བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས།

མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས། བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་སྡེ་ཚན་བཅས་ཀྱིས་བོད་ནང་གི་འགྲོ་བ་མིའི་ཐོབ་ཐང་སྐོར་ལ་སྙན་ཐོ་ཞིག་བཏོན་ཡོད་པ་རེད།

ཕྱི་ཚེས་ ༤ ཉིན་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱིས་སྙན་ཐོ་དེ་བསྒྲགས་ཡོད་ལ། སྙན་ཐོའི་སྒང་དུ་རྒྱ་ནག་གི་མི་རིགས་སྲིད་བྱུས་ལ་བསྐྱར་ཞིབ་མདོར་བསྡུས་ཤིག་དང་བཅས་ཐོག་མར་བོད་ནང་གི་ཆབ་སྲིད་ཀྱི་བཙན་གནོན་སྐོར་ལ་བཤད་དོན། རྒྱ་ནག་གཞུང་གི་བཤད་ཚུལ་ལྟར་ན་ ༢༠༠༦ ལོའི་ལོ་མཇུག་ལ་རྒྱ་ནག་རྒྱལ་ཡོངས་སུ་གྲངས་ཉུང་མི་རིགས་ཀྱི་ལས་བྱེད་ས་ཡ་ ༢་༩༩༤ ཡོད་པ་དང་། དེ་ནི་ ༡༩༧༨ ལོ་དང་བསྡུར་ན་ལྡབ་ ༣་༨ ཀྱིས་འཕར་ཡོད་ཟེར། རྒྱ་ནག་འོག་གི་རང་སྐྱོང་ལྗོངས་ལྔའི་སྲིད་སྐྱོང་བ་རིམ་པའི་ལས་བྱེད་ཕལ་ཆེ་བ་ནི་གྲངས་ཉུང་མི་རིགས་ཡིན། ཡིན་ཡང་གྲངས་ཉུང་མི་རིགས་ཀྱི་ལས་བྱེད་འདི་དག་ནི་དོན་དངོས་ཐོག་སྲིད་བྱུས་ཐག་གཅོད་བྱེད་མཁན་གྱི་རིམ་པར་བཞག་མེད། བོད་ཁུལ་དུ་གཞུང་གི་ལས་བྱེད་བརྒྱ་ཆ་ ༥༠ ནི་བོད་རིགས་ཡིན། ཁོང་ཚོར་ཆབ་སྲིད་ཐག་གཅོད་ཀྱི་གོ་ས་སྤྲད་པ་དེ་དག་ཀྱང་མིང་ཙམ་དུ་ལྷག་ཡོད། རང་སྐྱོང་ལྗོངས་འདི་དག་གི་ལས་དོན་ཐག་གཅོད་ཀྱི་དབང་ཚད་ཡོད་མཁན་ངོ་མ་དེ་དམར་ཤོག་ཚོགས་པའི་དྲུང་ཆེ་ཡིན། ད་ལྟའི་ཆར་ལྗོངས་ལྔ་དེ་དག་གི་ནང་དུ་གོ་ས་འདི་གྲངས་ཉུང་མི་རིགས་ཤིག་གིས་བཟུང་བ་ཞིག་མེད། ༡༩༦༥ ལོར་བོད་རང་སྐྱོང་ལྗོངས་བཙུགས་པ་ནས་ད་བར་དུ་གོ་ས་འདི་བོད་པ་ཞིག་གིས་བཟུང་མྱོང་མེད་ཅེས་བཀོད་འདུག

