བོད་པ་དག་གིས་རྣམ་རྒྱུན་དུ་འཚོ་བའི་ནང་དུ་ཟས་ལྷག་འཇོག་སྲོལ་མེད་པ་ནི། བོད་ཁུལ་ཡོངས་སུ་གཅིག་མཚུངས་ཡིན་ཟེར་ན་འགྲིག་པ་མ་ཟད། དེའི་བག་ཆགས་དེ་ཡི་རྐྱེན་པའི་ང་རང་ཡང་འཚར་ལོངས་ཀྱི་རྒྱུད་རིམ་ནང་དུ་རང་གི་ཕོར་བ་ལས་ཟས་འབྲུ་ལྡོག་གཅིག་ཡིན་ཡང་། ས་རུ་འཕོ་བ་དང་རྐང་རྫུས་བྱེད་པ་སོགས་བྱེད་ཐུབ་ཀྱི་མེད་ལ། དེ་ནི་ལས་འབྲས་དང་སྐྱེ་བ་སྔ་ཕྱི་ལ་ཡིད་ཆེས་བྱེད་མཁན་གྱི་བོད་པ་ཚང་གི་གོམས་གཤིས་བཟང་བོ་ཞིག་རེད་ཟེར་ན་འགྲིག་པ་དང་། དེ་ལྟར་བྱེད་པ་ནི། འབྲུ་རིགས་འདེབས་མཁན་གྱི་ཞིང་བ་ཆེས་མང་བོ་ཞིག་གི་དྲིན་ལན་ལ་ཆེད་དུ་བསམ་ཤེས་བྱས་པ་རེད་ཟེར་རྒྱུ་ཁག་ན་ཡང་། དོན་དངོས་ཐོག་དེ་འདྲ་བསམ་ཤེས་རེད་ཟེར་ན་འགྲིག འོན་ཀྱང་། ཆོས་ལུགས་ཡོད་ཀྱང་ཚེ་སྔ་ཕྱི་མི་བསམ་པ་དང་དགེ་སྡུག་སྤང་ལུང་བཤད་ཤེས་མཁན་གྱི་མི་གྲངས་མང་དུ་འཕེལ་བཞིན་དེང་གི་འཛམ་གླིང་གསར་བ་འདིར་ཟས་ལྷག་འཇོག་མཁན་ནི་དེང་རབས་ཅན་གྱི་རྒྱལ་ཁབ་ལས་མང་བོ་ཞིག་བྱུང་དུ་ཡོད་ལ། འཛམ་གླིང་འདིར་སྐྱེ་བོ་ཁྲི་ཕྲག་མི་ཉུང་བ་ཞིག་ཉིན་རེ་བཞིན་ཟས་སྐོམ་གྱི་སྡུག་བསྔལ་འོག་ནས་ཤི་བཞིན་ཡོད་པ་རེད།
ཕྱོགས་དངོས་གཞན་ཞིག་ནས་གླེང་བ་ཡིན་ན། འབྲུ་ལྡོག་གཅིག་ཕར་ཞོག ཟས་ཀྱི་བཟང་ངན་དང་ཤ་ཡི་ཞིམ་འདུག ཟ་མའི་བྲོ་བ་ཆེ་མིན་ལས་ཟ་མ་འདི་རང་གི་ལག་ནང་དུ་སླེབས་རེག་བར་གྱི་མི་ཆེས་མང་བོ་ཞིག་རྔུལ་ཆུའི་རྒྱུད་རིམ་ཁྲོད་ནས་ཐོན་སྐྱེད་བྱེད་ཀྱི་ཡོད་པ་སོགས་ལ་བསམ་བློ་ཞིག་གཏན་ནས་འཁོར་གྱི་མེད་པ་དང་། དེ་དག་གི་ལོ་ཟླའི་དཀའ་ཚེགས་གྲངས་མེད་ཅིག་རྒྱུད་དེ་ད་གཟོད་ལོངས་སུ་སྤྱོད་རྒྱུའི་སྐལ་བ་དེ་ལྡན་པར་བསམ་བློ་གཏོང་གི་མེད་ལ། བསམ་བློ་གཅིག་རང་གཏོང་བཞིན་ཡོད་པ་དེ་ནི་ངས་སྒོར་མོ་སྤྲད་དེ་ཉོས་པ་ཡིན། དེ་ནི་ཞིམ་པོ་མེད་ན་ཟ་འདོད་མིན་དེ་ནི་རང་ཉིད་ཀྱི་ཐག་གཅོད་བྱེད་ཆོག་པར་འདོད་ཀྱི་ཡོད་པ་དེའི་དབང་གིས་དེང་རབས་པ་ཆེས་མང་བོ་ཞིག་གིས་ཟ་མ་འདི་ལྟར་འཕྲོ་བརླག་དུ་གཏོང་བཞིན་ཡོད་ལ། ཉིན་རེ་བཞིན་འཛམ་གླིང་འདིར་ཟས་སྐོམ་འོག་འཆི་བཞིན་པའི་སྐྱེ་བོ་དེ་དག་གི་འཚོ་བ་དང་། རང་གི་འཚོ་བ་དེ་ཡང་འཛམ་གླིང་གི་མིའི་རིགས་དང་འབྲེལ་བ་དམ་ཟབ་ཡོད་པ་ཞིག་གཏན་ནས་ཚོར་ཐུབ་ཀྱི་མེད་པ་རེད།
