བོད་སྐོར་གླེང་ཚན་བརྒྱད།  ཡང་སྲིད་གནད་དོན་སྐོར།

རྩོམ་པ་པོ།  ཞའེ་ཝི།  (༢༠༢༦/༡༠/༠༨ ཉིན་སྤེལ།)

གཙང་བོས་རྒྱ་ཡིག་ནས་བསྒྱུར།

རྩོམ་ཁུངས། བོད་ཀྱི་དུས་བབ།

༼རྒྱ་ནག་ལ་ལྟ་བ། ༢༠༢༦ལོའི་ཟླ་ ༡༠  ཚེས་  ༨ ཉིན་གྱི་གསར་འགྱུར།༽ ཏཱ་ལའི་བླ་མའི་ཡང་སྲིད་ཀྱི་གནད་དོན་ནི། ངོ་གདོང་ནས་ཆོས་ལུགས་རྒྱུད་འཛིན་ཙམ་ཡིན་ཡང་། དོན་དུ་བོད་པའི་སྤྱི་ཚོགས་ཀྱི་དད་མོས་འཚོ་བ་དང། བོད་བརྒྱུད་ནང་བསྟན་གྱི་ལམ་སྲོལ། དེ་བཞིན་དེང་གི་རྒྱལ་ཁབ་ཀྱི་སྒྲིག་གཞིའི་བར་གྱི་གོ་བ་ལེན་ཕྱོགས་ཀྱི་ཧེ་བག་དང་འབྲེལ་བ་ཡོད་པ་རེད། དེའི་ཕྱིར་མ་འོངས་པར་ཡང་སྲིད་སྐོར་གྱི་གནད་དོན་དངོས་གནས་ལྷག་ཚེ། གདོང་ལེན་བྱ་དགོས་པ་ནི་ཆོས་ལུགས་ཆོ་ག་ཁོ་ན་མིན་པར། ཕྱོགས་སོ་སོས་ཐག་གཅོད་དང་བརྒྱུད་རིམ་ལ་གོ་བ་ལེན་ཚུལ་ཡང་འདུས་པས། དེ་རིང་ཅིས་ཀྱང་གནད་དོན་འདི་སྔོན་ནས་གླེང་དགོས་པའི་རྩ་བ་ཡང་དེར་ཐུག་ཡོད།

