སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} སོ་ལྔ།

བློ་བཟང་གི་སྐབས་དེར་རང་ཉིད་ཀྱིས་ས་ར་མཐོ་སློབ་དུ་ཟུར་ཞུགས་ཤིག་བྱེད་ཐུབ་ན། བོད་ཡིག་གི་ཤེས་ཚད་མཐོ་རུ་གཏོང་རྒྱུ་དང་རང་གི་འདོད་པ་འཁེང་བ་ཞིག་སྤྱོང་འདོད་ཀྱི་མདུན་པའི་ངོ་ཤེས་ཤིག་བརྒྱུད་དེ། ས་ར་སློབ་གྲྭའི་དགེ་རྒན་ཞིག་གི་དྲུང་ལ་སོང་དེ་རང་ཉིད་ད་ལོ་ཟུར་ཞིག་འཛིན་གྲྭར་ཞུགས་འདོད་ཡོད་ཚུལ་ཞུས་ཀྱང་། དགེ་རྒན་དེའི་ད་ལོ་ང་རང་གིས་དགེ་རྒན་རེ་ཡི་དངོས་ནས་ཟུར་ཞུགས་སློབ་མ་རེ་མཇུག་ཆོག་གི་ཡོད་པ་དེ་ནི་བདེན་པ་ཡིན་ཡང་། ངས་ཁྱེད་རང་གི་རེ་བ་དེ་ནི་སྐོང་ཐུབ་ས་མ་རེད། གང་ཡིན་ཟེར་ན་ལོ་ངོ་མ་ནས་བཟུང་དེ་མི་ཞིག་གིས་ང་རང་ལ་ཞུ་བ་འཐེན་ནས་ངས་མི་དེ་ལ་ཁས་ལེན་བྱས་ཡོད་པ་ཡིན། རེད་དེ། ཁྱེད་རང་གིས་ཡིག་རྒྱུགས་གཏོང་བའི་གྲངས་དུ་ཐོ་འགོད་བྱས་པ་ཡིན་ན་གོ་སྐབས་ཡོད་པ་རེད་ཅེས་བཤད་པ་རེད།

བློ་བཟང་དང་ཁོའི་གྲོགས་པོ་གཉིས་ཀྱིས་དགེ་རྒན་དེ་ལ་བཀའ་དྲིན་ཆེ་ཞུས་དེ་ཕྱིར་མེག་ལོར་དུ་ཡོང་བའི་ལམ་ཁར། བློ་བཟང་གི་སེམས་སུ་རང་ཉིད་ཀྱིས་ཡིག་རྒྱུགས་སྤྲོད་ཐུབ་པའི་གདེང་ཚོད་ཡོད་པ་ཡིན་ན། ཁོ་རང་ལ་ཞུ་བ་བྱེད་དུ་གང་ལ་འགྲོ་སྙམ་ཞོར། ཁོའི་གྲོགས་པོ་ལ་རྡ་ས་མེག་ལོར་རླངས་འཁོར་འབབ་ཚིགས་ནས། ཁྱེད་ཀྱིས་རོགས་རམ་གནང་བ་དེར་བཀའ་དྲིན་ཆེ་ཟེར་ནས་བཤད་དེ་རང་གི་བསྡོད་གནས་སུ་ལོག

ནོར་བུ་བཟང་མོས་ཀྱང་། སེམས་གཏིང་གི་དགའ་སར་གླེང་མྱོང་བའི་བློ་བཟང་ཕྱིར་རྡ་སར་འབྱོར་བ་དེ་ནི་མོ་རང་ལ་མཚོན་ན་ཆེས་དགའ་སྐྱིད་ཀྱི་ཉིན་མོ་ཞིག་ཡིན་པའི་ངང་ཚུལ་དག་བློ་བཟང་གི་ནང་དུ་ཡོང་ནས་ཡང་ཡང་དེ་སྟོན་བཞིན་ཡོད།

