ཉེ་སྔོན་བོད་གཞུང་སྨན་རྩིས་ཁང་གི་འགན་འཛིན་ལྷན་ཚོགས་ཀྱིས་ཐག་གཅོད་གནང་བ་གཞིར་བཟུང་། སྨན་རྩིས་ཁང་གི་སྨན་པ་ཚེ་དབང་རྟ་མགྲིན་ལགས་བོད་གཞུང་སྨན་རྩིས་ཁང་གི་འགན་འཛིན་དུ་བསྐོ་བཞག་གནང་ཡོད་པ་དང་། ཟླ་རྗེས་མའི་ཕྱི་ཚེས་ ༡ ཉིན་དངོས་སུ་ལས་ཀ་མགོ་འཛུགས་གནང་རྒྱུ་ཡིན་འདུག
འདི་གའི་གསར་འགོད་པས་དེའི་ཐད་བོད་གཞུང་སྨན་རྩིས་ཁང་གི་དྲུང་ཡིག་ཆེན་མོ་ཚེ་རིང་ཕུན་ཚོགས་ལགས་སུ་བཀའ་འདྲི་ཞུས་པར་ཁོང་གིས་གསུངས་དོན། ཟླ་འདིའི་ཕྱི་ཚེས་ ༢༢ ཉིན་ཏེ་རེས་གཟའ་ཟླ་བའི་ཉིན་རྒྱབ་འགན་འཛིན་ལྷན་ཚོགས་ཚོགས་ཐེངས་ ༦༧ འཚོགས་སྐབས་བོད་གཞུང་སྨན་རྩིས་ཁང་གི་འགན་འཛིན་ཟླ་བ་ལགས་ཀྱིས་ཕྱི་ལོ་ ༢༠༠༥ ལོ་ནས་ཕྱག་ལས་གནང་སྟེ། ད་ལྟ་སྒྲིག་གཞི་གཞིར་བཟུང་འགན་འཛིན་གྱི་ཕྱག་ལས་གནང་བའི་ལོ་ལྔའི་དུས་ཡུན་ཚང་སྟབས་རྩིས་ཞིབ་ཚོགས་ཆུང་གིས་འགན་འཛིན་ལྷན་ཚོགས་སུ་འོས་མི་ཕུལ་བའི་ཁོངས་ནས་སྨན་པ་ཚེ་དབང་རྟ་མགྲིན་ལགས་བདམས་ཐོན་བྱུང་བ་རེད། བོད་གཞུང་སྨན་རྩིས་ཁང་དེབ་སྐྱེལ་བྱས་པའི་སྒྲིག་གཞིའི་ནང་གསལ་བ་ལྟར་ན། ད་ལྟའི་ཆར་འགན་འཛིན་ལ་ཤེས་ཚད་ཐོག་སྨན་རམས་པ་ཆུང་བ་དང་རྩིས་རམས་པ་ཆུང་བ་ཡན་གྱི་མི་གང་ཡང་རུང་བ་ཞིག་ལ། ཞབས་ལོ་ལོ་ ༡༥ ཡན་ཞུས་ཟིན་པ་དང་རང་ལོ་ ༣༥ ལས་བརྒལ་བ་ཞིག་དགོས་ཀྱི་ཡོད་པས་ཁོང་ལ་དེའི་ཆ་རྐྱེན་ཡོངས་སུ་ཚང་ཡོད་ཅེས་དང་། ཉིན་འདི་འགར་འགན་འཛིན་གསར་རྙིང་རྣམ་གཉིས་ཀྱིས་རྩིས་སྤྲོད་རྩིས་ལེན་གནང་བཞིན་པ་དང་། ཟླ་རྗེས་མའི་ཕྱི་ཚེས་ ༡ ཉིན་ནས་འགན་འཛིན་གསར་པས་ཕྱག་ལས་གནང་མགོ་རྩོམ་གི་རེད་ཅེས་འགྲེལ་བརྗོད་གནང་ཡོད།
