ལྔ་བཅུའི་དུས་དྲན་དང་གཞུང་ཞབས་བགྲོ་གླེང་ཚོཊ་འདུ།

༧གོང་ས་མཆོག་གི་རླབས་ཆེན་གྱི་དགོངས་གཞི་དང་མཛད་བྱུས་ཅི་འདྲ་ཡོད་རུང་། དངོས་སུ་ལག་བསྟར་བྱུང་མིན་ནི་སྲི་ཞུ་ལས་བྱེད་པ་ཁོ་ནར་རག་ལུས་ཡོད་སྟབས། འདས་ལོ་ལྔ་བཅུའི་གྲུབ་འབྲས་དང་འཐུས་ཤོར་ཅི་བྱུང་གི་འགན་འཁུར་སྲི་ཞུ་ལས་བྱེད་པར་ཡོད་པའི་དངོས་དོན་གྱི་གནས་ཚུལ་འདི་ནི་གཡོལ་ཐབས་མེད་པ་ཞིག་ཡིན་པས་གྲུབ་འབྲས་ལ་དགའ་སྒོམ་བྱ་རྒྱུའི་སྔོན་དུ་འཐུས་ཤོར་ལ་འགན་ལེན་ངེས་པར་དུ་བྱ་དགོས་ཟེར།

 སྔར་ལོའི་གསུམ་བཅུའི་དུས་དྲན་ནས་ད་ལོའི་གསུམ་བཅུའི་དུས་དྲན་བར་གྱི་ལོ་ཧྲིལ་བོར། བཙན་བྱོལ་བོད་གཞུང་བཀའ་ཤག་གིས་ལྔ་བཅུའི་དུས་དྲན་གོ་སྒྲིག་ཚོགས་ཆུང་ཟུར་འཛུགས་བྱས་ཏེ། ༧གོང་ས་མཆོག་དབུས་བོད་མི་མང་པོ་ཁྱིམ་མཚེས་ཡུལ་གྲུ་ཁག་ལ་སྐྱབས་བཅོལ་དུ་འབྱོར་ཏེ། མི་ལོ་ཧྲིལ་བོ་ ༥༠ འཁོར་བའི་དུས་དྲན་སྲུང་གཙི་ཞུ་བཞིན་ཡོད་ལ། ད་ལོའི་ཟླ་ ༣ ཚེས་ ༡༠ ནས་ལྔ་བཅུའི་དུས་དྲན་ཡོངས་སུ་མཇུག་སྒྲིལ་གྱིན་ཡོད་པའི་གོ་སྐབས་དང་བསྟུན་ཏེ། བོད་གཞུང་གི་ལྷན་ཁང་མ་ལག་དང་བཅས་པའི་གཞུང་ཞབས་ལས་བྱེད་ཆ་ཕྲ་དང་། ས་གནས་གཞིས་མགོ་ཁག་ལྷན་ཞུགས་ཐོག ༼ ལོ་ལྔ་བཅུ་ཉམས་མྱོང་གཞིར་བཟུང་འབྱུང་འགྱུར་ལོ་ལྔ་བཅུའི་མི་རིགས་ཀྱི་རྩ་དོན་སྒྲུབ་ཕྱོགས་ཀྱི་འཆར་སྣང་སྐོར་བགྲོ་གླེང་། ༽ ཞུ་བ་ཞིག་ཚོགས་འཆར་ཡོད་སྟབས། འདི་གའི་གསར་འགོད་པ་ལྔ་བཅུའི་དུས་དྲན་གོ་སྒྲིག་ཚོགས་ཆུང་གི་ཚོགས་གཙོ་བཀྲ་ཤིས་ནོར་བུ་ལགས་ཀྱི་གམ་དུ་བཅར་ཏེ། མི་འགྱངས་པར་ཚོགས་འཆར་ཡོད་པའི་གཞུང་ཞབས་ལས་བྱེད་པའི་བགྲོ་གླེང་ཚོགས་འདུའི་སྐོར་ལ་བཅར་འདྲི་དང་སྦྲགས། འདས་པའི་ལོ་གཅིག་རིང་བཙན་བྱོལ་བོད་མིའི་སྤྱི་ཚོགས་ཁྱོན་ཡོངས་ནས་ལྔ་བཅུའི་དུས་དྲན་སྲུང་གཙི་བྱས་པའི་གནས་སྟངས་སྐོར་རྒྱུས་ལོན་བྱས་པ་ཡིན།

