སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} གྱ་བདུན།

བློ་བཟང་གིས། ཁྱེད་རང་གིས་མི་ཁ་འདྲ་བསམ་ནས་སློབ་གྲྭ་ནས་འདུག་འདོད་མེད་ཟེར་བ་དེ་ལ་ང་རང་གཏན་ནས་མོས་མཐུན་མེད། ངས་ཁྱེད་རང་ལ་སྔོན་ཆད་ནས་བཤད་ཟིན་པ་ལྟར་རེད། ང་རང་གི་མི་ཚེ་ནང་དུ་མྱི་ཁ་ནི་ཆར་བ་འབབ་འབབ་བྱེད་མྱོང་བ་མ་ཟད། དུས་ད་ལྟ་ཡང་མི་ཁ་ནི་རླུང་བུ་བཞིན་འཚུབ་དེ་འོང་གི་ཡོད་ཀྱང་། ངས་དེ་ཡི་སྐོར་ལ་འདང་རྒྱག་གི་མེད། མི་ལ་མི་ཁ་མེད་ན་ཤི་ནི་ཡིན། ཤིང་ལ་འཛེར་མ་མེད་རུལ་ནི་ཡིན་ཟེར་སྲོལ་ཡོད་པ་རེད། དེ་ལས་ཁྱེད་རང་གི་དངོས་ནས་སློབ་སྤྱོང་བྱེད་ཐུབ་ཀྱི་མེད་པ་བདེན་པ་ཡིན་ན། དངོས་ནས་དུས་ཚོད་འཕྲོ་བརླག་དུ་གཞུང་གི་འགྲོ་གྲོན་སོགས་འཕྲོ་བརླག་རེད།

མཚམས་སྐྱིད་ཀྱིས། དེ་རེད། དངོས་ནས་ང་རང་ལྟ་བུ་ཞིག་གིས་༧རྒྱལ་བ་རིན་པོ་ཆེ་དང་བོད་གཞུང་གི་བཀའ་དྲིན་འོག་ཟས་རང་གྲུབ་དང་གོས་རང་གྲུབ་བྱས་དེ་དུས་ཚོད་ཆུད་ཟོས་སུ་བཏང་བ་རེད། སློབ་སྤྱོད་བྱེད་ཐུབ་ཀྱི་མི་འདུག ད་དེ་ཡིན་དུས་ང་རང་སློབ་གྲྭ་ནས་བུད་དེ་ཁྱེད་རང་གི་ལྷན་དུ་འདུག་རྒྱུ་ཡིན།

བློ་བཟང་གིས། ངས་ཁྱེད་རང་ལ་སྔོན་ཆད་ནས་ཁས་ལེན་བྱས་མྱོང་བ་ལྟར། ངེད་གཉིས་ལྷན་དུ་བསྡོད་རྒྱུ་དེ་ལ་ཁྱེད་རང་གི་ཕྱོགས་ནས་འགྱུར་བ་མ་སོང་བ་ཡིན་ན། ངས་གཏན་ནས་འགྱུར་མི་གཏོང་ཟེར་ནས་བཤད་ཡོད་པ་དེ་ཡིན། ད་ཡིན་དུས་ཁྱེད་རང་སློབ་གྲྭ་ནས་འབུད་རྒྱུ་ཡིན་ན་ནི། གནས་སྐབས་རིང་འུ་གཉིས་འདི་ནས་ངའི་གྲོགས་པོའི་ནང་དུ་མི་བསྡོད་ཐབས་མེད་རེད་ལ། ངའི་ནུ་མོ་གུང་གསེང་དུ་བླངས་རྗེས་སུ་འུ་གཉིས་ས་ཆ་གཞན་ཞིག་དུ་ཁྱེད་རང་གི་འདོད་པ་ལྟར་འགྲོ་ཆོག ངའི་རོགས་པ་དེ་ལ་བཤད་ན་ཁོ་རང་གིས་འུ་གཉིས་འགྲོ་བྱེད་ཀྱི་ཧིན་སྒོར་སྟོང་ཕྲག་ཁ་ཤས་ཤིག་ཁོ་རང་གི་ཐབས་ཤེས་བྱེད་ཐུབ་ངེས་རེད།