བློ་བཟང་གིས་ཀྱང་། རང་ཉིད་ཀྱི་མོ་སྡོམ་ཤོར་ས་ནི་ཁོ་མོ་ཡིན་པ་མ་ཟད། དམིགས་བསལ་གྱིས་དུངས་པ་ཞིག་སེམས་ཁོང་དུ་ཡོད་པ་ལྟར། ཁོ་མོ་རང་གི་ནང་ལ་རྒྱུན་དུ་ཡོང་བ་དེ་ནི་ཁོ་རང་ལ་མཚོན་ན་རང་གི་སེམས་ཐག་ཉེ་སའི་མཛའ་མོ་ཞིག་ཡིན་སྣང་སྐྱེ་བཞིན་ཡོད་པ་ལས། དེ་ནི་མི་གཞན་ཞིག་ལ་དབང་ཟིན་པའི་བུད་མེད་ཅིག་ཡིན་པ་དང་། རང་གི་ནག་ཉེས་བྱེད་ཀྱི་ཡོད་པ་སོགས་ལ་བསམ་བློ་ཏུལ་ཙམ་རེ་འཁོར་ཡང་།
ནོར་བུ་བཟང་མོ་ཁོ་རང་གི་ནང་དུ་ཡོང་སྟངས་རེ་དང་། མོ་རང་གི་ངོ་གདོང་གི་འཛུམ་མདངས་དེ་དག་གིས་ཁོ་རང་དབང་མེད་དུ་རང་ཚུགས་མེད་པའི་མི་ཞིག་དུ་གྱུར་བཞིན་ཡོད་པ་རེད།

ད་ནི་ནོར་བུ་བཟང་མོ་དང་བློ་བཟང་གཉིས་ལ་རང་དབང་གི་ལུས་འབྲེལ་དང་རང་དབང་གི་ཐུག་འཕྲད་བྱེད་པ་ལ་བར་ཆད་གཏོང་མཁན་གྱི་བདེ་གྲོལ་མེད་པ་རེད། བདེ་གྲོལ་ནི་ནོར་བུ་བཟང་མོའི་ཁྱོ་ག་སྐུ་ཞབས་ཨེས་ལ་ཡི་བཀའ་དྲིན་ལ་ཕྱི་རྒྱལ་དུ་ཕྱིན་ཚར་ཡོད་པ་རེད།

བློ་བཟང་གིས་ཁོ་རང་སླེབས་ནས་ཉིན་ཁ་ཤས་ཀྱི་རྗེས་སུ། ནོར་བུ་བཟང་མོ་སླར་ཡང་ལུས་འབྲེལ་མགོ་འཛུགས་སྐབས་ཤིག་ལ། བློ་བཟང་གིས་ཁང་ཆུང་དེའི་ནང་ནས་འཁྲིག་པ་དུས་གཅིག་ལ་གཉིས་ཙམ་སྤྱད་རྗེས་སུ། རང་ཉིད་ལ་སྔར་ལས་ལྷག་པའི་ཚོར་བ་ཞིག་སྤྱིན་པ་དེའི་སྟབས་ཀྱིས་ནོར་བུ་བཟང་མོ་ལ། ཁྱེད་རང་ཉིན་མ་མང་བོ་ཞིག་ལ་རྒན་པོ་དང་ལྷན་དུ་བསྡད་མེད་པ་འདྲ།

ནོར་བུ་བཟང་མོས། དེ་ནི་སྔ་ས་ནས་བླངས་ཚར་བ་རེད་ལ། ད་ནི་ཕྲུ་གུ་ཆགས་རྒྱུའི་གོ་སྐབས་ཡོད་པ་རེད། ང་རང་གི་མི་ཚེའི་ནང་དུ་ཁྱེད་རང་མ་དབང་ཡང་། ཁྱེད་རང་གི་བུ་རྒྱུད་ཅིག་རེག་ན་ཡང་འགྲིག་གི་ཡོད་ཅེས་བཤད།

བློ་བཟང་གིས་སྐད་ཆ་དེ་ཐོས་མ་ཐག དངོས་ནས་སེམས་ནང་དུ་དེ་བས་ཀྱང་བཤད་མི་ཤེས་པའི་ཚོར་བ་ཞིག་གི་སྣུན་དེ་འོང་ནས། གཅིག་བྱས་ན་དེ་རིང་ཁྱེད་རང་ལ་བྱིས་པ་ཆགས་ཡོད་སྲིད་པ་རེད་ཅེས་ཀུ་རེ་ཞིག་དང་བཅས། རྒྱུན་ལྡན་ལྟར་ཁོ་གཉིས་བློ་བཟང་གི་ནང་ནས་རོགས་པ་ལས་ཁར་སོང་ཤུལ་དུ་དགའ་དགའ་སྤྲོ་སྤྲོ་བྱོས་དེ་བསྡད་ཡོད་པ་རེད།