བཀྲ་ཤིས་ནོར་བུ་ལགས་ཀྱིས་ཐོག་མར་ཚོགས་ལ་ཉེ་བའི་གཞུང་ཞབས་ལས་བྱེད་ཡོངས་ཀྱི་བགྲོ་གླེང་ཚོགས་འདུ་དེའི་སྐོར་ངོ་སྤྲོད་གནང་དོན། ལྔ་བཅུའི་དུས་དྲན་གྱི་མཛད་རིམ་ནང་གཞུང་ཞབས་ཡོངས་ཀྱི་བགྲོ་གླེང་ཚོགས་འདུ་རྒྱས་འཛོམས་ཤིག་ཡོད་པ་ལྟར། ཟླ་འདིའི་ཕྱི་ཚེས་ ༢༦ དང་ ༢༧ ཉིན་གཉིས་རིང་གཞུང་ཞབས་ལས་བྱེད་ཡོངས་དང་། ས་གནས་གཞིས་མགོ་ཁག དེ་བཞིན་འབྲེལ་མཐུད་པ་ཡོངས་ལྷན་ཞུགས་ཀྱི་ཚོགས་འདུ་རྒྱས་པ་ཞིག་ངྷ་ཤོད་བོད་ཁྱིམ་སློབ་གྲྭའི་ཚོགས་ཁང་ནང་ཚོགས་རྒྱུ་རེད། ཚོགས་འདུ་དེའི་སྟེང་བཀའ་ཤག་དབུ་བཞུགས་ཀྱིས་ཕལ་ཆེར་ཚོགས་བཅར་བ་ ༤༠༠ ལྷག་འཛོམ་འཆར་རེད། ཚོགས་འདུའི་ཉིན་དང་པོར་ཚོགས་བཅར་བ་ཡོངས་ཆུང་ཁག་བགོས་བརྒྱབས་ཏེ། བརྗོད་གཞིའི་ཐོག་བགྲོ་གླེང་གོ་བསྡུར་ཞིབ་ལྷུག་གནང་རྒྱུ་ཡིན་པ་དང་། ཉིན་གཉིས་པར་ཚོགས་ཆུང་ཁག་གི་བསམ་ཚུལ་ཕྱོགས་བསྡོམས་ཀྱིས་གྲོས་ཆོད་འཇོག་རྒྱུ་རེད། བགྲོ་གླེང་ཚོགས་འདུའི་གྲོས་གཞིའི་ཐད་བཀའ་བློན་ཁྲི་པས་ཞུ་སྐུལ་ཞིག་ཀྱང་གནང་འདུག ཅེས་གསུངས་བྱུང་།

གཞུང་ཞབས་ལས་བྱེད་པའི་བགྲོ་གླེང་ཚོགས་འདུའི་གྲོས་གཞིའི་ཐད་བཀའ་ཁྲི་མཆོག་གིས་ལམ་སྟོན་ཞིག་གནང་ཡོད་པའི་ནང་བཀོད་དོན། བཙན་བྱོལ་བོད་མི་རྣམས་ཁྱིམ་མཚེས་རྒྱལ་ཁབ་བལ་ཡུལ་དང་། འབྲུག་ཡུལ། ལྷག་པར་རྒྱ་གར་དུ་མི་ཚོགས་མཉམ་སྡོད་ཀྱི་གཞིས་ཆགས་དང་ཆོས་བྱེད་དགེ་འདུན་པའི་དགོན་སྡེ་ཁག ཤེས་ཡོན་སློབ་གྲྭ་ཁག  གཙུག་ལག་སློབ་ཁང་སོགས་གཞི་རྒྱ་ཆེ་བའི་འཛུགས་སྐྲུན་དང་། ཡར་རྒྱས་གསར་གཏོད་ཀྱི་རྣམ་པ་གྲངས་ལས་འདས་པ་ཞིག་བྱུང་ཡོད། དེ་དང་ཆབས་ཅིག་ཞན་ཆའི་ཕྱོགས་ནས་བལྟས་ན་འགྲན་ཟླ་མེད་པའི་ཤེས་ཡོན་སློབ་སྦྱོང་གི་གོ་སྐབས་ཐོབ་ཡོད་ཀྱང་། གནའ་བོའི་བོད་དུ་བྱུང་བ་ལྟ་བུའི་རྩོད་མེད་ཡོངས་གྲགས་ཀྱི་མཁས་དབང་འཐོན་དཀའ་བར་མ་ཟད།  