མཚམས་སྐྱིད་ཀྱིས། ཡ་ཡ། དེ་འགྲིག་གི་རེད། ང་རང་སང་ཉིན་སོང་ནས་སློབ་གྲྭ་རུ་དགོངས་པ་ཞུས་དེ་ནངས་ཉིན་ཡོང་གི་ཡིན། སློབ་གྲྭ་རུ་དགོངས་པ་ཞུ་སྟངས་ག་འདྲ་བྱས་པ་ཡིན་ན་འགྲིག་ས་རེད་དམ།

བློ་བཟང་གིས། དེ་གཙོ་བོ་ཁྱེད་རང་ལྟོས་ཤིག ལྷག་པར་དུ་སྐྱག་རྫུན་འདྲ་མི་འདྲ་བཤད་དེ་དགོངས་པ་ཞུ་དགོས་དོན་ཡོད་པ་མ་རེད་ལ། ལྷག་པར་དུ་ཁྱེད་རང་གི་གྲོགས་མོ་ཚོ་ལ་སྐད་ཆ་འདྲ་མིན་མང་བོ་ཞིག་བཤད་དགོས་དོན་ཡོད་པ་མ་རེད། ཁྱེད་རང་གིས་ཤེས་དགོས་པ་ཞིག་ལ། ད་ལྟ་འུ་གཉིས་ཀྱིས་མི་ཚེ་གསར་བ་ཞིག་གི་མགོ་འཛིན་རྒྱུའི་བསམ་བློ་གཏོང་བཞིན་ཡོད་དུས། རང་རང་དངོས་ནས་མ་ལན་མ་འགྱོད་པ་ཞིག་བྱེད་དགོས་པ་རེད། སློབ་གྲྭ་ནས་བུད་ཉིན་ནས། འུ་གཉིས་ཀྱིས་རང་མགོ་གང་ཐོན་བྱེད་པ་ལས། ཁྱེད་རང་གི་ཕུ་བོ་དང་ནང་མི་སོགས་ལ་འབྲེལ་བ་གནས་སྐབས་རིང་མི་བྱེད།

མཚམས་སྐྱིད་ཀྱིས། རེད། དེ་ངས་ཀྱང་བསམ་ཡོད། ནང་མི་དག་ལ་འབྲེལ་བ་བྱས་པ་ཡིན་ན། ཁོང་ཚོས་ང་རང་འདི་ནས་བསྡོད་དུ་མི་འཇུག་ཁོ་ཐག་ཡིན་ནི་རེད། ལྷག་པར་དུ་ཕུ་བོ་ཟླ་བས་ཤེས་པ་ཡིན་ན་ང་རང་ལེན་དུ་ཡོང་ཁོ་ཐག་ཡིན་ནི་རེད། ངས་ཁྱེད་རང་གི་སྐད་ཆ་སེམས་སུ་འཛིན།

ཉིན་གཉིས་ཀྱི་རྗེས་སུ་མཚམས་སྐྱིད་ཀྱིས་སློབ་གྲྭ་ནས་རྩ་དགོངས་ཞུས་དེ་བློ་བཟང་ཡོད་སར་ཡོང་བ་དང་། བློ་བཟང་གིས་སྐབས་དེར་ཁོ་རང་གི་ལས་ཀ་གལ་ཆེན་ཞིག་བྱེད་ཀྱི་ཡོད་སྟབས། བྲེལ་བ་ཅུང་ཚ་བའི་སྒང་ཡིན་པ་དང་། ཞོར་དུ་ལས་དོན་དེ་ཡི་ཆེད་དུ་ཁོ་རང་གི་གྲོགས་པོ་ཞིག་གི་ཟ་ཁང་ནང་དུ་ལས་ཀ་བྱེད་རྒྱུའི་ཁས་ལེན་མི་བྱེད་ཐབས་མེད་ཆགས་ཡོད་པ་རེད།

