ཁ་སང་ཕྱི་ཚེས་ ༡༢ ཉིན་སྤྱི་ནོར་༧གོང་ས་མཆོག་སྡེ་རཱེང་རྫོང་ལ་ཞབས་སོར་བཀོད་དེ། དེར་ལྷོ་ཕྱོགས་དགའ་ལྡན་བྱང་རྩེའི་དགེ་འདུན་པ་ཐུབ་བསྟན་ལགས་ཀྱིས་དགོན་པ་གསར་པ་ཞིག་བཞེངས་འཆར་ཡོད་པ་དེར་ཕེབས་ཏེ་ཐུགས་སྨོན་དང་ཤིང་སྡོང་འདེབས་འཛུགས་གནང་ཡོད་ལ། ཕྱི་ལོ་ ༡༩༨༣ ལོར་དུས་འཁོར་དབང་ཆེན་གནང་ཡུལ་གྱི་དུས་འཁོར་ཕོ་བྲང་ལ་ཕེབས་རྗེས། ཁྲོམ་རྭའི་རྩེ་ཐང་དུ་ཞབས་སོར་བཀོད་དེ། མི་མང་ཆིག་ཁྲི་༡༠༠༠༠ལྷག་ལ་མ་ཎིའི་ལུང་སོགས་ཀྱི་ཆོས་འབྲེལ་དང་བསྟུན་ཏེ། ཤེས་ཡོན་སློབ་སྦྱོང་དང་ཁོར་ཡུག་སྲུང་སྐྱོབ། འཕྲོད་བསྟེན་བཅས་ཀྱི་ཐད་བཀའ་སློབ་གནང་སོང་།
ཉིན་དེའི་ཕྱི་དྲོ་གནམ་གྲི་བརྒྱུད་འབུམ་སྡེ་ལར་ཆིབས་བསྒྱུར་བསྐྱངས་ཡོད། དེ་རིང་ཞོགས་པའི་ཆུ་ཚོད་ ༩ སྟེང་། འབུམ་སྡེ་ལའི་ཁྲོམ་གཞུང་གི་རྐང་རྩེད་སྤོ་ལོ་རྩེད་ཐང་ནས་མི་དམངས་ཉིས་ཁྲི་ ༢༠༠༠༠ ལྷག་ལ་སྒྲོན་དཀར་གྱི་ཚེ་དབང་དང་བཀའ་སློབ་གསུང་ཆོས་བསྩལ་ཡོད། དེ་དང་མཉམ་དུ་ཚེ་དབང་དང་དགེ་བསྙེན་གྱི་སྡོམ་པ་བཅས་གནང་ཡོད། སྐབས་དེར་༧གོང་ས་མཆོག་གིས་གསུངས་དོན། རབ་བྱུང་དགེ་འདུན་པའི་སྡེ་དང་། ཁྱིམ་པ་དགེ་བསྙེན་གྱི་སྡེ་བཅས་གཉིས་ཡོད་པ་ལས་ཁྱེད་ཅག་གིས་སོ་མཐར་བྱང་སེམས་ཀྱི་སྡོམ་པ་བཞེས་འདོད་ཡོད་རིགས་ཚོས་དེ་རིང་འདིར་དགེ་བསྙེན་གྱི་སྡོམ་པ་བཞེས་ཐུབ་ན་ཡག་པོ་ཡོད་པ་རེད། དེ་ལ་སྲོག་གཅོད་དང་ལོག་གཡེམ། མ་བྱིན་ལེན་པ། ཆང་འཐུང་བ། རྫུན་བཤད་པ་བཅས་སྤང་དགོས་པ་རེད། རབ་བྱུང་ན་དེ་དག་ལྔ་བོ་སྤང་དགོས་ལ། དེ་མ་བྱུང་ཚེ་གོང་གི་དེ་དག་ལས་གཉིས་དང་གསུམ། བཞི། ག་ཚོད་ཐུབ་ཐུབ་ཅིག་སྤངས་ཏེ་ཁས་ལེན་བྱས་ནའང་འགྲིག་གི་རེད། ཅེས་དེ་གའི་ཁྱིམ་པ་ཕོ་མོ་མང་པོ་ཞིག་ལ་དགེ་བསྙེན་གྱི་སྡོམ་པ་བསྩལ་སོང་། ༧གོང་ས་མཆོག་གིས་ཚེ་དབང་གི་སྐོར་ལ་གསུངས་དོན། ཚེ་རིང་པ་ཙམ་གྱིས་དོན་སྙིང་ཆེན་པོ་ཡོད་པ་མ་རེད། ཚེ་རིང་བ་དོན་དང་ལྡན་པ་ཞིག་བྱ་རྒྱུ་གལ་ཆེན་པོ་རེད། མི་ཚེ་དོན་དང་ལྡན་པ་ཞིག་ཡོང་རྒྱུའི་རྩ་བ་སེམས་ལ་བདག་པོ་རྒྱག་རྒྱུ་དེ་རེད། སེམས་པ་བཟང་པོ་ཡོད་ན། ཤེས་བྱ་ཡོན་ཏན་ཡོད་ཀྱང་རུང་ལ་མེད་ཀྱང་རུང་། རྒྱུ་ནོར་ལོངས་སྤྱོད་ཡོད་ཀྱང་རུང་ལ་མེད་ཀྱང་རུང་། སོ་སོ་རང་ཉིད་སྐྱིད་པ་དང་རང་གི་ཉེ་འཁོར་དུའང་བརྡབ་གསིག་མ་སོང་བ་ཡོང་གི་རེད། སེམས་པ་བཟང་པོ་མེད་ན་རྒྱུ་དངོས་པོ་མང་པོ་ཡོད་ཀྱང་ཆགས་སྡང་དང་ཕྲག་དོག་ཆེན་པོ་སྐྱེ་གི་རེད་ལ།ཤེས་བྱ་ཡོན་ཏན་ཡོད་ཀྱང་སེམས་མ་འདུལ་ན་ཡོན་ཏན་དེ་ལའང་རེ་བ་དང་དོགས་པ་མང་པོ་ཞིག་སྐྱེས་ཏེ་མ་སྐྱིད་པ་ཡོང་གི་རེད། སྤྱིར་ཤེས་བྱ་ཡོན་ཏན་ངེས་པར་དུ་དགོས་པ་རེད་ལ། རྒྱུ་ནོར་ལོངས་སྤྱོད་ཀྱང་ངེས་པར་དུ་དགོས་པ་རེད། དེ་དང་ཆབས་གཅིག་གཙོ་བོ་སེམས་བཟང་པོ་བྱ་རྒྱུ་དེ་གལ་ཆེ་ཤོས་རེད། ཅེས་གསུངས་བྱུང་།
ཁོང་གིས་མུ་མཐུད་དུ་འཛམ་གླིང་གི་ཆོས་ལུགས་ཁག་ཚང་མས་འཆམ་མཐུན་དང་ཕན་ཚུན་ལ་གུས་བརྩི་བྱ་དགོས་པའི་སྐོར་གསུངས་དོན། འཛམ་གླིང་གི་ཆོས་ལུགས་ཁག་ཚང་མས་མི་ལ་ཕན་ཐོགས་ཀྱིན་ཡོད། ཆོས་ལུགས་ཆེ་ཁག་ཕལ་ཆེ་བས་རང་དོན་མི་བསམ་པར་སྤྱི་ཚོགས་ལ་ཕན་བདེ་བསྒྲུབ་པའི་བསམ་པ་དང་སྤྱོད་པ་འཁྱེར་བསྡད་ཡོད། དེར་བརྟེན་ཆོས་ལུགས་གང་ལ་དད་པ་བྱེད་མཁན་ཡིན་ན་ཡང་། རང་རང་གི་ཆོས་གཞུང་ན་བཤད་ཡོད་པའི་བསླབ་བྱ་དེ་རིགས་ཁ་ཞེ་གཉིས་མེད་ཀྱིས་ལག་ལེན་འཁེལ་ཐུབ་པ་ཡིན་ན་ཕན་ཐོགས་ཆེན་པོ་ཡོད་པ་གསལ་བོ་རེད།འཛམ་གླིང་འདིར་ཆོས་ལུགས་མི་འདྲ་བ་མང་པོ་ཡོད་པ་དེར་ཕན་ཐོགས་ཆེན་པོ་འདུག་དྲན་ཡོད། གང་ཡིན་ཟེར་ན། དུས་རབས་མི་འདྲ་བ་དང་།ས་གནས་མི་འདྲ་བའི་མི་རིགས་སོ་སོར་གོམས་གཤིས་མི་འདྲ་བ་རེ་ཡོད། ད་ལྟ་འཛམ་གླིང་འདིར་མི་ཐེར་འབུམ་ཆུང་བ་དྲུག་ཙམ་ཡོད།དེ་དག་གི་ཁམས་དང་མོས་པ་སྣ་ཚོགས་རེད། དེར་བརྟེན་ཆོས་ལུགས་མི་འདྲ་བ་དེ་དག་གིས་མི་རིགས་མི་འདྲ་བ་དང་།ཁམས་དང་མོས་པ་མི་འདྲ་བར་ཕན་ཐོགས་ཆེན་པོ་ཡོང་གིན་ཡོད་པ་རེད། ཅེས་དང་།
