སྤྲ་ཁྱིམ་དེ་ཡི་བདག་པོ་ཕོ་གསར་དེ་ཡི་བློ་བཟང་དང་ཁོང་ཚོ་ཚང་མ་ལ་ཇ་ཞིག་བླུགས་ཞོར་དུ། སྔོན་དེར་ཁོང་ཚོ་ནང་དུ་མགྲོན་བསུ་མ་བྱས་པའི་རྒྱུ་མཚན་དག་བཤད་པ་རེད། སྤྱིར་ན་ང་ཚོ་ཚང་མ་བོད་རིགས་གཅིག་པ་རེད། རྒྱ་གར་ལ་འགྲོ་མཁན་ཚོ་ལ་ཇ་རྐྱང་བཀང་རེ་སྡུད་རྒྱུ་དེ་ནི་ང་ཚོས་ལོས་ཐུབ། ང་ཚོས་ལོས་བྱེད། འོན་ཀྱང་། ཉེ་སྔོན་ནས་བཟུང་དེ་ང་ཚོ་ལ་གཞུང་གིས་ཁྲིམས་བཟོས་པ་ལྟར། སྣེ་ལེན་བྱེད་མི་ཆོག་པ་མ་ཟད། འདི་ནས་ཡར་འགྲོ་མཁན་རིག་ན་ཡར་ཞུ་བྱེད་དགོས་པ་དང་། མ་ཞུས་པ་ཡིན་ན་སྒོར་ཆད་གཅོད་པ་དང་། སྣེ་ལེན་བྱས་པ་ཡིན་ན་དེ་བས་ཀྱང་ཆད་པ་ལྕི་མོ་གཅོད་པ་དང་། ཡར་ཞུ་བྱས་པ་ཡིན་ན་བྱ་དགའ་སྤྲོད་པ་སོགས་བྱེད་ཀྱི་ཡོད་པ་ཡིན་དུས། ང་ཚོ་ལ་དངོས་ནས་དཀའ་ངལ་ཡོད་པ་རེད། གང་ཡིན་ཟེར་ན་ང་ཚོ་འདི་ནས་འཚོ་བ་བསྐྱེལ་ནས་འདུག་དགོས་པ་ཡིན་དུས། ཁོང་ཚོས་བཤད་པ་ལ་མ་ཉན་པ་ཡིན་ན། ཉེས་ཆད་གཅོད་ཀྱི་ཡོད་པ་རེད།
དེ་ནས་ཁོས་བློ་བཟང་ལ་བལྟས་དེ་ཁྱེད་རང་གིས་སྐད་ལ་བལྟས་པ་ཡིན་ན་ཁམས་པ་ཞིག་ཡིན་ས་རེད། ལམ་ཁྲིད་ཀྱང་ཁྱེད་རང་ཡིན་ས་རེད། ཁྱེད་རང་སྔོན་ཆད་རྒྱ་གར་དུ་འགྲོ་མྱོང་ཡོད་པ་འདྲ་ཟེར་ནས་ཕོ་གསར་དེས་ཁོང་ཚོས་དཀའ་ངལ་དག་ཞིབ་དུ་བློ་བཟང་དང་རོགས་པ་ཚོ་ལ་བཤད་པ་དང་ཞོར་དུ་བློ་བཟང་ལ་སྐད་ཆ་དེ་འདྲ་ཞིག་དྲིས་དུས་སུ། བློ་བཟང་གིས་ང་རང་ལ་ལམ་ཁྲིད་མིན། ང་ཚོ་ལ་ལམ་ཁྲིད་མེད། ལམ་ཁྲིད་མེད་པ་ཡིན་དུས་འདི་ལྟར་མགོ་འཁོར་ནས་ལམ་བར་ནས་ཉིན་མ་མི་ཉུང་བ་ཞིག་ཡར་མར་གང་དུ་འགྲོ་དགོས་པ་ཡང་མ་ཤེས་པར་ལུས་པ་རེད། སྐུ་མཁྱེན་ང་ཚོ་ལ་ཤར་ཀོམ་པོའི་ཕྱོགས་སུ་འགྲོ་བའི་ལམ་ཁ་ཞིག་སྟོན་རོགས་ཟེར་ནས་བཤད་པ་རེད།