སྨན་པ་རྟ་མགྲིན་ཚེ་དབང་ལགས་ཀྱིས་ཕྱི་ལོ་ ༡༩༧༨ ལོར་སྨན་པ་བཀའ་བཅུ་པ་ཐོན་ཏེ་བོད་གཞུང་སྨན་རྩིས་ཁང་གི་ལས་བྱེད་པར་འཛུལ་ཞུགས་གནང་བ་ནས་བཟུང་། ཐོག་མར་སྤེལ་ཀོབ་བོད་མིའི་གཞིས་ཆགས་སུ་ལོ་གཅིག་རིང་སྨན་པའི་ཕྱག་ལས་གནང་བ་དང་། ༡༩༧༩ ལོ་ནས་ ༡༩༨༣ བར་ངྷ་ས་དབུས་སྨན་རྩིས་ཁང་ནང་སྨན་གཉེར་ཕྱིར་གཏོང་སྨན་དྲུང་དང་སྔ་དགོང་ནད་གསོ་ཁང་གི་ནད་པར་བརྟག་དཔྱད། སྐབས་མཚམས་ས་གནས་སྨན་པའི་རྐང་ཚབ་དང་༧གོང་ས་མཆོག་གི་བླ་སྨན་རྣམ་པའི་ཆིབས་ཞབས་བཅས་གནང་། ༡༩༨༤ ལོར་སྨན་རམས་པ་ཆུང་བར་གནས་སྤར། ལོ་དེར་ལྡི་ལི་གསར་བའི་ཡན་ལག་སྨན་ཁང་གི་སྨན་པར་བསྐོ་བཞག་གནང་། ལོ་བཅུ་ལ་སྨན་པ་དང་ལོ་བདུན་ལ་སྨན་པའི་འགན་འཛིན་གནང་། ༡༩༩༨ ལོའི་ཟླ་ ༩ ཚེས་ ༢༩ ཉིན་སྨན་རམས་པ་འབྲིང་བར་གནས་སྤར། ༢༠༠༡ ཟླ་ ༨ ཚེས་ ༡ ཉིན་༧གོང་ས་མཆོག་གི་སྐུ་བཅར་སྨན་པར་བསྐོ་བཞག་གནང་བ་དང་། ལོ་དེར་སྨན་སྦྱོར་ཁང་གི་འགན་འཛིན་སྨན་པར་བསྐོ་བཞག་གནང་། ༢༠༠༤ ལོའི་ཟླ་ ༡༢ ཚེས་ ༦ ཉིན་བོད་གཞུང་སྨན་རྩིས་ཁང་གི་ངེས་སྟོན་པ་གཞོན་པར་བསྐོ་བཞག་གནང་། ༢༠༠༧ ལོའི་ཟླ་ ༣ ཚེས་ ༡ ནས་མཐོ་སློབ་སློབ་སྤྱིའི་འགན་བཞེས། ༢༠༠༨ ཟླ་ ༡༠ ཚེས་ ༡ ཉིན་ནས་མཁས་པའི་སློབ་སྟོན་ཚོགས་ཆུང་གི་སློབ་སྟོན་པའི་མཛད་འགན་བཞེས་མུས་ཡིན་པ་སོགས། ཁོང་གིས་ད་བར་མི་ལོ་ ༣༠ རིང་བོད་ཀྱི་གསོ་བ་རིག་པའི་ཐོག་ཏུ་ཕྱག་ལས་གནང་འདུག
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
འཚོལ་ཞིབ་ཚོགས་ཆུང་ཟེར་བ་དེ་གང་ཡིན་ནམ། བླ་མ་སྤྲུལ་སྐུ་རྐྱང་ལས་གྲུབ་པ་ཞིག་ཡིན་རྒྱུ་རེད།
དངོས་ཡོད་གནས་ཚུལ་རེད། ངས་བསམ་ཚུལ་འདི་རིགས་ལ་གུས་བཀུར་ཞུ་གི་ཡོད་པས་འདི་ནས་དྲ་གྲོགས་ལྷན་རྒྱས་དང་བསམ་ཚུལ་བརྗེ་ལེན་བྱ་འདོད་བྱུང། ཚེ་སྲོག་གི་འགྲོ་གྲོན་མེད་པའི་ང་ཚོའི་མང་གཙོའི་ལམ་སྲོལ་དེ་ནི་རིན་ཐང་ལྡན་པ་ཞིག་ཏུ་ངས་མཐོང་གི་མེད། འཛམ་གླིང་མང་གཙོའི་རྒྱལ་ཁབ་ཁག་གི་མང་གཙོའི་ལོ་རྒྱུས་འབབ་ཚུགས་རེ་ནས་མི་མང་གི་རྐང་རྗེས་རེ་མཐོང་