ཆེས་མཐོའི་ཁྲིམས་ཞིབ་ཁང་གིས་ཞུ་སྦྱོར་བས་འོས་བསྡུ་ལས་ཁང་བཅའ་ཁྲིམས་དང་འོས་བསྡུའི་སྒྲིག་གཞིར་འགལ་བའི་ཁུངས་སྐྱེལ་ཐུབ་མེད་པས། བསྟན་འཛིན་མཁས་གྲུབ་ལགས་ཁྲིམས་སྒྲིག་དགོངས་དོན་འོག་རྒྱ་བལ་འབྲུག་གསུམ་ནས་འོས་གཞིར་ཞུགས་པ་དང་འོས་འཕེན་མི་ཆོག་པའི་བཅད་ཁྲ་བཏང་སོང་།
དེ་རིང་ཉིན་རྒྱབ་ཆེས་མཐོའི་ཁྲིམས་ཞིབ་ཁང་གི་འཚོགས་རར་བཙན་བྱོལ་བོད་མིའི་ཁ་མཆུ་ཨང་ ༢༣ པའི་མཐའ་མའི་ཐག་གཅོད་ཀྱི་བཅད་ཁྲ་བསྒྲགས་པའི་ཉན་ཞིབ་ཅིག་འཚོགས་སོང་བ་དང་སྐབས་དེར་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་ཁྲིམས་ཞིབ་པ་གཞན་གཉིས། དེ་བཞིན་ཞུ་སྦྱོར་བའི་ཁྲིམས་རྩོད་པ་བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་དང་རྩོད་ལན་པ་དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་མཆོག་བཅས་འཛོམས་འདུག
ཆེས་མཐོའི་ཁྲིམས་ཞིབ་ཁང་གི་མཐའ་མའི་ཐག་གཅོད་དང་བཅད་ཁྲའི་ནང་། ས་གནས་འོས་བསྡུ་ལས་ཁང་གིས་ཞུ་སྦྱོར་བ་བསྟན་འཛིན་མཁས་གྲུབ་ལགས་ཀྱི་འོས་བསྡུའི་ཐོབ་ཁུངས་བརྗེ་བསྒྱུར་བྱས་པ་ནི་འོས་བསྡུའི་ལས་དོན་འཐུས་ཤོར་བཏང་ཡོད་ཀྱང་། བསྟན་འཛིན་མཁས་གྲུབ་ལགས་སུ་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་པ་དང་འོས་འཕེན་དུ་མ་བཅུག་པའི་ཐག་གཅོད་དེ་ནི་ཁྲིམས་སྒྲིག་གི་དགོངས་དོན་ལྟར་བྱུང་ཡོད་སྐོར་དང་། དེ་བཞིན། བསྟན་འཛིན་མཁས་གྲུབ་ལགས་ཀྱིས་དབུས་འོས་བསྡུ་ལས་ཁང་གི་ཐག་གཅོད་བྱས་པ་རྣམས་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་བཅས་པར་འགལ་ཡོད་པའི་ཁུངས་སྐྱེལ་ར་སྤྲོད་ཐུབ་མེད་སྐོར། དེ་བཞིན། གྱོད་ཡ་ཕྱོགས་གཉིས་ཀྱི་ཞུ་སྙན་དང་དཔང་རྟགས། ཁྲིམས་སྒྲིག་གི་འཇུག་ཚུལ་དང་དེ་དག་གི་རྒྱུ་མཚན་ལ་བརྟེན་ནས། ཞུ་སྦྱོར་བ་བསྟན་འཛིན་མཁས་གྲུབ་ལགས་སྦེལ་ཀོབ་ས་གནས་སུ་གནས་སྐབས་བསྡད་པ་ཙམ་ལས། སྦེལ་ཀོབ་ས་གནས་སུ་ཁྲིམས་མཐུན་གནས་སྡོད་བོད་མི་ཞིག་ཡིན་པའི་ཆ་རྐྱེན་ཚང་གི་མེད་སྟབས། ཞུ་སྦྱོར་བ་བཙན་བྱོལ་བོད་མིའི་ཁྲིམས་སྒྲིག་གི་དགོངས་དོན་འོག་རྒྱ་བལ་འབྲུག་གསུམ་ནས་ཆོལ་ཁ་ཆོས་བརྒྱུད་ཀྱི་སྤྱི་འཐུས་ཀྱི་འོས་གཞིར་ཞུགས་པ་དང་འོས་ཤོག་འཕེན་མི་ཆོག་པའི་བཅད་ཁྲ་བཏང་སོང་།
