ཁྱེད་རང་སུ་ཡིན་ཟེར་ནས་ཁ་པར་འཇོག་མཁན་གྱི་མི་དེར་བློ་བཟང་གིས་སྐད་ཆ་དྲིས། མི་དེས་ཁྱེད་རང་ལ་སུ་དགོས་ཀྱི་ཡོད་ཅེས་ལན་བཏབ། བློ་བཟང་གིས་དྲིན་ཆེན་པོ། བན་སྡེ་འཚོ་ལ་སྐད་ཅིག་མི་གཏོང་ཨ་་་ ཁ་པར་ཨང་གྲངས་འདི་ཁོ་མོས་ང་ལ་བཞག་འདུག
མི་དེས་ཁྱེད་རང་སུ་ཡིན་ཞེས་དྲིས་དུས། བློ་བཟང་གིས་ངའི་མིང་ལ་བློ་བཟང་ཟེར་གྱི་ཡོད་ཅེས་བཤད་མ་ཐག མི་དེས་ཅུང་ཙམ་སྒུག ང་འགྲོ་ སྐད་གཏོང་།
བློ་བཟང་གིས། དོན་དག་ག་རེ་འདྲ་བྱུང་བ་ཡིན་ནམ་སྙམ་བཞིན། སྒེའུ་ཁུངས་ནང་ནས་ཕྱི་རོལ་དུ་རང་གིས་ཕ་རྒན་གྱིས་སྤག་སྤག་དཀྲུ་བཞིན་པ་དེར་ལྟོས།
ཨ་རོགས། ཁྱེད་རང་བློ་བཟང་ཡིན་ནམ་ཟེར་ནས་ཁ་པར་ནང་ནས་བུད་མེད་ཅིག་གིས་ཚུར་ཁ་གྲགས་སྐབས། བློ་བཟང་གིས་དེ་ནི་བན་སྡེ་འཚོ་ཡིན་པ་ཤེས་ནས།
ང་རང་བདེ་མོ་ཡིན།
ངས་ཁ་སང་ཐེངས་མ་ཁ་ཤས་ཤིག་ལ་ཁྱེད་རང་ལ་ཁ་པར་བཏང་བ་ཡིན།
ཤེས་སོང་། དེ་རིང་ངའི་ཕ་རྒན་གྱིས་ང་རང་ལ་བཤད་སོང་།
བློ་བཟང་། ཁྱེད་རང་གི་དམིགས་ཡུལ་ཕྱོགས་དེར་རེ་བ་མེད་ཐག་ཆོད་རེད་དམ། ད་དེ་འདྲ་ཡིན་ན་འུ་གཉིས་ཀྱིས་ལྷན་དུ་ས་གཞན་ཞིག་ནས་ཟ་ཁང་ཆུང་ཆུང་ཞིག་གམ། ཡང་ན། ང་རང་གི་ཨ་ཅེ་ཡིས་རྒན་པོ་ཡོད་ས་དེར་མགྲོན་ཁང་ཆུང་ཆུང་ཞིག་འདུག་ཟེར། ངས་ཁོ་རང་ལ་འུ་གཉིས་ཀྱི་གནས་ཚུལ་བཤད་པ་ཡིན། ཁོས་འུ་གཉིས་ལ་འདོད་པ་ཡོད་ན་རོགས་པ་བྱེད་ཆོག་ཟེར་གྱི་འདུག ཁྱེད་རང་གིས་བལྟས་པ་ཡིན་ན་ག་འདྲ་འདུག་ཞེས་བཤད།
བློ་བཟང་གིས། ངས་ཁྱེད་རང་ལ་ཉིན་འགའི་སྔོན་དུ་བཤད་པ་དེ་ལྟར་ཡིན། ངས་འདི་ནས་རོགས་པ་ཞིག་གི་བཤད་པ་ལྟར་འབྲོག་ས་དེར་ཟ་ཁང་ཞིག་འདུག་ཟེར་གྱི་ཡོད་པ་དེ་ལ་ལྟ་རུ་འགྲོ་དགོས་བསམ་ནས་བསྡད་ཡོད། གལ་སྲིད་དེ་རུ་འགྲོ་རྒྱུར་ཐག་གཅོད་སོང་བ་ཡིན་ན་ངས་ཁྱེད་རང་ལ་ཡང་བསྐྱར་འབྲེལ་བ་བྱེད་ཆོག གཞན་པའི་གནས་ཚུལ་ཅི་ཡང་མེད་དམ་ཟེར་ནས་དྲིས།