ཚན་པ་དང་པོ།  ཡང་སྲིད་ལམ་སྲོལ་གྱི་ཆོས་ལུགས་དོན་སྙིང།

ཏཱ་ལའི་བླ་མའི་ཡང་སྲིད་སྒྲིག་གཞི་ནི་ལོ་ངོ་བརྒྱ་ཕྲག་ལྷག་གི་འཕེལ་རྒྱས་བརྒྱུད་དེ། བོད་བརྒྱུད་ནང་བསྟན་ཀྱི་དགེ་ལུགས་པའི་ཆོས་ལུགས་ལམ་སྲོལ་གལ་ཆེན་ཞིག་ཏུ་གྱུར་ཡོད།  དད་ལྡན་པ་ལ་མཚོན་ན། ཡང་སྲིད་བཙལ་འཚོལ་དང་ངོས་འཛིན་ནི་སྤྱིར་བཏང་གི་གོ་གནས་བརྒྱུད་སྤྲོད་ཙམ་མིན་པར། ཆོས་ལུགས་རྒྱུད་འཛིན་དང་དད་མོས་རྒྱུན་བསྲིང་གི་ཆ་ཤས་ཤིག་ཡིན། ཏཱ་ལའི་བླ་མ་སྐུ་ཕྲེང་བཅུ་བཞི་བའི་ངོས་ནས་ཀྱང་། མ་འོངས་ཡང་སྲིད་ཀྱི་གནད་དོན་སྐོར་ལ་དུས་ཡུན་རིང་བོ་ཞིག་ནས་ཡོངས་ཁྱབ་གསལ་བསྒྲགས་བྱས་འདུག  ཕྱི་ལོ་ ༡༩༦༩ ལོར་ཁོང་གིས་མ་འོངས་པར་ཡང་སྲིད་འབྱུང་མིན་ནི་འབྲེལ་ཡོད་མི་སྣས་ཐག་གཅོད་བྱེད་དགོས་ཚུལ་བསྟན་པ་དང།  ཕྱི་ལོ་ ༢༠༡༡ ལོའི་ཟླ་ ༧ པར། ཁོང་གིས་སྔར་ལས་ཀྱང་མ་འོངས་ཡང་སྲིད་སྐོར་གྱི་བཀའ་སློབ་ལམ་སྟོན་ཡོངས་བསྒྲགས་བྱས། ཕྱི་ལོ་ ༢༠༢༥ ལོའི་ཟླ་ ༧ པར་ཁོང་གིས་ཡང་བསྐྱར་དངོས་སུ་གསལ་བསྒྲགས་བྱས་པར། ཏཱ་ལའི་བླ་མའི་ལམ་ལུགས་མུ་མཐུད་དུ་གནས་རྒྱུ་དང། མ་འོངས་ཡང་སྲིད་ཀྱི་ངོས་འཛིན་འགན་དབང་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩ་ལ་ཡོད་ཚུལ་བསྟན་འདུག། བྱེད་ཕྱོགས་དེ་དག་གིས་མ་འོངས་ཡང་སྲིད་སྐོར་ལ་བཀོད་སྒྲིག་གསལ་བོ་བྱས་པ་མཚོན་ལ། དེ་བཞིན་ཆོས་ལུགས་ཀྱི་སྒོ་ནས་ངོས་འཛིན་དཔང་རྟགས་ཀྱང་གསལ་བོར་བཏོན་ཡོད། མ་འོངས་པའི་གནད་དོན་གཙོ་བོ་ནི་ཡང་སྲིད་དགོས་དང་མི་དགོས་ཙམ་མ་ཡིན་པར། སུ་ཡིས་ངོས་འཛིན་མིན་དང་ལག་བསྟར་ཇི་ལྟར་བྱེད་མིན། དེ་བཞིན་ངོས་འཛིན་མི་འདྲ་བའི་བར་ལ་ཐག་གཅོད་ཇི་ལྟར་བྱེད་མིན་བཅས་ཀྱང་འདུས་སོ།།

ཚན་པ་གཉིས་པ།  པཎ་ཆེན་ཡང་སྲིད་ཀྱིས་བསྟབས་པའི་ལོ་རྒྱུས་བསླབ་བྱ།

པཎ་ཆེན་ཡང་སྲིད་ཀྱི་གནད་དོན་ནི་ཏཱ་ལའི་བླའི་མ་འོངས་ཡང་སྲིད་ཀྱི་གནད་དོན་སྐོར་ཤེས་པར་གཡོལ་ཐབས་མེད་པའི་ལོ་རྒྱུས་དུམ་བུ་ཞིག་རེད། པཎ་ཆེན་སྐུ་ཕྲེང་བཅུ་བ་མཆོག་གིས་རྙོག་འཛིང་ཆེ་བའི་ལོ་རྒྱུས་ཁོར་ཡུག་ཁྲོད་ནས་རིག་གནས་གསར་བརྗེ་དུས་སྐབས་ཀྱི་བརྡབ་གསིག་མྱངས་ཤིང་། དུས་ཕྱིས་དག་སེལ་བྱུང་ཡོད། ཕྱི་ལོ་ ༡༩༩༥ ལོར་ཁོང་སྐུ་གྲོངས་པ་ནས་བཟུང་། པཎ་ཆེན་སྐུ་ཕྲེང་བཅུ་གཅིག་པའི་ཆུང་སྲིད་ངོས་འཛིན་སྐོར་གྱི་མཇུག་འབྲས་མི་འདྲ་བ་བྱུང་བར་བརྟེན། མིག་སྔར་ད་དུང་གནས་པའི་ངོས་འཛིན་མི་འདྲ་བ་འདི་བྱུང་། དོན་དེས་སྤྱིར་ཆོས་ལུགས་ལམ་སྲོལ་གྱི་གནད་དོན་ཞིག་ལག་བསྟར་བྱེད་ཕྱོགས་དང་མཐའ་མའི་དབང་ཤུགས་ལ་རྩ་བའི་འགལ་བ་ཤོར་ན། དེ་མ་ཐག་ཏུ་ཆོས་ལུགས་ཀྱི་ཁྱབ་ཁོངས་ལས་འདས་ཏེ་དུས་ཡུན་རིང་བོའི་སྤྱི་ཚོགས་དང་ཆབ་སྲིད་གནད་དོན་ཞིག་ཏུ་འགྱུར་བ་གསལ་བཤད་བྱས་ཡོད། དེའི་ཕྱིར། པཎ་ཆེན་ཡང་སྲིད་ཀྱི་གནད་དོན་དེས་བསྟབས་པའི་བསླབ་བྱ་གལ་ཆེན་ཞིག་ནི། གལ་སྲིད་འབྲེལ་ཡོད་ཕྱོགས་ཀྱིས་གནད་དོན་མ་བྱུང་སྔོན་ནས་རྩ་བའི་འགྲོ་ཕྱོགས་གཏན་འཁེལ་མ་ཐུབ་ན། མ་འོངས་པར་འགལ་བ་ཐག་གཅོད་ཇེ་དཀའ་རུ་འགྱུར་བ་དེའོ།།

ཚན་པ་གསུམ་པ།  ཏཱ་ལའི་བླ་མས་མ་འོངས་ཡང་སྲིད་སྐོར་ལ་བཟུང་བའི་ཁ་གསལ་ལངས་ཕྱོགས།

ཏཱ་ལའི་བླ་མས་མ་འོངས་ཡང་སྲིད་སྐོར་ནས་སྤེལ་བའི་བྱེད་ཕྱོགས་དེ་ཉེ་ཆར་བྱུང་བ་ཞིག་མ་རེད། ཕྱི་ལོ་ ༢༠༡༡ ལོར་ཁོང་གིས་མ་འོངས་ཡང་སྲིད་ཀྱི་རྩ་བའི་ལམ་སྟོན་ཁྱབ་བསྒྲགས་བྱས་ཤིང་། ཕྱི་ལོ་ ༢༠༢༥ ལོའི་ཟླ་ ༧ པར་ཡང་བསྐྱར་ཏཱ་ལའི་བླ་མའི་ལམ་ལུགས་མུ་མཐུད་དུ་གནས་རྒྱུའི་གསལ་བསྒྲགས་བྱས་པར་མ་ཟད། ཡང་སྲིད་ངོས་འཛིན་གྱི་འགན་དབང་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩ་ལ་ཡོད་པ་ནན་བཤད་བྱས། བྱེད་ཕྱོགས་དེ་དག་གིས་མ་འོངས་ཡང་སྲིད་སྐོར་ནས་བཀོད་སྒྲིག་བྱས་པ་སྔར་ལས་མངོན་གསལ་ཡིན་པ་དང་། ཆོས་ལུགས་ཀྱི་སྒོ་ནས་ངོས་འཛིན་དཔང་རྟགས་གསལ་འདོན་བྱས་ཡོད། མ་འོངས་པའི་གནད་དོན་གཙོ་བོ་ནི་ཡང་སྲིད་དགོས་དང་མི་དགོས་ཙམ་མ་ཡིན་པར། སུ་ཡིས་ངོས་འཛིན་མིན་དང་ལག་བསྟར་ཇི་ལྟར་བྱེད་མིན། དེ་བཞིན་ངོས་འཛིན་མི་འདྲ་བའི་བར་ལ་ཐག་གཅོད་ཇི་ལྟར་བྱེད་མིན་བཅས་ཀྱང་འདུས་སོ།།