བློ་བཟང་གིས་རྒྱུན་དུ་གློག་ཀླད་ནང་དུ་རང་གི་ཉིན་ཐོ་དང་འབྲེལ་བའི་ཚོར་བ་དང་། རང་ཉིད་ཀྱི་གང་ཤེས་པའི་བསམ་ཚུལ་སོགས། རང་ཉིད་ཆེས་དགའ་ཕྱོགས་ལྟར། གློག་ཀླད་ནང་དུ་བརྙན་འཕྲིན་ཟློས་གར་སོགས་ལ་ལྟ་བཞིན་ཡོད་ལ། དུས་རྒྱུན་དུ་ཐ་མག་འཐེན་པ་ནི་དངོས་ནས་ཧ་ལས་པ་ཞིག་ཆགས་བཞིན་ཡོད་སྟབས། ཉིན་ཞིག་ནོར་བུ་བཟང་མོས་སྒེའུ་ཁུང་གི་འགྲམ་ངོས་སུ་བརྩིགས་ཡོད་པའི་ཐ་མག་གི་སྒམ་ཆུང་སྟོང་བ་ཚང་མ་འགྱིག་ཤོག་ཆེན་པོ་གཉིས་ཀྱི་ནང་དུ་གྲལ་དག་པོའི་སྒོ་ནས་བརྩིགས་དེ་བཀང་རེ་བྱས་དེ་གད་སྙིགས་ནང་དུ་འཕྱོ་རུ་འགྲོ་ཞོར་དུ། བློ་བཟང་ལ་ཐ་མག་ཇེ་ཉུང་དུ་གཏོང་ཐུབ་ན་ཡག་ས་རེད་ཅེས་བཤད་ཀྱང་། དེ་ནི་བློ་བཟང་གི་རྣ་བར་འཛུལ་གྱི་མེད་ན་ཡང་། ཡ་ཡ་ཟེར་ནས་མགོ་བོ་ལྡེབས་ཀྱིན་ནོར་བུ་བཟང་མོར་བསྐྱེལ་མ་བྱས།

བློ་བཟང་ལ་སླར་ཡང་ཨ་ཅག་ཚེ་འཛོམ་གྱིས་ཁ་པར་སླེབས་ནས། ཁོ་རང་ཡོང་ནས་རོགས་ཤིག་མི་བྱེད་ཐབས་མེད་ཆགས་རབས་ཀྱི་བསྐོར་མི་ཉུང་བ་ཞིག་བཤད་པ་དེའི་ངོ་མ་ལྡོག་པར། བློ་བཟང་གིས་རང་གི་རྒྱབ་ཁུག་ཆུང་ཆུང་དེ་འཁུར་ནས། ནོར་བུ་བཟང་མོ་དང་རང་གི་གྲོགས་པོ་སོགས་ལ་བདེ་མོ་བཞག་ནས་ལམ་དུ་ཆས།

སྐབས་དེར་བློ་བཟང་ལ་ཨ་ཅག་ཚེ་འཛོམ་གྱིས། བློ་བཟང་ཁྱེད་རང་ད་རེབས་ཡིན་གཅིག་མིན་གཉིས་ལ་རོགས་པ་ཞིག་བྱེད་དུ་ཡོང་རོགས། ང་ཚོས་ཟ་ཁང་གོང་མ་དེ་ཕྱིར་ཁ་འཆི་གང་ཡང་མེད་པ་བྱས་དེ་ཕྱིར་ཁང་བདག་རྒན་མོ་དེར་སྤྲད་པ་ཡིན་ལ། ང་ཚོས་ལྡི་ལུ་ནས་ཁང་རྙིང་ཞིག་ཉོས་ཡོད། དེ་རུ་ཁང་བ་ཞིག་རྒྱག་རྩིས་ཡོད་དུས། ང་རང་དང་བུ་དང་མནའ་མ་བཅས་ཚང་མ་དེ་རུ་སོང་བ་ཡིན་ན། ཟ་ཁང་འོག་མ་འདིར་ལྟ་སྐྱོང་བྱེད་མཁན་ཞིག་དངོས་ནས་ཁྱེད་རང་ལས་བློ་འཁེལ་ས་ཞིག་རེག་གི་མི་འདུག་སྟབས། ཁྱེད་རང་ཡིན་གཅིག་མིན་གཅིག་ལ་ཡོང་རོགས་ཞུ།

