ཕྱིར་ཉིན་བློ་བཟང་སྣེ་ལེན་ཁང་དུ་བྱིན་ནས་མཚམས་སྐྱིད་ཁྲིད་དེ་རང་གི་གྲོགས་པོའི་ནང་དུ་ཡོང་ནས་ཁོ་གཉིས་ཀྱི་ལྷན་དུ་ཉིན་གུང་ཁ་ལག་བཟོས་པ་དང་། ཞོར་དུ་འདས་སོང་གི་གཏམ་རྒྱུད་མི་ཉུང་བ་ཞིག་ལམ་བར་དུ་བཤད་པ་དེ་ཡི་འཕྲོར་མཐུད་དེ། བློ་བཟང་གིས། མཚམས་སྐྱིད་ལ། ངས་ཁྱེད་རང་ལ་དངོས་ནས་སྐད་ཆ་ཞིག་ཞིབ་དུ་འདྲི་འདོད་འདུག ཁྱེད་རང་གིས་ད་ལྟའི་བར་དུ་སུ་ལ་ཡང་བརྩེ་བ་ཆགས་མྱོང་མེད་ཟེར་བ་དང་། སྐྱེ་བ་སུ་ལ་ཡང་ཐུག་མྱོང་མེད་ཟེར་བའི་སྐད་ཆ་དེར་ང་གཏན་ནས་ཡིད་ཆེས་བྱེད་ཐུབ་ཀྱི་མི་འདུག ཡིན་ཡང་། ཁྱེད་རང་གིས་ཕོ་གསར་གཞན་དང་ལྷན་དུ་འོ་བྱེད་མྱོང་ཀྱང་མེད་དམ།
མཚམས་སྐྱིད་དང་ཁོ་གཉིས་ཀྱིས་དྲི་བ་ག་རེ་ཡིན་ཡང་དྲིས་ཆོག་པར་སྐད་ཆ་མགོ་གླེང་དུས་སུ། ཕན་ཚུན་གཉིས་ཀ་མོས་མཐུན་བྱུང་ཡོད་སྟབས། མཚམས་སྐྱིད་ཀྱིས། ཡོད། སློབ་གྲྭ་ནས་ཕོ་གསར་གཞན་ལ་འོ་བྱེད་མྱོང་ཡོད།
བློ་བཟང་མཚར་སྣང་དང་བཅས་དེ། འོ་ན་ཁྱེད་རང་ལ་ཚོར་བ་འདྲ་མ་བྱུང་ངམ།
བྱུང་མ་སོང་།
ལན་དེ་ལྟར་བཏབ་དུས་སུ། བློ་བཟང་ལ་རེ་ཞིག་དྲི་བ་གཞན་གང་ཡང་མེད་པར་ཁ་རོག་ཁོ་གཉིས་ཀྱི་གློག་ཀླད་ནང་ནས་ཕ་ཡུལ་གྱི་བརྙན་འཕྲིན་འོད་སྡེར་ཁ་ཤས་ཤིག་ལ་བལྟས་དེ་བསྡད་པ་རེད།
ཕྱི་དྲོ་སླེབས་ནས་འོང་གི་ཡོད་ལ། ད་ནི་མཚམས་སྐྱིད་ཕྱིར་སྣེ་ལེན་ཁང་དུ་འགྲོ་རན་ཡོད་སྟབས། བློ་བཟང་གིས་ཁོ་མོ་བསྐྱལ་ནས་སྣེ་ལེན་ཁང་གི་སྒོ་འགྲམ་དུ་སོང་བ་རེད།
བློ་བཟང་གིས་སྒོ་འགྲམ་ནས་མཚམས་སྐྱིད་ལ། ཁྱེད་རང་སྣེ་ལེན་ཁང་དུ་ཟ་མ་ཟ་འདོད་མེད་པ་དང་། དེ་ནས་སུན་ན་སང་ཉིན་སློབ་གྲྭར་མ་བཏང་བ་ཡིན་ན། ང་རང་ཡོད་སར་ཤོག་དང་འགྲིག་གི་རེད། ང་ནང་ནས་བསྡོད་ངེས་ཡིན་ཞེས་བཤད་པ་རེད།
