འཛམ་གླིང་གྲོས་ཚོགས་འཐུས་མིའི་བོད་དོན་ཚོགས་ཆེན་ཐེངས་ ༥ པ་དེ་ཕྱི་ཚེས་ ༡༨ ཉིན་ནས་ཉིན་གཉིས་རིང་རོམ་ནས་འཚོགས་བཞིན་ཡོད་ལ། ༧གོང་ས་མཆོག་ཚོགས་ཆེན་དེའི་སྟེང་ཕེབས་ཏེ་གསུང་བཤད་གནང་རྒྱུ་རེད།
ཚེས་ ༡༦ ཉིན་སྐུ་སྒེར་ཡིག་ཚང་གི་དྲ་ཐོག་ཏུ་གནས་ཚུལ་སྤེལ་བ་ལྟར་ན། ཉིན་དེའི་ཞོགས་པར་༧གོང་ས་མཆོག་ཨི་ཊ་ལིའི་ལྷོ་ཊེ་རོལ་རང་སྐྱོང་ཁུལ་དུ་ཞབས་སོར་བཀོད་ཡོད་ལ། རང་སྐྱོང་ས་ཁུལ་དེའི་སྲིད་འཛིན་ལོ་སེ་ཌུན་ཝལ་ཌེར་ Luis Durnwalder མཆོག་གིས་བྷོལ་ཛ་ནོ་གནམ་ཐང་ནས་ཕེབས་བསུ་ཞུས་ཡོད་པ་དང་། ས་གནས་མང་ཚོགས་དང་ཡུལ་དེར་གནས་སྡོད་བོད་པ་རྣམས་ཀྱི་གཟབ་རྒྱས་ཕེབས་བསུ་ཞུས་ཡོད་པ་རེད། ཚེས་ ༡༧ ཉིན་༧གོང་ས་མཆོག་གིས་སྲིད་འཛིན་ལོ་སེ་ཌུན་ཝལ་ཌེར་དང་ལྷོ་ཊེ་རོལ་གཞུང་འཛིན་མི་སྣ་རྣམས་ལ་མཇལ་འཕྲད་གནང་ཡོད་པ་རེད། ཉིན་དེའི་ཉིན་རྒྱབ་ཊི་ར་ཊོ་རང་སྐྱོང་མངའ་སྡེ་ཡི་སྲིད་འཛིན་ལོ་རེན་ཛོ་ངྷེ་ལི་ Lorenzo Dellai མཆོག་གི་གདན་ཞུ་ལྟར་ཊི་རེན་ཊོ་ཁྲོ་རང་སྐྱོང་མངའ་ཁུལ་དུ་གཟིགས་སྐོར་ལ་ཕེབས་རྒྱུ་རེད་འདུག
ཊི་རེན་ཊོ་རུ་༧གོང་ས་མཆོག་གིས་ཚོགས་འདུ་ཞིག་གི་སྟེང་གཏམ་བཤད་གནང་རྒྱུ་ཡིན་ལ། ཚོགས་འདུའི་བརྗོད་གཞི་ནི་མངའ་སྡེའི་རང་སྐྱོང་གཞུང་དང་རིག་གཞུང་གི་ངོ་རྟགས། མི་རིགས་མཉམ་གནས་ཀྱི་ཉམས་མྱོང་བཅས་ཀྱིས་བོད་ལ་བསྡུར་བ་ཞེས་པ་དེ་ཡིན་འདུག གོང་གི་རང་སྐྱོང་མངའ་སྡེ་དེ་གཉིས་ཀྱི་སྲིད་འཛིན་རྣམ་གཉིས་ཀྱིས་ཀྱང་ཚོགས་འདུ་དེའི་སྟེང་གཏམ་བཤད་གནང་རྒྱུ་རེད། ཚོགས་འདུ་འདི་ནི་ཊི་རེན་ཊོ་རང་སྐྱོང་མངའ་སྡེ་གཞུང་དང་ཊི་རེན་ཊོ་གཙུག་ལག་སློབ་ཆེན་གྱི་ཚན་རིག་སྡེ་ཚན། བྷོལ་ཛ་ནོ་རུ་ཡོད་པའི་ཡུ་རོབ་ཆེད་ལས་སྡེ་ཁག་བཅས་མཉམ་འབྲེལ་གྱིས་གོ་སྒྲིག་བྱས་པ་ཞིག་ཡིན་འདུག
