ཁང་གསར་རྡོ་རྗེ།
དད་གུས་ཀྱི་དབང་གིས་ཡིན་ནམ་ཡང་ན་བསམ་བློ་ལ་རང་དབང་མེད་པས་ཡིན། རྣམ་པ་གཅིག་ཏུ་ན་འདི་གཉིས་ཐ་དད་ཡིན་སྲིད་ལ་གཞན་དུ་ན་བབས་ས་གཅིག་མཚུངས་ཀྱང་ཡིན་སྲིད།
བསྟན་འཛིན་ཕན་བདེའི་༧རྒྱལ་བ་རིན་པོ་ཆེའི་བཞུགས་ཁྲི་ཞེས་པའི་རྩོམ་ཐུང་དེ་ཡང་མཐར་གཏུགས་ནས་བཤད་ན་དད་གུས་ཀྱི་ལྟ་སྟངས་འོག་ནས་བལྟས་པའི་མཐོང་ཚུལ་ཞིག་རེད་ལ། ངས་བྲིས་པ་ཁག་ཅིག་ཀྱང་ལྟ་སྟངས་དེ་རང་གི་འོག་ནས་བྲིས་ཡོད། ལྟ་སྟངས་དེའི་འོག་ནས་སོང་ན། རྔ་མོང་ཆེ་ན་ལྕི་བ་ཡང་ཆེ་དགོས་པའི་ལོག་རྟོག་བཟུང་སྟེ། མི་ཆེན་གྱིས་བཤད་ཚད་ལ་མཐོང་ཆེན་དང་མི་ཆུང་གི་སྐད་ཆ་ཚང་མ་ཆོ་མེད་དུ་བརྩི་རྐྱང་བྱེད་ངེས་པ་ནི་བཤད་མི་དགོས་པ་ཞིག་རེད། འོན་ཀྱང་གང་ཟག་ལ་མ་རྟོན་ཆོས་ལ་རྟོན་ཞེས་པའི་ལྟ་སྟངས་དེའི་དབང་དུ་བྱས་ན། བསམ་ཚུལ་ཚང་མར་བསམ་ཚུལ་ཡིན་མཉམ་གྱི་ལྟ་སྟངས་ཤིག་གི་ཐོག་ནས་རིན་ཐང་འཇོག་དགོས་པ་རེད་མ་གཏོགས། བཤད་མཁན་སུ་ཡིན་མིན་གྱི་ཐད་ནས་རིན་ཐང་འཇོག་མི་རུང་བ་རེད། ད་ནི་དོན་ཚན་ལ་དབབ་སྟེ་བཤད་པར་བྱ།
༡༽ ངའི་སྐད་ཆ་དེ་ཚོ་སུ་ལ་དམིགས་པ་དང་གང་ལ་གཟས་ཏེ་བཤད་མིན་ཐད། སྐུ་ཉིད་ཀྱིས་མཚོན་པའི་ཀློག་པ་པོ་སུས་གོ་བ་ག་རེ་བླངས་ནའང་ངས་དེ་འགྲིགས་མི་འདུག་ཅེས་བཤད་ཀི་མིན། གང་ཡིན་ཟེར་ན། ངས་བཤད་པའི་ང་ཚོའི་སྤྱི་ཚོགས་ཀྱི་མི་མངོན་པའི་སྒྲོམ་གཞི་དེ་གཞི་རྒྱ་ཆེན་པོ་ཞིག་ཡིན་པ་ལས་ཆུང་ཆུང་མ་རེད། དེའི་དབང་གིས་མི་འབུམ་གཅིག་ལྷག་གི་ནང་ལ་བཤད་པའི་སྐད་ཆ་དེ་སུའི་གནོངས་ལའང་ཕོག་ཆོག་པ་ལ་གནོངས་ཅན་ཞིག་གིས་ངོས་བླངས་ན་དེར་ཟད་ཀྱི་ངས་མཛུབ་བཙུགས་བྱས་པ་མིན།
