སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} དགུ་བཅུ།

ཉིན་མ་ཁ་ཤས་ཤིག་གི་རྗེས་སུ་བློ་བཟང་ལ་འཕྲིན་ཡིག་ཞིག་འབྱོར་བ་རེད། འཕྲིན་ཡིག་དེ་སྐུར་མཁན་ནི་མཚམས་སྐྱིད་ཡིན་པ་དང་། ཡིག་སྐོག་དེ་ཡི་ནང་དུ་འདྲ་དཔར་གཉིས་དང་ཡི་གེ་ཐུང་ཐུང་ཞིག་ལས་མེད་པ་རེད། འདྲ་དཔར་དེ་གཉིས་ཀྱི་གཅིག་གི་སྟེང་དུ་ཁོ་མོའི་འགྱིག་བཟོའི་བྱིས་པ་ཞིག་བཟུང་ཡོད་པ་དེ་ཡི་འོག་དུ་བློ་བཟང་གི་བྱིས་པ་དང་རྒན་མོ་མཚམས་སྐྱིད་ཟེར་ནས་བྲིས་ཡོད་པ་རེད། འདྲ་དཔར་གཞན་དེ་ནི་ཁོ་མོ་བསྡོད་སའི་ཉལ་ཁང་ཡིན་པ་དང་ལས་ཀ་བྱེད་ས་ཡང་དངོས་ནས་སྐྱིད་པོ་འདུག ཁྱེད་རང་ཡོང་བ་ཡིན་ན། ལས་ཀ་རེག་རྒྱུར་དཀའ་ངལ་མི་འདུག་ཞེས་བྲིས་ཡོད་པ་རེད།

བློ་བཟང་གིས་ཡིག་སྐོག་དེ་ཕྱིར་ཡིག་སྐོག་གསར་བ་ཞིག་གི་ནང་དུ་བསྡུས་དེ། འཕྲིན་ལན་ཐུང་ཐུང་འདི་འདྲ་ཞིག་དང་ལྷན་དུ་མཚམས་སྐྱིད་ལ་སྐུར་བ་རེད། མཚམས་སྐྱིད། ཁྱེད་རང་གིས་དེ་ཁུལ་དུ་ལས་ཀ་བྱེད་ཀྱི་ཡོད་པ་དང་བདེ་ཐང་ཡིན་པ་ཐོས་ནས་དངོས་ནས་དགའ་བོ་བྱུང་། ཡིན་ཡང་། འུ་གཉིས་ཀྱི་བར་ན་ཕོ་མོའི་འབྲེལ་བ་མེད་པ་ཁྱེད་རང་གིས་ཤེས་གསལ་རེད། རྗེས་ཕྱོགས་ང་རང་ལ་འདྲ་དཔར་དེ་འདྲ་སྐུར་མ་ཡོང་། འཕྲིན་ཡིག་ཀྱང་མ་སྐུར་ན་ཡག་པོ་འདུག ད་ནི་ཁྱེད་རང་ཁྱེད་རང་གི་ས་ནས་སྐྱིད་པོ་བྱོས་དེ་བསྡོད།

ཉིན་གྲངས་མང་བོ་ཞིག་མ་འགོར་བར་བློ་བཟང་ལ་སླར་ཡང་གྲོགས་པོའི་ཁ་པར་སྟེང་ལ་མཚམས་སྐྱིད་ཀྱིས་ཁ་པར་སླེབས་ནས། ངས་ཁྱེད་རང་དྲན་གྱི་འདུག ང་རང་མགྱོགས་པོ་རྡ་སར་ཕྱིར་ཡོང་རྒྱུ་ཡིན། ཁྱེད་རང་འཐད་མིན་ལ་ངས་མི་བལྟ། ང་རང་དངོས་ནས་ཡོང་གི་ཡིན། ཁྱེད་རང་གིས་ང་དེ་ལྟར་གཡུགས་ཐུབ་རྒྱུ་རེད་འདོད་ཀྱི་ཡོད་དམ། རྩེད་མོ་རྩེད་ཚར་ནས།

བློ་བཟང་གིས་ཁ་པར་དེ་ལ་ཉན་རྗེས་སུ། ད་ནི་དངོས་ནས་མཚམས་སྐྱིད་འདིས་མི་བྱེད་པ་གང་ཡང་མི་འདུག་སྙམ་བཞིན། རང་གི་གྲོགས་པོ་ཞིག་ལ་རྡེ་ར་སྒྲོང་དུ་འབྲེལ་བ་བྱེད་དུ་བཅུགས་ནས་ཁོ་མོའི་དེ་ཁུལ་ག་རེ་བྱེད་ཀྱི་ཡོད་མེད་སྐོར་ཞིག་འདྲི་རུ་བཅུགས་པ་རེད།

