ཧྥ་རན་སིར་བོད་ཀྱི་དཔལ་ཡོན་སློབ་གྲྭ་ཞེས་པ་ཞིག་གསར་འཛུགས་བྱས་ཡོད་ལ། སློབ་གྲྭ་འདི་བརྒྱུད་དེ་བུ་ཕྲུག་ཚོ་བོད་སྐད་དང་བོད་ཡིག་འབྲི་ཀློག་ཐུབ་མཁན། གཤིས་ཀ་ཡང་བོད་མི་སྤྱི་མཚུངས་ལྟར་ཡོང་ཐབས་བྱེད་ཀྱི་ཡིན་ཟེར།
ཟླ་འདིའི་ཚེས་ ༣ ཉིན་ཧྥ་རན་སི་བོད་རིགས་ཚོགས་པས་རྒྱལ་ས་ཕ་རི་སིའི་ནང་བོད་ཀྱི་དཔལ་ཡོན་སློབ་གྲྭ་ཞེས་པ་ཞིག་གསར་འཛུགས་གྱིས་དངོས་སུ་འཛིན་གྲྭ་ཚོགས་མགོ་ཚུགས་ཡོད་ལ། སློབ་གྲྭ་འདིས་ཚེས་གྲངས་གཏན་འབེབས་ཀྱིས་རེས་གཟའ་ཉི་མ་དག་ལ་བོད་ཕྲུག་ཚོར་བོད་ཀྱི་དཔལ་ཡོན་མཚོན་བྱེད་ཀྱི་རིག་གནས་སྣ་ཚོགས་སློབ་ཁྲིད་བྱ་རྒྱུ་ཡིན་ཞིང་། དེ་དག་གི་ནང་བོད་ཀྱི་བརྡ་སྤྲོད་སློབ་ཁྲིད་དང་། ནང་ཆོས་ཀྱི་རྨང་གཞིིའི་ཤེས་བྱ་མཚམས་སྦྱོར། བོད་ཀྱི་ལོ་རྒྱུས་མདོར་བསྡུས། བོད་ཀྱི་ཟློས་གར་རིག་གཞུང་ངོ་སྤྲོད། དེ་མཚུངས་བོད་ཀྱི་ཞལ་ལག་བཟོ་སྟངས་དང་། གྱོན་གོས་གོན་སྟངས། རྩེད་མོ་རྩེ་སྟངས་སོགས་ཀྱང་སྟབས་བསྟུན་གྱིས་བསླབ་རྒྱུ་ཡིན་འདུག བོད་རིགས་ཚོགས་པའི་ཚོགས་གཙོ་ཐུབ་བསྟན་རྒྱ་མཚོ་ལགས་ཀྱིས་ངོ་སྤྲོད་གནང་བ་ལྟར་ན། སློབ་གྲྭ་དེ་ནི་ཧྥ་རན་སིར་གནས་སྡོད་བོད་པའི་བུ་ཕྲུག་ཚོ་བོད་སྐད་དང་བོད་ཡིག་འབྲི་ཀློག་ཐུབ་མཁན། ཁོ་ཚོའི་གཤིས་ཀའང་བོད་མི་སྤྱི་མཚུངས་ལྟར་ཡོང་སླད་བཙུགས་པ་ཡིན་ཞིང་། རྒྱལ་ས་ཕ་རི་སིའི་ས་ཁུལ་བཅུ་གཅིག་པའི་གྲོང་ཁྱེར་སྲིད་གཞུང་ནས་སློབ་གྲྭའི་འཛིན་ཁང་དང་སློབ་ཆས་ཀྱི་མཐུན་འགྱུར་རོགས་རམ་གནང་ཡོད་པར་མ་ཟད། འབྱུང་འགྱུར་གྱི་ཟླ་དྲུག་གི་རྗེས་སུ་སློབ་གྲྭ་ཚོགས་དུས་ཀྱི་དུས་ཚོད་ཀྱང་མང་དུ་གཏོང་བར་ཞལ་བཞེས་གནང་ཡོད་འདུག