མཚམས་སྐྱིད་ཀྱིས་མགོ་བོ་སྡེབས་ཀྱིན། ཡ་ཡ་། ཁྱེད་རང་བཀའ་དྲིན་ཆེ། དངོས་ནས་སང་ཉིན་ང་སློབ་གྲྭར་མ་བཏང་བ་ཡིན་ན། ང་རང་གི་ཕུ་བོས་ང་རང་སྣེ་ལེན་ཁང་དུ་བསྡོད་མི་དགོས་ཟེར་བ་མ་ཟད། ཁོ་རང་གི་ངོ་ཤེས་གྲོགས་མོ་ཨ་རི་ནས་ཡོང་བ་གཉིས་ཀྱི་མར་ཕྱོགས་འདིར་མགྲོན་ཁང་ཞིག་གླས་དེ་བསྡད་ཡོད་པ་དེ་ནས་བསྡོད་ཟེར་གྱི་འདུག སང་ཞོགས་གཅིག་བྱས་ན་ང་རང་གི་ཕུ་བོས་བུད་མེད་དེ་གཉིས་ངོ་སྤྲོད་བྱས་རྗེས་སུ། ཁོ་རང་སང་དགོང་ཕྱིར་ལོག་འགྲོ་མཁན་ཡིན་པ་འདྲ། གང་ལྟར། ང་རང་སང་ཉིན་མ་སོང་ན། ང་རང་ཁྱེད་རང་ཡོད་སར་ཡོང་འདོད་འདུག
མཚན་མོ་དེར་བློ་བཟང་གི་གྲོགས་པོ་རྙིང་བ་དེས་ཁོ་རང་ལ་ང་རང་ལ་ཟ་རྒྱུ་འཐུང་རྒྱུའི་དཀའ་ངལ་མ་འཕྲད་པ་ཡིན་ན། ཁྱེད་རང་ལ་ཡང་གཏན་ནས་དཀའ་ངལ་འཕྲད་མི་སྲིད་པ་ཡིན། ད་ནི་ངས་བལྟས་པ་ཡིན་ན། ཁྱེད་རང་གིས་ལས་ཀ་བྱེད་པ་ལས་འདི་ཁུལ་ནས་འཛིན་གྲྭ་རེ་སོང་ནས་དབྱིན་ཡིག་ཕྲན་པུ་ཞིག་སྤྱོང་བ་དང་སློབ་སྤྱོང་རེ་བྱས་པ་ཡིན་ན་ཡག་པོ་མེད་འགྲོ་བསམ་གྱི་འདུག་ཞེས་བཤད་ཀྱང་། བློ་བཟང་གིས་རང་གི་གྲོགས་པོ་དེ་ལ་དཀའ་ངལ་གཏད་པ་མང་མེད་ན་ཉུང་མེད་སྙམ་བཞིན། ཡ་ཡ། ངས་ཀྱང་སློབ་སྤྱོང་ཕྲན་པུ་ཞིག་བྱེད་ཨེ་ཐུབ་བསམ་ནས་བསྡད་ཡོད་ཅེས་བཤད་པ་རེད།
མཚམས་སྐྱིད་སླར་ཡང་བློ་བཟང་ཡོད་སར་ཡོང་ནས་ཁོ་གཉིས་ཀྱི་ལྷན་དུ་ནང་ནས་ཟ་མ་བཟོས་པ་དང་། ཁ་སང་གི་བཤད་འཕྲོ་ལྟ་བུ་ཞིག་ལུས་ཡོད་པ་ལྟར། སླར་ཡང་ཕོ་མོའི་བར་གྱི་བརྩེ་དུང་གི་སྐོར་ལ་ཁ་བརྡ་བྱས་པ་རེད། བློ་བཟང་གིས་ཁྱེད་རང་ལ་དྲི་བ་ག་རེ་དྲིས་ཀྱང་འགྲིག་གི་ཡོད་མེད་དེ་ཡི་སྐོར་ལ་ལན་གསལ་བོ་ཞིག་དགོས་ཀྱི་འདུག་ཟེར་ནས་བརྙན་འཕྲིན་ལ་བལྟ་ཞོར་དུ་བཤད་དུས་སུ། མཚམས་སྐྱིད་ཀྱིས་ཁྱེད་རང་ལ་དྲི་བ་ག་རེ་འདྲི་འདོད་ཡོད་ན་དྲིས་ན་འགྲིག་གི་རེད།
