སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} གྱ་དྲུག

མཚམས་སྐྱིད་ཀྱིས། ངས་ཁྱེད་རང་ལ་འཕྲིན་ལན་ཞིག་སྐུར་ཚར་བ་ཡིན། ཁྱེད་རང་ལ་འཕྲོད་མ་སོང་བ་ཡིན་རྒྱུ་རེད། སང་ཉིན་ང་རང་རྡ་སྟེང་མེག་ལོར་དུ་འགྲོ་ངེས་ཡིན། ལྷག་པར་དུ་ཁྱེད་རང་གི་གྲོགས་པོ་དེ་ཡི་སར་སོང་ནས་རོགས་ཤིག་བྱེད་དུ་འཇུག་དགོས་ཀྱི་ཡོད། གང་ཡིན་ཟེར་ན། ང་རང་ལ་ཨ་རི་ནས་ཕུ་བོ་ཟླ་བས་ཨ་སྒོར་ཉིས་བརྒྱ་ཞིག་སྐུར་འདུག དེ་ཧིན་སྒོར་ལ་བརྗེ་བོ་རྒྱབ་དེ་གོན་པ་གསར་བ་ཁ་ཤས་ཤིག་ཉོ་འདོད་འདུག ངས་རེ་བ་ལ་ཁྱེད་རང་ལོ་སར་བར་དུ་ཚུར་འབྱོར་ན་བསམ་བཞིན་ཡོད།

བློ་བཟང་གིས། ཁྱེད་རང་གི་ཕུ་བོས་ཁྱེད་རང་ལ་སྒོར་མོ་སྐུར་ཡོད་ན་དངོས་ནས་ཡག་པོ་རེད། འོན་ཀྱང་། སྒོར་མོ་དེ་ཚོ་དོན་མེད་དུ་འཕྲོ་བརླག་དུ་མ་གཏོང་། གོན་པ་གསར་བ་རེ་ཉོས་དེ་བརྫིག་པོ་བྱེད་པ་ལས། ཟ་མ་ཡག་པོ་རེ་ཟས་དེ། སློབ་སྤྱོང་ཡག་པོ་ཞིག་བྱོས་པ་ཡིན་ན་ཡག་པོ་ཡོད་པ་རེད། ང་རང་ཕལ་ཆེར་ལོ་སར་ལ་ཡོང་མི་ཐུབ་ཁོ་ཐག་རེད། འོན་ཀྱང་ལོ་གསར་རྗེས་སུ་མི་འགྱངས་པར་ཡོང་ངེས་ཡིན། ལྷག་པར་དུ་སློབ་གྲྭ་དེ་རུ་ང་རང་གི་སྤུན་མཆེད་བཀྲ་ཤིས་དོན་འགྲུབ་ཀྱང་འབྱོར་ཡོད་པ་རེད། ཁྱེད་རང་གིས་ཁོ་ལ་ངོ་ཤེས་ཤིག་བྱས་པ་ཡིན་ན་ཡག་པོ་ཡོད་པ་རེད།

མཚམས་སྐྱིད་ཀྱིས། ཡ་ཡ། ངས་ཁྱེད་རང་གི་ཁ་ལ་ཉན་ཆོག ཡིན་ཡང་། ལོ་སར་ལ་ཁྱེད་རང་མི་ཡོང་ཁོ་ཐག་ཡིན་ན་ང་རང་ལོ་སར་སྐབས་སུ་སློབ་གྲྭ་ནས་མི་འདུག སྤིར་གཞིས་ཆགས་སུ་ང་ཚོའི་ཕ་ཡུལ་གཅིག་པ་ཚོས་ལོ་སར་ལྷན་དུ་གཏོང་བཞིན་འདུག ང་རང་དེ་རུ་འགྲོ་འདོད་འདུག འགྲིག་གི་རེད་དམ། འོན་ཀྱང་། ཕུ་བོས་ལོ་སར་གྱི་གུང་གསེང་སྐབས་སུ་རྡ་ས་མེག་ལོར་ནས་དབྱིན་སྐད་ཕྲན་བུ་ཞིག་ཟུར་སྤྱོང་བྱས་པ་ཡིན་ན་ཟེར་གྱི་འདུག

བློ་བཟང་གིས། དེ་འགྲིག་དང་འགྲིག ཡིན་ཡང་། ངས་བལྟས་པ་ཡིན་ན་ཁྱེད་རང་གི་ཕུ་བོས་བཤད་པ་དེ་དངོས་ནས་ཡག་པོ་འདུག གོ་སྐབས་དེ་དངོས་ནས་ཡག་པོ་རེད། གཙོ་བོ་ཁྱེད་རང་གི་བསམ་བློ་ཞིབ་མོ་གཏོང་། ངས་ཁྱེད་རང་གི་རང་གི་མདུན་ལམ་ནོར་དུ་མི་འཇུག་པའི་ཡིད་ཆེས་ཡོད།