བོད་ཀྱི་དཔལ་ཡོན་སློབ་གྲྭའི་འཛིན་གྲྭ་ཚུགས་དུས་ནི་རེས་གཟའ་ཉི་མ་དག་གི་སྔ་དྲོའི་ཆུ་ཚོད་བཅུ་བ་ནས་ཉིན་གུང་ཆུ་ཚོད་དང་པོའི་བར་ཡིན་ཞིང་། སློབ་གྲྭ་འདིར་ད་ལྟའི་ཆར་དངོས་སུ་ཐོ་འགོད་བྱེད་མཁན་རང་ལོ་ལྔ་ནས་བཅུ་བཞི་བར་གྱི་བོད་ཕྲུག་སུམ་ཅུ་སོ་གསུམ་ཡོད་འདུག བོད་ཕྲུག་དེ་དག་འཛིན་རིམ་དབྱེ་སྟངས་དང་འཛིན་གྲྭ་ཚོགས་སྟངས། སློབ་གཞི་གཏན་འབེབས། དགེ་རྒན་གོ་སྒྲིག་བྱེད་ཕྱོགས་ཐད་བོད་རིགས་ཚོགས་པའི་ཤེས་ཡོན་འགན་འཛིན་མགོན་པོ་བཀྲ་ཤིས་ལགས་ཀྱིས་ ༼ ད་ཡོད་བོད་ཕྲུག་ཚོའི་ལོ་ཚོད་དང་ཤེས་ཚད་དོ་མི་མཉམ་པར་བརྟེན་ང་ཚོས་སྐད་ཡིག་གི་འཛིན་རིམ་གསུམ་དུ་ཕྱེས་ཡོད། རང་ལོ་ལྔ་ནས་བདུན་བར་གྱི་ཕྲུ་གུའམ་བོད་ཡིག་ཁྱོན་ནས་སྦྱང་མྱོང་མེད་མཁན་ཚོ་འཛིན་རིམ་དང་པོའི་ནང་བཞག་ནས་བོད་ཡིག་ཀ་ཁ་ནས་མགོ་བཙུགས་ནས་བསླབ་རྩིས་ཡོད། དེའི་སློབ་གཞི་དགེ་རྒན་རང་ནས་གོ་སྒྲིག་བྱེད་ཀྱི་ཡོད། དེ་ནས་དེ་སྔ་བོད་རིགས་ཚོགས་པའི་བོད་ཡིག་འཛིན་གྲྭར་འགྲོ་མཁན་ཚོ་གཞིར་བཞག་ནས་བོད་ཡིག་ཅུང་སྦྱང་མྱོང་མཁན་ཚོ་འཛིན་རིམ་གཉིས་པར་བཞག་ཡོད། འདིའི་དགེ་རྒན་གཏན་འཇགས་ཡིན། སློབ་གཞི་བོད་གཞུང་གི་འཛིན་རིམ་བཞི་བ་དང་ལྔ་བའི་སློབ་དེབ་ཁག་ཡིན། རྒྱ་གར་ནང་བོད་གཞུང་གཏན་སློབ་དང་བོད་ཕྲུག་ཁྱིམ་སྡེ་ནང་སོང་ནས་བོད་ཡིག་གི་རྨང་གཞི་ཡོད་མཁན་ཚོ་འཛིན་རིམ་གསུམ་པའི་ནང་བཞག་ཡོད། ཁོ་ཚོར་བོད་ཀྱི་བརྡ་དག་དང་སུམ་རྟགས་བཤད་ཁྲིད་གཙོ་བོར་བྱ་རྩིས་ཡོད། བསླབ་གཞི་ལ་ལྟོས་ནས་དགེ་རྒན་ཀྱང་རེས་མོས་བྱ་རྩིས་ཡོད། སྐད་ཡིག་གི་འཛིན་གྲྭ་སྔ་དྲོ་ཆུ་ཚོད་.jpg)