ཁྲིམས་ཞིབ་ཁང་གི་ཐག་གཅོད་ངོས་འཛིན།
བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༡ (༢) པ། ས་གནས་འོས་བསྡུ་ལས་ཁང་ནས་ཁྱབ་ཁོངས་སོ་སོའི་འོས་འཕེན་པའི་མིང་གཞུང་མ་དེབ་ལ་སྣོན་འཕྲི་དག་བཤེར་བྱེད་པ་ལས། འོས་བསྡུའི་སྐབས་རེ་རེར་དེབ་སྐྱེལ་ བསྐྱར་དུ་བྱེད་མི་དགོས་ཞེས་གསལ་ཡོད་ནའང༌། དོ་བདག་གྱོད་ཡ་ཞུ་སྦྱོར་བའི་དཔྱ་ཁྲལ་ལག་དེབ་གཞིར་བཞག་གིས་འོས་བསྡུ་དེབ་འགོད་ཨང་ CAON 25༠ ཕྱི་ལོ་ ༢༠༢༠ ཟླ་ ༩ ཚེས་ ༥ ཉིན་བྱང་ཨ་རི་ཁོངས་དེབ་འགོད་བྱས་འདུག་པས། འོས་བསྡུའི་ཐོབ་ཁུངས་བྱང་ཨ་རི་ཆགས་ཀྱི་འདུག ཁེ་ཎ་ཊར་འོས་བསྡུ་དེབ་འགོད་ཡོད་བཞིན་དུ་སྦེལ་ཀོབ་ལུགས་བསམ་ས་གནས་སུ་དེབ་འགོད་བསྐྱར་དུ་བྱས་པ་དང༌། དེ་བཞིན་སྦེལ་ཀོབ་ལུགས་བསམ་ས་གནས་འོས་བསྡུ་ལས་ཁང་ནས་གྱོད་ཡ་ཞུ་སྦྱོར་བའི་འོས་བསྡུའི་ཐོབ་ཁུངས་བརྗེ་བསྒྱུར་གྱིས་དེབ་འགོད་ཨང་ ༥༢༠༠ ཕྱི་ ལོ་ ༢༠༢༥ ཟླ་ ༡༡ ཚེས་ ༤ འཁོད་པ་དེ་གཉིས་ཁྲིམས་སྒྲིག་ལྟར་བྱུང་མི་འདུག
བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༡ (༣) [ཀ] ནང་གསལ་འོས་འཕེན་པའི་མིང་གཞུང་མ་དེབ་ གཞིར་བཟུང༌། ཐོབ་ཁུངས་སོ་སོའི་མིང་གཞུང་བཟོ་འགོད་བྱེད་དགོས་པ་གསལ་བ་དང་བསྟུན། དབུས་འོས་བསྡུ་ལས་ཁང་ལ་འབུལ་དགོས་པ། དེ་བཞིན་དབུས་འོས་བསྡུ་ལས་ཁང་ནས་འོས་ཤོག་འགྲེམས་གཏོང་བྱེད་དགོས་པར་དབུས་ས་གཉིས་དབར་གྱི་འོས་བསྡུའི་ལས་དོན་བྱེད་ཕྱོགས་གསལ་བ་དང༌། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༡ (༣) [ཁ] ཐོབ་ཁུངས་སོ་སོའི་འོས་འཕེན་པའི་མིང་གཞུང་གཏན་འབེབས་ཟིན་འཕྲལ། དེའི་འདྲ་བཤུས་དབུས་འོས་བསྡུ་ལས་ཁང་ལ་འབུལ་གཏོང་དགོས་པ་དང་། སླད་མིང་གཞུང་དེ་དག་གཙོར་བཟུང་གིས་དབུས་འོས་བསྡུ་ལས་ཁང་ནས་འོས་ཤོག་འགྲེམས་གཏོང་བྱེད་དགོས་ཞེས་གསལ་ཡོད་པར་སོང་། ས་གནས་འོས་ བསྡུ་ལས་ཁང་གི་དབང་ཆ་ནི་མིང་གཞུང་བཟོ་འགོད་དང་དག་བཤེར་གྱི་ལས་འགན་ཡིན་པ་ལས། གང་ཟག་ཅིག་གི་འོས་བསྡུའི་ཐོབ་ཁུངས་གཞན་ཞིག་ཏུ་བརྗེ་བསྒྱུར་བྱ་རྒྱུའི་དབང་ཆ་གོང་གསལ་ཁྲིམས་ཡིག་གིས་གནང་མི་འདུག བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༧ (༡) [ཀ] པ་ནས་ [ཅ] པ་བར་དཀྱུས་གཅིག་ལ་གོ་བ་ལེན་དགོས་པ་ལས། ནང་གསེས་ཀྱི་དོན་ཚན་རེ་རེར་འགྲེལ་བཤད་ཀྱིས་གོ་བ་ལོགས་སུ་ལེན་ཐབས་མེད། བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༧ པ་ནི་སྤྱི་འཐུས་ལྷན་ཚོགས་ཀྱི་གྲུབ་ཆ་ཡིན་པས། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ པ་དེ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༧ པ་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་ཞེས་པ་དེ་འོས་བསྡུའི་སྒྲིག་གཞིའི་ནང་ལག་བལྟར་ཆེད། བོད་མི་མང་སྤྱི་འཐུས་རྣམས་ཀྱི་ཡོང་ ཁུངས་དང༌། རྩ་འབོར་གྱི་གྲངས་ཚད་གཏན་འབེབས་བྱས་པ་དང་། དམིགས་བསལ་གྱི་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ (༥) ནང་རྒྱ་བལ་འབྲུག་གསུམ་ལས་གཞན་པའི་ཕྱི་རྒྱལ་ཡུལ་གྲུ་ཁག་ཏུ་གནས་སྡོད་བོད་མིས་ཆོལ་ཁ་ཆོས་བརྒྱུད་ཀྱི་སྤྱི་འཐུས་ཀྱི་འོས་གཞིར་ཞུགས་པ་དང་འོས་ཤོག་འཕེན་མི་ཆོག་ཅེས་གསལ་ཡོད་པར་སོང༌། གོང་གསལ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༧ དང་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ གཉིས་དབར་འགལ་བ་ཆགས་ཀྱི་མེད།
