བློ་བཟང་གི་འདུག་རོགས་རྡོར་རྗེ་སྐྱབས་ཀྱིས་གནས་ཚུལ་དེ་དག་ཞིབ་དུ་གོ་མ་ཐག ཁོ་རང་གིས་དེ་འདྲ་ཞིག་ཡིན་ན་ནི། མི་དེ་ཚོ་སྐད་ཆ་བཤད་ཐོག་ནས་གཏན་ནས་འདུག་མཁན་མིན་ཚོད་རེད་འདུག ཁྱེད་རང་འདི་ནས་འགྲོ་རུ་འདྲ་བཅུགས་པ་ཡིན་ན་ང་རང་ཡང་གློག་བརྙན་འཁྲབ་མཁན་གྱི་གྲངས་ནས་འབུད་རྒྱུ་ཡིན་ཟེར་ནས་ཚིག་ཐག་བཅད་པ་དེས་བློ་བཟང་ལ་ལྷག་དུ་གྲོགས་པོའི་བར་གྱི་བརྩེ་འདང་ཟེར་བ་དེ་ཡི་གོ་རིམ་དང་གནས་ལུགས་ཤེས་སུ་བཅུགས་པ་རེད།
བློ་བཟང་གིས། ཁྱེད་རང་གིས་དེ་ལྟར་ང་ལ་རྒྱབ་སྐྱོར་གནང་བ་བཀའ་དྲིན་ཆེ། འོན་ཀྱང་། ཁོང་ཚོས་ང་རང་ཕྱིར་གཏོང་རྩིས་གཏན་ནས་མི་འདུག་ལ། འཁྲབ་ཚན་ཁ་ཤས་ཤིག་ང་རང་ལ་གོ་སྒྲིག་བྱས་པའི་མ་ཚད། འཁྲབ་སྟོན་མའི་ཚབ་མཚོན་ཚན་པ་འགའ་ཞིག་ཀྱང་ང་རང་ལ་གོ་སྒྲིག་བྱས་འདུག ཁོ་མོའི་གཟུགས་ཚད་དང་ངའི་གཟུགས་ཀྱི་རིང་ཚད་གཅིག་པ་ཡིན་པ་འདྲ། ཕྱི་དྲོ་ང་རང་སོང་ནས་མོ་རང་གི་གོན་པ་དང་འདྲ་བོ་ཁ་ཤས་ཤིག་ཚེམས་བཟོ་ལྷན་ཁང་དུ་ཚད་རྒྱག་དུ་འཇུག་དགོས་ཀྱི་ཡོད་འདུག
བློ་བཟང་གི་གྲོགས་པོ་རྡོར་རྗེ་སྐྱབས་ཀྱིས་ཁོ་རང་གི་སྐད་ཆ་དེ་དག་གོ་ནས་སེམས་པ་ཅུང་ལྷོད་དུ་འབབ་ཡོད་པ་དང་། ལྷག་པར་དུ་བློ་བཟང་ལ་ཉིན་འདི་འགར་སྒོར་ཆད་བྱུང་ནས་ཐ་མག་ཉོ་སྤྱད་ཀྱང་མེད་པ་རེད། གྲོགས་པོ་རྡོར་རྗེ་སྐྱབས་ཀྱིས་བློ་བཟང་ལ་ཐེངས་མ་ཁ་ཤས་ཤིག་གི་རིང་ལ་དུ་ཆད་སེལ་བ་དང་། གྲོགས་པོ་རང་གྲོལ་ནས་ཁོ་རང་ཐེངས་མ་ཁ་ཤས་ཤིག་ལ་སྤི་རེག་གི་མགྲོན་བྱས་པ་སོགས། བློ་བཟང་ཁོ་རང་ས་ཁུལ་དེར་འབྱོར་ནས་དུ་ཆད་བྱུང་མ་དགོས་པ་དེ་ནི་ཁོ་གཉིས་ཀྱི་བཀའ་དྲིན་ཆགས་ཡོད་པ་དང་། གོན་པ་བརྗེ་བོ་རྒྱག་རྒྱུ་མེད་ན་ཡང་ཁོ་གཉིས་ཀྱི་དྲིན་ལ་གོན་པ་ཡང་བརྗེ་སྤོར་བྱེད་རྒྱུ་ཡོད་པ་རེད།
