སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} གོ་དྲུག

བློ་བཟང་གིས། ད་ལྟ་བར་དུ་ང་རང་ལ་ཁ་པར་སླེབས་མཁན་ནི། རང་གི་གྲོགས་པོའི་རྙིང་བ་དེ་ཡི་དགའ་རོགས་མ་སྒྲ་ནས་ཡལ་མ་གཏོགས་གང་ཡང་མེད། ཁོ་མོ་ནི་ཡིན་རྒྱུ་མ་རེད། གཞན་གྱིས་ང་རང་གི་བསྡོད་གནས་ཀྱི་ཁ་པར་ཨང་གྲངས་ཤིག་གཏན་ནས་ཤེས་ཀྱི་མེད་སྙམ་བཞིན་མགྲོན་ཁང་ནང་གི་ཁ་པར་ཁང་གི་སོང་བ་རེད།

བློ་བཟང་ཁྱེད་རང་གི་ཁ་པར། བློ་བཟང་གིས་ག་ལེར་མི་དེ་ཡི་ལག་པ་ནས་པར་ཚུར་བླངས་དེ། ཨ་རོགས། ཁྱེད་རང་སུ་ཡིན།
ང་མཚམས་སྐྱིད་ཡིན། ཁྱེད་རང་བདེ་མོ་ཡིན་ནམ།
ཡིན། ང་བདེ་མོ་ཡིན། ཁྱེད་རང་ལ་ཁ་པར་ཨང་གྲངས་ཇི་ལྟར་རེག་སོང་།
དགའ་ས་ཞིག་འཚོལ་དགོས་པ་ཡིན་ན། ཐབས་ཤེས་ཡོད་པ་རེད།
བློ་བཟང་གིས་དེ་མ་ཐག ད་ནི་མཚམས་སྐྱིད་ཀྱིས་ང་རང་བསྡོད་དུ་མི་འཇུག་པ་ཤ་སྟག་རེད་འདུག་སྙམ་ནས། ཁྱེད་རང་གིས་ད་ནི་ང་རང་གི་ཕྱོགས་སུ་ཁ་པར་མ་གཏོང་རོགས། འུ་གཉིས་ལ་འབྲེལ་བ་མེད་པའི་སྐོར་སྔ་ས་ནས་ཐག་བཅད་པ་རེད། ངའི་རེ་བ་ལ་ཁྱེད་རང་གིས་ང་ལ་སུན་པོ་མ་བཟོས་ན་ཡག་པོ་འདུག ངས་ཁྱེད་རང་ལ་ཞུ་བ་བྱས་པ་ཡིན། ཁྱེད་རང་གིས་ཕྱིན་ཆད་འདི་རུ་ཁ་པར་མ་གཏོང་རོགས།

མཚམས་སྐྱིད་ཀྱིས། ངས་ཁྱེད་རང་ལ་རེ་བ་ཞིག་བཤད་རྒྱུ་ཡོད། རེ་བ་དེ་ཁྱེད་རང་གི་སང་ཉིན་ནངས་ཉིན་ཞིག་ལ་ང་རང་ལ་ལན་འདེབས་བྱས་པ་ཡིན་ན་འགྲིག་གི་ཡོད། དེ་འགྲིག་གི་རེད་དམ། དེ་ནི་ང་རང་གི་མཐའ་མའི་ཐག་གཅོད་ཡིན། ང་རང་དངོས་ནས་ཁྱེད་རང་ལ་དགའ་ཡི་འདུག དེ་ནི་ང་རང་གི་ནོར་འཁྲུལ་ཡིན་རྒྱུ་མ་རེད།

མཚམས་སྐྱིད་ཀྱིས་དེ་སྔ་དང་མི་འདྲ་བར་སྐད་ཆ་ལྷོད་ལྷོད་བྱས་དེ་བཤད་ནས་འོང་དུས། བློ་བཟང་གིས། རེད། དེ་འགྲིག་གི་རེད། ཁྱེད་རང་ལ་རེ་བ་གང་ཡོད་པ་དེ་ང་ལ་བཤད་ན་འགྲིག་གི་རེད། ཡིན་ཡང་། རེ་བ་དེ་འགྲུབ་མི་འགྲུབ་ནི་གཏན་ནས་མི་ཤེས།

མཚམས་སྐྱིད་ཀྱིས། ང་རང་གི་རེ་བ་ནི། ཁྱེད་རང་གིས་ང་ལ་སླར་ཡང་གོ་སྐབས་ཤིག་སྤྲད་དེ་འུ་གཉིས་ལྷན་དུ་བསྡོད་ཐུབ་མིན་དེ་ཡིན་ལ། གཞན་ནི་ཁྱེད་རང་གིས་གཏན་ནས་མོས་མཐུན་མ་བྱས་པ་ཡིན་ན་ནི། ང་རང་གི་ཕུ་བོ་ཟླ་བ་ཨ་རི་ནས་ང་རང་ལེན་དུ་ཡོང་གི་ཡོད་ཟེར་ནས་བཤད་ཀྱི་འདུག ཁོ་རང་མི་འགྱངས་པར་རྡ་སར་ཡོང་ངེས་ཡིན། དེ་ཡིན་དུས། ང་རང་ཁོ་རང་དང་འགྲོག་ནས་ཕྱིར་བོད་དུ་འགྲོ་རྒྱུ་དེ་ཡིན་པ་རེད། ངས་རང་གི་ནོར་འཁྲུལ་བྱས་པ་དེར་ངས་ཁས་ལེན་བྱེད་ཀྱི་ཡིན། ངས་ཁྱེད་རང་ལ་ཞུ་བ་བྱས་པ་ཡིན། ང་རང་ལ་གོ་སྐབས་ཤིག་སྤྲོད་དང་། རྗེས་ཕྱོགས་ཀྱང་ངས་ཁྱེད་རང་གི་འདོད་པ་ལྟར་བྱེད་ཆོག