ཚན་པ་བཞི་བ།  རྒྱ་ནག་གི་མིག་སྔའི་སྒྲིག་གཞི་དང་ཆོས་ལུགས་ལམ་སྲོལ་གྱི་ཧེ་བག

རྒྱ་ནག་གཞུང་གིས་སྤྲུལ་སྐུའི་ལམ་ལུགས་ལ་སྒྲིག་གཞི་གསལ་བོ་བཟོས་ཡོད་པ་སྟེ། ཕྱི་ལོ་ ༢༠༠༧ ལོར་ཁྱབ་བསྒྲགས་བྱས་པའི་《བོད་བརྒྱུད་ནང་བསྟན་བླ་སྤྲུལ་གྱི་ཡང་སྲིད་ངོས་འཛིན་དོ་དམ་བྱ་ཐབས་》ཞེས་པར་གཏན་འབེབས་བྱས་དོན། སྤྲུལ་སྐུའི་ཡང་སྲིད་ངོས་འཛིན་དེ་སྙན་ཞུ་དང་ཆོག་མཆན་གྱི་རིམ་པ་བརྒྱུད་དགོས་པ་དང་། ཤུགས་རྐྱེན་ཆེ་བའི་རིགས་ཀྱིས་རྒྱལ་ཁབ་ཆོས་ལུགས་ལས་དོན་ཁང་ལ་སྙན་ཞུ་དང་། ཤུགས་རྐྱེན་ཆེས་ཆེ་བའི་རིགས་ཀྱིས་རྒྱལ་དོན་ཁང་ལ་སྙན་ཞུ་བྱེད་དགོས་ཚུལ་བསྟན་ལ། དེ་བཞིན་འབྲེལ་ཡོད་ནང་བསྟན་མཐུན་ཚོགས་ཀྱིས་ཆོས་ལུགས་ཆོ་ག་དང་ལོ་རྒྱུས་ཀྱི་འགྲོ་ལུགས་ཏེ། གསེར་བུམ་དཀྲུགས་འདོན་གྱིས་ཆུང་སྲིད་ངོས་འཛིན་བྱེད་སྲོལ་ལྟར་ཡང་སྲིད་ངོས་འཛིན་བྱེད་དགོས་ཚུལ་ཡང་གཏན་འབེབས་བྱས་འདུག། ཕྱི་ལོ་ ༢༠༢༥ ལོར་རྒྱ་ནག་གི་ངོས་ནས་ཀྱང་ཡོངས་ཁྱབ་གསལ་བསྒྲགས་བྱས་དོན། ཏཱ་ལའི་བླ་མའི་ཡང་སྲིད་ནི་རྒྱལ་ནང་དུ་བཙལ་འཚོལ་དང་གསེར་བུམ་དཀྲུགས་འདོན། དབུས་སྲིད་གཞུང་གིས་ངོས་ལེན་ཆོག་མཆན་དགོས་ཚུལ་སོགས་ཀྱི་རྩ་དོན་བཏོན་ཏེ། གནད་དོན་དེ་དང་འབྲེལ་བའི་རྒྱ་ནག་དབུས་གཞུང་གི་བདག་དབང་གཙོར་འདོན་བྱས་ཡོད། དེར་བརྟེན་ཕྱོགས་གཉིས་པོར་ཡང་སྲིད་གནད་དོན་སྐོར་གྱི་ངོས་འཛིན་ལ་འགལ་བ་མངོན་གསལ་ཡོད་པ་ཤེས་ཐུབ་སྟེ། ཏཱ་ལའི་བླ་མའི་ཕྱོགས་ནས་བོད་བརྒྱུད་ནང་བསྟན་གྱི་ལམ་སྲོལ་དང་དགའ་ལྡན་ཕོ་བྲང་གི་ཡང་སྲིད་ཁྲོད་ཀྱི་འགན་དབང་གཙོར་འདོན་བྱས་ཡོད་པ་དང་། རྒྱ་ནག་གི་ཕྱོགས་ནས་མིག་སྔའི་སྒྲིག་གཞི་ལས་གསལ་བོར་བསྟན་པ་བཞིན་སྤྲུལ་སྐུའི་ཡང་སྲིད་གང་ཡང་རྒྱལ་ཁབ་ཀྱི་གཏན་འབེབས་ལྟར་ངོས་ལེན་གྱི་རིམ་པ་བརྒྱུད་དགོས་པ་གཙོར་འདོན་བྱས་ཡོད། དེར་བརྟེན་མ་འོངས་པར་འབྱུང་ངེས་པའི་འགལ་བའི་འགག་རྩ་དེ་“ཆོས་ལུགས་དང་ཆབ་སྲིད་”ཅེས་པའི་སྤྱི་མཚན་ཞིག་མ་ཡིན་པར། ཡང་སྲིད་ངོས་འཛིན་གྱི་མངོན་སུམ་བརྒྱུད་རིམ་དང་མཐའ་མའི་ཐག་གཅོད་ཀྱི་དབང་ཆ་སུ་ཞིག་ལ་ཡོད་མེད་དེར་ཐུག་ཡོད།