རྒྱ་གར་ནང་ཆོས་ལུགས་འདྲ་མིན་ཡོད་ཀྱང་ལོ་ངོ་སྟོང་ཕྲག་རིང་འཆམ་མཐུན་མཉམ་གནས། ཕན་ཚུན་ལ་གུས་བརྩིའི་ཐོག་ནས་དར་རྒྱས་བྱུང་བ་རེད། དེའི་རྩ་བ་གང་ལ་ཐུག་ཡོད་ཟེར་ན།ཨ་ཧིམ་སཱ་འཚེ་བ་མེད་པའི་ལྟ་གྲུབ་ལ་ཐུག་ཡོད། ང་རང་འཛམ་གླིང་གི་ས་ཆ་གང་ལ་སོང་ན་ཡང་། ངས་ང་རྒྱ་གར་གྱི་སྐད་འཁྱེར་བ་ཡིན་ཟེར་གི་ཡོད། གང་ཡིན་ཟེར་ན། ངས་བཤད་བསྡད་པ་དེ་དག་རྒྱ་གར་གྱི་དཔལ་ན་ལེན་ཊའི་ཆོས་བརྒྱུད་དང་།འཚེ་བ་མེད་པ། ཆོས་ལུགས་ཚང་མས་ཕན་ཚུན་གུས་བརྩི་བཅས་གཙོར་འདོན་བྱེད་ཀྱིན་ཡོད། དེ་ནི་རྒྱ་གར་གྱི་སྲོལ་རྒྱུན་བཟང་བོ་ཞིག་རེད་མ་གཏོགས་ང་ཚོས་གསར་བཟོ་བྱས་པ་ཞིག་མ་རེད། དེ་རིང་འདིར་འཛོམས་བསྡད་པ་ཚང་མས་ཕན་ཚུན་ངོ་ཤེས་པ་བྱ་དགོས་པ་རེད། ཅེས་གསུངས་བྱུང་།སྐབས་དེར་གསར་འགོད་པའི་བསྟན་འཛིན་སྒང་བོད་མིའི་གཞིས་ཆགས་ཀྱི་ས་གནས་མགོ་འཛིན་རྡོ་རྗེ་རིག་འཛིན་ལགས་སུ་བཅར་འདྲི་ཞུས་པར་ཁོང་གིས་གསུངས་དོན། དེ་རིང་འདིར་འབུམ་སྡེ་ལ་ཁུལ་གྱི་བོད་རིགས་གཙོས་པའི་བསྟན་འཛིན་སྒང་གཞིས་ཆགས་དང་སྡེ་རཱེང་། དེ་བཞིན་ས་གནས་ཁག་གི་ཁ་ཐོར་མི་མང་བཅས་བོད་རིགས་ཧ་ཅང་མང་པོ་ཕེབས་འདུག་ལ། མོན་པ་དང་གློ་བ། བལ་ཡུལ། རྟ་མང་བ། ཁུ་ནུ་སོགས་ཧི་མ་ལ་ཡའི་རི་རྒྱུད་ཀྱི་ནང་ཆོས་ལ་དད་པ་བྱེད་མཁན་གྱི་མི་རིགས་ཀྱང་མང་པོ་ཞིག་འབྱོར་འདུག་ཅེས་གསུངས་བྱུང་།