དེང་རབས་ཀྱི་ཁྱད་ལས་པ་དང་། རིག་གཅིག་རྐང་འཛིན་པ་གྲགས་ཅན་ཡང་ཉུང་ཤས་ལས་ཐོན་མེད་ཅིང་། གཞིས་ཆགས་ཁག་ཀྱང་རིམ་པས་ཁ་ཐོར་འགྲོ་ཉེན་ལ་ཕྱོགས་པ་དང་གཞོན་སྐྱེས་མང་ཆེ་བ་ངལ་རྩོལ་གྱི་ནུས་པ་དམན་ཞིང་། གཞན་རྟེན་གྱི་བསམ་བློ་དང་ནུབ་ཕྱོགས་ཡུལ་གྲུ་ཁག་ཏུ་བསྐྱོད་རྒྱུའི་འདུན་སྲེད་ཇེ་ཆེར་འཕེལ་བའི་ཐོག ལྷག་པར་འཇིགས་སྣང་སྐྱེ་འོས་པ་ཞིག་ལ་ཞིག་ལ་བོད་མིར་རང་གཤིས་སུ་གྲུབ་པའི་ཡ་རབས་བཟང་སྤྱོད་ཀྱི་གནས་བབ་ཉམས་དམས་སུ་སོང་སྟེ། གཡོ་རྒྱུ་ཁྲམ་གསུམ་སོགས་ངན་སྤྱོད་སྣ་མང་ལ་ཇི་མི་སྙམ་པར་འཇུག་མཁན་ཇེ་མང་དུ་འགྲོ་བཞིན་པ་བཅས་ལ་བརྟེན། འབྱུང་འགྱུར་བཙན་བྱོལ་བོད་མིའི་གནས་བབ་ཧ་ཅང་ཡིད་དོགས་སྐྱེ་གཞིའི་གནས་སུ་སླེབས་ཡོད། གཉན་འཕྲང་ཅན་གྱི་དུས་སྐབས་འདིར་བཙན་བྱོལ་བོད་གཞུང་གི་སྲི་ཞུ་ལས་བྱེད་པ་ཁེ་གཙང་འདི་ལོ་ཕྱི་ཟླ་ ༣ ཚེས་ ༢༦།༢༧ ཉིན་གཉིས་རིང་རྡ་སར་ཟུར་ཚོགས་ཀྱིས་འདས་པའི་ལོ་ལྔ་བཅུའི་ཉམས་མྱོང་གཞིར་བཟུང་འབྱུང་འགྱུར་ལོ་ལྔ་བཅུའི་བོད་མི་རིགས་ཀྱི་རྩ་དོན་བསྒྲུབ་ཕྱོགས་ཀྱི་འཆར་སྣང་སྐོར་བགྲོ་གླེང་གནང་རྒྱུའི་ལས་རིམ་བསྒྲིགས་ཡོད། འདི་ནི་འཆར་ཅན་གྱི་ཚོགས་འདུ་ལྟ་བུ་ཞིག་མ་ཡིན་པར་སྲིད་ཞུ་ལས་བྱེད་པ་མི་རེ་ངོ་རེས་སྤྱིར་སྲི་ཞུ་བ་ཡོངས་དང་། ལྷག་པར་རང་ཉིད་ཀྱི་སྒོ་གསུམ་གྱི་སྤྱོད་ཚུལ་ལ་བསྐྱར་ཞིབ་ནན་པོ་དང་། དེའི་ཉམས་མྱོང་གཞིར་བཟུང་འབྱུང་འགྱུར་རྩ་དོན་སྒྲུབ་ཕྱོགས་དང་ཐབས་ལམ་གཉིས་ཀར་ངེས་པ་རྙེད་པའི་ལམ་སྟོན་ཞིག་གཏན་འབེབས་ཡོངས་ཐབས་ལ་དམིགས་པ་ཞིག་ཡིན། ཞེས་བཀོད་འདུག