ཚན་པ་ལྔ་བ།  ངོས་འཛིན་མི་འདྲ་བར་འབྱུང་ངེས་པའི་ཤུགས་རྐྱེན།

གལ་ཏེ་མ་འོངས་པར་ཡང་སྲིད་ངོས་འཛིན་མི་འདྲ་བ་བྱུང་ན། དེའི་ཤུགས་རྐྱེན་ནི་ཆོས་ལུགས་ཀྱི་ཁྱབ་ཁོངས་ལས་ཡོངས་སུ་འདས་པ་ཞིག་ཡིན་ངེས། དང་པོ། དེས་བོད་པའི་སྤྱི་ཚོགས་ཁྲོད་ཀྱི་ཆོས་ལུགས་ངོས་འཛིན་ལ་ཐད་ཀར་ཤུགས་རྐྱེན་ཐེབས་ཏེ། དད་མོས་མི་གཅིག་པའི་ཚོགས་པས་ཡང་སྲིད་ངོས་འཛིན་མི་འདྲ་བར་ངོས་ལེན་བྱས་ན། ཡུན་རིང་གནས་པའི་ལྟ་བའི་འགལ་ཟླ་བསྐྲུན་ངེས། གཉིས་པ། དེས་བོད་པའི་སྤྱི་ཚོགས་དང་རྒྱ་ནག་གི་མི་རིགས་གཞན་བར་གྱི་ཕན་ཚུན་རྒྱུས་ལོན་ལ་ཤུགས་རྐྱེན་ཐེབས་ངེས། གལ་ཏེ་ཆོས་ལུགས་ཀྱི་གནད་དོན་ཞིག་དུས་ཡུན་རིང་པོར་གླེང་མོལ་བརྒྱུད་ནས་སེལ་མ་ཐུབ་ན། དེ་ཉིད་སྤྱི་ཚོགས་དང་ཆབ་སྲིད་ཀྱི་གནད་དོན་ཞིག་ཏུ་འཕོ་ཡང་སྲིད་པ་ཡིན། གསུམ་པ། བོད་དོན་རང་ངོས་ཀྱིས་རྒྱལ་སྤྱིར་ཤུག་རྐྱེན་ཐེབས་ཟིན་པས། གལ་ཏེ་མ་འོངས་པར་ངོས་འཛིན་མི་གཅིག་པའི་སྒྲོམ་གཞི་གཉིས་བྱུང་ན། དེའི་ཤུགས་རྐྱེན་ནི་རྒྱ་ནག་ནང་ཁུལ་གྱི་སྤྱི་ཚོགས་ལས་འདས་ཏེ། རྒྱལ་སྤྱིའི་སྤྱི་ཚོགས་སུ་མུ་མཐུད་དོ་སྣང་བྱེད་པའི་གནད་དོན་དུ་འགྱུར་སྲིད། རྒྱུ་མཚན་དེའི་དབང་གིས་ཡིད་གཟབ་བྱེད་དགོས་ས་ནི་ལྟ་ཚུལ་མི་འདྲ་བ་མིན་པར། ལྟ་ཚུལ་མི་འདྲ་བ་དེས་མཐར་ཕྱོགས་གཉིས་པོའི་འབྲེལ་ལམ་འགག་པའི་གནས་བབ་དེ་རེད།

ཚན་པ་དྲུག་པ།  ཅིའི་ཕྱིར་སྔོན་ནས་བགྲོ་གླེང་བྱེད་དགོས་པ་ཡིན།

       ལོ་རྒྱུས་ཀྱིས་བསྟན་ཟིན་པ་ལྟར། གནད་དོན་ལ་ལ་ཞིག་བགྲོ་གླེང་གི་གོ་སྐབས་ཡོད་པའི་དུས་སུ་གདོང་ལེན་མ་བྱས་ཚེ། འགལ་བ་དེ་ཉིད་རྒྱ་ཁྱབ་ཏུ་གྱུར་ཟིན་རྗེས་དེ་ཡི་ཆེད་དུ་བློས་གཏོང་ཚད་མེད་ཅིག་བྱ་དགོས་ངེས། ཏཱ་ལའི་བླ་མའི་ཡང་སྲིད་ཀྱི་གནད་དོན་ཡང་མིག་སྔར་དངོས་སུ་བྱུང་མེད་མོད། ཕྱོགས་གཉིས་པོས་སོ་སོའི་ལངས་ཕྱོགས་གསལ་བོར་བསྟན་ཟིན། དེ་ཡིས་ཏག་ཏག་མིག་སྔར་ལོ་རྒྱུས་དཔེ་མཚོན་ལ་ཞིབ་འཇུག་དང་། ལྟ་ཚུལ་མི་མཐུན་པར་གཤིབ་བསྡུར། འབྱུང་སྲིད་པའི་གནས་ཚུལ་ལ་བསམ་གཞིགས་བཅས་བྱེད་པའི་མཐུན་རྐྱེན་ཡོད་པ་གསལ་བཤད་བྱས་པ་རེད། སྔོན་ནས་བགྲོ་གླེང་བྱེད་པ་ནི། དང་ཐོག་ནས་མཇུག་འབྲས་གཏན་འཁེལ་བྱེད་པའི་དོན་མིན་ལ། འགལ་ཟླ་སློང་བའི་ཆེད་དུའང་མིན་པར། གང་ཐུབ་ཅི་ཐུབ་ཀྱིས་མ་འོངས་པར་ཕན་ཚུན་འབྲེལ་ལམ་འགག་པའི་གནས་སྟངས་འབྱུང་བར་གཡོལ་ཐབས་བྱེད་པའི་ཆེད་དུ་ཡིན།