ཡང་ཁོང་ལ་བསྟན་འཛིན་སྒང་ས་གནས་གཞིས་མགོའི་འོག་ཏུ་བོད་མི་ག་ཚོད་ཡོད་སྐོར་དྲིས་པར། བོད་མིའི་གཞིས་ཆགས་གཙོ་བོ་བསྟན་འཛིན་སྒང་གཅིག་པུ་རེད། གཞན། མོན་རྟ་དབང་དང་འབུམ་སྡེ་ལ། སྡེ་རཱེང་བཅས་སུ་བོད་མི་ཁ་ཐོར་མང་པོ་ཡོད། ཉེ་ཆར་གྱི་མི་འབོར་ཞིབ་བཤེར་གཞིར་བཞག་བྱས་ན། བསྟན་འཛིན་སྒང་གཞིས་མགོའི་འོག་ཏུ་བོད་པ་ཆིག་སྟོང་གསུམ་བརྒྱ་ ༡༣༠༠ ཙམ་འདུག་ཅེས་ངོ་སྤྲོད་གནང་བྱུང་། ཚེ་དབང་གྲུབ་རྗེས་འབུལ་ལ་ཁུལ་གྱི་མི་མང་ཚོས་རིག་གཞུང་འཁྲབ་སྟོན་བྱས་ཡོད་ལ། ཉིན་རྒྱབ་ཆུ་ཚོད་ ༣ སྟེང་འབུམ་ལ་དགོན་རྩེ་དགའ་ལྡན་རྣམ་རྒྱལ་གླིང་དུ་ཆིབས་སྒྱུར་གྱིས་ཐེངས་འདིར་གསུང་ཆོས་ཞུ་བར་བཅར་མཁན་འབུམ་ལ་ཁུལ་གྱི་བོད་རིགས་མི་མང་ཆིག་སྟོང་ཡས་མས་ཤིག་ལ་དམིགས་བསལ་གྱི་བཀའ་སློབ་ལམ་སྟོན་གནང་ཡོད། །
འདི་གའི་གསར་འགོད་པ་དོན་འགྲུབ་བཀྲ་ཤིས་ཀྱིས་འབུམ་སྡེ་ལ་ནས་སྤེལ།
མོན་གྷོ་གཞིས་ཆགས་དགོན་སྡེ་ཐུན་མོང་གི༎
དམ་ཕྲུག་ས་རྟགས་ཕབ་པའི་ཞུ་ཡིག་ནང་༎
ཁྱེད་ཀྱི་མཛད་རྗེས་སྤྱི་འཐུས་ལྷན་ཁང་བརྒྱུད༎
རྒྱལ་ཕམ་ལྟད་མོ་རྒྱལ་ཁམས་ཡོངས་ལ་གྲགས།།
གསེར་རྟ་ཚུལ་ཁྲིམས་འོད་ཟེར་གྱི་ཉེ་ཆར་མཛད་རྗེས་ལ་བསྔགས་པ།
ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས།
ནད་པར་སྙིང་བརྩེ་འཁོར་ནི་དག་པ་དང་།
ཆོས་དང་ཟང་ཟིང་ཕན་ཐོག་ལ་བརྩོན་པ།
དུས་སུ་འདོམས་པ་དེ་ཉིད་བླ་མར་བསྔགས།
གསར་འགོད་པ་དོན་འགྲུབ་བཀྲ་ཤིས་ལགས་ཀྱིས་དེ་གའི་གནས་ཚུལ་ཞིབ་ཕྲ་སྤེལ་པར་བསྔགས་བརྗོད་དང་འབྲེལ། འབྱུང་འགྱུར་ཡང་དེ་བཞིན་སྤེལ་ཐུབ་པའི་རེ་སྐུལ་ཞུ་རྒྱུ་ཡིན།
ཇི་སྐད་དུ་རྒྱལ་ཚབ་ར་སྒྲེང་རིན་པོ་ཆེའི་ཞལ་སྔ་ནས།
མགོན་མེད་གངས་ཅན་ཞིང་འདིའི་འགྲོ་བ་རྣམས།།
ཇི་སྲིད་འཁོར་བའི་ཕྱི་མཐའ་མ་རྫོགས་པ།།
དེ་སྲིད་མཚུངས་པ་མེད་པའི་གསང་གསུམ་གྱིས།།
སྡེ་བཞིའི་དཔལ་ལ་སྦྱོར་བཞིན་བརྟན་པར་བཞུགས།།
ཉམ་ཐག་སྨག་རུམ་འཐིབས་པའི་གངས་ཅན་འདིར།།
མགོན་ཁྱོད་ཐུགས་རྗེའི་སྒྲོན་མེ་འབར་བའི་གཟིས།།
ཕན་དང་བདེ་བའི་སྣང་བ་འགྱེད་བཞིན་དུ།།