དེ་དུས་ཕོ་གསར་དེ་བགད་མོ་དགོད་ཞོར་དུ། ཁྱེད་རང་ལམ་པ་མིན་ན་མིན། ཡིན་ན་ཡིན། འོན་ཀྱང་། ཁྱེད་ཚོས་ལམ་ཁ་ནོར་ཡོད་པ་མ་རེད། འདི་ནས་ཤར་རྒྱགས་ལ་ཡར་སོང་བ་ཡིན་ན་ཉིན་མ་ཁ་ཤས་ཤིག་གི་རྗེས་སུ་ཁྱེད་ཚོ་ཤར་ཀོམ་པོ་ལ་སླེབས་ངེས་རེད། དོ་ནུབ་ཁྱེད་ཚོ་འདི་ནས་ཆུ་ཚོད་གཉིས་གསུམ་ཞིག་ལ་ལམ་ཁ་འདི་འདེད་ནས་སོང་དང་། ལུག་རྭ་ཞིག་ལ་འཕྲད་ངེས་ཡིན། དེ་ནས་ཞག་འདུག་བྱས་པ་ཡིན་ན་འགྲིག་གི་རེད། གཅིག་བྱས་ན། ལུག་རྫུ་ཞིག་དེ་རུ་བསྡད་ཡོད་ན་ཐང་། ཡོད་ན་མི་དེ་ལ་པ་སངས་ཚེ་རིང་གིས་ང་ཚོ་ཁྱེད་རང་གི་ས་ནས་བསྡོད་ཟེར་གྱི་འདུག་ཞེས་བཤད་ན་འགྲིག་གི་རེད། ཁོ་རང་ངས་ངོ་ཤེས་ཤིག་ཡིན་ཞེས་བཤད་དེ་ཁོང་ཚོ་ཇ་ཚ་བོ་འཐུང་དུ་བཅུགས་པ་དང་རྩམ་པ་རྒྱག་ཚད་ཅིག་ཟ་རུ་བཅུགས་ནས། ནུ་མོ་མཚོ་མོ་སྐྱིད་ལ་ལམ་ཁ་ནས་ཟོས་ཟེར་ནས་ཤ་སྐམ་ཉུང་ཉུང་ཞིག་ཀྱང་སྤྲད་པ་རེད།
ཕོ་གསར་དེས་ཁོང་ཚོ་ལ་འདྲ་དཔར་ཞིག་བསྟན་ནས། བླ་མ་འདི་བ་ཚང་བལ་ཡུལ་དུ་བཞུགས་ཡོད་པ་རེད། ང་ཚོའི་ཡུལ་སྡེ་འདིས་བླ་མ་རེད། ཁོང་ཚང་ལ་མཇལ་དུ་ང་རང་ཡང་ཐེངས་མ་གཅིག་སོང་བ་ཡིན། སྐབས་དེར་ང་རང་ཡང་༧རྒྱལ་བ་རིན་པོ་ཆེ་ཚང་ལ་མཇལ་དུ་འགྲོ་འདོད་ཀྱང་། ཡི་གེ་མེད་པ་དང་སྐད་སོགས་མི་ཤེས་སྟབས་བལ་ཡུལ་ནས་ཁ་ཕྱིར་འཁོར་ནས་ཚོང་ཕྲན་པུ་ཞིག་ཁུར་ནས་ཡོང་བ་ཡིན། རྗེས་མ་གོ་སྐབས་འདྲ་རེག་པ་ཡིན་ན་ང་རང་ཡང་༧རྒྱལ་བ་རིན་པོ་ཆེ་ལ་མཇལ་འདོད་དངོས་ནས་ཆེན་པོ་འདུག་ཟེར་ནས་ཁོང་ཚོ་ལ་སེམས་གསོ་དང་བཅས་ལམ་མཇུག་བྱས།
རྒྱབ་ལ་ཁུར་རྒྱུའི་བྲོ་དང་ཁ་ལ་ཟ་རྒྱུའི་ལྟོ་རེག་སྟབས། ཁོང་ཚོ་དངོས་ནས་ཇེ་མགྱོགས་དུ་སོང་ཡོད་པ་དང་། ལུང་སྟོང་དེ་ནས་གནམ་མཁའི་སྐར་ཚོགས་ལ་ལྟ་ཞོར། ཆུ་ཕྲན་གྱི་ཤག་སྒྲ་ལ་ཉན་ཞོར་ཁོང་ཚོ་རྐང་ལམ་ཕྲ་མོ་དེ་དེད་ནས་ལུག་རྭ་ཞིག་ཡོད་པ་དེ་ལ་སླེབས་རེག་བར་དུ་འགྲོ་རྒྱུའི་སེམས་ཐག་བཅད་པ་རེད།