ཚན་པ་བདུན་པ།  ཐ་དད་པའི་ལྟ་ཚུལ་སྤྱི་ཚོགས་འགལ་ཟླ་འགྱུར་བའི་སྔོན་འགོག

གལ་ཏེ་མ་འོངས་པར་དངོས་གནས་ཡང་སྲིད་ངོས་འཛིན་མི་འདྲ་བ་བྱུང་ན། གལ་ཆེ་བ་ནི་ཇི་ལྟར་བྱས་ནས་འགལ་བ་དེ་ཆོས་ལུགས་འབྲེལ་མོལ་དང་སྤྱི་ཚོགས་འབྲེལ་ལམ་གྱི་ངོ་བོས་སེལ་ཐབས་དེ་རེད། དེའི་ཕྱིར་གནད་དོན་དངོས་སུ་མ་བྱུང་སྔོན་ནས་འབྲེལ་མཐུད་ཀྱི་གོ་སྐབས་བསྐྲུན་རྒྱུ་ནི། མ་འོངས་པར་ཞི་བདེའི་སྒོ་ནས་ཐག་གཅོད་བྱེད་པར་ཆ་རྐྱེན་བསྐྲུན་པ་རེད། ཡིན་ན་ཡང་འགལ་བ་སེལ་བར་བགྲོ་གླེང་བྱེད་པ་ལ་སོ་སོའི་ལངས་ཕྱོགས་བརྟན་པོར་འཛིན་དགོས་ཏེ། ཏཱ་ལའི་བླ་མའི་ལངས་ཕྱོགས་སྲུང་སྐྱོབ་དང་། རྒྱ་ནག་གི་དྲག་སྤྱོད་ལ་ངོ་རྒོལ་བྱེད་པའོ།།