སྲིད་ཞིའི་བར་དུ་མི་གཡོ་རྟག་བརྟན་ཤོག།
ཞེས་གསུངས་པ་དང།
རྫོང་སར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་པའི་ཞལ་སྔ་ནས།
སྲིད་པ་གསུམ་ན་ངོ་མཚར་ཟླ་མེད་པ།།
ཨུ་དམ་ཝཱ་ར་ལྟར་འཕགས་ཐམས་ཅད་མཁྱེན།།
འཛམ་གླིང་བསྟན་འགྲོ་ཡོངས་ཀྱི་གཙུག་ནོར་ཆེ།།
རྒྱལ་མཆོག་ཕྱག་ན་པདྨོ་ཞབས་བརྟན་ཤོག།
ཅེས་གསུངས་པ་ལྟར་འགྲུབ་པར་སྨོན།
དོན་བཀྲ་ལགས།
འདི་ལྟར་ཡིག་ནོར་ཇེ་ཉུང་དང་སྤུས་ཇེ་དག་ལ་འགྲོ་བཞིན་པར་སེམས་གཏིང་ནས་དགའ་བ་ཞིག་འཕེལ་བར་གྱུར། དོལ་རྒྱལ་སྐོར་སོགས་ལ་བསྩལ་བའི་བཀའ་སློབ་དང་བཅས་པའི་གསར་གནས་ཤིག་བཀོད་སོང་བ་དེ། བསུབ་ནས་མཐོང་རྒྱུ་མེད་པ་ཆགས་སོང་བ་དེ་ཅིས་ཡིན་ནམ། ག་རེ་བྱས་པ་རེད།
གཤམ་གྱི་འདི་ཚོ་བཟོ་བཅོས་ཤིག་ཐུགས་འདོགས་འཚལ་ཞུའོ།།
རྩེ་ཐང༌། རྩེད་ཐང༌།
གནམ་གྲི། གནམ་
དོན་བཀྲ་ལགས།
འདི་ལྟར་ཡིག་ནོར་ཇེ་ཉུང་དང་སྤུས་ཇེ་དག་ལ་འགྲོ་བཞིན་པར་སེམས་གཏིང་ནས་དགའ་བ་ཞིག་འཕེལ་བར་གྱུར། དོལ་རྒྱལ་སྐོར་སོགས་ལ་བསྩལ་བའི་བཀའ་སློབ་དང་བཅས་པའི་གསར་གནས་ཤིག་བཀོད་སོང་བ་དེ། བསུབ་ནས་མཐོང་རྒྱུ་མེད་པ་ཆགས་སོང་བ་དེ་ཅིས་ཡིན་ནམ། ག་རེ་བྱས་པ་རེད།
གཤམ་གྱི་འདི་ཚོ་བཟོ་བཅོས་ཤིག་ཐུགས་འདོགས་འཚལ་ཞུའོ།།
རྩེ་ཐང༌། རྩེད་ཐང༌།
གནམ་གྲི། གནམ་གྲུ།
སྒྲོན་དཀར། སྒྲོལ་དཀར།
གསར་འགོད་པའི། གསར་འགོད་པས།
ཚེ་རིང་བོ་ཙམ་གྱིས་དོན་སྙིང་ཆེན་པོ་ཡོད་པ་མ་རེད།
ཚིག་འདིས་དངོས་གནས་རྒྱབ་ལྗོངས་མཐུག་པོ་ཞིག་སྟོན་གྱིན་འདུག
ཚིག་འདིས་ཐག་རིང་ཐག་རིང་གི་དམིགས་འདུན་ཟབ་མོ་ཞིག་ལ་ང་ཚོས་ཧུར་ཐག་བྱ་རྒྱུ་སྟོན་གྱིན་འདུག
ཡིག་ནོར དག་བཅོས
སོ་མཐར་བྱང་སེམས་ཀྱི་སྡོམ་པ༽ སོ་ཐར་བྱང་སེམས་ཀྱི་སྡོམ་པ
དོགས་པ་མང་པོ་ཞིག་སྐྱེས་ཏེ་མ་སྐྱིད་པ་ཡོང་གི་རེད༽ མི་སྐྱིད་པ་ཡོང་གི་རེད
མ་འོངས་པའི་དགག་སྒྲ་སྦྱར་དགོས་ལགས།