བློ་བཟང་གློག་བརྙན་ལས་ཁུངས་དེ་ཡི་བོད་ཀྱི་ཕོ་གསར་མགྲིན་ཚབ་པ་དེས་ཁ་པར་སླེབས་ནས་སང་ཞོགས་སྔ་བོ་ང་ཚོ་ཁྱེད་རང་ལེན་དུ་ཡོང་ངེས་ཡིན། དེ་དུས་ཁྱེད་རང་ལྡི་ལུ་ས་ཆ་གང་དུ་ཡོད་པ་དེ་ཡི་ས་ཚིགས་ང་ལ་ཤོད་དང་། ངས་སང་ཉིན་རོགས་པ་གཞན་དག་ཡང་རྡ་ས་ནས་ཁྲིད་དེ་འོང་གི་ཡོད།
བྱ་རྒོད་རྟགས་ཅན་གྱི་རླངས་འཁོར་བརྫིག་པོ་ཞིག་གི་ནང་དུ་བློ་བཟང་དང་ཁོ་རང་གི་ལས་རོགས་གཞན་དག་དང་བཅས་ལྡི་ལུ་གསར་བའི་གློག་བརྙན་འཁྲབ་གཞུང་རྩོམ་པ་པོ་དེ་ཡི་བསྡོད་གནས་སུ་ཕྱིན་པ་དང་། དེ་ནས་ཁོང་ཚོ་ལ་འཚམ་འདྲི་དང་ཁོང་ཚོ་ད་རེབས་ཀྱི་གློག་བརྙན་གསར་བ་འདི་འཁྲབ་པའི་ནང་གི་མི་སྣ་གཙོ་བོ་དག་ཆགས་རྒྱུ་ཡིན་པ་སོགས་གླེང་མཐར། ཁོང་ཚོ་སང་ཞོགས་སྔ་བོ་ཆུ་ཚོད་ལྔ་བའི་སྟེང་ནས་ཡར་བླངས་དེ་གནམ་ཐང་དུ་འགྲོ་དགོས། དེ་ཡི་གོ་སྒྲིག་ཚང་མ་ང་ཚོའི་ཚོགས་པ་འདིས་གོ་སྒྲིག་བྱས་ཟིན་པ་ཡིན། ང་ནི་གློག་བརྙན་འདིའི་འཁྲབ་ཁྲིད་པ་གཞོན་པ་ཡིན་ཟེར་ནས་རྒྱ་གར་ཤ་ཅུང་ཙམ་སྐམ་རུད་དུ་གྱུར་བའི་ཕོ་གསར་དེས་ཁོང་ཚོ་ལ་དེ་ལྟར་འགྲེལ་བཤད་བྱས་པ་རེད།
བློ་བཟང་ནི་ཁོ་རང་གི་མི་ཚེ་ནང་དུ་གནམ་གྲུ་ཞིག་གི་ནང་དུ་འགྲོ་མྱོང་མེད་པ་དང་། ཁོ་རང་གི་གྲོགས་པོ་རེ་ཟུང་ཞིག་ཀྱང་དེ་སྔོན་གནམ་གྲུའི་ནང་དུ་འགྲོ་མྱོང་མེད་མཁན་ཡིན་སྟབས། ཁོང་ཚོ་ཚང་མ་ཡ་མཚར་དང་སྤྲོ་སྣང་སོགས་ཀྱི་འཁང་ནས་གནམ་གྲུའི་དེ་ཡི་ནང་ནས་ལྡི་ལུ་གསར་བའི་མཁའ་དབྱིངས་བརྒྱུད་དེ་ལ་དགས་ཕྱོགས་སུ་འཕུར་བ་རེད།
བློ་བཟང་གིས་བསམ་པར། གནམ་གྲུའི་ནང་དུ་ད་སྔ་བསྡད་མྱོང་མེད་དུས། གནམ་གྲུའི་ནང་གི་གཙང་སྤྱོད་དེ་ཡང་མ་འདྲ་བ་ཞིག་ཡིན་རྒྱུ་རེད། གཅིག་བལྟ་རུ་འགྲོ་བསམ་ནས་གཙང་སྤྱོད་ནང་དུ་སོང་དུས། དངོས་ནས་གནམ་གྲུའི་ནང་གི་གཙང་སྤྱོད་དངོས་ནས་ས་ཐོག་གི་གཙང་སྤྱོད་གཞན་དང་མ་འདྲ་བ་ཞིག་ཡིན་པ་མ་ཟད། ནང་དུ་གློག་སྒོ་སོགས་གང་ཡང་མེད་པའི་སྟེང་ལ། གཙང་སྤྱོད་ནང་གི་བརྩིགས་ངོས་སུ་དབྱིན་ཡིག་གིས་གནོན་ཟེར་བ་དང་། རྒྱོབས་ཟེར་བ་ཞིག་ལས་གང་ཡང་མེད་སྟབས། བློ་བཟང་གིས་རང་གི་བཙོག་པ་བཏང་རྗེས་སུ། གནོན་ཟེར་བ་དེ་ཡི་སྟེང་དུ་གཅིག་གནན་པ་ན། གཙང་སྤྱོད་ཀྱི་ཁ་ཕྱེ་ནས་བཙོག་པ་གར་སོང་ཆ་མེད་དུ་གྱུར་བ་རེད།