ཚན་པ་བརྒྱད་པ། ང་ཚོས་ཇི་ལྟར་གནད་དོན་འདིར་གདོང་གཏད་དགོས།

ཏཱ་ལའི་བླ་མའི་ཡང་སྲིད་ཀྱི་གནད་དོན་དེ་ནི། ཆོས་ལུགས་མི་སྣ་ཞིག་གི་རྒྱུད་འཛིན་གྱི་གནད་དོན་ཁོ་ན་ཞིག་མ་ཡིན་པར། གནའ་བོའི་ཆོས་ལུགས་ཤིག་གི་ལམ་སྲོལ་དེ་དེང་རབས་རྒྱལ་ཁབ་ཅིག་གི་སྒྲིག་གཞིའི་འོག་ཇི་ལྟར་ངོས་འཛིན་བྱེད་མིན་དང་འབྲེལ་བ་ཞིག་རེད། ཆོས་ལུགས་ལམ་སྲོལ་དེ་ལ་ལོ་རྒྱུས་རྒྱུན་མཐུད་རང་བཞིན་ཡོད་ལ། རྒྱལ་ཁབ་ཀྱི་སྒྲིག་གཞི་ལ་ཡང་རྩ་ཁྲིམས་ཀྱི་རྒྱབ་གཉེར་ཡོད། གལ་ཏེ་ཕྱོགས་གཉིས་པོས་སོ་སོའི་ཁེ་དབང་ཁོ་ན་གཙོར་འདོན་བྱས་ཏེ། ཕྱོགས་གཞན་པའི་དངོས་ཡོད་ངོས་ལེན་མ་བྱས་ན་འགལ་ཟླ་འབྱུང་སླ་བ་ཡིན། དེའི་ཕྱིར་དེ་ལས་ཀྱང་གལ་ཆེ་བ་ནི་དངོས་དོན་དང་ལམ་སྲོལ། ཁྲིམས་ལུགས། དེ་བཞིན་ཕྱོགས་སོ་སོས་ཁྱབ་བསྒྲགས་བྱས་པའི་ལངས་ཕྱོགས་བཅས་མདུན་དུ་བཞག་སྟེ། གང་མགྱོགས་ངང་འབྱུང་སྲིད་པའི་གནས་ཚུལ་འདྲ་མིན་ལ་ཞིབ་འཇུག་དང་བགྲོ་གླེང་བྱེད་དགོས། བོད་པའི་སྤྱི་ཚོགས་ལ་མཚོན་ན། ཆོས་ལུགས་ལམ་སྲོལ་གྱི་རྒྱུན་མཐུད་དང་དད་མོས་རང་དབང་གཉིས་ཕན་ཚུན་བརྟེན་ཅིང་འབྲེལ་ཡོད་ལ། རྒྱ་ནག་གི་སྤྱི་ཚོགས་ལ་མཚོན་ན། ཆོས་ལུགས་ལམ་སྲོལ་དང་རྒྱལ་ཁབ་ཀྱི་སྒྲིག་གཞིའི་འབྲེལ་བ་ཐག་གཅོད་ཇི་ལྟར་བྱེད་མིན་ནི། དེང་རབས་སྤྱི་ཚོགས་ཀྱིས་ཅིས་ཀྱང་གདོང་ལེན་བྱེད་དགོས་པའི་དཀའ་ངལ་ཞིག་ཡིན། རྒྱལ་སྤྱིའི་སྤྱི་ཚོགས་ལ་མཚོན་ན། གནད་དོན་དེ་ཞི་བདེ་དང་གནས་ལུགས་ལྡན་པའི་སྒོ་ནས་སེལ་ཐུབ་མིན་ལ་དོ་སྣང་བྱེད་དགོས་པ་རེད།

མཇུག་གཏམ།

ཏཱ་ལའི་བླ་མའི་ཡང་སྲིད་གནད་དོན་དེ་མིག་སྔར་དངོས་སུ་བྱུང་མེད་ན་ཡང་། འབྲེལ་ཡོད་ཀྱི་ཕྱོགས་གཏོགས་སོ་སོས་མི་མཐུན་པའི་ལངས་ཕྱོགས་གསལ་བོར་བཏོན་ཟིན། དེས་མ་འོངས་པར་དངོས་གནས་གདོང་ལེན་བྱེད་དགོས་པ་དེ། གློ་བུར་འབྱུང་བའི་གནད་དོན་ཞིག་མིན་པར། སྔོན་དཔག་བྱེད་ཆོག་པ་དང་གཟབ་ནན་སྒོས་ཐག་གཅོད་བྱེད་ཐབས་ལ་བསམ་གཞིག་དགོས་པའི་དཀའ་ངལ་ཞིག་རེད། དེ་འདྲ་ཡིན་པའི་དབང་གིས་ད་ལྟ་བགྲོ་གླེང་བྱེད་པ་ནི། འགལ་ཟླ་སློང་བྱེད་མ་ཡིན་པར་འགལ་བའི་འབྱུང་རྩ་ར་འཕྲོད་པར་ཚོད་ལྟ་བྱས་ཏེ། མ་འོངས་པར་གཞན་དབང་གིས་མཇུག་འབྲས་འཁུར་མི་དགོས་པའི་ཆེད་དུ་ཡིན།  ང་མི་སྒེར་ལ་མཚོན་ན་རྩོམ་ཡིག་འདི་ཞེ་དཀར་བའི་བསམ་གཞིག་ཅིག་ཏུ་འགྱུར་བའི་རེ་བ་ལས། སྟབས་བདེའི་ཆབ་སྲིད་འབོད་ཚིག་ཙམ་མིན། དངོས་དོན་ལ་བརྩི་འཇོག་དང་ལམ་སྲོལ་ལ་བསམ་ཤེས། དངོས་ཡོད་ལ་ངོས་ལེན་བཅས་གཞི་རྩར་བཞག་ན། ད་གཟོད་མ་འོངས་པར་གདོང་ལེན་བྱེད་དགོས་པའི་ལམ་ཁ་དེ་གསལ་བོར་མཐོང་ཐུབ་བོ།།