ཞུ་སྐུལ་དེའི་ནང་བཙན་བྱོལ་སྤྱི་ཚོགས་ཀྱི་ལེགས་ཉེས་ཅི་བྱུང་གཞུང་ཞབས་ལས་བྱེད་ཚོར་རག་ལས་ཡོད་སྐོར་བཀོད་དོན། མཁྱེན་གསལ་ལྟར་འདས་ལོ་ལྔ་བཅུའི་ནང་བཙན་བྱོལ་བོད་མིའི་སྤྱི་ཚོགས་སུ་ལེགས་ཉེས་ཀྱི་གནས་ཚུལ་ཅི་བྱུང་རྣམས་རྒྱུ་མེད་རང་བྱུང་ལྟ་བུ་མ་ཡིན་པར་བཙན་བྱོལ་བོད་གཞུང་གི་སྲིད་བྱུས་དང་ལས་གཞི་ཁག་ལས་བྱུང་བ་ཤས་ཆེ་བ་དང་། དེ་ཡང་༧གོང་ས་མཆོག་གི་རླབས་ཆེན་གྱི་དགོངས་གཞི་དང་མཛད་བྱུས་ཅི་འདྲ་ཡོད་རུང་། དངོས་སུ་ལག་བསྟར་བྱུང་མིན་ནི་སྲི་ཞུ་ལས་བྱེད་པ་ཁོ་ནར་རག་ལུས་ཡོད་སྟབས། འདས་ལོ་ལྔ་བཅུའི་གྲུབ་འབྲས་དང་འཐུས་ཤོར་ཅི་བྱུང་གི་འགན་འཁུར་སྲི་ཞུ་ལས་བྱེད་པར་ཡོད་པའི་དངོས་དོན་གྱི་གནས་ཚུལ་འདི་ནི་གཡོལ་ཐབས་མེད་པ་ཞིག་ཡིན་པས་གྲུབ་འབྲས་ལ་དགའ་སྒོམ་བྱ་རྒྱུའི་སྔོན་དུ་འཐུས་ཤོར་ལ་འགན་ལེན་ངེས་པར་དུ་བྱ་དགོས། དེ་ནི་བྱུང་རབས་ལ་འཁྲི་བའི་ལས་འགན་ཞིག་ཀྱང་ཡིན། འདས་པའི་གནས་ཚུལ་ཙམ་དུ་མ་ཟད། འབྱུང་འགྱུར་ཡང་བཙན་བྱོལ་བོད་མིའི་ལས་དབང་གི་ཁ་ཕྱོགས་ཅི་འདྲ་ཞིག་ཏུ་འགྲོ་མིན་བརྒྱ་ཆ་མང་ཤོས་བཙན་བྱོལ་བོད་གཞུང་གི་སྲི་ཞུ་བར་རག་ལུས་ཡོད། གནས་ཚུལ་འདི་ལ་ཐུགས་བསམ་གཏིང་ཟབ་བཞེས་པ་ཡིན་ན། བཟོད་པར་དཀའ་བའི་འགན་འཁྲི་ཤིན་ཏུ་ལྕི་བ་ཞིག་ཡོད་པ་དང་ཆབས་ཅིག་བྱུང་རབས་ཀྱི་དོན་སྙིང་ལྡན་པའི་གོ་སྐབས་རླབས་ཆེན་ཞིག་ཀྱང་ཡོད་པ་མཁྱེན་ཐུབ། རྒྱུ་མཚན་དེ་དག་ལ་བརྟེན་བཙན་བྱོལ་བོད་གཞུང་གི་སྲི་ཞུ་བ་རྣམས་ནི་རྒྱལ་ཁབ་དང་སྒྲིག་འཛུགས་གཞན་གྱི་ལས་བྱེད་དང་གཏན་ནས་མི་འདྲ་བར་རླབས་ཆེན་གྱི་མི་རིགས་ཤིག་གི་ཕུགས་འདུན་ཁ་ལོ་བསྒྱུར་མཁན་ཞིག་ཡིན། ཞེས་དང་།

