ་གཉིས་ཀྱིས་ལས་ཀའི་བསྐོར་ལ་སྐད་ཆ་འདྲ་མིན་སྣ་ཚོགས་རེ་བཤད།

རྒྱ་མཚོས་བློ་བཟང་ལ། ཁྱེད་རང་ས་ཁུལ་དེར་ལས་ཀ་བྱེད་དུ་འགྲོ་འདོད་ཡོད་ན། ངས་ཁྱེད་རང་ལ་ཁ་པར་ཨང་གྲངས་ཤིག་སྤྲོད་ཆོག ཁོང་ཚོ་ལ་ལས་ཀ་བྱེད་མཁན་བོད་མི་ཞིག་མ་རེག་པར་བསྡད་འདུག འདི་མི་ཚང་དེས་བུའི་ཁ་པར་ཨང་གྲངས་རེད། ཁོ་རང་དེང་སང་ལྡི་ལུར་ཡོད་པ་རེད། འགྲེལ་བ་བྱེད་ན་མགྱོགས་པོ་བྱས་ན་ཡག་གི་རེད་ཅེས་བློ་བཟང་ལ་ཁ་པར་ཨང་གྲངས་ཤིག་སྤྲད།