ལོ་གསར་མ་སླེབས་པའི་གོང་དེར་བློ་བཟང་ལ་འཕྲིན་ཡིག་ཞིག་འབྱོར་བ་དང་། འཕྲིན་ཡིག་དེ་སྐུར་མཁན་ནི་རང་གི་སྤུན་མཆེད་བཀྲ་ཤིས་དོན་འགྲུབ་ཡིན་པ་རེད། འཕྲིན་ཡིག་གི་ནང་དུ་ཁོ་རང་སློབ་གྲྭ་རུ་བདེ་མོ་ཡིན་པ་དང་། ནུ་མོ་མཚོ་མོ་སྐྱིད་ཀྱང་སློབ་གྲྭ་ན་བདེ་མོ་ཡོད་ཚུལ། ཞོར་དུ་མཚམས་སྐྱིད་ཀྱི་སྐོར་ཞིག་བྲིས་ཡོད་པ་ནི། ཕུ་བོ་བློ་བཟང་ལགས། ངས་གོ་ཐོས་ཡིན་ན། ཁྱེད་རང་མཚམས་སྐྱིད་ཟེར་བའི་བུ་མོ་དེ་དང་དགའ་རོགས་ཡིན་རབས་འདུག ངའི་རེ་བ་ཡིན་ན་ཁྱེད་རང་གིས་བུ་མོ་དེ་དང་དགའ་རོགས་མ་སྒྲིག་ན་ཡག་པོ་འདུག བུ་མོ་དེ་ནི་ང་ཚོའི་འཛིན་གྲྭའི་ནང་གི་མ་རབས་ཚ་ཤོས་ཀྱི་བུ་མོ་དེ་རེད། ཁོ་མོས་འདི་ནས་ཕོ་གསར་གཞན་དག་ལྷན་དུ་དགའ་རོགས་སྒྲིག་གི་འདུག མཐའ་མཇུག་ངས་རེ་བ་ནི་ཁྱེད་རང་གི་བུ་མོ་འདི་ལས་ཡག་ཞིག་རེག་ངེས་ཡིན་པར་ཡིད་ཆེས་ཡོད་ལ། བུ་མོ་དེ་ལ་བརྩེ་བ་ཆགས་མེད་པར་རེ་བ་རྒྱག་གི་ཡོད་ཅེས་བྲིས་ཡོད་པ་རེད།

བློ་བཟང་གིས་ཡི་གེ་ཞིབ་དུ་ཀློག་ནས་སྣང་མེད་དུ་སྐྱུར་བ་དང་། མུ་མཐུད་དུ་མཚམས་སྐྱིད་ཀྱི་ཁ་པར་སླེབས་ཐེངས་རེ་ལ། ཁ་བརྡ་སློབ་གསོ་རེ་བྱེད་པ་དང། ཁོ་གཉིས་མི་རིང་བར་ཐུག་ཐུབ་ངེས་ཡིན་པའི་སྐོར་རྐྱང་རྐྱང་བཤད་པ་རེད།

ཟླ་ངོ་ཁ་ཤས་ཀྱི་རྗེས་སུ་ཕྱིར་རྡ་སར་འབྱོར་ནས་སློབ་གྲྭ་རུ་རང་གི་སྤུན་མཆེད་དང་རྡོར་སྐྱབས། མཚམས་སྐྱིད་བཅས་ལ་ཐུག་འཕྲད་བྱེད་དུ་སོང་བ་དང་ལག་སྐྱེས་ཆུང་ཆུང་རེ་ཡང་ཉོས་དེ་སོང་། བཀྲ་ཤིས་དོན་འགྲུབ་དང་རྡོར་སྐྱབས་གཉིས་ལ་ཁ་བརྡ་ལྷོད་ལྷོད་ཅིག་བྱས་རྗེས་སུ་ཁོ་གཉིས་བློ་བཟང་གི་ལག་སྐྱེས་དེ་དག་ཁུར་ནས་ཕྱིར་སློབ་གྲྭར་སོང་ཤུལ་དུ། མཚམས་སྐྱིད་དང་ཁོ་གཉིས་གཟའ་ཉི་མའི་ཉིན་རྡ་སྟེང་ནས་ཐུག་འཕྲད་བྱེད་རྒྱུའི་དུས་ཚོད་བསྒོས།

ཕྱིར་ཉིན་ཞོགས་པ་སྔ་བོ་བློ་བཟང་ནོར་གླིང་གི་རང་གི་གྲོགས་པོ་ཚེ་རིང་གི་ནང་ནས་ཡར་བླངས་དེ། ཟླ་ངོ་དྲུག་གི་རིང་དུ་ཁ་ངོ་མ་ཐུག་པའི་རང་གི་ནུ་མོ་མཚམས་སྐྱིད་ལ་ལྟ་རུ་སོང་བ་རེད། བློ་བཟང་གིས་ནུ་མོ་མཚོ་མོ་སྐྱིད་ལ་ཉོས་པའི་ལག་སྐྱེས་དང་གོན་པ་གསར་བ་ཆ་ཚང་གཉིས་བཅས་ཁུར་ནས་སློབ་གྲྭར་འབྱོར་དུས། སློབ་གྲྭའི་བར་གསེང་བཏང་མེད་སྟབས། ཅུང་ཙམ་སྒུག་དགོས་བྱུང་བ་རེད།