དཔལ་འབྱོར་འཛུགས་སྐྲུན་གྱི་ཕྱོགས་ནས་བཤད་ན། རྒྱ་ནག་གཞུང་གིས་ ༡༠༨༠ གྱ་གྲངས་ནང་དུ་བོད་ཀྱི་དཔལ་འབྱོར་འཛུགས་སྐྲུན་ཐད་ལམ་ལུགས་གཉིས་བཏོད་ཡོད་ལ། དང་པོ་ནི་བོད་ནང་གི་དཔལ་འབྱོར་འཛུགས་སྐྲུན་ཁྲོད་བོད་མི་རྣམས་ཀྱིས་མཉམ་ཞུགས་དང་སྣེ་ཁྲིད་བྱེད་རྒྱུ་དེ་ཡིན་ལ། རིམ་པ་གཉིས་པ་ནི་ཉམས་མྱོང་དང་ལག་རྩལ་ཡོད་མཁན་གྱི་རྒྱ་རིགས་ཚོས་མགོ་ཁྲིད་པའི་རོགས་རམ་འོག་ནས་བོད་ནང་གི་དཔལ་འབྱོར་འཛུགས་སྐྲུན་བྱེད་རྒྱུ་དེ་ཡིན་ལ། བརྒྱད་ཅུ་གྱ་གྲངས་ཀྱི་དཀྱིལ་ནས་བཟུང་རྒྱ་ནག་གིས་རིམ་པ་གཉིས་པ་འདི་ལག་བསྟར་བྱས་ཡོད། ༡༩༩༤ ལོའི་བོད་ཀྱི་ལས་དོན་ཚོགས་འདུ་ཐེངས་གསུམ་པའི་སྟེང་དུ། དཔལ་འབྱོར་འཛུགས་སྐྲུན་བརྒྱུད་བརྟན་ལྷིང་དང་བདེ་འཇགས་ལ་སྟངས་འཛིན་བྱེད་རྒྱུའི་སྲིད་བྱུས་དེ་བཟུང་བ་དང་། ༢༠༠༡ ལོའི་བོད་ཀྱི་ལས་དོན་ཚོགས་འདུ་ཐེངས་བཞི་བའི་སྐབས་ནས་བཟུང་དཔལ་འབྱོར་ཅན་དུ་བསྒྱུར་བའི་ཁྲོད་ནས་མི་རིགས་ཀྱི་འདུ་ཤེས་རྩ་མེད་བཟོ་བའི་སྲིད་བྱུས་བཟུང་ཡོད། ཅེས་དང་།
རྒྱ་ནག་གཞུང་གི་འཛུགས་སྐྲུན་འཐབ་བྱུས་འདི་ལ་ཐོབ་ཐང་གཞིར་བཟུང་དང་དགོས་མཁོ་གཞིར་བཟུང་གི་ཁ་ཕྱོགས་མེད། བོད་ནང་རང་སྐྱོང་དངོས་མེད་པར་བརྟེན་བོད་མི་རྣམས་འཛུགས་སྐྲུན་གྱི་གོ་རིམ་ཁྲོད་དབང་ཆ་མེད་པ་དང་དབང་ཆ་ཐག་གཅོད་ཀྱི་བྱེད་མཁན་གྱི་དབང་འཛིན་མི་སྣ་ཆགས་མེད་པས་ཡིན་ལ། དགོས་མཁོ་གཞིར་བཟུང་གི་སྲིད་བྱུས་མེད་པ་ནི། རྒྱ་ནག་གཞུང་གིས་གཞུང་ལམ་དང་ལྕགས་ལམ་སོགས་འཛུགས་སྐྲུན་གྱི་རྣམ་གྲངས་གཙོ་བོར་བཟུང་སྟེ་བོད་མི་ཚོའི་གཞི་རྩའི་དགོས་མཁོར་བསྟུན་མེད་པས་ཡིན། གོང་གི་འཛུགས་སྐྲུན་འདི་དག་ནི་ཚོང་པ་དང་ཞབས་ཞུ་པ། གཞུང་གི་ལས་བྱེད་པ་བཅས་ལ་དམིགས་ཤིང་དེ་དག་ཁྲོད་བོད་མི་ཉུང་ཙམ་ལས་མེད། བོད་རིགས་བརྒྱ་ཆ་ ༨༠ ལྷག་ནི་ཞིང་འབྲོག་གི་འཚོ་བར་བསྟེན་ཡོད་སྟབས་བོད་མིའི་དགོས་མཁོར་འཚམ་པའི་དཔལ་འབྱོར་འཛུགས་སྐྲུན་བྱས་མེད། དེ་བཞིན་དཔལ་འབྱོར་དེ་སྲིད་དོན་གྱི་ལག་ཆར་སྤྱད་པ་དང་། གྲོང་ཁྱེར་འཛུགས་སྐྲུན་ལ་ཕྱོགས་པ། བོད་མི་རྣམས་མཐར་འདེད་བྱས་པ་སོགས་བཀོད་ཡོད།