བློ་བཟང་ཕྱིར་རང་གི་གྲོགས་པོ་རང་གྲོལ་དང་པ་སངས། རྡོ་རྗེ་སྐྱབས། མིག་དམར་བཅས་ལ་གནམ་གྲུའི་ནང་གི་གཙང་སྤྱོད་ནི་ས་ཐོག་གི་གཙང་སྤྱོད་དང་མི་འདྲ་བའི་སྐོར་ཞིག་བཤད་དུས། ཁོང་ཚོས་ཁྲོད་ནས་པ་སངས་ཅུང་མི་ལས་པར་ཁ་རོག་གེར་བསྡོད་ན་ཡང་། གཞན་དག་གིས་དེ་འདྲ་ཞིག་ཡིན་ན་ང་རང་ཡང་བལྟ་རུ་འགྲོ་དགོས་ཀྱི་ཡོད་ཟེར་ནས་གཅིག་འཕྲོ་གཅིག་གིས་བཤད་བཞིན་པའི་སྐབས་སུ། གནམ་གྲུའི་ནང་ནས་མི་དམངས་ལ་རང་རང་རྐུབ་སྟེགས་སྟེང་ནས་གཏན་པོ་སྲུང་ཐག་གིས་བསྡམ་ནས་འདུག་རོགས། སྐར་མ་ཁ་ཤས་ཀྱི་རྗེས་སུ་གནམ་གྲུའི་ས་ལ་འབབ་རྒྱུ་རེད་ཅེས་བཤད་པ་རེད།
པ་སངས་ཀྱིས། བློ་བཟང་ལ་ལྟ་ཞོར་དུ། ང་རང་སྔོན་ཆད་ང་ཚོའི་ལས་ཁུངས་ཀྱི་འཁྲབ་སྟོན་ཞིག་གི་ཆེད་དུ་ཕྱི་རྒྱལ་དུ་སོང་དུས། གནམ་གྲུའི་འདི་ལས་ཆེ་བ་ཡོད་པ་མ་ཟད། འགྲོ་ཡུལ་གྱི་དུས་ཚོད་ཀྱང་ཧ་ཅང་རིང་བོ་རེད། དེ་དུས་ཀྱི་གནམ་གྲུའི་ནང་གི་ཆ་རྐྱེན་ནི་གནམ་གྲུའི་འདི་དང་བསྡུར་ན་གང་ཡང་མ་རེད། ཁྱེད་ཚོ་བྲེལ་བ་མ་བྱེད་དང་ཕྱིར་ཡོང་དུས་སུ་བལྟ་ཆོག་གི་རེད།
ལ་དགས་ཀྱི་གནམ་ཐང་དུ་འབྱོར་དུས། ཁོང་ཚོ་ལ་བསུ་མ་བྱེད་དུ་ཡོང་མཁན་གྱི་རླངས་འཁོར་བརྫིག་པོ་གཉིས་གསུམ་ཞིག་ཡོད་པ་མ་ཟད། ཁོང་ཚོ་ལ་རྒྱ་གར་གྱི་བུད་མེད་མཛེས་མ་ཞིག་གིས་ཁྱེད་ཅག་ལ་དྭགས་སུ་བདེ་བར་འབྱོར་བ་གློག་བརྙན་ལས་ཁུངས་འདིས་ཚབ་བྱས་དེ་ཚང་མ་ལ་བཀྲ་ཤིས་བདེ་ལེགས་ཞུ། ད་ང་ཚོ་མགྲོན་ཁང་དུ་འགྲོ ཕྱི་དྲོ་ཁྱེད་ཚོ་འཁྲབ་ཁྲིད་འགན་འཛིན་གྱིས་ཐུགས་འཕྲད་ཅིག་བྱེད་དགོས་ཀྱི་ཡོད་ཟེར་གྱི་འདུག ཁྱེད་ཅག་གིས་མགྲོན་ཁང་ངལ་ཅུང་ཙམ་གསོས་རྗེས་སུ། ང་ཚོས་རླངས་འཁོར་ཞིག་ཁྱེད་ཅག་བསུ་རུ་བསྔགས་ཡོང་།
བློ་བཟང་གིས། ལ་དགས་ཀྱི་ཡུལ་ལྗོངས་ཀྱི་བཀོད་པ་དག་མིག་ལམ་དུ་མངོན་དེ་འོང་དུས་སུ། སྟོད་མངའ་རིའི་ས་ཁུལ་གྱི་རྣམ་པ་ཞིག་ཡིན་པ་ལྟ་བུའི་སྣང་ཚུལ་ཞིག་མིག་ལམ་དུ་ཤར་བཞིན། རླངས་འཁོར་གྱི་སྒེའུ་ཁུངས་ལས་རྒྱང་ལྟ་བྱེད་ཀྱིན་གནམ་ཐང་ནས་མགྲོན་ཁང་ཕྱོགས་སུ་ཤར་རྒྱུགས་བྱེད་ཀྱིན་པའི་རླངས་འཁོར་ནང་ནས་སེམས་པ་ག་ལེར་གཞན་ཞིག་ལ་འཁོར་བ་རེད།
མུ་འགོད།
