སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} སུམ་བཅུ།

ནོར་བུ་བཟང་མོས་ཀྱང་། ཡུན་རིང་གི་སྐོམ་གདུང་ཞིག་ཟེར་ན་འདྲ། རང་ཉིད་ཆེས་དགའ་སའི་མི་དེའི་བརྩེ་བ་ཟེར་ན་རེད། ད་ནི་རང་ཉིད་ལ་ཐོབ་སོང་སྙམ་ཞོར་དུ། བློ་བཟང་ལ་འཐམ་ནས་ཁ་བསྐྱེལ་ཞོར་དུ། ཁྱེད་རང་གིས་དངོས་ནས་འགོར་འགྱངས་བྱེད་རྒྱུ་མང་སོང་ཞེས་བཤད།

བློ་བཟང་གི་རླངས་འཁོར་ནི་ཕྱི་དྲོ་དུས་ཚོད་དྲུག་དང་ཕྱེད་ཀའི་སྟེང་དུ་ཡིན། ཉིན་དེ་ནི་སྤྱི་ལོ་ཉིས་སྟོང་གཉིས། སྤྱི་ཟླ་བཅུ་གཅིག་ཚེས་ཉི་ཤུའི་ཕྱི་དྲོ། ཆུ་ཚོད་བཞི་དང་སྐར་མ་ཞེ་ལྔ་ཡིན། བློ་བཟང་གི་ཆེས་ཐོག་མའི་བུད་མེད་གཅིག་ལ་ལུས་འབྲེལ་སྐར་མ་ཁ་ཤས་ཤིག་རིང་གི་སྐྲག་སྣང་དང་དྲག་དུ་ལྡིང་བཞིན་པའི་སྙིང་ཆུང་གི་འཕར་སྒྲ་དང་བསྟུན་ནས་ཚོར་བ་དེ་ནི་གང་ཡིན་འདི་ཡིན་མེད་པ་ཞིག་གི་ཁྲོད་ནས། ཡུན་རིང་གཉར་བའི་དམ་ཚིག་དུ་འབོད་པའི་མོ་སྡོམ་དེ་ནས་བཏང་།

ཁ་བསྐྱེལ་ཞོར་དུ་ཉལ་ཁྲིའི་སྒང་ནས་ཉལ་ཐུལ་ལ་ལག་གཉོབ་བྱེད་ཀྱིན། རང་རང་གི་གོན་པ་ཡོངས་རྫོགས་འཕུད་དེ་ཉལ་ཐུལ་ནང་དུ་འཛུལ། བློ་བཟང་ནི་རྒྱ་སྟག་རི་ལས་ཤོར་བ། ཁྱི་ལྟོགས་པ་ལྟོ་དང་འཕྲད་པ། སྙིང་ཆུང་གི་འཕར་ལྡིང་དང་འགྲོག་ནས་སྐར་མ་ལྔ་དྲུག་རིང་གི་འབྲེལ་བ་དེ་ནི་འདི་རེད་ཟེར་ནས་ཚོར་བ་ཁྱད་དུ་འཕགས་པ་ཞིག་མྱོང་ཁོམ་སོགས་གང་ཡང་མ་བྱུང་བར་ཁུ་བ་ཤོར།

ནོར་བུ་བཟང་མོས། ཁྱེད་ཀྱིས་ད་ལྟའི་བར་དུ་ངའི་སྟེང་ལ་རང་ཚུགས་བཟུང་བ་རེད། གཞི་ནས་མགོ་འཛུགས་ཀྱང་། འདི་འདྲའི་དུས་ཚོད་ཅིག་གི་སྐབས་སུ་བྱུང་བ་ནི། དངོས་ནས་སེམས་པ་སྐྱོ་བ་ཞིག་རེད། ཆུ་ཚོད་གཅིག་གི་རྗེས་སུ་ང་དང་བྲལ་ནས་འགྲོ་ཁ་མ་འདི་འདྲ་ཞིག་ལ་ཟེར་ཞོར། ཐོབ་པ་དེ་ཤོར་ན་མི་འདོད་པའི་སྐད་ཆ་གློ་བུར་བ་ཞིག་ངག་ལས་ཤོར།

ནོར་བུ་བཟང་མོས་ཉལ་གོས་ལྡེབས་བརྩེགས་རྒྱག་ཞོར་དུ་བློ་བཟང་ལ་ཡར་ལོངས། ཁྱེད་རང་གི་གྲོགས་པོ་ཕྱིར་ནང་དུ་སླེབས་གྲབས་ཡོད་པ་རེད། འདང་བརྒྱབ་དེ་བསྡད་ནས་ཅི་བྱེད།

བློ་བཟང་ལ་བསམ་རྒྱུ་དྲན་རྒྱུ་གང་ཡང་མེད་པར་གདོང་འདོག་ཤོར་ནས་རླངས་འཁོར་ནང་དུ་འཛུལ་བཞིན་ཡོད་ལ། གྲོགས་པོ་རེ་ཟུང་དང་ནོར་བུ་བཟང་མོ་བཅས་ཁོ་རང་ལ་བསྐྱེལ་མ་བྱེད་དུ་ཡོང་ཡོད།

ལྡི་ལུར་ཉིན་གཉིས་ལུས་པའི་རིང་དུ་བློ་བཟང་ལ་ཟ་མ་ཟ་འདོད་ཀྱི་ཡི་ཀ་མེད་པར་འདང་རྒྱག་གི་ནང་དུ་ལྷུང་ཡོད་པ་དང་། ཐ་མག་རྔུབ་འཐེན་བྱེད་པ་དང་སྤི་རག་རེ་འཐུང་ནའ་རང་ཉིད་གཅིག་བུར་ལྷ་ས་མགྲོན་ཁང་ནས་མེ་འཁོར་འཛིན་བྱང་ལ་སྒུག་ཡོད། བློ་བཟང་གིས་རང་གི་ཉིན་ཐོ་འབྲི་དེབ་ཚུར་བླངས་དེ་སྒང་དུ་འདི་ལྟར་བྲིས།

བློ་བཟང་གི་ཉིན་ཐོ།

ངའི་སེམས་པ་འདི་འདི་ལྟར་ལྡིང་ཚར་སོང་། སེམས་གཏིང་གི་བརྩེ་མཐུན་མ། འུ་གཉིས་གྱེས་ཁར། ནམ་ཡང་བརྗེད་མི་ཐུབ་པའི་དྲན་ཤིང་འདི་ལྟར་འཇོག་དགོས་བྱུང་བ་ཅི་ཡིན་ནམ། ངའི་རང་ཉིད་ལ་ཡིད་ཆེས་བྱེད་ཐུབ་ཀྱི་མི་འདུག ད་ནི་ངས་ཡོད་ཚད་ཁྱེད་ལ་སྤྲད་ཟིན། བདེ་མོ་བྱོས། གཅིག་ཐང་ན། མྱུར་དུ་མཇལ་ཐུབ་ན་ཐང་། མི་ཡུལ་ན་ང་ལ་བདེ་སྣང་གི་ཚོར་བ་ཏུལ་འབྲི་ཙམ་ཡང་མེད་པའི་སྐབས་འདི་ལ། ངས་ཁྱེད་ལ་བཀའ་དྲིན་ཆེ་ཟེར་ན་འདོད།

༢༠༠༢།༡༡།༢༡ལ་བློ་བཟང་གིས་ལྡི་ལུ་ལྷ་ས་མགྲོན་ཁང་ནས།

མུ་འགོད།