༢༽ དངོས་ཡོད་གནས་ཚུལ་ལ་ཞིབ་ཏུ་བསམས་ན། ཉིད་ཀྱིས་མགོ་ནས་མཇུག་བར་ག་རེ་བྲིས་པ་དེ་ག་སྒྲོམ་གཞི་དེའི་གཙོ་གནད་རེད། ༸རྒྱལ་བ་རིན་པོ་ཆེར་དད་པ་ཡོད། ཁོང་དྲིན་ཆེ། ཁོང་གིས་དམངས་གཙོ་གསོལ་རས་གནང་བ་རེད། ཁོང་བླ་ན་མེད་པ་རེད། དེའི་དགོངས་པ་དང་མི་མཐུན་པ་སྨྲས་ན་མི་རིགས་ཀྱི་ཞབས་འདྲེན་རེད། ངོས་ལེན་མེད། ངོ་རྒོལ་ཡོད་ཟེར་གྱི་ཡོད་རེད། སྐད་ཆ་འདི་འདྲ་བཤད་དེ་ང་ཚོ་རྡོག་རྡོག་བཟོི་ཐུབ་ན། སྐད་ཆ་འདི་ག་རང་གིས་ང་ཚོ་དུམ་བུ་མང་པོར་གཏོང་ཐུབ་ཀྱི་རེད།
༣༽ང་ཚོའི་དམངས་གཙོ་འདི་༸རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོས་གསོལ་རས་གནང་བ་རེད། དེ་དོན་དངོས་རེད། ལུང་པ་ཆུས་འཁྱེར་ན་རྡོ་ལེབ་སྐམ་པོར་མི་གནས་པ་བཞིན་མང་གཙོའི་རྒྱལ་ཁབ་ཆེ་ཤོས་རྒྱ་གར་ནང་ལ་ཕེབས་རྗེས་མང་གཙོའི་ལུགས་བཟང་དུ་མ་ཕེབས་རང་ཕེབས་ཡིན་པ་དེ་ཡང་དོན་དངོས་རེད།
འོ་ན། བོད་མི་ཚོས་འདས་པའི་ལོ་ངོ་ ༣༦༠ ལྷག་གི་རིང་ལ་ཅིའི་ཕྱིར་ལམ་ལུགས་གསར་པ་ཞིག་ལ་རྩོད་ལེན་མ་བྱས་པ་རེད། ད་ལྟ་རང་གི་ཕྲག་སྟེང་དུ་ལྷུང་པའི་འགན་འཁྲི་ཡང་ངོས་འཛིན་མི་ཐུབ་པ་འདི་འདྲ་ཇི་ལྟར་ཆགས་པ་རེད། འདིའི་ཕུགས་དེད་ན་༸རྒྱལ་བ་སྐུ་ཕྲེང་ལྔ་པ་ནས་བརྩིས་པའི་བོད་ཀྱི་དབུ་ཁྲིད་དང་ལས་སྣེ་ཚོས། བསམ་བཞིན་དུའང་བསམ་བཞིན་མ་ཡིན་པར། བོད་མི་དམངས་རྣམས་མུན་འཐོམ་དུ་བཞག་པ་དང་འབྲེལ་བ་ཡོད་པ་དེ་ཡང་དོན་དངོས་རེད། མདོར་བསྡུས་ནས་བཤད་ན། ༡༩༥༩ གོང་དུ་༸རྒྱལ་བ་རིན་པོ་ཆེས་དབུ་འཁྲིད་པའི་བོད་གཞུང་དགའ་ལྡན་ཕོ་བྲང་གིས་བོད་མི་དཀྱུས་མ་ཚོ་ལ་ཕན་པའི་སློབ་གྲྭ་ག་ཚོད་བཙུགས་འདུག་གམ། འདི་གཅིག་པུ་ལ་བསམ་བློ་བཏང་ན་ཤེས། ལོ་བརྒྱ་ཕྲག་མུན་འཐོམ་དུ་བཞག་པའི་མི་རིགས་ཤིག་ལ་ལོ་ཁ་ཤས་ནང་༸རྒྱལ་ཁབ་ཀྱི་འགན་ལེན་པར་ཤོག་ཟེར་ན་ཁག་པོ་ལོས་བྱེད།