བཅུ་བ་ནས་བཅུ་གཅིག་བར་ཡིན། དེ་ནས་ནང་ཆོས་ངོ་སྤྲོད་དང་། ལོ་རྒྱུས་བཤད་ཁྲིད། ཟློས་གར། བོད་ལུགས་ཀྱི་རི་མོ་འབྲི་སྟངས་སོགས་རེས་མོས་ཀྱིས་སྔ་དྲོ་ཆུ་ཚོད་བཅུ་གཅིག་ནས་བཅུ་གཉིས་པར་བསླབ་རྩིས་ཡོད། ཕྲུ་གུ་ཚོ་བོད་སྐད་དང་བོད་ཡིག་འབྲི་ཀློག་ཐུབ་མཁན། བོད་མིའི་གཤིས་ཀ་འཇགས་སླད་སློབ་ཁྲིད་གཅིག་པུའི་སྒང་ནས་ཡོང་རྒྱུ་ཁག་པོ་རེད། གཙོ་བོ་ཁོ་ཚོར་རང་གིས་གང་སྦྱང་ཤིང་གང་ཤེས་པ་དེ་བེད་སྤྱོད་ཀྱི་ཁོར་ཡུག་ཅིག་བསྐྲུན་རྒྱུ་གལ་ཆེན་པོ་རེད། དེར་བརྟེན་ཐ་མའི་དུས་ཚོད་གཅིག་དེ་ཁོ་ཚོར་རང་མོས་ཁོར་ཡུག་ཅིག་བསྐྲུན་ནས་ཕན་ཚུན་ལ་བོད་སྐད་བཤད་བཅུག་ནས་རྩེད་མོའི་རིགས་དང་། བོད་ཀྱི་ཞལ་ལག་བཟོ་སྟངས། གྱོན་གོས་གོན་སྟངས་སོགས་སྟབས་བསྟུན་གྱིས་བསླབ་འཆར་ཡོད། ད་ཡོད་སྐད་ཡིག་དང་ཟློས་གར། རི་མོ་བསླབ་མཁན་གྱི་དགེ་རྒན་བརྒྱད་ལྷག་ཡོད་པ་ཚང་མ་དེ་སྔ་དགེ་རྒན་གྱི་ཉམས་མྱོང་ཡོད་མཁན་རྐྱང་རེད། མ་འོངས་པར་བོད་ཀྱི་དཔལ་ཡོན་སློབ་གྲྭའི་ཕྲུ་གུ་ཚོས་ལོ་སར་དང་སྐུའི་འཁྲུངས་སྐར། དེ་མིན་བོད་རིགས་ཚོགས་པའི་གོ་སྒྲིག་བྱེད་བཞིན་པའི་བོད་ཀྱི་རིག་གཞུང་འདུ་འཛོམས་སྟེང་བོད་ལུགས་ཀྱི་ཞབས་གཞས་སྣ་གཉིས་གསུམ་རེ་སྤྱན་གཟིགས་འབུལ་ཐུབ་པའི་རེ་བའང་བྱེད་ཀྱིན་ཡོད་༽ ཅེས་སློབ་གྲྭའི་བྱེད་སྒོ་ཁག་ཞིབ་ཚགས་ཀྱིས་ངོ་སྤྲོད་གནང་སོང་།
བོད་ཀྱི་དཔལ་ཡོན་སློབ་གྲྭ་ལམ་ལྷོང་དང་ཚགས་ཚུད། རྒྱུན་གནས་ཐུབ་ཐབས་སུ་ཕ་མ་ཚོས་བོད་རིགས་ཚོགས་པ་དང་མཉམ་རུབ་བྱེད་ཀྱི་ཡོད་འདུག ད་ལྟའི་ཆར་ཁོ་ཚོས་ཕ་མའི་ཚོགས་ཆུང་ཞིག་ཟུར་དུ་བཙུགས་ནས་དུས་ཚེས་ལྟར་ཕྲུ་གུ་ཚོ་སློབ་གྲྭར་བསྐྱལ་ལེན་གྱི་འགན་འཁུར་གྱིན་པར་མ་ཟད། སློབ་ཕྲུག་ཚོའི་སློབ་ཆས་དང་རོལ་མོ། འཁྲབ་ཆས་སོགས་གང་མཁོའི་མཐུན་རྐྱེན་རྣམས་ཕ་མ་རང་ངོས་ནས་སྒྲུབ་ཀྱི་ཡོད་འདུག ཕ་མའི་ཚོགས་ཆུང་གིས་ཕྲུ་གུ་སུ་ཞིག་རྒྱུ་མཚན་ངེས་ཅན་མེད་པར་ལོ་གཅིག་ནང་འཛིན་གྲྭར་ཐེངས་གཉིས་ཆད་ན་ཕྲུ་གུའི་ཕ་མས་ཉེས་ཆད་དུ་ཡོ་སྒོར་ཉེར་ལྔ་རེ་འབུལ་དགོས་པའི་སྒྲིག་གཞི་ཞིག་ཀྱང་བཟོས་ཡོད་འདུག