ཟླ་གཅིག་འགོར་ལ་ཡོད་པའི་ཕྱི་དྲོ་ཞིག་ལ། བློ་བཟང་གི་མིང་ཐོག་ལ་མ་དངུལ་འགན་འཛིན་གྱིས་བློ་བཟང་གི་མིང་ཐོག་ལ་ཡིག་སྐོག་སྟེང་དུ་ཁོ་རང་གི་མིང་བྲིས་པ་ཞིག་སྤྲད་དུས་སུ། བློ་བཟང་གི་སེམས་སུ་འདི་ག་རེ་ཡིན་མིན་དྲན་ཞོར་དུ་ག་ལེར་ཁ་ཕྱེ་དུས་སུ། ནང་དུ་ཧིན་སྒོར་གཅིག་སྟོང་བཞི་བརྒྱ་ཡོད་པ་རེད། བློ་བཟང་གིས་དེ་མཐོང་བ་དངོས་ནས་དགའ་བོ་བྱུང་མ་ཟད། འོག་དུ་བྲིས་པའི་ཡི་གེ་དེར་བལྟས་དུས་བདུན་ཕྲག་གཉིས་རིང་གི་ལག་དངུལ་ཟེར་བ་བྲིས་ཡོད་པ་མཐོང་དུས་སུ། ད་གཟོད་ཁོང་ཚོ་ལ་ལག་དངུལ་ཞིག་ཀྱང་སྤྲོད་ཀྱི་ཡོད་པ་ཤེས་ནས། དེ་ནུབ་ཁོ་རང་གི་གྲོགས་པོ་གཉིས་ལ་དོ་ནུབ་གཉིས་སྤྱིན་བདག་བྱེད། འུ་ཅག་ལྕོག་ལམ་ཚལ་དུ་སྤི་རེག་ཞིག་འཐུང་དུ་འགྲོ
གྲོགས་པོ་རྡོར་རྗེ་སྐྱབས་དང་རང་གྲོལ་གཉིས་ཀྱིས། དེ་འདྲ་ཞིག་བྱེད་དགོས་པ་མ་རེད། ཁྱེད་རང་ལ་ད་ལྟ་དངུལ་ཆད་བྱུང་ཡོད་པ་ངེད་གཉིས་ཀྱིས་ཤེས་གསལ་རེད་ཟེར་ན་ཡང་བློ་བཟང་ཁོ་རང་གིས་ཨུ་ཚུགས་ཀྱིས་ངོ་མ་ལྡོག་མ་ཐུབ་པར་ཁོང་ཚོ་ལྕོག་ལམ་ཚལ་གྱི་ཟ་ཁང་ཞིག་གི་སྤི་རེག་འཐུང་དུ་སོང་ན་ཡང་། གྲོགས་པོ་རྡོར་རྗེ་སྐྱབས་ཀྱིས་སྤི་རེག་འཐུང་གི་མེད་པ་རེད། ཡིན་ཡང་། ཁོ་ལ་ཤིང་ཏོག་ཁུ་ཞིག་བསྔགས་པ་དང་ཁོ་གཉིས་ཀྱིས་སྤི་རེག་ཤེལ་དམ་གཅིག་གཉིས་ཤིག་འཐུང་ནས་འཁྲབ་གཞུང་དངོས་ནས་མགོ་འཛུགས་བྱེད་ལ་རན་པའི་སྐོར་ལ་ཁ་བརྡ་བྱས་པ་རེད།
རླངས་འཁོར་མང་བོ་ཞིག་བང་སྒྲིག་ནས་རི་བོ་ཆུང་ཆུང་ཞིག་གི་སྒང་དུ་དགོན་ཆུང་ཞིག་ཡོད་པ་དེ་ཡི་འདབས་སུ་འབྱོར་ནས་དེ་རུ་རླངས་འཁོར་མི་ཉུང་བ་ཞིག་བཞག་ཡོད་པ་དང་། བློ་བཟང་དང་ཁོ་རང་གི་འཁྲབ་རོགས་ཚང་མ་ཡང་རླངས་འཁོར་ལས་ག་ལེར་ས་རུ་འབབ་ནས་རི་སྒང་དེ་རུ་ཡར་འཛེགས་པ་རེད།