སྤུན་ཟླ་ཚོ། ཁྱེད་ཅག་གི་ཞིབ་དུ་གཟིགས་དང་། འདྲ་དཔར་འདི་དག་ནི་དེང་སང་ཚོང་ཡག་པོ་མེད་དུས་ཀྱི་ཟ་ཁང་ཞིག་གི་ནང་གི་སྐུ་མགྲོན་དག་གིས་ཟས་ལྷག་གི་རྣམ་པའི་ཟུར་ཞིག་རེད། གལ་སྲིད། འུ་ཅག་བོད་པ་མི་ཉུང་བ་ཞིག་གི་གོམས་གཤིས་ནང་དུ། ཐ་ན་རང་གི་བ་མའི་ནང་གི་ཟས་འཕྲོ་ཉུང་ངུ་ཞིག་ཀྱང་འཇོག་སྲོལ་མེད་པར་གཙང་མ་བྱེད་ཀྱི་ཡོད་ན། ཁྱེད་ཅག་གི་འདི་དག་གིས་ཟས་ལ་གདེང་འཇོག་མེད་པའི་འདྲ་དཔར་འདི་དག་མཐོང་དུས་ག་རེ་དྲན་གྱི་འདུག་ལགས།
སྔོན་ཆད་ཅིག་ལ་དྲ་ཐོག་གི་སྤུན་ཟླ་ཞིག་གིས་རང་གི་ཕོར་བའི་ནང་གི་འབྲས་ལྡོག་གཅིག་གི་སྐོར་ཞིག་གླེང་མྱོང་ཡོད་ཀྱང་། དེ་དུས་སྤུན་ཟླ་མི་ཉུང་བ་ཞིག་གིས་དེ་ལ་ཞེ་དྲགས་བསམ་ཚུལ་གང་ཡང་གསུངས་མ་སོང་། ད་རེབས་སྤུན་ཟླ་དག་གིས་ཟས་ལྷག་གི་སྐོར་ལ་རང་རང་གི་གང་དྲན་པ་དག ཞིབ་དུ་གསུང་རྒྱུར་རེ་བ་ཡོད་ལགས།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
ཟ་ལེ་རྒྱལ་ལགས། མི་ལ་ལྟོག་སྐོམ་ཡོང་མ་མྱོང་བ་ཡིན་ན། ཟས་ལྷག་གང་འདོད་དུ་བཞག་ན་འགྲིག་གི་ཡོད་པ་རེད་དམ་ལགས། ཟས་ལྷག་འཇོག་པ་དེ་ནི་འཕྲོད་བསྟེན་ལ་བསམ་ནས་བཞག་པ་རེད་དམ་ལགས། བོད་མི་རིགས་ལས་སེར་སྣ་ཚ་བ་ཞིག་མེད་པ་རེད་དམ་ལགས། དེས་ན་སྐུ་ཉིད་ཀྱིས་རང་གི་ཕྲུ་གུའི་ཟ་མར་ལྡོག་རྫུས་བྱེད་པ་རིག་ན་གང་ཞིག་བཤད་རྩིས་ཡིན་ནམ་ལགས། ཟས་ལྷག་བཞག་དུས་འཕྲོད་བསྟེན་ཡིནཔ་རེད་ཅེས་བསླབ་བྱ་རྒྱག་རྒྱུ་ཡིན་ནམ་ཅི་ལགས།
ཟས་ལྷག་མི་འཇོག་པ་དེ་ང་ཚོ་ཚང་མ་ང་བརྒྱད་ལོར་ལྟོགས་ནས་ལྡེབས་ཤི་བྱས་བའི་བོད་པ་དེ་དག་གི་རྣམ་ཤེས་ཡིན་པའི་ཁར། སློབ་སྟོན་པ་ཚོའང་ང་བརྒྱད་ལོའི་ལྟོགས་སྐོམ་མྱངས་བའི་བོད་པ་ཚོ་ཡིན་པས་ཟས་ལྷག་འཇོག་མ་ཐུབ་པ་ཡིན་ས་རེད། གྲོད་ཁོག་བརྒྱགས་ནའང་ཟས་ལྷག་ལ་སེར་སྣ་སྐྱེས་ཏེ་ཨུ་ཚུགས་ཀྱིས་ཟ་བ་དེས་གཟུགས་པོར་གནོད་ཀྱིན་ཡོད་ས་རེད། ཟ་མ་འཕྲོ་བརླག་དང་གཟུགས་པོ་འཕྲོ་བརླག་གཉིས་ཀར་གདམས་ཀ་བྱེད་ཤེས་དགོས་བ་འདྲ།