འདས་པའི་ལོ་ཤས་ནས་བཟུང་ཧྥ་རན་སིར་བོད་མི་གནས་སྤོ་བྱེད་མཁན་ཇེ་མང་སོང་དུ་སྟེ། ད་ལྟའི་ཆར་རྒྱལ་ས་ཕ་རི་སི་གཅིག་པུའི་ནང་ཁ་ཐོར་བོད་མི་དགུ་བརྒྱ་ལྷག་ཡོད་འདུག་ལ། དེའི་ནང་རང་ལོ་བཅུ་དྲུག་མན་གྱི་བོད་ཕྲུག་བརྒྱད་ཅུ་ཙམ་ཡོད་འདུག
ཡུ་རོབ་ས་གནས་གསར་འགོད་པ། ཟླ་བ་ཚེ་རིང་།
བོད་ཀྱི་དཔལ་ཡོན་མཐར་ཐོན་ཤོག །
གྲོགས་པོ་ཅོ་རི་ལགས་ ང་ཚོའི་ཚོགས་གཙོ་་ཐུབ་བསྟན་ལགས་ནི་པར་དང་པོ་ནང་གི་ རྒྱབ་ལ་བཞེངས་ནས་ཡོད་པའི་གཡས་ནས རྩི་ན་དགུ་པ་དང་ གཡོན་ནས རྩི་ན་བརྒྱད་་པ་ སྟོད་གོས་ སྨུག་མདོག་ལ་ གོང་ཤན་ དམར་སེར་ཅན་ དབུ་ འཁྱོག་ནས་ཡོད་པ་དེ རེད ལགས།
ད་དངོས་གནས་རྒན་བསེ་རུ་ནི་སྟོར་ཚར་འདུག་ དག་ཆ་ནི་ཁྱོད་རྫིག་ང་རྫིག་རྐྱང་དོན་ཡོང་གི་འདུག་། ཨ་ཙི་སྐུ་རྩེད་ཡིན།
བདེན་བདེན་བྱམས་རྒྱལ་ལགས་ཡང་ནོར་ཡིག་བྲིས་ཚར་འདུག་དྲ་གྲོགས་བསེ་རི་ཕེབས་ང་སྐྲག་གིན་འདུག
གྲོགས་བྱམས་རྒྱལ་ལགས་ཚོགས་གཙོ་ཐུབ་བསྟན་རྒྱལ་མཚོ་ལགས་དང་ཐོས་འཛིན་རྣ་བའི་ཡུལ་དུ་གོ་མྱོང་ཡང་ཁྲ་ཆུང་མིག་གིས་དངོས་སུ་མཇལ་མྱོང་མེད།
ཁྱེད་ཀྱིས་ང་ལ་ཐུབ་བསྟན་སྐུ་པར་ངོ་སྤྲད་གནང་རོགས།
ང་ལ་མིག་ཡོད་ཀྱང་དམ་པ་ངོ་མི་ཤེས་།
ད་ཐེངས་སློབ་གྲ་འདི་བཞིན་དབུ་འཛུགས་ཐུབ་པར་ཡོད་རྒུ་རྩལ་སྤྲུགས་ཀྱི་ནུས་པ་འདོན་མཁན་གཙོ་བོ་ས་གནས་བོད་རིགས་ཚོགས་པའི་ཚོགས་གཙོ་བཀའ་དྲིན་ཅན་ཁོ་བོའི་གྲོགས་པོ་ཐུབ་བསྟན་རྒྱ་མཚོ་དང་ ཚུལ་ཁྲིམས་བཟོད་པ་ བསྟན་འཛིན་ དེ་བཞིན་ རྒྱུན་ལས་རྣམ་པ་ ཤེས་ཡོན་འགན་འཛིན་ གྲོགས་པོ་མགོན་པོ་བཀྲ་ཤིས། གྲོགས་པོ་ བསམ་བསྟན། ཕ་མའི་ཚོགས་ཆུང་གི་ཉི་མ་དང་ གཞན་གཉིས་ངོ་ཤེས་ཀྱང་ མིང་དྲན་གྱི་མི་འདུག་ བཅས་ཚང་མ་ལ་ཐུགས་རྗེ་ཆེ་ཞུའོ།