བན་སྡེ་འཚོས། གཞན་གང་ཡང་མེད། དེས་ན་ངས་ཁྱེད་རང་གི་ལན་ལ་སྒུག་ནས་འདུག ཉིན་མ་ཁ་ཤས་ཀྱི་རྗེས་སུ་ཡིན་གཅིག་མིན་གཅིག་ཁ་པར་ཞིག་གཏོང་རོགས། གལ་སྲིད་ཁྱེད་རང་འགྲོ་རྒྱུ་ཐག་གཅོད་སོང་བ་ཡིན་ན། ངས་ཀྱང་འདི་ནས་ཁྱེད་རང་ཕྱིར་སླེབས་རེག་བར་དུ་ལས་ཀ་བྱས་དེ་བསྡད་ཆོག དེ་ནས་ཁྱེད་རང་གི་འདོད་པ་ལྟར་བྱེད་ཆོག་ཞེས་བཤད།
བློ་བཟང་གིས། ཡ་ཡ བདེ་མོ་ཟེར་བཞིན། སེམས་ནང་དུ། ད་ངས་གང་བྱས་ན་ཡག་པོ་ཡོད་དམ། དེ་རིང་ཕ་རྒན་སོང་ནས་མོ་བཏབ་དེ་ཕྱིར་སླེབས་པ་ཡིན་ན་དེ་ནས་གང་བྱེད་དགོས་མིན་ཐག་གཅོད་བསམ་ཞོར་དུ། སྒོ་བུད་དེ། ཨ་ཕ། ཁྱེད་རང་ད་ཨ་ལགས་ཚང་གི་སར་ཕྱག་མོ་འདེབས་དུ་འགྲོ་རྒྱུ་ཡིན་ནམ་ཞེས་དྲིས།
ཕ་རྒན་འཇིགས་གྲོལ་གྱིས། སྤག་སྤག་དཀྲུ་ཚར་གྲབས་ཡོད་ལ། རེད་རེད། ངས་འདི་གཙང་མ་ཞིག་བྱས་ཚར་ན་ད་འགྲོ་ཆོག ཨ་མ་ཡོང་ན། ང་རང་དགོན་པའི་ནང་དུ་བུད་ཐལ་ཟེར་ནས་ཤོད།
བློ་བཟང་གིས་རང་གི་དྲིན་ཆེན་མ་ལོའི་ལས་ཀའི་སྐོར་ལ་བསམ་བློ་འཁོར་ནས་མིག་མཐའ་མཆི་མས་འཁང་། དྲིན་ཆེན་མ་ལོ། ཁྱེད་རང་གིས་དངོས་ནས་དཀའ་ལས་བརྒྱབ་པ་མང་དྲགས་སོང་། ཟླ་གཅིག་ལ་རྒྱ་སྒོར་ཉིས་བརྒྱའི་ཆེད་དུ། ཞོགས་པ་སྔ་བོ་ནས་ཡར་བླངས་དེ། ནུ་མོ་དང་ཚ་བོ་གཉིས་ལ་ཞོགས་ཇ་བསྐོལ་རྗེས། རྐང་འཁོར་ཞོན་ནས་མགྲོན་ཁང་དེ་རུ་སོང་ནས། ཉིན་བཀང་བོར་ཉལ་གདན་དང་ཉལ་གཤུབ། གཞན་གྱིས་བཙོག་པ་བཟོས་པའི་མགྲོན་ཁང་ནང་གི་རས་གདན་སོགས་ལག་དཀྲུ་བརྒྱབ་ནས་ལག་པ་སེར་ཁ་བཀས་ཀྱང་། ཕྱིར་ནང་དུ་འབྱོར་དུས། ད་དུང་ང་ཚོ་ལ་ཁ་ལོག་ཚིག་ལོག་ཙམ་ཡང་བརྒྱབ་མྱོང་མེད་པར། མ་ཁོ་མ་གཅེས་ཟེར་ཞོར། ང་དང་ནུ་བོ། ནུ་མོ་དང་ཚ་བོ། སྲི་མོ་བཅས་ལ་བྱམས་པའི་ངག་གི་འབོད་སྟངས་རེར། ང་ཚོ་བུ་ཕྲུག་ཚོ་ནི་དངོས་ནས་ནུས་མེད་རྐྱང་རྐྱང་རེད་འདུག་དྲན་ན་སེམས་པ་མི་སྐྱིད་ཀི ཨ་མ་ལགས། ད་ཁྱེད་རང་གི་ངལ་གསོ་བྱེད་རན་རེད།
བློ་བཟང་གིས་རང་གི་དྲིན་ཆེན་ཨ་མའི་ལས་ཚེགས་ལ་བསམ་ཞོར་དུ་དབུགས་རིང་ཞིག་འཐེན་ཞོར་དུ་རྐུབ་སྟེགས་སྟེང་དུ་བསྡད་ནས་བརྙན་འཕྲིན་གྱི་གློག་སྒོ་ཕྱེ་ནས་དྲིན་ཆེན་མ་ལོ་ཡོང་བར་སྒུག་ནས་བསྡད།
མུ་འགོད།
