བློ་བཟང་གི་གོན་པ་ཡོངས་རྫོགས་ཆར་བས་བརློན་པ་བཟོས་ཡོད་ཀྱང་། ད་དུང་ཕྱིར་དྲན་གྱི་ཁྲོད་དུ་རང་གི་ནང་དུ་སླེབས་དུས་སུ། དྲིན་ཆེན་མ་ལོ་སྒྲོལ་མ་འཚོས་རང་གི་བུ་ཆར་བའི་བརློན་པ་བཟོས་ཡོད་པ་མཐོང་མ་ཐག
བློ་བཟང་། ཆར་བ་མཚམས་འཇོག་རེག་བར་དུ་སྒུག་ནས་ཡོང་ན་མི་འགྲིག་ནས། ད་སོང་། མགྱོགས་པོ་བྱོས། གོན་རྒྱུ་བརྗེ་ནས་ཤོག་ཟེར་ནས་ཁོ་རང་གི་རྐང་འཁོར་ཨ་མས་ཁྱེར་ནས་འཆམ་འོག་དུ་སོང་།
བློ་བཟང་གིས། སྐྱོན་མེད་ཀི་ཟེར་ཞོར་དུ། གོན་པ་བརྗེ་རུ་ཕྱིན། དགོང་མོ་དེར་ཆར་བ་མུ་མཐུད་དུ་འབབ་བཞིན་ཡོད་པ་མ་ཟད། ནུ་མོ་མཚོ་མོ་སྐྱིད་དང་ཚ་བོ་རྡོ་རྗེ་རྒྱལ། ད་དུང་། ནུ་བོ་ཀླུ་འབུམ་རྒྱལ་ཁོང་ཚོ་ཚང་མས་ནུབ་ཚལ་འཐུང་རྗེས་སུ། བློ་བཟང་གིས་ཉིན་དེར་ཁོ་རང་ལ་ཞང་བོ་ཨ་ཁུ་ལགས་དང་གྲོགས་པོ་རྙིང་བ་གྲྭ་སྤྱིན་པ་གཉིས་ཀྱིས་སྒོར་མོ་སྤྲད་པ་སོགས་གླེང་བ་མ་ཟད། ཕྱིར་ཉིན་རང་གི་ཨ་མྱེ་བདེ་ཆེན་སར་སོང་ནས་གནས་ཚུལ་ཞིབ་དུ་ཞུ་རྒྱུར་ཁོང་ཚོས་གྲོས་ཁ་འཆམ།
ཨ་མྱེ་བདེ་ཆེན་གྱིས། བློ་བཟང་ལ། ད་ནི་ཁྱེད་རང་གིས་བསམ་ཐོག་ལ་ཕ་མ་གཉིས་ཀྱིས་བཞག་ཟིན་པ་ཡིན་དུས། ང་རང་ལ་དམིགས་བསལ་གྱིས་བསམ་འཆར་གང་ཡང་མེད། ད་ནི་ཁྱེད་རང་ཐག་རིང་དེ་འདྲ་ཞིག་ལ་བུད་སོང་བའི་ཕྱིར་ཉིན། ང་དང་ཁ་ངོ་ཨེ་ཐུག་ཤེས་ནི་མ་རེད། མ་ཐུག་ཡང་མི་སྐྱོན་གི ས་མཐའ་གང་ཞིག་ནས་བསྡད་ཀྱང་། རང་གི་བྱ་བ་འཕྱུག་དུ་མ་འཇུག སྒོར་མོ་ཆ་རེ་གསོག་ཨེ་ཐུབ་ལྟོས། ས་གང་དུ་སོང་ཡང་སྒོར་མོ་མེད་དུས་མི་གྲལ་ལ་ཚུད་ཁག་པོ་ཡིན་ནི་རེད། ཐ་ན་རང་གི་སྤུན་ཉེ་རིང་ཚོ་ཡིན་ཡང་རོགས་བྱེད་མཁན་ཡོད་ནི་མ་རེད་སོགས། བློ་བཟང་ཁོ་རང་ལ་འཇིག་རྟེན་མིའི་འགྲོ་ལུགས་མི་ཉུང་བ་ཞིག་གསུངས།