ད་དུང་ཕ་མ་འགའ་ཤས་ཀྱིས་བུ་ཕྲུག་སློབ་གྲ་བཏང་མི་འདུག་པས་བློ་ཕམ་ཡོད་།
དགེ་རྒན་ཚང་མ་དངས་བླངས་ཡིན་འདུག་པས་དམིགས་བསལ་ཐུགས་རྗེ་ཆེ་ཞུ།
ལས་འགུལ་འདི་རྒྱུན་འཁྱོངས་ཡོང་བའི་སྨོན་ལམ་གྲངས་མེད་ཞུའོ།
ཨ་ལ་ལ་ལ། བོད་གངས་ཅན་གྱི་བུ་ཕྲུག་ཟེར་དུས་འདྲ་རྒྱུ་ཞིག་མི་འདུག གང་ས་འདི་ལྟར་གནང་ན་དངོས་གནས་བོད་ཟེར་བ་འདི་ལ་རེ་བ་མེད་ཀི་ཟེར་བ་རྫུན་དུ་སོང་འདུག སློབ་གྲྭ་གསར་འཛུགས་བྱེད་པར་ཐོག་མའི་བསམ་འཆར་འདོདན་མཁན་དང་དེ་དང་ཕྱོགས་མཚུངས་སུ་རབ་འདེགས་གནང་སྟེ་སློབ་གྲྭ་གསར་པ་བསྒྲུབས་པའི་ལས་ཀྱི་སྣེ་མོ་བ་ཡོང་ལ་ཐུགས་རྗེ་ཞུ། ཨོ་རེད། འདྲ་པར་དང་པོ་དེའི་ནང་ན་ངོ་ཤེས་འགའ་ཡང་འདུག ས་དཀར་འོད་ཟེར་དང་ཁ་སྒང་བསམ་གཏན། ས་དཀར་འོད་ཟེར་གྱི་བུ་མོ་གཉིས་དང་གཡུང་དྲུང་འབུམ་གྱི་བུ་བཅས་འདུག ཡུན་རིང་ཞིག་ལ་རིག་མ་སོང་། ཆེན་པོ་ཆགས་འདུག་དཱ། ཁྱེད་རྣམ་པའི་བསམ་དོན་ཡིད་བཞིན་འགྲུབ་པ་དང་སློབ་གྲྭ་ཡར་རྒྱས་གོང་འཕེལ་ཡོང་བར་སྨོན།
དེ་ནི་ཧ་ཅང་གི་དགའ་འོས་བའི་དོན་བཟང་ཞིག་རེད། ང་ཚོ་ཡུལ་གྱར་བོད་པའི་སྤྱི་ཚོགས་ཁྲོད་དུའང་བོད་ཀྱི་སྐད་ཡིག་ལ་ནག་ནོག་གི་དྲི་མས་སྦགས་ཏེ་རིལ་དྲི་ཞིག་ཀུན་ནས་འཐུལ་བཞིན་པའི་སྐབས་འདིར། ཡུལ་འདིར་བོད་ཀྱི་སྐད་ཡིག་དང་གོམས་གཤིས་སོགས་མི་ཉམས་རྒྱུན་འཛིན་གྱི་ཆེད་དུ་འདི་འདྲའི་སློབ་གྲྭ་ཞིག་བཙུགས་པར་རྟེན་འབྲེལ་ཞུ་བ་དང་སྐུ་ཚེ་བརྟན་པའི་སྨོན་ལམ་འདེབས་ཀྱི་ཡིན།
ཨོ་ཡག་བྱུང་། འུ་ཚང་ལ་རེ་བ་ཞིག་ཡོད་རྒྱུ་རེད་བསམ་ཀི མ་འོངས་པའི་སོན་རྩ་དེ་ཚོས་བོད་ཀྱི་སྲོག་རྩ་སྦྱང་བཞིན་འདུག་ག