རྒྱུ་ཡོད་ཀྱང་ང་ཚོའི་མང་གཙོའི་འབབ་ཚུགས་རེ་ན་༸གོང་མཆོག་གི་ཞབས་རྗེས་རེ་མ་གཏོགས་མཐོང་རྒྱུ་མེད། ང་ཚོའི་མང་གཙོ་ནི་༸གོང་ས་ཆེན་པོས་ཁ་ཞེ་གཉིས་མེད་ཀྱི་ཐོག་ནས་གསོལ་རས་གནང་བར་ངས་ཡིད་ཆེས་བླ་མེད་ཞུ་བཞིན་ཡོད། ཐེངས་འདིའི་སྨན་རྩིས་ཁང་གི་འགན་འཛིན་འདེམ་ཕྱོགས་ཐད་ལ་སྤྱི་ཚོགས་སྟེང་གླེང་རྙོག་ཆེན་པོ་ཆགས་ཡོད། རྒྱུ་རྐྱེན་གཙོ་བོ་ནི་འགན་འཛིན་ལྷན་ཚོགས་ཀྱི་ཚོགས་གཙོ་འཕྲོད་བསྟེན་བཀའ་བློན་དཔལ་འབྱོར་ཚེ་རིང་ལ་སྒྲིག་གསལ་་དོན་གནད་རིག་ཐག་གཅོད་བྱེད་པའི་བློ་སྤོབས་དང་འཇོན་ཐང་མེད་པ་དང་། འཛིན་སྐྱོང་རྙིང་པ་འོས་མིའི་ཁོངས་སུ་མ་བཞག་པས་བློ་ཕམ་པ། འཚོལ་ཞིབ་ཚོགས་ཆུང་གིས་དབང་ཤུགས་བེད་སྤྱོད་བྱས་པ་སོགས་རེད།
སྨན་རྩིས་ཁང་ལ་བདུད་ཀྱི་ཆོ་འཕྲུལ་འདྲ་བསྟན་ཀྱི་ཡོད་པ་འདྲ།
རེད་ཡ། རྡོ་ལགས་རྒྱབ་སྐྱོར་ཡོད། བླ་སྨན་རྟ་མགྲིན་ནས་དང་པོ་བྱེད་ཀྱི་མིན་ཟེར་ནས་དགོངས་པ་ཞུ། སྨན་རྩིས་ཁང་འཐུས་ཤོར་ལ་བཏང་། ཡང་བྱེད་ཀི་ཡིན་ཟེར། རྒན་འཁོགས་རྐྱང་རེས་བསྐོར་བ་ལས་ལོ་གཞོན་པར་རྩིས་སྤྲད་ན་ཡག་པོ་འདུག་
སྨན་རམས་པ་ཚེ་དབང་རྟ་མགྲིན་མཆོག་གཅིག་ནས་ད་ལྟ་ལོ་ཆེན་པོ་སླེབས་ཟིན་པ་དང་། གཉིས་ནས་འཛིན་སྐྱོང་གི་འཇོན་ཐང་དེ་ཙམ་མེད་པ། གསུམ་ཐད་ནས་ནད་པར་མ་གཟིགས་ན་སྨན་རྩིས་ཁང་དང་ནད་པ་གཉིས་ཁར་གྱོང་རེག་རྒྱུ་ཡིན་འདུག་ན། འཚོལ་ཞིབ་དང་རྩིས་ཞིབ་ཚོགས་ཆུང་གི་ཕུལ་བའི་འོས་མི་གཉིས་པ་སྨན་རམས་པ་ཆོས་ལོ་ཐར་ལོ་ན་གཞོན་པ་དང་ཤེས་ཚད་ཡོད་པས་འགན་འཛིན་རན་ཤོས་དེ་རེད་འདུག
སྔོན་མར་སྨན་རྩིས་ཁང་གི་འགན་འཛྀན་རྣམས་ཀྱིས་སོ་སོའི་བུ་ཕྲུག་ལ་བདག་སྐྱོང་སྤྲད་པ་ལས། སློབ་ཕྲུག་གཞན་པ་རྣམས་ལ་དེ་ཙམ་དོ་སྣང་མ་སྤྲད་པའི་སྐད་ཆ་མང་པོ་གོ་རྒྱུ་འདུག དེ་འདྲ་མི་གནང་བར་མཁྱེན།