བློ་བཟང་གིས། ཨ་མྱེ་ལགས། གཅིག་བྱས་ན་ཉིན་མ་ཞིག་སླར་ཡང་ང་ཚོ་ཐུག་ན་ཐང་། ང་རང་ལ་རེ་བ་ཡང་དེ་འདྲ་ཞིག་ཡོད། ནུ་མོ་མཚོ་མོ་སྐྱིད་ངས་ཁྲིད་དེ་འགྲོ་རྒྱུ་ཡིན། དེ་ཡི་རྒྱུ་མཚན་ཚང་མ་ངས་ཁྱེད་རང་ལ་གོང་དུ་ཞུས་ཟིན་པ་དེ་རེད། ཁོ་མོ་ད་དུང་ལོ་ཆུང་བ་དང་བསམ་མི་ཤེས་པའི་སེམས་ནང་དུ་དཀའ་ངལ་ཡོད་པ་མ་རེད། ཆེན་པོ་ཆགས་ནས་གནས་ཚུལ་ཚང་མ་ཤེས་དུས། ད་དངོས་ནས་ཁག་པོ་ཆགས་ངེས་རེད། དེ་ཡིན་དུས་ངས་ཁོ་མོ་རྒྱ་གར་དུ་ཁྲིད་སོང་ནས་སློབ་སྤྱོང་ཡག་པོ་ཞིག་བྱེད་དུ་འཇུག་གི་ཡིན།
བློ་བཟང་གིས་རང་གི་ཨ་མྱེ་ལགས་ཀྱིས་རང་ཉིད་ལ་ད་ལྟ་ཡང་གྲྭ་བ་ཡིན་པར་ཡིད་ཆེས་བྱེད་ཀྱི་ཡོད་པ་དེ་ཡི་སྐོར་ལ་བསམ་བློ་རེ་གཏོང་ཞོར་དུ་སེམས་པ་སྐྱོ་གདུང་གི་གཟུར་ནས་ཕྱིར་སྡེ་བའི་ནང་དུ་ལམ་ལ་ཆས་པའི་ལམ་ཁར། རྒྱ་གར་དུ་ངོ་ཤེས་པའི་གྲོགས་པོ་གྲྭ་བ་ཞིག་གི་མགྲོན་འབོད་བྱས་ཡོད་པ་དེ་ཡི་ནང་དུ་སོང་། གྲྭ་བ་དེས་ཁོ་རང་གི་གནས་ཚུལ་དག་བློ་བཟང་ལ་ཞིབ་དུ་གླེང་དུས། ཁོ་རང་ཡང་རང་ས་ནས་རང་དབང་མེད་པའི་ཁོར་ཡུག་ལ་སུན་སྣང་ཆེན་པོ་ཡོད་ཀྱང་། འགྲོ་འདོད་ཀྱང་འགྲོ་གྲོན་གྱི་དཀའ་ངལ་ཆེ་བ་དང་། ཕྱོགས་གཞན་ཞིག་ནས་ཕ་མ་གཉིས་ཀྱིས་གཏན་ནས་ཁོ་རང་ས་གཞན་དུ་འགྲོ་རྒྱུར་འདོད་པ་མེད་པ་སོགས་ཀྱི་གནས་ཚུལ་མང་བོ་ཞིག་བློ་བཟང་དང་ལྷན་དུ་ཁ་བརྡ་བྱས།
འདི་ན་རྒྱ་སྒོར་བརྒྱ་མ་གཏོགས་མེད་ཀྱང་ལམ་བར་ནས་ཁ་ལག་ཞིག་ཟ་བྱེད་བྱོས། གཅིག་བྱས་ན་ཉིན་ཞིག་ང་རང་སླར་ཡང་རྒྱ་གར་དུ་སླེབས་ཡོང་ན་ཐང་། དེ་དུས་ང་ཚོ་ཐུག་གི་རེད། གལ་ཏེ། རྒྱ་གར་དུ་ཡོང་མ་ཐུབ་པ་ཡིན་ན་རྒྱ་ནག་རྒྱལ་ས་པེ་ཅན་དུ་སློབ་སྤྱོང་ཞིག་བྱེད་དུ་འགྲོ་ཨེ་ཐུབ་བསམ་ནས་བསྡད་ཡོད། དེ་ཡང་ཕ་མ་གཉིས་དང་གྲོས་ཁ་བྱུང་དགོས་པ་རེད།