ཡང་གཞུང་ཞབས་ལས་བྱེད་རེ་ཟུང་གིས་སྤྱི་རྒྱུ་སྒེར་ཟོས་དང་ལྐོག་ཟ་རུལ་སུངས་བྱས་སྟབས། སྦལ་བ་རྨ་ཅན་བཞིན་སྲི་ཞུ་བ་ཡོངས་ཀྱི་གཟུགས་བརྙན་ལ་ནག་ཐིག་འཕོག་གིན་ཡོད་སྐོར་བསྟན་དོན། སྤྱི་ཚོགས་ལ་བཀའ་ཤག་གིས་དུས་རྒྱུན་དུ་སྲི་ཞུ་ལས་བྱེད་པ་རྣམས་རང་རང་གི་ལྟོ་གོས་གཏམ་གསུམ་མམ། འཚོ་བའི་མདུན་ལམ་བློས་གཏོང་བྱས་ཏེ་བོད་མི་རིགས་ཀྱི་རྩ་དོན་ཐོག་དང་བླངས་ཀྱིས་སྲི་ཞུ་སྒྲུབ་མཁན་ཞིག་ཡིན་པར་ངོས་ལེན་བྱེད་ཀྱིན་ཡོད། ང་ཚོའི་ངོས་འཛིན་འདི་དངོས་དོན་ལ་བརྟེན་པ་ཞིག་ཡིན་མིན་ལས་བྱེད་སོ་སོས་རང་གིས་རང་ལ་ཞུ་དག་བྱས་ཏེ། གཏན་ལ་འབེབས་དགོས་པ་ཞིག་ལས་བཀའ་ཤག་གིས་ཤེས་ཐབས་དཀའ། སྤྱིར་བཏང་སྲི་ཞུ་ཕལ་མོ་ཆེ་ལྷག་བསམ་དང་དྲང་བདེན། བརྩོན་ཤུགས་བཅས་ཡི་རངས་བསྔགས་བརྗོད་དང་ཀྱི་གནས་སུ་ཆེ་ཡང་། སྐབས་འཁྲིའི་ལས་འགན་ལ་སྣང་མེད་བྱེད་པ་དང་། ཉེ་དགའ་ཕྱོགས་ལྷུང་། སྤྱི་རྒྱུ་སྒེར་ཟོས། ལྐོག་ཟ་རུལ་སུངས་བྱེད་མཁན་རེ་ཟུང་ཡང་དུས་ནས་དུས་སུ་བྱུང་དང་ཡོང་བཞིན་པ་དིས་སྦལ་བ་རྨ་ཅན་ལྟ་བུས་སྲི་ཞུ་བ་སྤྱིའི་གཟུགས་བརྙན་ལ་ནག་ཐིག་ཕོག་ཡོད་པའང་དངོས་དོན་ཁས་ལེན་མི་བྱེད་ཐབས་མེད་དང་། དེ་དག་སེལ་ཐབས་ཀྱང་ལས་བྱེད་པ་རང་གིས་བྱ་རྒྱུ་ལས་གཞན་གྱིས་བྱ་མི་ཐུབ། གོང་གསལ་གྱི་རྒྱུ་མཚན་དང་གནས་བབ་འདི་དག་གི་འོག་ད་ལན་བགྲོ་གླེང་ཚོགས་འདུའི་ནང་སྤྱི་སྒེར་གཉིས་ཀའི་དངོས་ཡོད་ཀྱི་གནས་བབ་ལ་སྙིང་དོན་འཚོལ་བའི་གཟུ་བོའི་བློས་རང་རང་གི་ནུས་པ་དང་། ཞན་ཆ། ཀླན་ཀ གོ་སྐབས་བཅས་ལ་རྟོག་ཞིབ་མཐིལ་ཕྱིན་གྱི་ལམ་ནས་གཡོ་ཟོལ་སྤངས་པའི་དགོངས་འཆར་ལྷུག་པོ་ཡོང་བའི་རེ་བ་ཤུགས་ཆེན་བྱེད་བཞིན་ཡོད། སྤྱི་ནོར་༧གོང་ས་མཆོག་གིས་རེ་བ་བཟང་ས་དང་གྲྭ་སྒྲིག་སྡུག་ས་ནས་བྱེད་དགོས་པའི་ལམ་སྟོན་ལྟར། འབྱུང་འགྱུར་བོད་མིའི་ལས་དབང་ཐད་རྒྱལ་སྤྱིའི་གནས་བབ་དང་བོད་མིའི་ཤེས་བརྩོན། རྒྱ་ནག་གི་ཆབ་སྲིད་བཅས་ལ་གཞིགས་པའི་ཞིབ་འཇུག་གཏིང་ཟབ་ཀྱི་ལམ་ནས་ཚང་མས་དགོངས་འཆར་ཞིབ་ལྷུག་གནང་བའི་སྐུལ་མ་ཞུ་རྒྱུ་ཡིན། ཞེས་བཀོད་འདུག

