སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} གོ་དགུ

གྲོགས་པོ་རྡོར་རྗེ་སྐྱབས་ཀྱིས། དངོས་ནས་མཚམས་སྐྱིད་ཟེར་བའི་བུད་མེད་དེ་ནི་ལས་སླ་བོ་ཞིག་རེད་མི་འདུག ངས་ཕར་ལ་སྐད་ཆ་ཚིག་གཅིག་མ་བཤད་གོང་དུ། ཁོ་མོས་ང་ལ་སྐད་ཆ་ཚིག་གཉིས་བཤད་ཀྱི་འདུག དེ་ནས་ངས་ཁོ་མོ་སྡུག་དམོད་མི་ཉུང་བ་ཞིག་བྱས་པ་མ་ཟད། ཁྱེད་རང་གིས་བློ་བཟང་ཡག་པོ་བྱས་དེ་འདུག་གི་བཅུགས་ན་ཡག་པོ་ཡོད་པ་རེད། དེ་མིན་ན་ཁྱེད་རང་ལ་མཇུག་འབྲས་ཡག་པོ་ཞིག་མེད་ཁོ་ཐག་རེད་ཅེས་བཤད་པ་ཡིན།

བློ་བཟང་གིས། ད་ནི་སང་ཉིན་ཁ་པར་ཏན་ཏན་ཡོང་ངེས་ཡིན། ད་ངས་ཁོ་མོ་ལ་སྐད་ཆ་གང་ཞིག་བཤད་ཀྱང་གནས་ལུགས་དུ་མི་འགྲོ་བ་ཁོ་ཐག་ཡིན་ལ། ཁོ་མོའི་འདོད་ཐོག་དུ་མ་བཞག་པ་ཡིན་ན། གཏན་ནས་ཁ་རོག་གེར་མི་བསྡོད་ཁོ་ཐག་ཡིན་པ་རེད། ཡིན་ཡང་། ངས་ཁོ་མོ་ལ་སེམས་ཐག་སྔ་ས་ནས་བཅད་ཡོད་པ་རེད། ཁོ་མོས་ཀྱང་། དེ་ཤེས་ཡོད་ངེས་རེད།

མཚམས་སྐྱིད་ནི་དངོས་ནས་བློ་བཟང་ལ་དངོས་ནས་སེམས་གཏིང་ནས་དགའ་བཞིན་ཡོད་མེད་མི་ཤེས་ཀྱང་། བློ་བཟང་ཁ་རོག་གེར་མི་འཇོག་པ་དེ་ནི་དངོས་ནས་བདེན་པ་ཆགས་ཡོད་པ་རེད། བློ་བཟང་ཁ་པར་ཁང་དུ་སོང་ནས་ཁོ་མོའི་སླེབས་པའི་ཁ་པར་ཡར་བཀྱགས་མ་ཐག

མཚམས་སྐྱིད་ཀྱིས། ཁྱེད་རང་མི་མ་རེད། ཁ་སང་ངེད་གཉིས་ཀྱི་དུས་ཚོད་འགོས་ཡོད་ཀྱང་། ཁྱེད་རང་མི་ཡོང་བར་རོགས་པ་ཞིག་བསྔགས་ནས་ང་ལ་སྡུག་དམོད་བྱེད་དུ་བཅུགས། དོན་དངོས་སུ་ཁྱེད་རང་གི་གྲོགས་པོ་དེ་ང་རྗེས་མ་ཐུག་གི་རེད། དེ་དུས་རྩིས་རྒྱག་ཆོག འུ་གཉིས་བར་གྱི་དོན་དག་འུ་གཉིས་ཀྱིས་ཐག་གཅོད་བྱེད་དགོས་པ་ཡིན་དུས། ཁོ་རང་ལ་གཏན་ནས་ཇུས་འདོག་གང་ཡོད་པ་རེད། ཁྱེད་རང་གིས་ང་ལ་ཁོའི་མིང་ཤོད་དང་།