༧གོང་ས་མཆོག་ལ་ནི་ལྷོ་ཊི་རོལ་རང་སྐྱོང་མངའ་སྡེ་གཞུང་དང་ཊི་རེན་ཊོ་རང་སྐྱོང་གཞུང་གཉིས་ཀྱིས་གདན་ཞུ་གནང་ཡོད་པ་དང་། ཨི་ཊ་ལིའི་བྱང་ཕྱོགས་ཀྱི་རང་སྐྱོང་མངའ་སྡེ་འདི་གཉིས་ལ་དམིགས་བསལ་གྱི་གནས་བབ་ཅིག་ཡོད་འདུག ཕྱི་ཚེས་ ༡༧ ཉིན་༧གོང་ས་མཆོག་ཨི་ཊ་ལི་ཡི་རྒྱལ་ས་རོམ་ལ་ཕེབས་ཡོད་པ་རེད།
ཚེས་ ༡༨ ཉིན་༧གོང་ས་མཆོག་རོམ་དུ་འཚོགས་བཞིན་པའི་འཛམ་གླིང་གྲོས་ཚོགས་འཐུས་མིའི་བོད་དོན་ཚོགས་ཆེན་ཐེངས་ ༥ པའི་སྟེང་ཆིབས་སྒྱུར་གྱིས་གསུང་བཤད་གནང་རྒྱུ་རེད། ཚོགས་ཆེན་འདིའི་སྟེང་ལ་རྒྱལ་ཁབ་ ༢༨ ནས་ཕེབས་པའི་གྲོས་ཚོགས་འཐུས་མི་ ༡༠༠ ལྷག་མཉམ་ཞུགས་གནང་ཡོད་པ་རེད། ཉིན་གཉིས་རིང་གི་ཚོགས་འདུ་འདི་ནི་ཨི་ཊ་ལི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའ་གོ་སྒྲིག་འོག ཨི་ཊ་ལི་ཡི་གྲོས་ཚོགས་འོག་མའི་ཚོགས་ཁང་ནང་འཚོགས་རྒྱུ་རེད། ཨི་ཊ་ལིའི་གྲོས་ཚོགས་འོག་མའི་ཚོགས་གཙོ་ གྷན་ཧྥུ་རན་ཁོ་ ཧྥི་ནི་ Gianfranco Fini མཆོག་གིས་༧གོང་ས་མཆོག་ལ་གྲོས་ཚོགས་འོག་མའི་ཚོགས་ཁང་ནང་དུ་ཕེབས་བསུ་དང་བཅས་མཇལ་འཕྲད་གནང་རྒྱུ་རེད། ཚོགས་གཙོ་དང་རོམ་གྲོང་ཁྱེར་སྤྱི་ཁྱབ་པ་GianniAlemanno རྣམ་གཉིས་ཀྱིས་ཀྱང་ཚོགས་ཆེན་དེའི་སྟེང་གཏམ་བཤད་གནང་རྒྱུ་རེད།
ལོ་འདིའི་ཕྱི་ཟླ་ ༢ པ་སྟེ། ༧གོང་ས་མཆོག་ཐེངས་སྔོན་མར་ཨི་ཊ་ལིར་ཕེབས་སྐབས་གྲོང་ཁྱེར་སྤྱི་ཁྱབ་པ་མཆོག་གིས་༧གོང་ས་མཆོག་ལ་རོམ་གྲོང་ཁྱེར་གྱི་མི་སེར་ཕྱག་རྟགས་དེ་༧གོང་ས་མཆོག་ལ་ཕུལ་ཡོད་པ་རེད།
ཕྱི་ཚེས་ ༡༩ ཉིན་༧གོང་ས་མཆོག་ཕྱིར་ལྡི་ལིར་ཆིབས་སྒྱུར་གནང་རྒྱུ་རེད།
རླབས་ཆེན་གྱི་དབུ་ཁྲིད་ཁོང་སྐུ་ཚེ་སྐལ་བརྒྱར་བརྟེན་པའི་སྨོན་འདུན་ཞུ