ལུག་རྭ་དེ་རུ་སླེབས་དུས། ལུག་རྭའི་ནང་དུ་ལུག་གཅིག་ཀྱང་མཐོང་རྒྱུ་མེད་པ་མ་ཟད། ལུག་རྫུ་ཡང་གཏན་ནས་མཐོང་རྒྱུ་མེད་སྟབས། ཁོང་ཚོས་དེ་ནས་ལུག་རྫིའི་རྡོ་ཁང་ནང་དུ་བལྟས་དུས། རྡོ་ཁང་ནང་དུ་ཅ་ལག་ཁ་ཤས་ཤིག་ལས་གང་ཡང་མཐོང་རྒྱུ་མེད་སྟབས། ཁོང་ཚོས་བློ་བཟང་གི་བཤད་པ་ལྟར། ལུག་རྫིའི་རྡོ་ཁང་ལས་མི་ཉལ་རྒྱུ་བྱས་དེ་ལུག་རྭའི་ནང་དུ་མལ་ས་བཅོས་པ་རེད།
མུ་འགོད།
སྤུན་ཟླ་ཁྱེད་ཚོ་ཕེབས་ནས་རང་རང་ལྟ་ཚུལ་གསུངས་པ་དེར་དགའ་ནི་ཡིན། རྗེས་ཕྱོགས་ཀྱང་དུས་ཚོད་གང་ཁོམ་ལ་ཡོང་གི་བསྡོད། ངས་སྒོ་ནས་བལྟས་དེ་འདུག
དངོས་གནས་སྙན་མོ་འདུག ཡིན་ན་ཡང་དུམ་ཙམ་ལས་ཀློག་ཁོམ་མ་བྱུང་།
དགོངས་དག
ཤ་སྐམ་་་་་་རྩེད་མོ། དག་བཅོས།
དུས་ཡུན་གང་འཚམ་རིང་ང་ལ་ལས་དོན་མང་པོ་ཞིག་གི་རྐྱེན་བྱས་ཏེ་དྲྭ་ལམ་དུ་ཡོང་མ་ཐུབ། ཁྱེད་ཀྱི་དངོས་སྒྲུང་རིང་པོ་དེའི་བཅུ་བཞི་བཅོ་ལྔའི་སྐབས་སུ་ཀློག་ཁན་གྱི་གྲས་ཡིན་ཡང་། དེ་ནས་ཀློག་ཐུབ་མ་སོང་། ཡང་བསྐྱར་ཁྱེད་ཀྱི་སྒྲུང་རིང་དེ་ཀློག་པའི་འགོ་བཙུགས་པ་ཡིན།
ཨ་རོ། ད་སྐམ་དང་། ཚོང་གིས་ཁྱེད་ཀྱི་སྒྲུང་གི་ངོ་བོ་བསྒྱུར་སྲིད། ཉི་མ་ཁ་ཤས་སྔོན་ལ་ང་ཁྱེད་ཚོའི་ལུང་པ་དེར་བསླེབས་ཀྱང་། ཤ་བཙོས་མ་དང་མ་བཙོས་པ་སྟེ། རྗེན་བཟའ་བྱེད་མཁན་མང་པོ་འདུག དེ་དག་དངོས་སྒྲུང་ནང་དུ་ཞུགས་པ་མིན་ལས་ཆེ། རྩེད། ལོ་སར་བཟང་།
སྐུ་ཉིད་ཕེབས་ནས་ཀློག་པ་དགའ་ཡོད། རྗེས་ཕྱོགས་ཀྱང་ཁོམ་དུས་ཡོང་གི་བསྡོད། ད་ནི་ཟིན་བྲིས་འདི་ལ་མཆན་པུ་ཇེ་ཉུང་དུ་འགྲོ་བཞིན་འདུག ལོ་སར་བའི་ནང་དུ་ཚང་མ་ལས་དོན་ཞིག་གི་ཁོམ་ལོང་སྤྲོད་ཀྱི་མེད་པ་འདྲ།
བཀླགས་ཟིན