བློ་བཟང་གིས་རང་ཉིད་ཀྱི་ངོ་ཤེས་མི་ཉུང་བ་ཞིག་དང་ཐུག་འཕྲད་བྱས་ཀྱང་། རང་ཉིད་ཕྱིར་རྒྱ་གར་དུ་འགྲོ་བཞིན་ཡོད་པའི་སྐོར་རང་གི་བློ་གཏད་ཐུབ་སའི་གྲོགས་པོ་རེ་ཟུང་ཞིག་ལ་མ་གཏོགས་གཏན་ནས་མ་བཤད་ཀྱང་། དེ་དག་གི་ས་ནས་ཁོང་ཚོའི་སེམས་ནང་གི་རང་དབང་བྲལ་བའི་སྡུག་བསྔལ་དེ་དག་ལ་ཉན་ཐེངས་རེར། བོད་པ་ཟེར་བའི་མི་རིགས་འདིས་སེམས་གཏིང་དུ་ན་ཟུག་ཞིག་ཡོད་པ་དེ་ནི་ཟུར་བལྟས་ལེབ་མཐོང་དུ་གྱུར་བ་རེད།
ཕྱིར་སྡེ་བའི་ནང་དུ་ཡོང་བའི་ལམ་ཁ་ནས། ཆུང་དུས་ནས་རང་ཉིད་རྫོང་ཐོག་ནས་སློབ་གྲྭ་འགྲོ་དུས་སུ་བསྡོད་ཡུལ་ཨ་མྱེ་བདེ་ཆེན་གྱི་ནུ་མོ་ཨ་ནེ་རྟ་མགྲིན་འཚོ་ཡོད་སར་འཚམ་འདྲི་ཞིག་བྱེད་དུ་སོང་དུས། ཨ་ནེ་རྟ་མགྲིན་འཚོས། བློ་བཟང་ལ་རང་གི་སྐེ་རུ་འཕྱངས་པའི་དངུལ་ཁུག་ཚུལ་དྲགས་ཅན་པོ་དེ་ཡི་ནང་ནས་རྒྱ་སྒོར་བཅུ་ལོ་གཉིས་ཕྱིར་བཏོན་ནས། འདི་མཚོ་མོ་སྐྱིད་ཁྱེད་གཉིས་ཀྱི་ལམ་པར་ཟ་མ་ཞིག་ཟ་བྱེད་བྱོས། ཕྱིར་རྒྱ་གར་དུ་འབྱོར་ན་༧རྒྱལ་བ་རིན་པོ་ཆེ་ཚང་གི་མདུན་ནས་ང་ལ་སྐྱབས་འཇུག་ཞིག་ཞུ་རྒྱུ་མ་བརྗེད། ངས་ཀྱང་འདི་ནས་ཁྱེད་མིང་སྲིང་གཉིས་བདེ་བར་འབྱོར་བར་་སྨོན་ལམ་རྒྱུན་དུ་འདེབས་ཆོག་ཟེར་ནས་མིག་ཆུ་དང་ལྷན་དུ་གསུངས་དུས་སུ། བློ་བཟང་གིས་ལག་ཟུང་འདར་ཞོར་དུ། ཨ་ནེ་ལགས། དངོས་ནས་ཐུགས་རྗེ་ཆེ། སྤྱིར་བཏང་ཡིན་ན་ངས་ཁྱེད་རང་གི་སྒོར་མི་འདི་ལེན་སྲོལ་མེད་ཀྱང་། མ་བླངས་པ་ཡིན་ན་ཁྱེད་རང་གིས་སེམས་ཕམ་ངེས་ཡིན་པས་ངས་ལེན་ཆོག ང་རང་གིས་༧རྒྱལ་བ་རིན་པོ་ཆེ་ཡི་དྲུང་ནས་སྐྱབས་འཇུག་ཞུ་ཁོ་ཐག་ཡིན་ཞེས་ཁས་ལེན་བྱས།
བློ་བཟང་གིས་ནངས་ཉིན་ང་རང་ཕྱིར་རྒྱ་གར་དུ་ལམ་དུ་ཆས་རྒྱུ་རེད་མོད། ད་ལྟ་བན་སྡེ་འཚོས་གང་བྱེད་ཀྱི་ཡོད་དམ་སྙམ་བཞིན། ཕྱིར་དྲན་གྱི་ཀློང་དུ་བཞུད།
མུ་འགོད།
ཡུལ་ལུང་གང་དུ་བསྡོད་ཀྱང་།།
སེམས་ཀྱི་བཞུར་བའི་དབྱངས་རྟ།།
རིགས་ཞེན་གདུང་བའི་འབོད་པ།།
གངས་ཅན་བོད་དུ་སྐུར་ཡོད།།
ལོ་དང་གསར་བའི་བར་ནས།།
དུས་ཀྱི་ལང་ཚོ་ཟད་དེ།།
མི་ཡུལ་ས་མཐའ་ཞིག་ནས།།
རིགས་ཀྱི་སྙིང་གཏམ་འབྲི་འདོད།།