བཙན་བྱོལ་བོད་མིའི་བཅའ་ཁྲིམས་ལེའུ་ ༧ པ། དོན་ཚན་ ༧༡ པ་བཙན་བྱོལ་བོད་མིའི་གཞིས་སྒར་ཁག་ཏུ་གནས་སྡོད་བོད་མིའི་སྒྲིག་འཛུགས་གཤམ་གསལ་ཞེས་པའི་ནང་གསེས་ ༡ ནས་ ༦ བར་དུ་མ་ཚུད་པའི་བོད་མིའི་གནས་ཡུལ་གཞན་དག་ཚང་མ་དོན་ཚན་དེ་རང་གི་ནང་གསེས་ ༧ པར་གོ་དགོས་པ་དང་། ཕྱི་རྒྱལ་ཡུལ་གྲུ་ཁག་ཏུ་གནས་སྡོད་བོད་མི་རྣམས་ཀྱང་དེའི་ནང་དུ་ཚུད་ཀྱི་ཡོད་པ་བཙན་བྱོལ་བོད་མིའི་བཅའ་ཁྲིམས་ལེའུ་ ༧ པའི་ནང་གསེས་དོན་ཚན་ཆ་ཚང་དཀྱུས་གཅིག་ཏུ་བཀླགས་ན་ཤུགས་ཀྱིས་གོ་བ་ངེས་པ་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་འདི་བཙན་བྱོལ་ནང་འོས་བསྡུའི་ནང་ཆ་ཤས་ལེན་མཁན་ཚང་མར་ཁྱབ་ཀྱི་ཡོད།
གོང་གསལ་ཁྲིམས་སྒྲིག་གཞིར་བཟུང་། འོས་བསྡུའི་ཐོབ་ཁུངས་བརྗེ་བསྒྱུར་དང་འབྲེལ་བའི་ཐོག་ས་གནས་ནས་འོས་བསྡུའི་ལས་དོན་བྱེད་ཕྱོགས་འཐུས་ཤོར་སོང་འདུག་ཀྱང༌། གྱོད་ཡ་རྩོད་ལན་པ་དབུས་འོས་བསྡུ་ལས་ཁང་ནས་དོ་བདག་གྱོད་ཡ་ཞུ་སྦྱོར་བར་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་པ་དང་འོས་འཕེན་ཐད་ཀྱི་ཐག་གཅོད་བྱས་པ་དེ་ཁྲིམས་སྒྲིག་ལྟར་བྱུང་འདུག
གྱོད་ཡ་རྩོད་ལན་པ་དབུས་འོས་བསྡུ་ལས་ཁང་གི་ཐག་གཅོད་བྱས་པ་རྣམས་བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་བཅས་པར་འགལ་བའི་ཁུངས་སྐྱེལ་ར་སྤྲོད་གྱོད་ཡ་ཞུ་སྦྱོར་བས་བྱས་ཐུབ་མེད་པའི་ཐག་གཅོད་དུ།
ཁྲིམས་ཞིབ་ཁང་གི་ཐག་གཅོད་ངོས་འཛིན།
གནས་སྡོད་ཅེས་པའི་ཚིག་གི་གོ་བ་ལེན་ཕྱོགས་ནི། ཁྲིམས་སྒྲིག་ནང་གསལ་གྱི་བེད་སྤྱོད་བྱེད་སྟངས་ཀྱི་ཐོག་ནས་གོ་བ་ལེན་དགོས་པ་ལས། སྤྱིར་བཏང་གི་སྐད་ཆའི་ཚིག་དོན་ཁོ་ནར་བརྟེན་ནས་གོ་བ་ལེན་མི་རུང་བར། ཁྲིམས་དང་སྒྲིག་གཞི་དོན་ཚན་ཡོངས་རྫོགས་དང་། དེ་དག་གི་དབར་གྱི་འབྲེལ་བ། ཁྲིམས་ཀྱི་དམིགས་ཡུལ་བཅས་ལ་ཕྱོགས་ཡོངས་ནས་བལྟ་དགོས།
བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༧ (༡) [ག] [ང] [ཅ] དང་། དོན་ཚན་ ༧༡ དང་ ༧༡ (༦) དེ་བཞིན་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ (༣) (༤) (༥) བཅས་ཀྱི་ནང་། གནས་སྡོད་ཅེས་འཁོད་ཡོད་པ་དེ་དག་གི་གོ་བ་གཅིག་མཚུངས་ཡིན་པ་ལས། དོན་ཚན་སོ་སོ་དང་བྲལ་ནས་འགྲེལ་བརྗོད་བྱེད་ན་མི་འགྲིག