བློ་བཟང་གིས་ཉིན་ལྟར་ཟ་ཁང་དང་འདུག་ཁང་བཅས་ཀྱི་འགན་ཡོངས་རྫོགས་འཁུར་ནས་བསྡད་དེ་དུས་ཡུན་ཟླ་ངོ་ཁ་ཤས་ཤིག་གར་སོང་ཆ་མེད་དུ་ཕྱིན་པ་རེད། དེ་དུས་ཉིན་ཞིག་རང་གི་གྲོགས་པོ་ལ་རྡ་སར་ཁ་པར་ཞིག་བཏང་དུས། ནོར་བུ་བཟང་མོ་ལ་ཁྱེད་རང་གི་ཕྲུ་གུ་ཡོད་རབས་བསྐོར་ཞིག་ཁོ་མོའི་ཨ་ཅེ་ཡིས་བཤད་ཀྱི་འདུག ཨ་རོགས་བདེན་པ་ཨེ་ཡིན་ཞེས་དྲིས་དུས། བློ་བཟང་གིས་གང་ཡིན་འདི་ཡིན་མེད་པར། ཡིན་རྒྱུ་མ་རེད་ཟེར་བ་ལས་བཤད་རྒྱུ་མང་བོ་ཞིག་མ་རྙེད།

ཉིན་མ་དེ་ནས་བཟུང་། བློ་བཟང་གི་སེམས་སུ་དངོས་ནས་རང་ཉིད་ནི་བྱིས་པ་ཞིག་གི་ཕ་རྒན་ཆགས་པ་ཡིན་ནམ་སྙམ་ཞོར་སེམས་ནང་དུ་སྤས་གསང་བྱེད་དགོས་པའི་གཏམ་རྒྱུད་ཅིག་གི་སྒོ་མོ་ཕྱེ་ཡོད་ན་ཡང་། སུ་ལ་ཡང་རང་ཉིད་ཀྱི་བུ་ཕྲུག་ཞིག་ཡོད་རབས་ཀྱི་སྐད་ཆ་དེ་འདྲ་ཁ་ནས་བཤད་ཐུབ་ཀྱི་མེད་པ་རེད།

ཉིན་ཞིག་བློ་བཟང་གིས་ཕ་ཡུལ་དུ་ཁ་པར་བཏང་དུས། ཨ་མས། བློ་བཟང་ད་ཁྱེད་རང་དངོས་ནས་མགྱོགས་པོ་བོད་དུ་ཡོང་ཐུབ་པ་ཡིན་ན་དངོས་ནས་ཡག་པོ་འདུག ཨ་མྱེ་ཡང་ལོ་ཆེན་པོ་རེད་ལ། ཨ་ཁུ་ཡང་ལོ་ཆེ་སྟབས། རྗེས་མ་ཞིག་ལ་ཁ་ངོ་ཐུག་མིན་ཡང་བཤད་དཀའ་ཚོད་རེད་ལ། ངས་ཀྱང་དངོས་ནས་དྲན་ནས་ཉི་མ་མི་འགྲོ་བ་ཞིག་རེད། ཐུབ་ན་ཁྱེད་རང་གང་མགྱོགས་ཤིག་བོད་དུ་ཡོང་རོགས་ཞུ་ཟེར་ནས་ཁ་པར་གཏོང་ཐེངས་རེར་སྐད་ཆ་དེ་གཅིག་བུ་ལས་ཨ་མ་ལ་བཤད་རྒྱུ་མེད་སྟབས། བློ་བཟང་གིས་རང་ཉིད་འདི་ལྟར་ཕ་ཡུལ་དུ་ཕྱིར་ལོག་པ་ཡིན་ན་དངོས་ནས་ཡག་པོ་མི་འདུག་སྙམ་ན་ཡང་། ཐད་ཀར་ཨ་མ་ལ་གང་ཡང་བཤད་མ་ཐུབ།