ཐོག་མ་དེར་ཧྥ་རན་སིར་གནས་བཞུགས་བོད་རིགས་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ།འདི་ནི་བྱ་བ་བཟང་པོ་ཞིག་རེད་ཕ་མ་ཚོས་ཀྱང་མུ་མཐུད་རྒྱབ་སྐྱོར་གནང་རོགས་གནང།
བོད་རིགས་ཚོགས་པའི་ངོས་ནས་སློབ་གྲྭ་འདི་མུ་མཐུད་འཇུག་སྐྱོང་ཐུབ་པ་གནང་རོགས།
ང་ལ་རེ་བ་ཞིག་ཡོད་པ་ནི། དེ་ནས་ཁྱེད་ཚོས་དགེ་རྒན་བཙལ་དུས་འདི་ཕྱོགས་ཀྱི་སློབ་སྤྱི་འགས་བཙལ་སྟངས་ནང་བཞིན་བཙལ་ན་ཡར་རྒྱས་མེད་པ་ཐག་གཅོད་ཐུབ། དགེ་རྒན་ཡག་པོ་ཞིག་བཙལ་ན་ཡར་རྒྱས་མ་སོང་ཐབས་མེད་རེད། གཟབ་དགོས་ས་དེ་རེད།
རྗེས་སུ་ཡི་རང་ཡོད།
ང་ཚོས་ནམ་ཡིན་ཡང་། ལས་ཀ་ཞིག་ག་འདྲ་བྱས་ནས་མགོ་རྩོམ་ཐུབ་རྒྱུ་དེ་མ་ཡིན་པར།
ཅི་ལྟར་མཇུག་སྐྱོང་རྒྱུ་དེར་བསམ་བློ་གཏོང་དགོས་པ་གལ་ཆེན་པོ་རེད་བསམ།
རླབས་ཆེན་གྱི་ཕྱག་ལས་དེ་རྒྱུན་སྐྱོང་ཐུབ་པའི་རེ་བ་དང་སྨོན་འདུན་ཞུ།
རྒྱ་གར་དང་བལ་ཡུལ་དུ་ཡོད་བོད་མི་ནུབ་ཕྱོགས་ཡུལ་དུ་མགྱོགས་པོ་ཕེབས་ཤོག་ཞེས་རེ་བ་དང་ང་རང་ཚོ་ས་ཆ་ཡག་ས་འདིར་མཉམ་འཛོམ་ཡོང་བའི་སྨོན་ལམ་ཡོད།
ནུབ་ཕྱོགས་སུ་ཡོད་པའི་བོད་ཕྲུག་ཚོས་བོད་སྐད་བོད་ཡིག་གི་འགྲན་བཟོད་ན་ཡར་རབ་སྤྱོད་བཟང་ཐོག་ནས་རྒྱ་གར་པའི་གཡོ་རྒྱུ་ཁྲམ་གསུམ་གྱི་ངན་གོམས་དེར་དང་བྲལ་ནས་ཐར།་ ད་བུ་ཕྲུག་འདི་ཚོ་ཡག་པོ་ཆགས་ཀྱིན་རེད
ནུབ་ཕྱོགས་ཡོད་པའི་བོད་ཕྲུག་དང་རྒྱ་གར་ཡོད་པའི་བོད་ཕྲུག་གཉིས་ལོ་བཅུའི་རྗེས་སུ་བོད་སྐད་དང་བོད་ཡིག་འགྲན་བསྡུར་བྱ་ཀྱིས་ཡིན་ནོ།ཧཧཧཧཧ
ལས་དོན་འདི་ལ་ཡི་རང་དགའ་བསུ་ཞུ་རྒྱུ་ཡིན་པར་མ་ཟད། རྒྱུན་སྐྱོང་ཐུབ་པའི་སྨོན་འདུན་ཀྱང་ཞུས་པ་ཡིན།
ཨོ་དེའི་བར་ཞིག་ན་མགོན་པོ་བཀྲིས་ཀྱང་ཡོད་པ་འདྲ།གལ་སྲིད་ཁོང་ཡིན་ན་རྒྱགས་པ་ཆགས་འདུག