བློ་བཟང་གི་ཁོ་རང་ཡང་ཉིན་འགའི་སྔོན་དུ་ལས་ཀ་གཞན་ཞིག་རེག་ཡོད་པ་དེ་ནི་དངོས་ནས་ལས་ཀ་རླབས་ཆེན་ཞིག་ཡིན་ཟེར་ན་མི་འགྲིག་པ་མེད་ལ། དེ་ཡི་སྐོར་ཡང་མཚམས་སྐྱིད་ཀྱིས་གོ་ཡོད་པ་མ་ཟད། ཁ་པར་ནང་ནས་ཁྱེད་རང་ལ་གོ་སྐབས་དེ་འདྲ་རེག་སྟབས། ང་རང་གཏན་ནས་དྲན་གྱི་ཡོད་པ་མ་རེད་སོགས་གླེང་བ་སོགས་བསམ་བློ་འདྲ་མིན་འཁོར་བཞིན་བསྡད་ཡོད་པ་དང་། ལས་ཀ་དེ་འདྲ་ཞིག་རེག་ཡོད་ཀྱང་། དེ་བྱེད་དུ་འགྲོ་རྒྱུའི་དུས་ཚོད་ལ་སླེབས་རྒྱུར་ད་དུང་ཉིན་མ་བཅུ་ཙམ་ཡོད་པ་རེད།

བློ་བཟང་ལ་གྲོགས་པོ་ཞིག་གིས་གནས་ཚུལ་བཤད་པ་ལྟར། མཚམས་སྐྱིད་ཀྱིས་རྡེ་རེ་སྒྲོང་ནས་རྡ་ས་བར་དུ་འགྲོ་བའི་རླངས་འཁོར་འཛིན་བྱང་ཉོ་རོགས་ཀྱང་། བློ་བཟང་གི་གྲོགས་པོ་དེ་ཡི་ངོ་ཤེས་ཨ་ཅག་ཞིག་གིས་བྱས་འདུག་པ་དེ་ཡི་སྟབས་ཀྱིས་བློ་བཟང་ལ་གནས་ཚུལ་གསར་བ་འབྱོར་བ་རེད། བློ་བཟང་གིས་ད་ནི་རང་གི་ལས་ཀ་དེ་ལ་བར་ཆད་ཡོང་ཁོ་ཐག་རེད། དོ་ནུབ་ང་རང་ལྡི་ལུ་རུ་ལམ་དུ་ཆས་ནས་ལྡི་ལུ་ནས་ཉིན་མ་ཁ་ཤས་དེ་བསྐྱལ་བ་ལས་ཐབས་ཤེས་མི་འདུག་སྙམ་ནས། རང་གི་ལག་དུ་ཧིན་སྒོར་བརྒྱ་ལག་ལས་མེད་པས་ཁོ་རང་གི་ལས་ཀ་བྱེད་སའི་གྲོགས་པོ་དེ་ལ། ང་རང་ལ་ཧིན་སྒོར་གཅིག་སྟོང་གི་སྔ་གཞུག་གནོང་དང་། ངས་ཁྱེད་རང་ལ་གོང་ནས་གཡར་བའི་སྒོར་མོ་དེ་དག་གི་བུ་ལོན་དང་བཅས་དེ་ལྷན་དུ་ང་རང་ལས་ཀ་དེ་འགྲུབ་ནས་ཕྱིར་ཡོང་དུས་སྤྲོད་ཆོག

ང་རང་ག་དུས་ཕྱིར་སླེབས་ཀྱང་། ཁྱེད་རང་ཡོད་སར་ལས་ཀ་མུ་མཐུད་དུ་བྱེད་ངེས་ཡིན། དེ་བྱས་པ་ཡིན་ན་འགྲིག་གི་འདུག་གམ། ང་རང་འདི་ནས་བསྡད་པ་ཡིན་ན། སང་ཉིན་མོ་རང་འདིར་སླེབས་ཁོ་ཐག་རེད་ལ། ཁོ་མོ་འདི་རུ་སླེབས་ཚེ། ང་རང་ལས་ཀ་དེ་བྱེད་དུ་འགྲོ་ཐུབ་མི་ཡོང་བ་ཡིན། དེ་ཡིན་དུས་ང་རང་གི་ལས་དོན་མང་བོ་ཞིག་གི་གོ་སྐབས་ཀྱང་ཤོར་འགྲོ་བ་ཁྱེད་རང་གིས་ཤེས་གསལ་རེད།

གྲོགས་པོ་དེས། ཁོ་རང་ལ་ཡིན་དང་ཡིན། འགྲིག་གི་རེད། དོ་ནུབ་སོང་། ངས་ཁྱེད་རང་ལ་ལོས་གཡར། དེ་ཙམ་གྱིས་འགྲིག་གི་འདུག་གམ།