སྐབས་དེར་ཁང་བ་དེ་ནི་ཧ་ཅང་ཆུང་ཆུང་ཡིན་ལ། ཁོ་གཉིས་རྐུབ་སྟེགས་སྟེང་ནས་བསྡོད་ཡུན་རིང་དྲགས་སྟབས། གཉིས་ཀ་ཉལ་ཁྲིའི་སྟེང་དུ་ནར་ནས་གླེང་མོལ་བྱེད་སྐབས་སུ། བློ་བཟང་གིས། ཁྱེད་རང་གིས་ཁ་སང་བཤད་པའི་སྐད་ཆ་གཅིག་ད་དུང་ཡང་། ངས་སྣང་བར་གཏན་ནས་འགྲོ་ཡི་མི་འདུག
འོ་བྱས་ཀྱང་ཚོར་བ་མི་འདུག་ཟེར་བ་དེ།
དེ་དངོས་ནས་ཡིན།
དེས་ན་ངས་ཁྱེད་རང་ལ་ཚོད་ལྟ་ཞིག་བྱས་ན་འགྲིག་གི་རེད་དམ།
འགྲིག་གི་རེད།
ད་ནི་ས་ཡང་རུབ་ནས་འགྲོ་གྲབས་ཡོད་པ་དང་། བློ་བཟང་གིས་མཚམས་སྐྱིད་ལ་འོ་ཞིག་བྱས་ཚར་བ་མ་ཟད། མཚམས་སྐྱིད་ལ་ཚོར་བ་གང་ཡང་མེད་པའི་ཁུལ་དང་བཅས་བསྡད་པ་རེད།
མཚམས་སྐྱིད་ཀྱིས་ཁོ་མོ་སྣེ་ལེན་ཁང་དུ་བསྡོད་ཀྱི་མེད་པ་དང་། དོ་ནུབ་ང་རང་གི་ཕུ་བོའི་གྲོགས་མོ་དེ་གཉིས་ཀྱི་སར་འགྲོ་དགོས་པ་རེད། ཁྱེད་རང་གིས་ང་བསྐྱེལ་ཐུབ་ཀྱི་འདུག་གམ་ཟེར་ནས་བློ་བཟང་ལ་དྲིས་དུས་སུ། བློ་བཟང་གིས་ཐུབ་དང་ཐུབ། ད་ཁྱེད་རང་འགྲོ་འདོད་འདུག་གམ་ཟེར་ཞོར་ཉལ་ཁྲིའི་སྟེང་ནས་ཡར་བླངས་དེ་རང་གི་ལྷམ་མགོ་གོན་པ་རེད།
ལམ་བར་དུ་མཚམས་སྐྱིད་ཀྱིས། ང་རང་དངོས་ནས་བཤད་ན་ཁོ་མོ་གཉིས་ཡོད་སར་འདུག་འདོད་མེད་མོད། ཕུ་བོས་དེ་ནས་བསྡོད་ཟེར་སྟབས་མ་བསྡད་པ་ཡིན་ན་འགྲིག་གི་མ་རེད། གཅིག་བྱས་ན། ཁོ་མོ་གཉིས་ནང་དུ་མེད་ན་ཡང་ཐང་། ང་རང་ལ་སྡེ་མིག་ཡོད་ས་ཞིག་བཤད་སོང་ཡང་ངས་དྲན་གྱི་མི་འདུག
བློ་བཟང་གིས། དེས་ན་ཁྱེད་རང་མི་བདེ་བ་འདྲ་མེད་ན། ངེད་གཉིས་ཀྱི་ནང་དུ་བསྡད་ན་འགྲིག་གི་རེད། དོ་ནུབ་ངས་རོགས་པ་ཡང་ནང་དུ་མི་ཡོང་ཟེར་ནས་ང་རང་ལ་བཤད་སོང་། ཁོ་རང་དོ་ནུབ་ཐུགས་སྤྲོ་ཞིག་ལ་འགྲོ་དགོས་ཀྱི་ཡོད། སང་ཉིན་ངལ་གསོ་ཡིན་སྟབས། རོགས་པ་དེ་ཡི་ནང་ནས་ཉལ་རྒྱུ་ཡིན་ཟེར་ནས་བཤད་སོང་།