སྨན་རམས་པ་ཚེ་དབང་རྟ་མགྲིན་ལགས་འགན་འཛིན་བསྐོ་བཞག་གནང་བར་འཞམས་འདྲི་བཀྲིས་བདེ་ལེགས་ཞུ། ཁོང་ནི་ནམ་རྒྱུན་ནད་པ་སུ་ཞིག་ཡིན་རུང་ཀུན་ལ་བྱམས་སྐྱོང་དང་བརྩེ་བས་བརྟག་དཔྱད་ཡག་པོ་ཞེ་དྲག་གནང་གི་འདུག དངོས་གནས་བྱང་ཆུབ་སེམས་དཔའི་བྱ་སྤྱོད་རང་རེད་འདུག
གསར་འགོད་པ་ལགས།
སྨན་རམས་པ་ཚེ་དབང་རྟ་མགྲིན་ལགས་འགན་འཛིན་འོས་མིའི་ཁོངས་སུ་འདེམས་ཐོན་བྱེད་མཁན་རྩིས་ཞིབ་ཚོགས་ཆུང་མ་ཡིན་པར། འཚོལ་ཞིབ་ཚོགས་ཆུང་རེད།་དབྱིན་སྐད་ལ་( search committee)ཟེར།་དེ་ཡང་སྨན་རྩིས་ཁང་གི་འགན་འཛིན་འདེམས་ཕྱོགས་ཐད་འགྲེལ་བརྗོད་ཕྲན་ཙམ་ཞུས་ན། ཐོག་མར་འཚོལ་ཞིབ་ཚོགས་ཆུང་གི་མི་འགྲོ་འོས་འདེམས་ཚོགས་ཆུང་འཛིན་སྐྱོང་ནས་བཀོད་སྒྲིག་ཞུས་པ་དང། ཚོགས་ཆུང་དེས་གོ་སྒྲིག་བྱས་པ་བརྒྱུད་སྨན་རྩིས་ཁང་གི་སྨན་ལས་ངོ་མ་ཡོངས་ཀྱིས་འོས་ཤོག་འཕེན་ནས་འཚོལ་ཞིབ་ཚོགས་ཆུང་གི་མི་བཞི་འདེམས་ཐོན་བྱེད་དགོས། ད་ལོའི་འཚོལ་ཞིབ་ཚོགས་ཆུང་ནང་ཐད་བཀོད་ཚོགས་གཙོ་གཅིག་དང། འོས་འདེམས་བྱུང་བའི་ཚོགས་མི་བཞི་ཡོད། དེ་དག་ལས་གཅིག་སྐར་རྩིས་པ་དང་། གཉིས་སྨན་པ། གཅིག་སྨན་རྩིས་ཁང་གི་དྲུང་ཆེ་རེད་འདུག མི་བཞི་ལས་གྲུབ་པའི་འཚོལ་ཞིབ་ཚོགས་ཆུང་དེ་ལ་དབང་ཚང་ཆེན་པོ་ལྡན་ཡོད་པ་དཔེར་ན། སྨན་རྩིས་ཁང་གི་འགན་འཛིན་གྱི་འོས་མི་གསུམ་
འདོན་རྒྱུའི་དབང་ཚད་ཆ་ཚང་ཡོད་པ་དང། ཚོགས་ཆུང་དེས་འདེམས་པའི་འོས་མི་
གསུམ་པོའི་མཚན་ཐོ་སྨན་རྩིས་ཁང་གི་འགན་འཛིན་ལྷན་ཚོགས་ལ་ཕུལ་རྗེས་
འགན་འཛིན་ལྷན་ཚོགས་ཀྱིས་གཅིག་འདེམས་དགོས་པ་རེད། མདོར་ན་འཚོལ་ཞིབ་ཚོགས་ཆུང་ནི་སྨན་རྩིས་ཁང་གི་སྨན་ལས་ཡོངས་ཀྱི་ངོ་ཚབ་
མཚོན་པའི་ཚོགས་ཆུང་ཞིག་ཡིན་སྐད།
