ངོས་ནས་རང་བཙན་རྩོད་ཀྱིན་མེད།

༧གོང་ས་མཆོག་གིས་ཉི་ཧོང་གི་གསར་འགོད་པ་ཚོར་ངོས་ནས་བོད་རང་བཙན་རྩོད་ཀྱིན་མེད་ཅེས་སླར་ཡང་གསུངས་ཡོད་འདུག

ཟླ་འདིའི་ཚེས་ ༣ ཉིན་༧གོང་ས་མཆོག་ཉི་ཧོང་གི་གྲོང་ཁྱེར་མཱ་སུ་ཡ་མའི་ནང་ཆིབས་བསྒྱུར་གནང་སྟེ། གསར་འགོད་ལྷན་ཚོགས་ཤིག་བསྐྱངས་ཡོད་པ་དང་། སྐབས་དེར་༧གོང་ས་མཆོག་གིས་ཉི་ཧོང་གི་གསར་འགོད་པ་ཚོར་ངོས་ནས་བོད་རང་བཙན་རྩོད་ཀྱིན་མེད་པར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་འཁོད་པའི་མིང་དོན་མཚུངས་པའི་རང་སྲིད་རང་སྐྱོང་ཞིག་ཡོང་ཐབས་བྱེད་ཀྱིན་ཡོད། འདས་པའི་མི་ལོ་གཅིག་གི་ནང་རྒྱ་རིགས་མཁས་དབང་ཁག་ཅིག་གིས་རྒྱ་ནག་གཞུང་གིས་བོད་ལ་འཛིན་པའི་སྲིད་བྱུས་ལ་སྐྱོན་བརྗོད་བྱས་པའི་རྩོམ་ཡིག་མང་པོ་ཐོན་ཡོད་པ་དེ་དག་ང་ཚོར་བློ་སྟོབས་སྐྱེས་དགོས་པའི་མངོན་རྟགས་ཤིག་ཏུ་གྱུར་ཡོད། ཅེས་བཀའ་ལན་གནང་ཡོད་པ་དང་། ཕྱི་ཚེས་ ༣ ཉིན་གྱི་ཕྱི་དྲོ་༸གོང་ས་མཆོག་གིས་དེར་ཡོད་དད་ལྡན་པ་ ༥༠༠༠ ལྷག་ལ་མི་ཚེ་བདེ་སྐྱིད་ལྡན་པ་ཡོང་བའི་ཐབས་ལམ་ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་གནང་ཡོད། སྐབས་དེར་༧གོང་ས་མཆོག་གིས། རང་ལ་བྱམས་བརྩེའི་བསམ་བློ་ཡོད་པ་ཡིན་ན་རང་གི་བསམ་བློ་སྟོབས་ཆེན་པོ་དང་བརྟན་པོ་ཞིག་ཡོང་ཐུབ། དཔེར་ན། རང་གི་ལུས་པོའི་ནང་དུ་ནད་གཞི་སྔོན་འགོག་བྱེད་མཁན་གྱི་ཟུངས་ཤུགས་ཡོད་ན་ལུས་ཀྱི་ན་ཚར་གདོང་ལེན་བྱེད་ཐུབ་ཀྱིན་ཡོད་པ་ལྟར། རང་ཉིད་ལ་བསམ་བློ་བརྟན་པོ་ཞིག་ཡོད་པ་ཡིན་ན། སྤོབས་པ་ཆེན་པོའི་ཐོག་ཉེན་ཁ་དང་དཀའ་ངལ་གང་མང་ལ་ཁ་གཏད་གཅོག་ཐུབ་གི་རེད། ཅེས་གསུངས་ཡོད་པ་རེད།