མཚམས་སྐྱིད་ཀྱིས། བདེ་བོ་མི་འདུག ད་ཁྱེད་རང་ལ་དཀའ་ལས་གཏད་པ་རེད་ཅེས་བཤད་ཀྱིན་ཁོ་གཉིས་ཁོ་མོ་བཅོལ་སའི་གནས་ཚང་དེ་ཡི་སྒོ་འགྲམ་དུ་འབྱོར་དུས། སྒོ་ལ་ལྕགས་ཟ་ཞིག་བརྒྱབ་དེ་བཞག་ཡོད་པ་དེ་མཐོང་ནས། རེད་རེད། དེས་ན་ངེད་གཉིས་ཕྱིར་འགྲོ
བློ་བཟང་གི་སེམས་སུ་བུད་མེད་ཞབས་གསར་མ་ཟེར་ན་དངོས་ནས་བུད་མེད་གཞན་དང་མ་འདྲ་བའི་ཚོར་བ་ཞིག་སྤྲོད་རབས་ཡོད་པ་རེད་སྙམ་ན་ཡང་། མཚམས་སྐྱིད་ལ་ཐད་ཀར་གང་ཡང་བཤད་མི་འཕོད་པ་ནི། ཁོ་མོ་ལ་ཁོ་རང་ཡོད་སར་བསྡད་པ་ཡིན་ན། ལག་པ་མི་འཆིང་ཟེར་ནས་ཁས་ལེན་བྱས་ཡོད་སྟབས། རེ་ཞིག་རིང་མཚམས་སྐྱིད་ལ་གང་ཡང་མ་བཤད་པ་རེད།
གང་ལྟར། ས་རུབ་ནས་ཡུན་རིང་ཞིག་འགོར་ནས། བློ་བཟང་དང་མཚམས་སྐྱིད་གཉིས་ཀྱིས་སྐད་ཆ་ལྡ་བེ་ལྡུབ་བེ་ཞིག་བཤད་ནས་གཉིས་ཀ་གཉིད་ཀྱང་ཁུགས་ཀྱི་མེད་པའི་སྐབས་དེར། བློ་བཟང་གིས། མཚམས་སྐྱིད་ལ་ཁྱེད་རང་ད་ལྟའི་བར་དུ་ཕོ་གསར་སུས་ཀྱང་ལག་པ་འཆིང་མྱོང་མེད་ན། ད་ནི་རང་དབང་ཡོད་སའི་ལུང་བ་ཞིག་དུ་འབྱོར་ནས་ཕ་མ་དང་ཉེ་རིང་སུ་ཡང་འཁྲིས་སུ་མེད་པའི་སྐབས་འདི་འདྲ་ཞིག་ལ། ཁྱེད་རང་གི་མུ་མཐུད་དུ་རང་གི་ལུས་པོ་དེ་གཙང་མ་གཉར་ཐུབ་ཀྱི་རེད་འདོད་ཀྱི་ཡོད་དམ།
མཚམས་སྐྱིད་ཀྱིས། ཁྱེད་རང་གི་བཤད་པ་བདེན་པ་རེད། ང་རང་ད་ནི་རང་གི་ཕ་མ་ཉེ་དུ་ཡོད་ཚད་དང་རྒྱང་དུ་བཞག་ནས་ཡོད་པའི་ལུང་བ་འདིར། ངས་རང་གི་ལུས་པོ་འདི་མུ་མཐུད་དུ་གཙང་མ་གཉར་ཟེར་ན་དངོས་ནས་ཁག་པོ་རེད། འོན་ཀྱང་་
མི་སུ་ཞིག་ངའི་མི་ཚེ་དང་ལྷན་དུ་འགྲོག་འདོད་ཡོད་པ་དེ་ལ།
དེས་ན་ང་རང་ཁྱེད་དང་ལྷན་དུ་འགྲིག་གི་རེད་དམ།
དེས་ལོས་འགྲིག འོན་ཀྱང་། དམ་བཅའ་འཇོག་དགོས།