ཁོང་ཚོ་ལ་གོན་པ་གོན་མཁན་ཡང་ཡོད་ལ། འདོག་ཆ་འདོག་མཁན་ཡང་ཡོད། ཡིན་ཡང་། བློ་བཟང་ལ་གཏན་ནས་དེ་ཡི་རིགས་གོམ་མེད་པ་བཞིན་ཁོ་རང་གི་གྲོགས་པོ་དག་ལ་ཡང་དེ་རིགས་གོམ་མེད་པའི་སྟབས་ཀྱིས་གོན་པ་རང་རང་གིས་གོན་བཞིན་ཡོད་ན་ཡང་། འདོག་ཆ་འདོག་སྐབས་སུ་བོད་རིགས་བུད་མེད་དེ་དག་ལ་འདོག་དུ་མི་འཇུག་ཐབས་མེད་ཆགས་ཡོད་པ་རེད། བོད་རིགས་བུད་མེད་དེ་དག་ནི་ལ་དྭགས་བོད་ཀྱི་གཞིས་གྲོང་ཁག་ནས་འདི་རུ་ལས་ཀ་བྱེད་དུ་ཡོང་བ་ཤ་སྟག་ཡིན་སྟབས། ཁོ་མོ་ཚོ་ཡང་རང་རིགས་ཀྱི་ཕོ་གསར་ཚོ་དང་ལྷན་དུ་ལས་ཀ་བྱེད་རྒྱུར་བྱུང་བ་དངོས་ནས་དགའ་བཞིན་སྤྲོ་བཞིན་བྱེད་ཀྱི་ཡོད་པ་རེད།
བློ་བཟང་གི་གམ་དུ་འབྱོར་བའི་བུད་མེད་དེ་ནི། ཉེ་སྔོན་ནས་བཟུང་དེ་ཁོ་རང་གི་གྲོགས་པོ་རང་གྲོལ་གྱིས་ཐབས་ཤེས་གང་ཡོད་བརྟེན་ནས་ངོ་ཤེས་སྒྲིག་བཞིན་པའི་བུད་མེད་བབ་ཆགས་པ་དང་རྣམ་པ་ཡག་ཤོས་ཀྱི་བུད་མེད་ཅིག་ཡོད་པ་དེ་ཡིན་པ་རེད། བློ་བཟང་གིས་བུད་མེད་དེ་ཡི་མིང་ཤེས་ཀྱི་ཡོད་ཀྱང་། ཁོ་རང་གིས་རང་ཉིད་གློག་བརྙན་འཁྲབ་སའི་ཁོར་ཡུག་དེར་འབྱོར་བ་ནས་བཟུང་དེ་རྐང་བཙུགས་དེ་བུད་མེད་སུ་ལ་ཡང་ཕར་ཁ་གྲགས་མྱོང་མེད་པ་རེད། རྒྱུ་མཚན་ནི་ཁོ་རང་བུད་མེད་ཚོའི་འཛུམ་མདངས་ལ་སྐྲག་གི་ཡོད་པ་ལོས་ཡིན། འོན་ཀྱང་། ཁོ་རང་གི་དྲན་ཡུལ་དུ་ཡང་མེད་པ་ནི། ཁོ་རང་གི་འཁྲིས་སུ་འདོག་ཆ་བཟུང་ནས་འོང་བཞིན་པའི་བུད་མེད་ཉི་མ་ལྷ་སྒྲོན་ནི་ཁོ་རང་མི་ཚེའི་འཚོ་བའི་ནང་དུ་གོམ་པ་སྤོ་སྲིད་པ་གཏན་ནས་ཡིད་དུ་དྲན་མྱོང་མེད་པ་ཞིག་ཡིན།