བློ་བཟང་གིས་བསམ་པར། ཁ་ཐུག་ནས་འུ་གཉིས་ཡོང་གི་མ་རེད་ཅེས་བཤད་པ་ཡིན་ན་ཁོ་མོའི་སེམས་པ་ཡང་སྐྱོ་བའི་སྒང་ལ་ཡག་པོ་མེད་པ་ཞིག་ཆགས་སྲིད་པ་ཡིན། དེ་ལས་ཐབས་མཁས་པོའི་སྒོ་ནས་ལན་ཞིག་བཏབ་ནས་ཐག་གཅོད་བྱས་པ་ཡིན་ན་ཡག་པོ་རེད་སྙམ་ཞོར་དུ། རེད་རེད། འགྲིག་གི་རེད། ཁྱེད་རང་གིས་ང་ལ་ཉིན་གཉིས་ཀྱི་རྗེས་སུ་ཁ་པར་རྒྱོབས་དང་། དེ་ནས་ངས་ཁྱེད་རང་ལ་ལན་སྤྲོད་ཆོག དེ་དུས་ཁྱེད་རང་གིས་ང་ལ་ཁོང་ཁྲོ་མེད་པ་ཞུ།

བློ་བཟང་ཁ་པར་ཁང་ནས་སྒོ་རུ་བུད་དུས། ཉི་མ་སྒྲོལ་མ་ཁ་པར་ཁང་གི་སྒོ་འགྲམ་དུ་བསྡད་ཡོད་པ་དང་། བློ་བཟང་ལ་ཁྱེད་རང་ལ་ཁ་པར་གཏོང་མཁན་གྱི་བུད་མེད་དེ་ནི་སུ་རེད་ཅེས་དྲིས་པའི་ལན་དུ་བློ་བཟང་གིས་ཁོ་གཉིས་འཕྲད་པ་ནས་འཐོར་བའི་བར་དུ་ཉི་མ་ལྷ་སྒྲོན་ལ་ཞིབ་དུ་བཤད་པ་རེད།

ཉི་མ་ལྷ་སྒྲོན་གྱིས། དེས་ན་ཁྱེད་རང་གིས་རྗེས་སུ་ཁ་པར་སླེབས་ན་ཐག་གཅོད་ག་འདྲ་བྱེད་རྩིས་ཡོད་དམ། ཁྱེད་རང་གི་བཤད་སྲོལ་ལ་བལྟས་པ་ཡིན་ན། ཁྱེད་རང་གི་ཐག་གཅོད་ག་འདྲ་ཞིག་བྱས་ཀྱང་། ཁོ་མོས་ཁྱེད་རང་བསྡོད་དུ་འཇུགས་རྩིས་མི་འདུག་པ་འདྲ། དེ་ཡིན་དུས་ཁྱེད་རང་ལ་ཐབས་ཤེས་གཞན་གང་ཡོད་པ་རེད། ཁོ་མོའི་ལྷན་དུ་མི་བསྡོད་ཟེར་ནས་ཐག་བཅད་པ་ཡིན་ན། ཁོ་མོ་རང་ཤི་རྒྱག་གི་ཡིན་ཟེར་ན་གང་བྱེད།

བློ་བཟང་གིས་ཐ་ནག་རྐང་གཅིག་ལ་མེ་སྒྲོན་ཞོར་དུ། རང་གི་ཉལ་ཁྲིའི་སྒང་ནས་ངལ་གསོ་ཞོར་དུ། རེད་རེད། ངས་ཀྱང་རྒྱུན་རིང་བོ་ཞིག་ལ་དེ་ཡི་སྐོར་ལ་བསམ་བློ་བཏང་བ་ཡིན། འོན་ཀྱང་། ཁོ་མོ་ང་རང་གི་ཆེད་དུ་རང་ཤི་རྒྱག་ཐུབ་མཁན་དེ་འདྲ་ཞིག་གཏན་ནས་རེད་མི་འདུག དེ་འདྲ་ཞིག་ཡིན་ན་ནི། ཁོ་མོས་ང་རང་གི་གང་བཤད་པ་དེར་དང་ལེན་བྱེད་ངེས་ཡིན། འོན་ཀྱང་། ཁོ་མོས་ང་རང་ལ་སུན་པོ་བཟོ་བ་དེར་དམིགས་ཡུལ་གཞན་ཞིག་ཡོད་ཁོ་ཐག་རེད། དེ་ངས་གསལ་བོ་ཞིག་ཤེས་ཀྱི་མི་འདུག