མཚམས་སྐྱིད་ཀྱིས་དེ་ལ་གཏན་ནས་ངེས་ལེན་བྱེད་ཐུབ་ཀྱི་མི་འདུག་ཟེར་ནས་ཡང་དང་བསྐྱར་དུ་རྙོག་དྲ་བཤད་མགོ་བཙུགས་པ་དང་། བློ་བཟང་གིས་དེ་ནི་རང་ཉིད་ཀྱི་ནུ་མོ་མཚོ་མོ་སྐྱིད་ཚུར་སླེབས་རེག་བར་དུ་ཡིན་ཡང་ཁོ་རང་གི་ལས་ཀ་བྱེད་རྒྱུ་ཡིན་ཟེར་ནས་བཤད་དུས། མཚམས་སྐྱིད་ཀྱིས། དེས་ན་ངས་རང་གི་ནང་དུ་ཨ་མ་ལ་ཁ་པར་གཏོང་གི་ཡིན། ཁྱེད་རང་གི་གྲོགས་པོ་དེ་ལ་ལག་ཁྱེར་ཁ་པར་ཞིག་གཡར་ནས་ཤོག་དང་།

བློ་བཟང་གིས། ཁྱེད་རང་གིས་དེ་ལྟར་མ་བྱེད། འུ་གཉིས་ལ་བཤད་མཚམས་ཡོད་པ་རེད། ཁྱེད་རང་གིས་ནང་དུ་ཁ་པར་བཏང་བ་ཡིན་ན་འུ་གཉིས་ཀྱི་གནས་ཚུལ་འགྱུར་བ་འགྲོ་ཁོ་ཐག་ཡིན་པ་རེད། གལ་སྲིད། ཁྱེད་རང་གི་ཕ་ཡུལ་དུ་ཁ་པར་གཏོང་གི་ཡིན་ན། འུ་གཉིས་ཁ་ཁར་བྱེད་དགོས་ཆགས་ངེས་ཡིན།

མཚམས་སྐྱིད་ཀྱིས། ངས་འུ་གཉིས་མི་ཚེ་ལྷན་དུ་ཡོང་རྒྱུར་རེ་བ་བྱེད་ཐུབ་ཀྱི་མི་འདུག་ལ། ལྷག་པར་དུ་ད་ལྟའི་འཆར་ངས་རང་གི་ནང་དུ་ཁ་པར་རྒྱག་རྒྱུའི་སེམས་ཐག་བཅད་ཟིན་པ་ཡིན། ཁྱེད་རང་གིས་རང་གི་གྲོགས་པོ་ལ་ཁ་པར་གཡར་རོགས་ཞུ།

བློ་བཟང་གིས་སླར་ཡང་། འདི་ནི་ཁྱེད་རང་གིས་བཤད་པའི་སྐད་ཆ་རེད། ངས་ཁྱེད་རང་ལ་ད་དུང་གོ་སྐབས་ཤིག་སྤྲོད་ཆོག འུ་གཉིས་མི་ཚེ་ལྷན་དུ་བསྐྱེལ་འདོད་ཡོད་པ་ཡིན་ན། དེ་མིན་ན། རྗེས་ཕྱོགས་ཁྱེད་རང་འགྱོད་པ་སྐྱེ་ནས་ག་རེ་བྱས་ཀྱང་ངས་གཏན་ནས་ཁས་ལེན་བྱེད་མི་སྲིད། འདི་ཁྱེད་རང་གི་མཐའ་མའི་ཐག་གཅོད་ཡིན་ནམ།

མཚམས་སྐྱིད་ཀྱིས། འདི་ནི་ང་རང་གི་མཐའ་མའི་ཐག་གཅོད་ཡིན། ཁྱེད་རང་སོང་ནས་གྲོགས་པོ་དེར་ཁ་པར་གཡར་ནས་ནང་དུ་ཧིན་སྒོར་ལྔ་བརྒྱ་འདི་བླུགས་ནས་ཡོང་རོགས། དེ་ནས་ངས་ཁ་བརྡ་ལྷོད་ལྷོད་ཅིག་བྱེད་ཆོག་གི་རེད།