ཉི་མ་ལྷ་སྒྲོན་གྱིས། བློ་བཟང་ལ་བལྟ་ཞོར་དུ། ཁྱེད་རང་གི་ལག་པ་ཡར་བཀྱོག་དང་། ངས་ཁྱེད་རང་གི་འདོག་ཆ་འདོག་ཟེར་བཞིན་རང་ཉིད་ཀྱི་མིང་དང་རང་ཉིད་ཀྱི་ལས་ཀ་སོགས་བློ་བཟང་ལ་ངོ་སྤྲོད་ཅིག་བྱས་པ་དང་། བློ་བཟང་ལ་ཁྱེད་རང་གི་མིང་ལ་ཅི་ཟེར་གྱི་ཡོད་ཅེས་དྲིས་པ་རེད།
བློ་བཟང་གིས་རང་ཉིད་ཀྱི་མིང་བཤད་པ་དང་། རང་ཉིད་ནི་འདིར་སླེབས་ནས་བཟུང་དེ་ཕན་ཚུན་ལ་ངོ་ཤེས་བྱེད་འདོད་མེད་པ་དེ་འདྲ་ཞིག་གཏན་ནས་མིན་ན་ཡང་། ངོ་མི་ཤེས་པའི་མི་ཞིག་ལ་ངོ་ཤེས་སྒྲིག་རྒྱུ་དེ་ཡང་ལས་སླ་བོ་ཞིག་གཏན་ནས་མིན་པ་སོགས་ཁོ་མོའི་དོགས་གཞི་དག་སེལ་ཐབས་བྱས་པ་རེད།
བློ་བཟང་གིས་དགོན་ཆུང་དེ་ཡི་སྐེས་འཛེགས་བརྒྱུད་དེ། ཡར་རི་སྒང་གི་འཁྲབ་ཚན་འཁྲབ་སའི་ཕྱོགས་སུ་འགྲོ་བཞིན་སྐབས་སུ་ཕྱི་ལོག་ནས་བུད་མེད་ཅིག་གིས་བློ་བཟང་ང་སྒུག་དང་ཟེར་བ་ཞིག་ཐོས་ནས་ཕྱིར་བལྟས་བྱས་དུས། དེ་ནི་ད་ལྟ་རང་གསར་དུ་ཁ་བརྡ་བྱས་མ་ཐག་པའི་བུད་མེད་ཉི་མ་ལྷ་སྒྲོན་ཡིན་པ་ཤེས་ནས། བློ་བཟང་གི་སེམས་ནང་དུ་ཚ་ཤད་ཅིག་རྒྱག་ཞོར་དུ་ཁོ་མོའི་ཕྱོགས་སུ་བལྟས་དེ་སྒུག་ནས་བསྡད་པ་རེད།
མུ་འགོད།
སྤུན་ཟླ་ཁྱེད་གཉིས་ཕེབས་པ་དགའ་ཡོད། རྗེས་ཕྱོགས་ཀྱང་ཡོང་རྐྱང་བྱོས། སྒུག་ནས་འདུག
གྲོགས་པོ་ཤ་རུས་ལགས་་་་་ང་རང་ཚོའི་དུས་བབ་དྲ་བ་ནང་དུ་ནད་འབུལ་མཛུལ་ནས་ནམ་རྒྱུན་བཞིན་མི་འདུག
ཁྱེད་ཀྱིས་དེའི་སྐོར་རུ་ཅང་མཁྱེན་སོང་ངམ།
ད་ལྟ་རྒྱ་གར་གྱི་དགོང་མོའི་དུས་ཚོད་༧དང་སྐར་མ་༣༥་རེད། ངའི་འདི་ནས་མཆན་བུ་འདེབས་པར་སྐྱོན་ཅང་མི་འདུག
ཤ་ཁྲག་ཚང་གི་ཁྱིམ་ཡང་སྟོང་བར་འདུག་པར་བལྟས་ན་མཆན་བུ་འདེམས་མི་ཐུབ་ཀི་ཟེར་བ་བདེན་པ་འདྲ། སྐྱོན་ཞིག་ཏན་ཏན་ཡོད་ས་རེད།