སློབ་གསོའི་ཐད་ནས། རྒྱ་ནག་གིས་བོད་ལ་འཛིན་པའི་སློབ་གསོའི་སྲིད་བྱུས་ནི་ཆབ་སྲིད་བསམ་བློའི་སློབ་གསོ་ཡིན། བོད་མི་རྣམས་ཏང་དང་མེས་རྒྱལ་ལ་དགའ་དགོས་པ་དེ་རེད། ༢༠༠༩ ལོར་རྒྱ་ནག་གིས་རྒྱལ་གཅེས་ཀྱི་སློབ་གསོའི་ལས་འགུལ་བསྐྱར་དུ་སྤེལ་བ་དང་། སློབ་གསོའི་ལམ་ལུགས་དང་ཡིག་རྒྱུགས་སོགས་ཀྱི་ནང་དུ་གྲངས་ཉུང་མི་རིགས་མཐུན་སྒྲིལ་གྱི་རིགས་བཅུག་སྟེ་ཆབ་སྲིད་བསམ་བློའི་སློབ་གསོ་སྔར་ལས་ཇེ་དམ་དུ་ཕྱིན་ཡོད། རྒྱ་ནག་གི་སློབ་གསོའི་སྲིད་བྱུས་ནང་དུ་གྲངས་ཉུང་མི་རིགས་དག་གི་ལོ་རྒྱུས་དང་། གོམས་སྲོལ། སྐད་ཡིག སློབ་གསོ་སོགས་ལ་བརྩི་བཀུར་མེད་ལ་སློབ་ཁྲིད་ཀྱང་བྱེད་ཀྱིན་མེད་པར་ནག་གསུབ་གཏོང་བའི་དམིགས་ཡུལ་དེ་བཟུང་ཡོད། འདི་དག་ལ་བརྟེན་གྲངས་ཉུང་མི་རིགས་ཀྱི་བྱིས་པ་ཚོས་རང་ཉིད་ཀྱི་རིགས་རྒྱུད་ནི་དམའ་རིམ་ཞིག་ཡིན་པའི་ཚོར་སྣང་ཡོང་གི་ཡོད། བོད་ཀྱི་སྐད་ཡིག་གི་ཕྱོགས་ནས་བཤད་ན། སྐད་ཡིག་གི་དཀའ་རྙོག་ཐག་མ་བཅད་བར་དུ་སློབ་གྲྭའི་ནང་གི་སློབ་གསོ་ཡར་རྒྱས་ནི་ཡོང་ཐབས་མེད་པ་ཞིག་ཆགས་ཡོད། མཁས་དབང་དཔལ་ལྡན་ཉི་མས་བོད་ནང་གི་རྒྱ་སྐད་དང་འབྲེལ་བའི་དཀའ་རྙོག་ཐད་བཤད་དོན། བོད་ནང་ལ་རྒྱ་ནག་གི་དཔལ་འབྱོར་གྱི་ཤུགས་རྐྱེན་བསླེབས་པ་ནས་བཟུང་བོད་ཀྱི་སྐད་ཡིག་གི་གནས་སྟངས་སྔར་ལས་ཇེ་ཞན་དུ་གྱུར་ཡོད་ཟེར། རྒྱ་ནག་གཞུང་གིས་རྩ་ཁྲིམས་ནང་གྲངས་ཉུང་མི་རིགས་ཀྱི་སྐད་ཡིག་གི་ཐོབ་ཐང་ནི་ཁྲིམས་མཐུན་ཡིན་པར་བཀོད་ཡོད་ཀྱང་། བོད་ནང་དུ་རྒྱ་སྐད་ནི་འཛིན་སྐྱོང་དང་ཚོང་ལས་ཀྱི་སྐད་ཡིག་ལ་སྤྱོད་ཀྱིན་ཡོད། ༡༩༩༧ ལོ་ནས་བཟུང་བོད་ནང་གི་སློབ་གྲྭ་ཕལ་ཆེ་བའི་ནང་དུ་རྒྱ་སྐད་ནི་སྐད་བརྡའི་བརྒྱུད་ལམ་དུ་གྱུར་ཡོད་ཟེར།