ས་གནས་དང་ས་གནས་རང་ཁོངས་མི་མང་ཞེས་པ་གཉིས་ཀྱང་གོ་དོན་ཕན་ཚུན་འབྲེལ་ནས་གོ་བ་ལེན་དགོས་པ་ལས། དེ་གཉིས་སོ་སོར་གོ་བ་བླངས་ན། ཁྲིམས་ཡིག་གི་དགོངས་པ་དོར་བའི་ཉེན་ཁ་ཡོད།
བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༢ པའི་ནང་ས་གནས་རང་ཁོངས་མི་མང་ཞེས་པའི་གོ་དོན་ནི། བཙན་བྱོལ་བོད་མིའི་བཅའ་ཁྲིམས་ལེའུ་ ༧ པའི་ནང་གསལ་གྱི་ས་གནས་དེར་གཏན་འཇགས་གནས་སྡོད་ཀྱི་མི་མང་ལ་གོ་དགོས།
བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༢ པའི་ནང་ས་གནས་ཞེས་པ་དེའི་ཁྱབ་ཚད་རྒྱ་བལ་འབྲུག་ གསུམ་གྱི་ས་གནས་ཁོ་ནར་ཚད་བཀག་བྱས་ཡོད་པའི་གསལ་ཁ་མེད་ནའང༌། ཕྱི་རྒྱལ་ཡུལ་གྲུ་ཁག་ཏུ་གཏན་འཇགས་གནས་སྡོད་བྱས་པའི་བོད་མི་ཡོངས་རྫོགས་རང་བཞིན་གྱིས་ས་གནས་རང་ཁོངས་མི་མང་གི་ཁྱབ་ཁོངས་ནང་ཚུད་ཀྱི་མེད་པར་གོ་བ་བླངས་པ་ནི། སྒྲིག་གཞིའི་ཚིག་དོན་ལས་བརྒལ་བའི་ཚད་བཀག་ཅིག་ཏུ་འགྱུར་ཉེན་ཡོད།
ས་གནས་ཀྱི་གོ་དོན་ནི། ས་གནས་དེ་རྒྱ་བལ་འབྲུག་གསུམ་གྱི་ནང་ཡོད་མེད་ཙམ་ལ་བལྟ་བ་ལས། གལ་ཆེ་བ་ནི། ས་གནས་དེ་བཙན་བྱོལ་བོད་མིའི་བཅའ་ཁྲིམས་དང་བཙན་བྱོལ་བོད་མིའི་འོས་བསྡུའི་སྒྲིག་གཞིའི་དགོངས་དོན་དང་མཐུན་པའི་ས་གནས་ཤིག་ཡིན་མིན་དང་། དེར་གང་ཟག་དེས་གཏན་འཇགས་གནས་སྡོད་བྱས་ཡོད་མེད། དེ་བཞིན་ས་གནས་དེ་དང་གང་ཟག་དེའི་དབར་ལ་བཙན་བྱོལ་བོད་མིའི་འོས་བསྡུའི་སྒྲིག་གཞིའི་ནང་གསལ་གནས་སྡོད་ཅེས་པའི་དོན་དང་ངོས་འཛིན་རུང་བའི་ཁྲིམས་མཐུན་འབྲེལ་བ་ཡོད་མེད་དེ་ཡིན།
བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༢ པའི་ནང་ས་གནས་གཞན་ནས་གནས་སྤོས་བྱས་པའི་གང་ཟག་ཅིག་ས་གནས་གསར་པའི་རང་ཁོངས་མི་མང་དུ་གཏོགས་པར་ཆ་རྐྱེན་ཁ་གསལ་བཀོད་ཡོད་པ་སྟེ། ས་གནས་སུ་ལོ་ཧྲིལ་པོ་ ༥ ཡན་བསྡད་ཟིན་པ་དང་། གཞིས་ཁོངས་སྔ་མའི་ཐོབ་སྐལ་བློས་བཏང་ཟིན་པ། གཉེན་སྒྲིག་བག་ལེན་གྱི་ལམ་ནས་ལུགས་མཐུན་གནས་སྤོས་བྱས་པ་བཅས་ཡིན་ཞེས་པ་དེའི་ཁྲིམས་དོན་གྱི་གོ་བ་ནི། ས་གནས་རང་ཁོངས་མི་མང་ཞེས་པ་དེ་ས་ཆ་གང་ཞིག་ཏུ་གནས་སྐབས་ཙམ་བསྡད་པའི་གང་ཟག་ཅིག་ལ་གོ་བ་མ་ཡིན་པར། ས་གནས་དེ་དང་གང་ཟག་དེའི་དབར་ཁྲིམས་ཀྱིས་ངོས་འཛིན་རུང་བའི་གཏན་འཇགས་ཀྱི་གནས་སྡོད་ལ་འབྲེལ་བ་ཆགས་ཡོད། གནས་སྡོད་ཀྱི་གོ་དོན་དེ་གནས་སྐབས་ས་གནས་ཤིག་ཏུ་བསྡད་པ་ཙམ་གྱིས་གཏན་འཇགས་ཀྱི་གནས་སྡོད་དང་གཅིག་མཚུངས་སུ་བརྩི་མི་རུང་། གནས་སྐབས་ཀྱི་བསྡད་པ་དང༌། བཙན་བྱོལ་བོད་མིའི་ཁྲིམས་སྒྲིག་དགོངས་དོན་གྱི་གནས་སྡོད་གཉིས་དབར་ཁྲིམས་དོན་གྱི་ནུས་པའི་ཆ་ནས་ཁྱད་པར་ཆེན་པོ་ཡོད།
ས་གནས་རང་ཁོངས་མི་མང་དང་གནས་སྡོད་དབར་གྱི་འབྲེལ་བ་ཡང་སྣང་མེད་དུ་གཏོང་མི་རུང༌། བཙན་བྱོལ་བོད་མིའི་འོས་བསྡུའི་སྒྲིག་གཞི་ནང་ས་གནས་དང་དེའི་རང་ཁོངས་མི་མང་ལ་ཁྲིམས་མཐུན་གྱི་གལ་གནད་དམ་ཐོབ་ཐང་གསལ་པོར་བཀོད་ཡོད། གནས་སྡོད་ཀྱི་གོ་དོན་ཡང་དེ་དང་བྲལ་ནས་རང་འཚམས་ཀྱིས་གོ་བ་ལེན་མི་རུང་། བཙན་བྱོལ་བོད་མིའི་ཁྲིམས་སྒྲིག་དགོངས་དོན་གྱི་གནས་སྡོད་ཀྱི་གོ་དོན། ཁྲིམས་མཐུན་གྱི་ངོ་བོ་དང་ཆ་རྐྱེན་གང་ཡོད་པ་དེ་དག་ལ་བརྟེན་ནས་གོ་བ་ལེན་དགོས། གནས་སྡོད་ཅེས་པའི་ཁྲིམས་དོན་གྱི་གནས་བབ་ནི། གྱོད་ཡ་ཞུ་སྦྱོར་བ་དང་སྦེལ་ཀོབ་ས་གནས་དབར་ལ་བཙན་བྱོལ་བོད་མིའི་འོས་བསྡུའི་སྒྲིག་གཞི་ནང་གལ་གནད་ཅན་དུ་བརྩི་པའི་ཁྲིམས་མཐུན་གྱི་འབྲེལ་བ་ཡོད་མེད་དང་། དེ་འདྲའི་འབྲེལ་བ་ཞིག་སྒྲིག་གཞིའི་ནང་གསལ་པོའམ་ཤུགས་སུ་བསྟན་ཡོད་མེད་ ལ་གཞིགས་ཏེ་དཔྱད་དགོས་པ་ཡིན།
གྱོད་ཡ་ཞུ་སྦྱོར་བ་སྦེལ་ཀོབ་ས་གནས་སུ་གནས་སྐབས་བསྡད་པ་ཙམ་གྱིས། སྦེལ་ཀོབ་ས་གནས་ཀྱི་ཁྲིམས་མཐུན་གནས་སྡོད་བོད་མི་ཞིག་ཡིན་པར་ཐག་ཆོད་མི་ཐུབ། གནས་སྐབས་ཀྱི་གནས་སྡོད་དང༌། བཙན་བྱོལ་བོད་མིའི་ཁྲིམས་སྒྲིག་དགོངས་དོན་གྱི་གནས་སྡོད་གཉིས་དབར་ཁྲིམས་དོན་གྱི་ངོ་བོ་དང་ནུས་པའི་ཆ་ནས་ཁྱད་པར་གསལ་པོ་དབྱེ་དགོས།