བྲིས་དེ་རྫོགས་པ་མེད་ཀྱང་།།
བཤད་ནས་ཚར་བ་མེད་ཀྱང་།།
གླེང་དེ་རྫོགས་རྒྱུ་མེད་ཀྱང་།།
ན་ཟུག་འཇགས་ཐབས་མི་འདུག།
ལོ་འདི་སར་དང་མི་སར།།
སེམས་ཀྱི་འཁྱེར་ཕྱོགས་ཤིག་རེད།།
སྐྱིད་དང་གླུ་ལེན་ཡོད་མེད།།
ཚང་མས་རང་ལ་དྲིས་ཤིག།
ལོ་གཅིག་ཚུར་ལ་སླེབས་ཤིང་།།
ཚེ་ཐག་ཇེ་ཐུང་ཕྱིན་སོང་།།
ཐུང་བའི་མ་འོངས་འཚོ་བར།།
ལས་ལ་བརྩོན་པར་སྐུལ་འདོད།།
སྤུན་ཟླ་ཁྱེད་ཅག་སླེབས་ནས་རང་རང་གི་བསམ་ཚུལ་གསུངས་པ་དེར་དགའ་ནས་ཡོད། རྗེས་ཕྱོགས་ཀྱང་མུ་མཐུད་དུ་ཕེབས་པར་རེ་བ་ཡོད།
སྤུན་གྲོགས་ཤ་རུས་ལགས། ལོ་གསར་བཀྲ་ཤིས་བདེ་ལེགས་ཞུ།
༄༅། །་གླུ་ཨ་ལ་ངག་གི་འགུག་ལུགས་རེད། གླུ་ཐ་ལ་གླུ་ཡི་ལེན་ལུགས་རེད།
གླུ་རེ་རེ་མི་ལེན་བཀའ་མེད་རེད། རེ་རེ་མི་ལེན་མཚར་མེད་རེད། སྐྱིད་ན་ཇ་ཆང་མཚར་གླུ་རེད།
སྡུག་ན་རང་སེམས་གསོ་གླུ་རེད། ངས་དེ་རིང་གླུ་ཞིག་ལེན་དེ། ལོ་གསར་པའི་རང་སེམས་གསོ་གླུ་ཡིན།
1.དབུས་གཙང་ཆོས་ཀྱི་ཆོལ་ཁ་ནས། ཕོ་བྲང་དམར་པོའི་གཞི་དཀྱུལ་ལ། རྗེ་དར་མ་འུག་སྡེ་བཙན་པོ་ལགས།
བོད་ཁ་བ་ཅན་གྱི་མི་རིགས་འདིར། ཐུགས་རྗེ་སྤྱན་གྱིས་ཨེ་གཟིགས་ལགས། གཟིགས་ན་དགོང་པར་ཅི་འདྲ་ཡོད།
2.མདོ་སྟོད་མི་ཡི་ཆོལ་ཁ་ནས། གླིང་དཔའ་རྟུལ་སུམ་ཅུའི་གཞི་དཀྱུལ་ལ། དཔའ་མི་འགྱུར་མདན་མ་བྱང་ཁྲ་ལགས།
དགྲ་དམར་པོ་དཔང་ཤུགས་ཆེ་ལུགས་དེར། ཐུགས་རྗེ་སྤྱན་གྱིས་ཨེ་གཟིགས་ལགས། གཟིགས་ན་དཔང་རོགས་ཅི་འདྲ་ཡོད།
3.མདོ་སྨད་རྟ་ཡི་ཆོལ་ཁ་ནས། རིག་པའི་དཔའ་བོའི་གཞི་དཀྱུལ་ལ། སྡུག་བཙོན་པ་དགེ་འདུན་ཆོས་འཕེལ་ལགས།
བོད་གངས་ཅན་དབུ་མའི་གཞུང་ལམ་འདིར། ཐུགས་རྗེ་སྤྱན་གྱིས་ཨེ་གཟིགས་ལགས། གཟིགས་ན་ལམ་སྟོན་ཅི་འདྲ་ཡོད།
ས་འདི་ཡི་ས་ངོ་ཨེ་མཁྱེན་་ལགས། ས་འདི་ཡི་ཡིན་ལུགས་ཞུ་པས་ན། ས་རང་ཡུལ་མ་རེད་མི་ཡུལ་རེད།