བློ་བཟང་གིས། ཁྱེད་རང་གི་ཁྲོང་ཁྲོ་མི་ཟ་ཟེར་ནས་ཉེ་སྔོན་ཁས་བླངས་ཡོད་པ་མ་ཡིན་ནམ། རྒྱུ་མཚན་འདི་འདྲ་ལ་བརྟེན་ནས་ངས་ཁྱེད་རང་དང་ལྷན་དུ་མི་ཚེ་མི་བསྐྱེལ་བའི་ཐག་གཅོད་སྔ་ས་ནས་བྱས་པ་རེད། ཁྱེད་རང་གིས་སྐད་ཆ་ཞོགས་པ་བཤད་པ་ཕྱི་དྲོ་མེད་པ་ཞིག་ཡིན་དུས། ངས་ཁྱེད་རང་དང་ལྷན་དུ་མི་ཚེ་བསྐྱེལ་ཟེར་བ་དེ་ནི་དངོས་ནས་ང་རང་གི་རང་སྲོག་གཅོད་ཀྱི་ཡོད་པ་དང་གཅིག་པ་རེད། ད་ནས་བཟུང་ཁྱེད་རང་གིས་ང་ལ་ཁ་པར་མ་གཏོང་། ངས་ཁ་པར་ལེན་གྱི་ཡང་མིན། ད་ནི་འུ་གཉིས་རང་རང་ས་ནས་ལྷོད་ལྷོད་བྱས་དེ་འདུག

མཚམས་སྐྱིད་ཀྱིས། ཁྱེད་རང་གི་སྐྱིད་པོ་དྲན་གྱི་འདུག དགོས་དུས་རྩེད་མོ་རྩེད་སྤྱད་བྱས། མི་དགོས་དུས་གཡུགས་ཆོག་ཆོག་ཞིག་གང་དུ་ཡོད། ལྟད་མོ་ལྟོས་དེ་བསྡོད། ང་རང་ས་ཁུལ་དེར་སླེབས་མི་ཐུབ་པ་ཞིག་གཏན་ནས་མ་རེད། ང་ཡོང་ཁོ་ཐག་ཡིན།

བློ་བཟང་གིས། ཁྱེད་རང་ལ་ངའི་སྲོག་དགོས་ན་འདི་རུ་ཤོག ངས་ཁྱེད་རང་ལ་སྤྲོད་ཆོག དེ་མིན་མི་ཚེ་གཅིག་ལ་བཟའ་ཚང་ཟེར་བ་དེ་འདྲའི་སྐོར་ལ་ཁྱེད་རང་གི་བསམ་བློ་གཏོང་གི་མ་འདུག ད་དུང་འདི་ཕྱོགས་སུ་ཡོང་རྒྱུར་བསམ་བློ་མ་གཏོང་། འདི་ཁུལ་དུ་ཡོང་བ་ལ་སྐྱབས་བཅོལ་ལག་ཁྱེར་ཡང་དགོས་པ་རེད། མ་བསམ་ས་ནས་ཁྱེད་རང་བཙོན་དུ་བཅུགས་ཡོང་།

མཚམས་སྐྱིད་ཀྱིས། ང་རང་དེ་རུ་ཡོང་མ་ཐུབ་ཀྱང་། ངས་རྡ་ས་ནས་ཁྱེད་རང་ཕྱིར་སླེབས་རེག་བར་དུ་སྒུག་ནས་ཡིན། རིང་ན་ཁྱེད་རང་ལོ་གཅིག་འགོར་སྲིད། དེ་ལ་ཧ་ལས་རྒྱུ་གང་ཡང་མེད། ལྟད་མོ་ལྟོས།

བློ་བཟང་གིས་ཁྱེད་རང་གི་འདོད་པ་བྱོས། ངས་ཁྱེད་རང་ལ་ག་རེ་བཤད་ཀྱང་ཁྱེད་རང་གི་ཉན་མི་སྲིད་པ་ངས་ཤེས་ཡོད། ཡིན་ཡང་། ད་ནས་བཟུང་ང་རང་ལ་གཏན་ནས་འདི་ཁུལ་ལ་ཁ་པར་མ་གཏོང་། ངས་ལས་ཀར་བར་ཆད་བྱེད་ཀྱི་འདུག ངས་ཀྱང་གཏན་ནས་ཁྱེད་རང་གི་ཁ་པར་མི་ལེན་ཁོ་ཐག་ཡིན། ད་བདེ་མོ་བྱོས།

ཉིན་མ་དེ་ནས་བཟུང་མཚམས་སྐྱིད་ཀྱིས་ཁ་པར་ཞིག་གཏན་ནས་མ་སླེབས་པ་རེད། འོན་ཀྱང་། ཉིན་ཞིག་ཁོ་རང་བསྡོད་སའི་མགྲོན་ཁང་ནང་དུ་ཁོ་རང་གི་གུས་གསེང་ཉིན་མོ་དེར་ཁོ་རང་གི་ཕུ་བོ་ཟླ་བས་རྡ་ས་ནས་ཁོ་རང་ལ་ཁ་པར་འབྱོར་བ་རེད།