འདིའི་ནང་ན་གཡས་གཡོན་གྱི་སྣེ་གཉིས་ན་ཡོད་པའི་རྒན་བསམ་གཏན་དང་ས་དཀར་འོད་ཟེར་གཉིས་མ་གཏོགས་ངོ་ཤེས་ཀྱི་མི་འདུགཡིན་ནའང་ཁོང་ཚོའི་དམིགས་ཡུལ་དང་ལྷག་བསམ་ལ་ཡི་རངས་ཡོད།ཁོང་ཚོའི་གཟི་བརྗིད་ལྡན་པའི་ལས་ཀ་ལ་གྲུབ་འབྲས་ལྡན་པར་སྨོན།
ནོར་བཅོས། ཤེར་བ། ཟེར་བ། འབྲེལ་ཡོད།
ཧྥ་རན་སིར་བོད་ཀྱི་དཔལ་ཡོན་སློབ་གྲྭ་ཤེར་བ་ཞིག་གསར་འཛུགས་གནང་བ་དེར་སེམས་གཏིང་ནས་བསྔགས་བརྗོད་ཡོད་ལ་འྦེལ་ཡོད་ཚང་མར་ཐུགས་རྗེ་ཆེ་ཞུ་འདོད་བྱུང་།
གང་ཡིན་ཟེར་ན་ཕྱི་རྒྱལ་དུ་བོད་པའི་བོད་རིགས་ཚོས་ངེས་པར་དུ་བོད་ཀྱི་སྐད་ཡིག་དང་། རིག་གཞུང་། ནང་ཆོས། སྲིད་དོན། སྨན་རྩིས། སྒྱུ་རྩལ། རྩོམ་རིག ཟློས་གར། ཆས་གོས་སོགས་བོད་ཀྱི་ཐུན་མོང་མ་ཡིན་པའི་བོད་མི་རིགས་འདི་ཁྱད་ཆོས་རྣམས་མི་ཉམས་རྒྱུན་འཛིན་བྱེད་པ་དགོས།
ལར་ནས་གངས་ཅན་པ་ཟེར་བའི་བོད་མི་རིགས་འདི་འཛམ་གླིང་ནང་མ་ཤི་སོན་གནས་ཐུབ་པར་འབད་དགོས་ལ་དེ་ཡང་བོད་ཀྱི་ལོ་ཆུང་བྱིས་པ་ཚོ་གལ་འགངས་ཆེན་པོ་ཞིག་ཆགས་ཀྱི་ཡོད་སྟབས་ང་ཚོ་བོད་རིགས་ཚང་མས་མི་རེ་ངོ་རེ་ངོས་ནས་ལས་འགན་ཞིག་འཁུར་ཏེ་བོད་མི་རིགས་ཟེར་བ་དེ་ཕྱིས་འབྱུང་འཛམ་གླིང་སྟེང་དུ་ཡར་ལངས་ཐུབ་པར་འབད་དགོས།
བོད་ཀྱི་ཤེས་རིག་ནི་བོད་མི་རིགས་ཀྱི་ཁྱད་ཆོས་ཡིན་ལ་བོད་ཀྱི་ན་གཞོན་རྣམས་བོད་མི་རིགས་ཀྱི་སྲོག་རྩ་ཡིན་སྟབས་བོད་རིགས་ཀྱི་ཚེ་སྲོག་ལ་ཁྱད་ཆོས་སོན་ཉམས་ལྡན་པ་ཞིག་ངེས་པར་དུ་དགོས།
བོད་ཀྱི་ཆོས་རིག་སྨན་པའི་བྱ་ཞིག་རེད་དེས་ནས་དགའ་སྤོབས་སྐྱེ་འོས་ལ་ཐུགས་རྗེ་ཆེ་ཞུ་རྒྱུ་ཡིན། ཧྥ་རན་སི་བོད་ཀྱི་དཔལ་ཡོན་སློབ་གྲྭ་ཚགས་ཚུད་ལམ་ལྷོང་ཐོག་བོད་ཀྱི་ཆོས་རིག་ལ་སྲི་ཞུ་ཡོང་བའི་ཡིད་ཆེས་དང་སྤོབས་པ་ཡོད།
ངོ་མ་དགའ་འོས་པའི་དོན་དག་ཅིག་རེད།