བླ་སྨན་པ་ཚེ་དབང་རྟ་མགྲིན་མཆོག་འགན་འཛིན་དུ་བསྐོ་གཞག་གནང་བར་བཀྲིས་བདེ་ལེགས་ཞུ། ཁོང་གི་རྒྱུན་ལྡན་ནད་པ་ལ་ཧ་ཅང་རྟགས་དཔྱད་ཡག་པོ་གནང་རྐྱེན་ཞོགས་ཀི་ཆུ་ཚོད་དྲུག་པ་ནས་ཁོང་གི་གཟིམ་ཤག་སར་ཤ་སྦྲམ་བཞིན་འཚངས་ཚར་ཡོད། ད་ནི་ཁོང་གི་ལས་ཁུངས་ཀྱི་ཕྱག་ལས་ཡོད་སྟབས་ནད་པ་རྟགས་དཔྱད་གནང་རྒྱུ་ཐད་ཏོག་ཙམ་ཐུས་ཤོར་མི་འགྲོ་སྙམ་པའི་སེམས་ཁྲལ་བྱུང་།
ལོ་ཤས་གོང་ངས་སྨན་རྩིས་ཁང་གི་འགན་འཛིན་ཟླ་བ་ལགས་ལ་དེའི་སྐོར་དྲིས་པ་ཡིན། ཁོང་གིས་དེང་སྐབས་བོད་སྨན་ནང་དུ་སྲོག་ཆགས་ཀྱི་ཤ་ཁྲག་རུས་གསུམ་ལ་སོགས་པའི་རིགས་བེད་སྤྱོད་གཏོང་གི་ཡོད་པ་མ་རེད་ཟེར།
ཁ་ཉིན་ཞིག་ལ་སྨན་པ་ཞིག་དང་མཉམ་དུ་སྐད་ཆ་བྱུང་སྐབས། བོད་སྨན་ནང་ལ་གཞུང་ནས་བསྟན་པའི་རྒྱུ་ཆ། དཔེར་ན། གླ་རྩི་དང་དོམ་འཁྲིས་ལ་སོགས་པ་བེད་སྤྱོད་མ་བཏང་ན་སྨན་དེའི་ནུས་པ་འཐོན་གི་མ་རེད་ཟེར།
དེ་བྱས་དུས། ཡུལ་ཁྲིམས་དང་རྒྱལ་ཁྲིམས། ཁོར་ཡུག་དང་སྲོག་ཆགས་བཅས་ལ་ལྟོས་པའི་སྒོ་ནས་བོད་སྨན་བཟོ་དགོས་ཀྱི་ཡོད་ས་རེད།
ངས་འདི་འདྲ་བཤད་རུང་མིན་མི་ཤེས་ཏེ། བོད་སྨན་འདི་དེང་རབས་ཅན་དུ་བསྒྱུར་དགོས་ས་མང་པོ་ཞིག་ཡོད་ས་རེད། ན་ནིང་ཞིག་ལ་དབྱིན་ཇི་རྒན་པོ་སངས་རྒྱས་པའི་ཆོས་ལ་དད་མཁན་ཞིག་གིས་བོད་སྨན་གྱི་ནང་དུ་སྲོག་ཚགས་ཀྱི་ཤ་ཁྲག་རུས་གསུམ་སྤྱི་དང་ལྷག་པར་ཡང་རྷ་སྟོང་དུ་འགྲོ་ཉེའི་ སྲོག་ཆགས་འབྲོང་སོགས་ཀྱི་ཤ་ཁྲག་བེད་སྤྱོད་བྱེད་གྱིན་འདུག་ཟེར་ནས་མ་དགའ་བ་ལྟ་བུ་བྱེད་ཀྱིན་འདུག ད་དུང་བོད་སྨན་ནང་གི་ལྟས་བརྟག་པ་ལྟ་བུ་དད་མོས་ཡིད་ཆེས་ཁོ་ན་དང་འབྲེལ་བ་དེ་ཚོ་ལ་ཡིད་མི་ཆེས་མཁན་མང་པོ་ཡོད་ངེས་རེད།
སྨན་རྩིས་ཁང་གི་སྨན་པ་ཚེ་དབང་རྟ་མགྲིན་ལགས་བོད་གཞུང་སྨན་རྩིས་ཁང་གི་འགན་འཛིན་བསྐོ་བཞག་གནང་པར་འཚམས་འདྲའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག ཕྱོགས་ཞེན་འཐེན་འཁྱེར་དང་བྲལ་པའི་ཚོགས་པ་ཚད་ལྡན་ཞིག་གི་འགན་འཛིན་དུ་འགྱུར་བར་སྨོན།