མཚོ་སྔོན་ཞིང་ཆེན་རིག་དངོས་སྡེ་ཚན་གྱིས་གསར་དུ་རྙེད་པའི་བྲག་བརྐོས་རི་མོ་དེའི་སྟེང་སྐབས་དེའི་མཐོ་སྒང་གི་སྲོག་ཆགས་དང་མིའི་རིགས་ཀྱི་འཚོ་བའི་རྗེས་ཤུལ་མངོན་འདུག་ཟེར།
ཕྱི་ཚེས་ ༥ ཉིན་གསར་ལམ་དུ་གནས་ཚུལ་སྤེལ་བ་ལྟར་ན། མཚོ་སྔོན་ཞིང་ཆེན་རིག་དངོས་སྡེ་ཚན་གྱིས་ཉེ་ཆར་མཚོ་སྔོན་ཞིང་ཆེན་མཚོ་ནུབ་སོག་བོད་རིགས་རང་སྐྱོང་ཁུལ་གྱི་ཚྭ་འདམ་གཤོངས་ས་ནས་གཞི་ཁྱོན་ཆེ་བའི་བྲག་བརྐོས་རི་མོ་ཞིག་གསར་དུ་རྙེད་ཡོད་པ་དང་། བྲག་བརྐོས་རི་མོ་དེ་དག་ལས་ས་མཐོའི་སྲོག་ཆགས་འཚོ་སྡོད་བྱས་པའི་གནས་ཚུལ་དང་སྐབས་དེ་དུས་ཀྱི་མིའི་རིགས་ཀྱི་འཚོ་བའི་རྗེས་ཤུལ་སླར་ཡང་མངོན་པར་བཀོད་ཡོད་ཚུལ་བརྗོད་ཡོད་པ་རེད། བྲག་བརྐོས་རི་མོ་དེ་ལོ་རབས་ག་དུས་ནང་བྱུང་བ་ཡིན་མིན་ད་དུང་ར་འཕྲོད་བྱུང་ཐུབ་མེད་ཀྱང་། བྲག་བརྐོས་རི་མོ་དེ་མཚོ་སྔོན་ཞིང་ཆེན་མཚོ་ནུབ་སོག་བོད་རིགས་རང་སྐྱོང་ཁུལ་གྱིས་རིག་དངོས་ཡོངས་ཞིབ་བཤེར་ཐེངས་གསུམ་པ་བྱེད་པའི་སྐབས་སུ་མཚོ་ནུབ་སོག་བོད་རིགས་རང་སྐྱོང་ཁུལ་གྱི་ཀྲོའུ་ཏ་ཁྲའེ་ཏན་གྲོང་རྡལ་གྱི་ཁྲའེ་ཏན་གྲོང་ཚོའི་ཧུང་ཐུའུ་གྲོག་རོང་ཞིག་ཏུ་ཤེས་རྟོགས་བྱུང་ཡོད་འདུག་ལ། རིག་དངོས་རིགས་གཅིག་མཁས་ཅན་གྱིས་བརྟག་དཔྱད་བྱས་པ་བརྒྱུད་དེའི་སྟེང་དུ་རི་མོ་ ༢༨ ཡོད་པ་དང་། དེ་དག་གི་ཁྲོད་ཤྭ་བ་དང་འབྲི་གཡག རྔ་མོང་། ལུག ཁྱི་སོགས་སྲོག་ཆགས་ཀྱི་གཟུགས་བརྙན་ཡོད་པ་དང་། བྲག་བརྐོས་རི་མོའི་རྒྱ་ཁྱོན་ཆེ་ཤོས་ལ་སེན་ཊི་མི་ཊར་ ༤༠ × ༢༥ ཡིན་པ་རེད།
བོད་ཀྱི་ས་ཁུལ་གང་ཞིག་ནས་ལོ་རྒྱུས་ལྡན་པའི་གནའ་བོའི་རི་མོ་དང་ཡི་གེ་སོགས་གསར་རྙེད་བྱུང་ན་དེ་ལ་དགའ་བསུ་མ་གཏོགས་མི་དགའ་དོན་ཅི་ཡོད། དཔེར་ན་ཏུན་ཧོང་གི་ཡི་གེ་བཞིན་རེད། བོད་མི་རིགས་ས་གནས་དེ་གཉུག་མར་གནས་པའི་མཚོན་རྟགས་སུ་འགྲོ་ངེས།
འདྲེ་ངན་དེ་ཚོས་བཙལ་བཙལ་ནས་ཡང་དེའི་ཉེ་འཁོར་ནས་གཏེར་ཁ་གསར་བ་ཞིག་རྙེད་མི་ཡོང་བར་སྨོན།