དོན་དངོས་ཀྱི་གནས་ཚུལ་ཐོག་ཁྲིམས་དོན་སྦྱོར་བའི་སྐབས། གནས་ཚུལ་རེ་རེ་བཞིན་དུ་ཁྲིམས་ཡིག་ནང་གཏན་འབེབས་བྱས་པའི་ཆ་རྐྱེན་དང་བྱ་རིམ་ཁག་དང་བསྟུན་ནས་བྱས་ཡོད་མེད་ལ་བལྟོས་ནས། དེ་དག་ཚུལ་བཞིན་བསྒྲུབས་མེད་པ་གཏན་འཁེལ་བྱུང་བས། གྱོད་ཡ་ཞུ་སྦྱོར་བས་སྦེལ་ཀོབ་ས་གནས་སུ་བཙན་བྱོལ་བོད་མིའི་ཁྲིམས་སྒྲིག་དགོངས་དོན་གྱི་གནས་སྡོད་ཡིན་པ་ཁུངས་སྐྱེལ་ར་སྤྲོད་བྱས་ཐུབ་མ་སོང༌།
གོང་གསལ་ཁྲིམས་སྒྲིག་གི་དགོངས་དོན་དང༌། ས་གནས་རང་ཁོངས་མི་མང་གི་གོ་དོན། དེ་བཞིན་དོ་བདག་གི་དོན་དངོས་གནས་ཚུལ་བཅས་ཕན་ཚུན་སྦྱར་ཏེ་བལྟས་ན། གནས་སྡོད་ཅེས་པའི་ཐ་སྙད་དེ། ས་གནས་གང་ཞིག་ཏུ་དངོས་སུ་བསྡད་པའི་དུས་ཡུན་ཙམ་ལ་གོ་བ་བླངས་པའི་ཐ་སྙད་ཅིག་མིན།
གྱོད་ཡ་ཞུ་སྦྱོར་བ་སྦེལ་ཀོབ་ས་གནས་དེར་བསྡད་པའི་དུས་ཡུན་ཙམ་གྱིས། བཙན་བྱོལ་བོད་མིའི་ཁྲིམས་སྒྲིག་དགོངས་དོན་གྱི་གནས་སྡོད་ཀྱི་གནས་བབ་བསྒྲུབ་ཐུབ་མ་སོང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༢ པའི་ནང་གསེས་དོན་ཚན་ཁག་གི་དགོངས་པ་དང་མཐུན་པའི་ཆ་རྐྱེན་ཁག་ཚང་གི་མེད་པ་དང་། ཁྲིམས་ཡིག་ནང་གཏན་འབེབས་བྱས་པའི་བྱ་རིམ་ཁག་ཚུལ་བཞིན་བསྒྲུབས་མེད་པ་ངེས་བརྟན་བྱུང་བར། གྱོད་ཡ་ཞུ་སྦྱོར་བས་སྦེལ་ཀོབ་ས་གནས་ཀྱི་རང་ཁོངས་མི་མང་གི་ཁོངས་སུ་རང་ཉིད་ཚུད་ཀྱི་ཡོད་པའི་བཙན་བྱོལ་བོད་མིའི་ཁྲིམས་སྒྲིག་དགོངས་དོན་གྱི་ཁྲིམས་མཐུན་གནས་བབ་ཡོད་པ་ཁུངས་སྐྱེལ་ར་སྤྲོད་བྱས་མ་ཐུབ་པར་བརྟེན།
གོང་གསལ་གྱོད་ཡ་ཕྱོགས་གཉིས་ཀྱི་ཞུ་སྙན་དང་དཔང་རྟགས། ཁྲིམས་སྒྲིག་གི་འཇུག་ཚུལ་དང༌། དེ་དག་གི་རྒྱུ་མཚན་ལ་བརྟེན་ནས་གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ད་ལྟའི་བཙན་བྱོལ་བོད་མིའི་ཁྲིམས་སྒྲིག་དགོངས་དོན་རྒྱ་བལ་འབྲུག་གསུམ་ནས་ཆོལ་ཁ་ཆོས་བརྒྱུད་ཀྱི་སྤྱི་འཐུས་ཀྱི་འོས་གཞིར་ཞུགས་པ་དང་འོས་ཤོག་འཕེན་ཆོག་གི་མི་འདུག་པའི་བཅད་ཁྲར།
གསར་འགོད་པ། སྐལ་བཟང་སྦྱིན་པ།