ནུ་མོ་མཚོ་མོ་སྐྱིད་ཀྱིས་རང་གི་ཕུ་བོ་བློ་བཟང་རང་ཉིད་ལ་ཐུག་འཕྲད་བྱེད་དུ་འབྱོར་ཡོད་པ་མཐོང་མ་ཐག ངུ་སྐད་དང་བཅུས་དེ་རང་གི་ཕུ་བོ་ལ་འཐམ་ནས་ངུས་པ་ན། བློ་བཟང་གི་སེམས་གཏིང་ནས་ཟུག་རྔུ་ཞིག་དང་བཅས། ད་མ་ངུ་། ང་ཁྱེད་རང་ཡོད་སར་ཐོན་ཡོད་པ་མི་རིག་གི མ་ངུ་། མ་ངུ་། འདི་ཟེར་ནས་ཁོ་རང་གིས་ཅ་དངོས་དག་ནུ་མོ་མཚོ་མོ་སྐྱིད་ལ་སྤྲད་དུས། ད་དུང་། ངུ་མཚམས་མ་ཆད་པར། མིག་ཆུ་འཁུར་ཚེས་ནས་ཟེགས་ཀྱིན་ཡོད་པ་རེད།

བློ་བཟང་གིས། ད་མ་ངུ་། མིག་ཆུ་དེ་ཚོ་ཡག་པོ་ཞིག་ཕྱིས་ཤིག ངས་ཁྱེད་རང་ལ་འདྲ་དཔར་ཁ་ཤས་ཤིག་བརྒྱབ་ནས། ང་རང་ཕར་སོང་ནས་ནང་ལ་སྐུར་དགོས་པ་རེད། ནང་མི་ཚོས་ཁྱེད་རང་གི་དཔར་ཞིག་སྐུར་ཤོག་ཟེར་ནས་ཡང་དང་བསྐྱར་དུ་བཤད་ཀྱི་འདུག ཁྱེད་རང་འདི་ལྟར་ངུས་པ་ཡིན་ན། ང་རང་རྗེས་མ་ལྟ་རུ་ཡོང་གི་མིན།

སྐབས་དེར། ནུ་མོ་མཚོ་མོ་སྐྱིད་ཀྱིས། ཨང་ཨང་ཟེར་ཞོར་དུ། ཕུ་བོ་བློ་བཟང་གི་ཉོས་པའི་རྩེད་ཆས་ཤིག་ལག་དུ་བཟང་ནས་འདྲ་དཔར་བརྒྱག་དུ་བཅུགས་པ་རེད། བློ་བཟང་གིས་སྐབས་དེར་ཁོ་རང་གི་ཉེ་འཁོར་དུ་ཁོ་གཉིས་ལ་ཐག་རིང་ཐུང་གཉིས་ཀ་ནས་བལྟས་དེ་བསྡོད་ཀྱིན་པའི་བྱིས་པ་དེ་དག་གི་ངང་ཚུལ་མཐོང་དུས་སུ། སེམས་བསམ་པའི་གཏིང་ནས་སྐྱོ་བ་དྲགས་པོ་ཞིག་སྐྱེ་ཞོར་དུ། ལྟོས་དང་། ཁྱེད་རང་ལ་ང་ཡོང་ནས་ལག་སྐྱེས་ཉོས་དེ་ལྟ་རུ་ཡོང་གི་ཡོད་པ་དང་། ཁོང་ཚོས་རང་གི་ཕ་མ་དག་རྒྱང་རིང་བོད་དུ་ཡོད་པའི་ཁྱེད་རང་དགའ་ན་རེད།

བློ་བཟང་གིས་རང་གི་ནུ་མོ་ལ་ཐུག་འཕྲད་བྱས་ཚར་ནས་ཕྱིར་རྡ་སར་འགྲོ་བའི་རླངས་འཁོར་ནང་དུ་བུད་དེ་ཡོང་བའི་ལམ་ཁ་ནས། སློབ་གྲྭའི་ནང་གི་བྱིས་པ་གཞན་དག་གི་ངོ་གདོང་དང་། དེ་དག་གི་མ་འོངས་པ། ཡང་ན། རང་རང་གི་ཤ་ཁྲག་གི་ལུས་བརྟེན་འཕྲོད་མཁན་གྱི་ཕ་མ་ཉེ་དུ་ཚོ་དང་རྒྱང་ཐག་རིང་བའི་ཡུལ་ན་འཚོ་བའི་སྐོར་སོགས་ལ་འདང་རྒྱག་གིན་ཕྱིར་རྡ་སར་འབྱོར་བ་རེད།