བོད་ཀྱི་ནང་ཆོས་ཕྱོགས་ནས་བཤད་ན། ༢༠༠༨ ལོའི་ཞི་རྒོལ་གྱི་རྗེས་ནས་བཟུང་། རྒྱལ་གཅེས་སློབ་གསོའི་ལས་འགུལ་དེ་སྔར་ལས་ཤུགས་ཆེ་རུ་བཏང་སྟེ་དགོན་པ་ཁག་དང་གཞི་རིམ་མང་ཚོགས་ནང་སྤེལ་ཡོད། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་གཞོན་པ་ཧའོ་ཕིན་གྱིས་བཤད་དོན། གྲྭ་དམངས་རྣམས་རྒྱལ་གཅེས་ཅན་དུ་བསྒྱུར་རྒྱུའི་ལམ་སྟོན་སློབ་གསོ་ནི་རྒྱལ་གཅེས་ཀྱི་སློབ་གསོ་དེ་ཡིན་པར་ཟེར། འདི་ནི་པེ་ཅིན་གྱིས་ནང་ཆོས་འདི་དམར་ཤོག་ཚོགས་པའི་སྒྲོམ་གཞིའི་ནང་འཇུག་ཐབས་དེ་ཡིན་ལ། གནས་སྟངས་འདིའི་འོག་ནས་ནང་ཆོས་ལ་སློབ་གཉེར་འཐུས་ཚང་ཞིག་ཡོང་མི་ཐུབ་པ་ནི་གསལ་བོ་རེད། གཞུང་གི་བཀའ་མ་རྩིས་པར་བསྙད་དེ་གྲྭ་པ་དང་བཙུན་མ་སྟོང་ཕྲག་མང་པོ་འཛིན་བཟུང་དང་དགོན་པ་ནས་ཕྱིར་འབུད། བཀག་ཉར་སོགས་བྱས་ཡོད། ད་དུང་ཏཱ་ལའི་བླ་མར་དགག་རྒྱག་གི་ལས་འགུལ་སོགས་ཀྱང་ཡོད་ཟེར།

མི་རིགས་ཁྱད་གསོད་ཀྱི་ཐད་ནས། ༢༠༠༨ ལོའི་ཞི་རྒོལ་སྐབས་རྒྱ་གཞུང་གིས་འཁྱོག་བརྗོད་ཀྱི་དྲིལ་བསྒྲགས་ཤུགས་ཆེར་བྱས་པ་དེས་གྲངས་ཉུང་མི་རིགས་ལ་ཁྱད་གསོད་དང་རྔམ་དྲག་བསླངས་ཡོད། བོད་མི་རྣམས་ནི་སོ་སོ་བོད་པ་ཞིག་ཡིན་པའི་རྐྱེན་གྱིས་མགྲོན་ཁང་ནས་ཕྱིར་འབུད་བྱས་པའི་གནས་ཚུལ་ཡང་བྱུང་ཡོད། ལྷ་ས་ནས་མདོ་སྨད་དང་མདོ་སྟོད་ཀྱི་མི་གནས་སྡོད་ཆོག་མཆན་གྱི་ལག་འཁྱེར་མེད་མཁན་རྣམས་འཛིན་པ་དང་ཕྱིར་འབུད་སོགས་བྱས་ཡོད། དེ་བཞིན་བོད་མི་རྣམས་ནི་གྲངས་ཉུང་ཡིན་པར་བརྟེན་མཐའ་འཁོབ་པ་དང་རྗེས་ལུས་པ་ཡིན་པར་ངོས་འཛིན་བྱས་ཏེ། བོད་ཀྱི་རིག་གཞུང་ངོ་མ་དང་གོམས་སྲོལ་སོགས་ལ་སྲུང་སྐྱོབ་དང་གོང་སྤེལ་བྱེད་ཀྱིན་མེད་ཅེས་སོགས་བཀོད་ཡོད་པ་རེད།