ཕྱི་ཚེས་ ༢༢ ཉིན་གྱི་ཞོགས་པར་གདོང་རས་ནག་པོ་གཡོགས་ཤིང་ལག་ཏུ་གྲི་དང་དབྱུག་པ་ཐོགས་པའི་མི་བཅུ་གྲངས་འགས་པེ་ཅིན་ཁྲོ་ཡཱང་ཁུལ་གྱི་སྒྱུ་རྩལ་ལས་རིགས་ས་ཁུལ་གྱི་ཁང་པའི་སྒོ་དང་དྲ་མ། ལྡེབས་གྱང་སོགས་ལ་གཏོར་བཅོམ་དང་། སྒྱུ་རྩལ་ལས་རིགས་གཉེར་མཁན་དག་ལ་གང་བྱུང་གཅར་རྡུང་བྱས་པར་བརྟེན། ཉིན་དེའི་ཕྱི་དྲོར་སྒྱུ་རྩལ་བ་ ༢༠ ལྷག་གིས་ལག་ཏུ་འཕྲེད་དར་འཕྱར་ཏེ་ཁྲང་ཨན་གཞུང་ལམ་སྟེང་དུ་རྔམ་སྟོན་ཁྲོམ་སྐོར་བྱས་ཏེ་རུལ་སུངས་སུ་འགྱུར་བཞིན་པའི་རྒྱ་ནག་གི་སྤྱི་ཚོགས་ལ་ངོ་རྒོལ་གྱི་རྣམ་པ་བསྟན་ཡོད་པ་རེད། ངོ་རྒོལ་ཁྲོམ་སྐོར་བྱེད་མཁན་སྒྱུ་རྩལ་བ་དེ་དག་ཐེན་ཨན་མཱེན་ཐང་ཆེན་དུ་བསྐྱོད་འཆར་ཡོད་ནའང་། ཐང་ཆེན་དང་སྤྱི་ལེ་ ༡ ཙམ་གྱི་མཚམས་ལ་སླེབས་སྐབས་རྒྱ་ནག་དྲག་ཆས་དམག་དཔུང་དང་ཉེན་རྟོག་པས་བཀག་འགོག་བྱས་འདུག རྔམ་སྟོན་ཁྲོམ་སྐོར་དེ་ནི་པེ་ཅིན་དུ་དྲུག་བཞི་སློབ་མའི་ལས་འགུལ་བྱུང་བའི་རྗེས་སུ་བྱུང་བའི་ཁྲང་ཨན་གཞུང་ལམ་སྟེང་གི་རྔམ་སྟོན་ཁྲོམ་སྐོར་ཐོག་མ་དེ་ཆགས་ཡོད། དེར་བརྟེན་ཕྱི་ནང་གི་དྲ་རྒྱ་དང་གསར་ལམ་ཁག་ཏུ་དོ་སྣང་དང་གླེང་སློང་ཤུགས་ཆེན་འབྱུང་བཞིན་པ་དང་། པེ་ཅིན་གྱི་རང་དབང་རྩོམ་པ་པོ་ཅཱ་ཐེན་ཆིས་ཀྱིས་ཨ་རིའི་རླུང་འཕྲིན་ཁང་ལ་དེའི་སྐོར་ནས་འགྲེལ་བརྗོད་གནང་དོན། འདི་ནི་ཕལ་ཆེར་ཆབ་མཚོན་རང་བཞིན་ལྡན་པའི་ལས་འགུལ་ཞིག་ཏུ་ངོས་འཛིན་བྱས་ཆོག འདས་པའི་དུས་ཡུན་རིང་པོའི་ནང་ཁྲང་ཨན་གཞུང་ལམ་དུ་མི་སུས་ཀྱང་འདི་ལྟའི་ལས་འགུལ་སྤེལ་མ་ནུས་པ་རེད། གལ་ཆེ་བ་ཞིག་ནི་ཐེངས་འདིའི་ཁྲོམ་སྐོར་བྱེད་མཁན་དག་ནི་མང་ཚོགས་དཀྱུས་མ་མིན་པར་ཤེས་ལྡན་མི་སྣའི་དཔུང་ཁག་ཅིག་ཡིན་པས། འདི་ནི་ལྟ་གྲུབ་དང་སྤྱི་ཚོགས་ཀྱི་རྒྱབ་ལྗོངས་གང་ཐད་ནས་དོན་སྙིང་ལྡན་པ་ཞིག་རེད་ཅེས་བརྗོད་ཡོད་པ་རེད། རྒྱ་ནག་ནང་ལོག་གི་གསར་ལམ་དྲ་བ་འགར་ཡང་དེའི་སྐོར་གྱི་གནས་ཚུལ་ཐོན་ཡོད་ནའང་རྗེས་སུ་བསུབས་ཏེ་བཀག་སྡོམ་བྱས་ཡོད་འདུག
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
སྒྱུ་རྩལ་བ་ཚོས་ལས་འགུལ་ལམ་སློང་ཡོང་བར་སྨོན་ཟེར་དགོས་བ་འདྲ། འོན་ཀྱང་གསར་འགོད་པས། ལྡེབས་གྱང་དང་ཆབ་མཚོན་ཟེར་བའི་ཚིག་དག་གོ་མ་སོང་། གྱང་ལྡེབས་ཟེར་ན་གྱང་ངོས་ལ་གོ་བ་ཡིན་མོད། ལྡེབས་གྱང་ཟེར་བ་མགོ་མཇུག་ལྡོག་མེད་དམ་སྙམ། ཆབ་མཚོན་ཟེར་བ་འདི་ཚབ་མཚོན་ཨེ་ཡིན་ནམ། དེ་ལྟར་ན་གོང་མ་དེ་ནོར་བ་དང་རྗེས་མ་དེ་གཏགས་ནོར་ཡིན་པས་སྐྱོན་མི་འདུག་སྙམ།