མགོ་སེར་པོ་མི་ཡི་ས་ཆ་རེད། རྒྱུ་ལོངས་སྤྱོད་ཕུན་སུམ་ཚོགས་ས་རེད། མི་ཀུན་ལ་རང་དབང་ཡོད་ས་རེད།
ང་འདྲ་ང་ངོ་ཨེ་མཁྱེན་ལགས། ང་འདྲ་ཡིན་ལུགས་ཞུ་པས་ན། བོད་གངས་ཅན་རང་དབང་ཡོད་པའི་དུས།
ས་བདག་ཚང་གི་བུ་སྐལ་ཡིན། དུས་དེང་སང་བཤད་ན་ཡིད་རེ་མུག ས་མཐའ་འཁྱམས་བའི་སྐྱབས་བཅོལ་ཡིན།
འདིར་ནས་གསན་་དང་བོད་མི་རྣམས། གསན་དང་ཞུ་རྒྱུ་འགའ་རེ་ཡོད། ཞུ་ཟེར་ལེ་དམ་ཆོས་མི་འདུག་སྟེ།
ཚིག་གསུམ་འདྲ་མ་ཨེ་འདྲ་ཡོད།
1.བོད་ཁ་བ་ཅན་གྱི་མི་རིགས་འདི། ལ་མཐོ་པོའི་རྩེ་གྱི་ཉི་མ་འདྲ། ཉི་མ་ལ་རྒྱབ་ནུབ་བཞིན་འདུག
དེ་ལ་དགོངས་པ་ཅི་འདྲ་ཡོད། དེ་བསམ་བཞིན་ཅོ་རི་ཡིད་རེ་སྐྱོ། ཡིད་སྐྱོ་བ་དགུང་ཁའི་དར་ལྕེ་རེད།
སེམས་སྐྱོ་བ་ལུང་སྟོང་ཤོག་ཁྱེར་རེད།
2.བོད་ཁ་བ་ཅན་གྱི་སྐད་ཡིག་འདི། ཆུ་སྔོན་མོའི་དཀྱུལ་གྱི་ལྦུ་བ་འདྲ། ཡུན་མི་རིང་ལྦུ་བ་ཡལ་བཞིན་འདུག
དེ་ལ་དགོངས་པ་ཅི་འདྲ་ཡོད། དེ་བསམ་བཞིན་ཅོ་རི་ཡིད་རེ་སྐྱོ། ཡིད་སྐྱོ་བ་དགུང་ཁའི་དར་ལྕེ་རེད།
སེམས་སྐྱོ་བ་ལུང་སྟོང་ཤོག་ཁྱེར་རེད།
3.བོད་གངས་ཅན་དབུ་མའི་གཞུང་ལམ་འདི། རི་མཐོ་པོའི་རྩེ་་གྱི་རྐང་ལམ་འདྲ། རི་མཐོ་པོའི་རྩེ་ལ་འགྲོ་མི་ལ།
རྟ་འདོ་ལུ་རྡོག་རྩ་གཅིག་བསྒྲིལ་མེད། དེ་ལ་དགོངས་པ་ཅི་འདྲ་ཡོད། དེ་བསམ་བཞིན་ཅོ་རི་ཡིད་རེ་སྐྱོ།
ཡིད་སྐྱོ་བ་དགུང་ཁའི་དར་ལྕེ་རེད།་སེམས་སྐྱོ་བ་ལུང་སྟོང་ཤོག་ཁྱེར་རེད།
གླུ་གོ་ན་རྣ་བ་ཡུལ་ལ་གསོལ། མ་གོ་གླུ་ལ་ཡང་ཞུ་མེད། བོད་མིའི་ཡིད་ལ་དེ་ལྟར་ཞོགས། སྐུ་ཚེ་བརྟན་པའི་སྨོན་
ཡར་ལ་ལངས་ཤོག་་་་བོད།
ལོ་གསར་བཀྲ་ཤིས་བདེ་ལེགས་ཡོད།
ལོ་གསར་བཀྲ་ཤིས་བདེ་ལེགས་ཡོད།
བཀླགས་ཟིན་སང་ཉིན་མཇལ།
ངོ་མ་སེམས་འགུལ་ཐེབས་དགོས་པ་ཞིག་བྲིས་འདུག་་་་་་མུ་མཐུད་དུ་ཡིན་དཱ།་་
མཚམས་འཇོག་མི་ཉན།་་་་་མཚམས་བཞག་ན་ཁྱེད་ཀྱིས་ཉེས་པ་བསག་ས་རེད།