བཀྲ་ཤིས་ནོར་བུ་ལགས་ཀྱིས་མུ་མཐུད་དུ་ལྔ་བཅུའི་དུས་དྲན་མཇུག་སྒྲིལ་ལ་ཉེ་བའི་སྐོར་ངོ་སྤྲོད་གནང་དོན། ད་ལོའི་གསུམ་བཅུའི་དུས་དྲན་སྐབས་ལྔ་བཅུའི་དུས་དྲན་མཇུག་སྒྲིལ་གྱིན་ཡོད་པ་རེད། དུས་དྲན་གྱི་ལས་རིམ་ནང་གསལ་བ་ལྟར། བཙན་བྱོལ་བོད་མིའི་སློབ་གྲྭ་ཁག་དང་དགོན་སྡེ་ཁག བོད་གཞུང་གི་ལྷན་ཁང་ཁག་བཅས་ཀྱིས་ཁུངས་སོ་སོའི་ལོ་རྒྱུས་དང་འབྲེལ་བའི་དཔེ་དེབ་མང་པོ་ཞིག་དཔར་སྐྲུན་བྱས་དང་བྱེད་མུས་རེད། ང་ཚོའི་གོ་སྒྲིག་ཚོགས་ཆུང་གི་ངོས་ནས་ཀྱང་ལས་བསྡོམས་ལྟ་བུའི་དཔེ་དེབ་ཅིག་དཔར་བསྐྲུན་བྱ་འཆར་ཡོད། དེ་བཞིན་གསུམ་བཅུའི་དུས་དྲན་གོང་དུ་བོད་གཞིས་བྱེས་གཉིས་ནས་༧གོང་ས་མཆོག་ལ་བརྟན་བཞུགས་རྒྱས་པ་ཞིག་འབུལ་རྒྱུ་རེད། དེ་མིན་ས་གནས་ཁག་ཚང་མས་འགན་གཙང་ལེན་ཐོག གཞུང་གི་ངོས་བཞེས་ཡོད་པའི་ལས་རིམ་ཙམ་མ་ཡིན་པར་སོ་སོ་རང་ངོས་ནས་ཀྱང་ལས་འགུལ་འདྲ་མིན་སྤེལ་འདུག རྒྱལ་ཁབ་ཁ་ཤས་ནང་ལྔ་བཅུའི་དུས་དྲན་གྱི་མཛད་རིམ་ལ་དཀའ་ངལ་དོག་ཙམ་རེ་ཡང་འཕྲད་ཡོད། དཔེར་ན། མཛད་རིམ་ནང་བོད་མི་གནས་ཡུལ་རྒྱལ་ཁབ་ཁག་གི་གཞུང་དམངས་ལ་ཐུགས་རྗེ་ལེགས་གསོལ་གྱི་ལས་རིམ་ཤིག་ཡོད་ཀྱང་། བལ་ཡུལ་ལྟ་བུར་མཚོན་ན་ཆབ་སྲིད་ཀྱི་དཀའ་ངལ་འོག་ནས་ལས་དོན་ད་སྔ་བསྒྲུབ་ཐུབ་ཡོད་པ་མ་རེད། དེ་བཞིན་འབྲུག་ཡུལ་དུའང་བྱུང་ཡོད་པ་མ་རེད། དེ་མིན་གྱི་རྒྱལ་ཁབ་ཁག་གི་གཞུང་དམངས་ལ་འཆར་གཞི་ལྟར་བསྒྲུབ་ཐུབ་ཡོད་ལ། ལྷག་པར་དུ་རྒྱ་གར་ལྟ་བུར་མཚོན་ན། རྒྱལ་ས་ལྡི་ལིར་༧གོང་ས་མཆོག་དབུས་བཀའ་བློན་ཁྲི་པ་སོགས་ཆེད་ཕེབས་ཀྱིས་རྒྱ་གར་གཞུང་དམངས་ལ་ཐུགས་རྗེ་ལེགས་གསོལ་ཧ་ཅང་གི་ཡག་པོ་ཞིག་བྱུང་སོང་། ཞེས་གསུངས་བྱུང་།