རྒྱ་གར་གྱི་སློབ་ཕྲུག་ཉིན་མོ་སྟེ། སྲིད་བློན་དམ་པ་ནེ་རུ་མཆོག་གི་འཁྲུངས་སྐར་དང་བསྟུན་ཏེ། དེ་རིང་ཞོགས་པར་སྤྱི་ནོར་༧གོང་ས་མཆོག་འབུམ་ལ་དགོན་རྩེ་དགའ་ལྡན་རབ་རྒྱལ་གླིང་གི་ཐང་ཆེན་དུ་ཞབས་སོར་བཀོད་དེ། འབུམ་ལ་ས་ཁུལ་གྱི་རྒྱ་གར་སློབ་གྲྭ་ཁག་ ༡༥ ཙམ་གྱི་སློབ་ཕྲུག་ཚོར་ཞལ་མཇལ་དང་བཀའ་སློབ་ལམ་སྟོན་གནང་ཡོད་ལ། དེའི་རྗེས་མོན་ཡུལ་རོ་ནང་སྨད་ཁཱ་ལ་ཐང་ཞེས་པར་ཕེབས་ཏེ་ཆུ་ཚོད་གཅིག་རིང་མི་མང་ལ་བཀའ་སློབ་དང་ཆོས་འབྲེལ་བཞག་ཡོད།
འབུམ་སྡེ་ལ་ཁུལ་གྱི་མཛད་འཆར་ཡོངས་སུ་ལེགས་བྱུང་རྗེས་གནམ་གྲུ་བརྒྱུད་རྒྱལ་ས་ཨི་ཊ་ན་གྷར་ལ་ཕེབས་འཆར་ཡོད་པ་དང་། དེ་གའི་མཛད་འཆར་སྐོར་བླ་མ་མཚོ་སྣ་རིན་པོ་ཆེ་མཆོག་གིས་ངོ་སྤྲོད་གནང་དོན་ལྟར་ན། དེ་རིང་སྔ་དྲོའི་ཆུ་ཚོད་ ༡༢ ཙལ་ལ་༧གོང་ས་མཆོག་གནམ་གྲུ་བརྒྱུད་རྒྱལ་ས་ཨི་ཊ་ན་གྷར་ལ་ཞབས་སོར་འཁོད་རྒྱུ་ཡིན་པ་དང་། དེར་མངའ་སྡེ་བློན་ཆེན་མཆོག་གིས་ཉིན་གུང་གསོལ་ཚིགས་འདེགས་འབུལ་དང་། གསོལ་ཚིགས་དེའི་སྟེང་ཨི་ཊ་ན་གྷར་གྱི་བཀའ་བློན་ལྷན་རྒྱས་གཙོས་པའི་ས་གནས་གྲོས་ཚོགས་འཐུས་མི་རྣམ་པ། གནད་ཡོད་དཔོན་རིགས་ཁག་ཅིག་བཅས་ལྷན་ཞུགས་གནང་འཆར་ཡོད་འདུག ཉིན་གུང་རྗེས་རྒྱལ་ས་ཨི་ཊ་ན་གྷར་གྱི་གཞུང་འབྲེལ་མི་སྣ་ཁག་ཅིག་དང་ཆོས་ལུགས་འདྲ་མིན་ཁག་གི་སྐུ་ཚབ། དེ་བཞིན་མཁས་དབང་རྣམ་པ་ཁག་ཅིག་བཅས་དང་ལྷན་དུ་ཆོས་ལུགས་འཆམ་མཐུན་གཙོས་པའི་གནད་དོན་ཁག་ཅིག་གི་སྐོར་ལ་བགྲོ་གླེང་གནང་རྒྱུ་ཡིན་པ་དང་། དེའི་རྗེས་ཨི་ཊ་ན་གྷར་དུ་ནང་པའི་དགོན་པ་གཉིས་ཡོད་པ་དེར་ཞབས་སོར་བཀོད་དེ་ཆོས་འབྲེལ་འཇོག་རྒྱུ་ཡིན་འདུག སང་ཉིན་ཕྱི་ཚེས་ ༡༥ ཉིན་གྱི་ཞོགས་པ་༧གོང་ས་མཆོག་ཨི་ཊ་ན་གྷར་ནས་མཁའ་ལམ་བརྒྱུད་རྒྱལ་ས་ལྡི་ལིར་ཞབས་སོར་འགོད་རྒྱུ་ཡིན་འདུག
ཐེངས་འདིར་རྒྱ་ནག་གཞུང་གིས་ཇི་ལྟར་གནོན་ཤུགས་སྤྲོད་མིན་ལ་མ་ལྟོས་པར་སྤྱི་ནོར་༧གོང་ས་མཆོག་མོན་རྟ་དབང་ཁུལ་དུ་ཆིབས་སྒྱུར་བསྐྱངས་ཏེ། ཉིན་ལྔའི་རིང་གི་མཛད་འཆར་ཡོངས་རྫོགས་ལེགས་པར་གྲུབ་སྟེ། ཕྱི་ཚེས་ ༡༢ ཉིན་སྡེ་རཱེང་རྫོང་དུ་ཆིབས་སྒྱུར་བསྐྱངས་ཏེ་མི་མང་ཆིག་ཁྲི་ ༡༠༠༠༠ ལྷག་ལ་མ་ཎིའི་ལུང་སོགས་གནང་ཡོད་པ་དང་། ཚེས་ ༡༣ ཉིན་འབུམ་སྡེ་ལའི་མི་མང་ཉིས་ཁྲི་ ༢༠༠༠༠ བརྒལ་བར་ཚེ་དབང་དང་དགེ་བསྙེན་གྱི་སྡོམ་པ་སོགས་བསྩལ་ཡོད་ལ། ཉིན་རྒྱབ་འབུམ་ལ་དགོན་རྩེ་དགའ་ལྡན་རབ་རྒྱལ་གླིང་ནས་བོད་རིགས་མི་མང་ལ་དམིགས་བསལ་བཀའ་སློབ་གནང་ཡོད། དེ་རིང་ཞོགས་པ་སློབ་གྲྭ་ཁག་ ༡༥ ཙམ་གྱི་སློབ་ཕྲུག་ཚོར་གསུང་བཤད་གནང་ཡོད་ལ། དེ་ནས་རོ་ནང་ཁཱ་ལ་ཐང་དུ་ཆིབས་སྒྱུར་གྱིས་མི་མང་ལ་ཆོས་འབྲེལ་བཞག་ཡོད། ཉིན་གུང་རྒྱལ་ས་ཨི་ཊ་ན་གྷར་ལ་ཞབས་སོར་བཀོད་དེ་མཛད་འཆར་ཁག་ཡོངས་སུ་གྲུབ་རྗེས་སང་ཉིན་རྒྱལ་ས་ལྡི་ལིར་ཕེབས་རྒྱུ་ཡིན་འདུག
དོན་གྲུབ་བཀྲ་ཤིས་ལགས།
སྐུ་ཉིད་ཀྱིས་གསར་འགྱུར་དུས་ཐོག་ཐད་གཏོང་གནང་བ་བཀའ་དྲིན་ཆེ། ཡིག་ནོར་ལ་ཅུང་ཐུགས་གཟབ་གནང་རོགས། ལས་བྲེལ་གྱི་དབང་གིས་ནོར་སྲིད་ཀྱང་གང་ལྟར་ཡིག་ནོར་གཅིག་ཤོར་བ་དེ་མི་ཁྲི་སྟོང་མང་པོའི་སེམས་ཁམས་སུ་ཕོག་ཐུག་འགྲོ་གིན་ཡོད་སྟབས། ནན་ཙམ་གནང་རོགས།
ངའི་མིག་གིས་མཐོང་བའི་ཡིག་ནོར།
མ་དག་པ། དག་པ།
སློབ་ཕྲུག་ཉིམ་མོ་སྟེ། སློབ་ཕྲུག་ཉིན་མོ་སྟེ།
འངའ་སྡེ་བློན་ཆེན། མངའ་སྡེ་བློན་ཆེན་
ཉིན་གོང་། ཉིན་དགུང་།
འབུལ་སྡེ་ལ། འབུམ་སྡེ་ལ།
ཇི་སྐད་དུ་རྒྱལ་ཚབ་ར་སྒྲེང་རིན་པོ་ཆེའི་ཞལ་སྔ་ནས།
མགོན་མེད་གངས་ཅན་ཞིང་འདིའི་འགྲོ་བ་རྣམས།།
ཇི་སྲིད་འཁོར་བའི་ཕྱི་མཐའ་མ་རྫོགས་པ།།
དེ་སྲིད་མཚུངས་པ་མེད་པའི་གསང་གསུམ་གྱིས།།
སྡེ་བཞིའི་དཔལ་ལ་སྦྱོར་བཞིན་བརྟན་པར་བཞུགས།།
ཉམ་ཐག་སྨག་རུམ་འཐིབས་པའི་གངས་ཅན་འདིར།།
མགོན་ཁྱོད་ཐུགས་རྗེའི་སྒྲོན་མེ་འབར་བའི་གཟིས།།
ཕན་དང་བདེ་བའི་སྣང་བ་འགྱེད་བཞིན་དུ།།
སྲིད་ཞིའི་བར་དུ་མི་གཡོ་རྟག་བརྟན་ཤོག།
ཞེས་གསུངས་པ་དང།
རྫོང་སར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་པའི་ཞལ་སྔ་ནས།
སྲིད་པ་གསུམ་ན་ངོ་མཚར་ཟླ་མེད་པ།།
ཨུ་དམ་ཝཱ་ར་ལྟར་འཕགས་ཐམས་ཅད་མཁྱེན།།
འཛམ་གླིང་བསྟན་འགྲོ་ཡོངས་ཀྱི་གཙུག་ནོར་ཆེ།།
རྒྱལ་མཆོག་ཕྱག་ན་པདྨོ་ཞབས་བརྟན་ཤོག།
ཅེས་གསུངས་པ་ལྟར་འགྲུབ་པར་སྨོན།
ཐེངས་འདིའི་༧གོང་ས་སྐྱབས་མགོན་ཆེན་པོ་མཆོག་གི་མཛད་འཕྲིན་སྐོར་གྱི་གནས་ཚུལ་འཐུས་ཚང་དུས་བབ་གསར་འགོད་པ་དོན་གྲུབ་བཀྲ་ཤིས་མཆོག་གིས་ཐད་གཏོང་གནང་བྱུང་བར་བཀའ་དྲིན་དཔག་མེད་ཆེ་ཞུ།