བློ་བཟང་གི་སེམས་ནང་དུ་བུད་མེད་ཟེར་བ་འདི་ནི་དྲང་མོ་བཤད་དེ་ཡོང་བ་ཞིག་མིན་ཟེར་བ་ནི་འདི་འདྲ་ལ་ཟེར་བ་ལོས་ཡིན། ད་ནི་གང་ལྟར། རང་ཉིད་ནི་མི་ཚེ་གསར་བ་ཞིག་གི་མགོ་འཛིན་དགོས་པ་དེ་ནི་བཤད་མ་དགོས་པ་རེད། ཁོ་མོ་ད་ལྟའི་བར་དུ་མི་སུ་ལ་ཡང་ཐུག་མྱོང་མེད་པ་དེ་བདེན་པ་ཡིན་ཚེ། ཁོ་མོ་ང་དང་བརྩེ་བ་ཟབ་མོ་ཞིག་ཆགས་ངེས་ཡིན་པ་ནི་བཤད་མི་དགོས་པ་ཞིག་རེད། ཁོ་མོ་ལ་དམ་བཅའ་བཞག་ཀྱང་མ་འགྲིག་པ་མི་འདུག་སྙམ་ནས། ངས་ཁྱེད་རང་ལ་དམ་བཅའ་བཞག་ཆོག
བློ་བཟང་གིས་ཁོ་མོ་མནའ་བསྐྱལ་ནས་དམ་བཅའ་བཞག་རྗེས་སུ། དེས་ན་ངས་ཁྱེད་རང་ལ་དོ་ནུབ་ལུས་འབྲེལ་བཞག་ན་འགྲིག་གི་རེད་དམ།
དེས་ལ་ཅི་སྐྱོན། སློབ་གྲྭ་དེ་རུ་ཡོད་མཁན་མི་ཉུང་བ་ཞིག་ཕ་རྒན་མ་རྒན་རེད།
ཡིན་ཡང་། ང་རང་ཁོང་ཚོ་དང་གཏན་ནས་མི་འདྲ།
དེ་ལ་ཅི་སྐྱོན། འུ་གཉིས་ཀྱི་མི་ཚེ་ལ་དམ་བཅའ་བཞག་ཚར་བ་རེད།
རེད་དེ། ང་རང་སློབ་མ་གཙང་མ་ཞིག་བྱེད་འདོད་ཡོད།
བློ་བཟང་གིས་དེས་ན་ངས་ཁྱེད་རང་ལ་ཕྱི་ནས་སྒུག་ན་འགྲིག་གི་རེད་ཅེས་ད་ངེད་གཉིས་གཉིད་ཟེར་ནས་བློ་བཟང་གཉིད་རྩིས་བྱས་དུས་སུ། མཚམས་སྐྱིད་ཀྱིས་ཅུང་ཙམ་བསྡོད་དང་ཁ་བརྡ་བྱེད་རོགས་བྱོས་ཟེར་ནས་ཡང་དང་བསྐྱར་དུ་གཉིད་དུ་མ་བཅུགས་པ་རེད།
མུ་འགོད།
སྤུན་ཟླ་ཁྱེད་ཅག་ཕེབས་ནས་བློ་བཟང་གི་བྱེད་སྟངས་ལ་བསམ་ཚུལ་རེ་གསུངས་པ་དེར་དགའ་ཡོད། ངས་ཀྱང་བློ་བཟང་གི་བྱེད་སྟངས་ཁ་ཤས་ཤིག་ནི་དངོས་ནས་ཡ་མཚར་དང་ཁྲེལ་གཞུང་མེད་པ་ལྟ་བུ་ཞིག་དུ་མཐོང་གི་ཡོད་ན། སྤུན་ཟླ་ཁྱེད་ཅག་གིས་གང་དགོངས་ཀྱི་འདུག་གམ།
མེ་ཏོག་ལེན་ཟེར་བ་ལས་མེ་ཏོག་དབྲལ་ཟེར་ན་དོན་དང་མཐུན་གི
བློ་བཟང་གིས་མེ་ཏོག་ལེན་རྒྱུ་དེ་འདྲ་ལས་སླ་བོ་ཞིག་འུ་ཡིན་ན།
ཤ་ཁྲག་ལགས་སྐུ་ཉིད་ཀྱི་སྒྲུང་རིང་འདི་མུ་མཐུད་བཀླགས་ཐུབ་མ་སོང་།
དེ་རིང་གཟའ་ཉི་མ་དང་སྟབས་བསྟུན་ནས་ཁྱིད་ཀྱི་ཟིན་བྲིས་ལ་ཡོང་ནས་ལོག་འགྲོ་བཞིན་ཡོད།