༤༽ ངས་གཏམ་དཔེ་གསར་པ་ཞིག་རྩོམ་འདོད་བྱུང་། དེ་ནི། བཟང་བཟང་བླ་མ་དང་ངན་ངན་མང་ཚོགས། ཞེས་པ་འདི་ཡིན། ང་ཚོས་གྲུབ་འབྲས་གླེང་སྐབས། བླ་ཆེན་འདི་དང་འདིའི་བཀའ་དྲིན་ཉག་གཅིག་ལ་བརྟེན་ནས་བྱུང་ཞེས་བརྗོད་པ་ལས། ལས་དོན་དེའི་ནང་དངོས་སུ་དཀའ་ཚེགས་མྱངས་ཏེ་ལས་ཀ་བྱེད་མཁན་ཚོའི་བྱས་རྗེས་བགྲངས་པ་ཧ་ལམ་མཐོང་རྒྱུ་མེད་ཅིང་། ཡང་ལས་དོན་འཐུས་ཤོར་དང་བྱུས་ཉེས་ཀྱི་སྐོར་གླེང་སྐབས། གོང་རིམ་གྱི་བཀོད་འདོམས་འོག་ཏུ་ལས་དོན་སྒྲུབ་མཁན་གཤམ་འོག་ལས་བྱེད་པ་རྣམས་དང་། མང་ཚོགས་ཀྱིས་མ་འཇོན་རབས་མ་གཏོགས། དཀོན་མཆོག་གོང་ཕུད་ཅེས་སྦུག་རྩ་ངོ་མ་དེར་ཅི་ཡང་བརྗོད་ཕོད་ཀྱི་མེད་པའམ་བརྗོད་ཀྱི་མེད། ཅི་མཛད་ཡང་དག་པ་དང་ཅི་གསུང་ལེགས་བཤད་རེད།
ང་རང་རྒྱ་ནག་ནང་དུ་ཕྲན་བུ་སྡོད་མྱོང་། རྒྱ་ནག་ནང་དུའང་མང་ཚོགས་ཕལ་མོ་ཆེས་སྲིད་གཞུང་དང་སྲིད་འཛིན་ལ་སྐྱོན་བརྗོད་བྱས་པ་ཉུང་ཉུང་རེད། མང་ཆེ་བས་སྲིད་གཞུང་གི་གཤམ་འོག་ལས་བྱེད་པས་སྲིད་བྱུས་ཚུལ་བཞིན་ལག་བསྟར་མ་བྱས་པར་བསམས་ཏེ། དབུས་གཞུང་ལ་ཞུ་གཏུགས་བྱེད་ཅིང་། ནམ་ཞིག་དབུས་གཞུང་གིས་མཁྱེན་ན་གནས་དོན་ཐག་གཅོད་ཡོང་གི་རེད་དྲན་བཞིན་ཡོད། རྒྱ་མི་སྟོང་ཕྲག་མང་པོས་ཡིད་ཆེས་དེ་འདྲ་ཞིག་བཅངས་ཏེ་ཉིན་ལྟར་རྒྱ་གཞུང་ལ་སྙན་ཞུ་འབུལ་བཞིན་ཡོད། ཞུ་གཏུགས་བྱེད་བཞིན་ཡོད།
འོན་ཀྱང་རྒྱ་གར་དང་ཨ་རི། ཁེ་ཎ་ཌ་སོགས་ཚད་ལྡན་གྱི་དམངས་གཙོའི་རྒྱལ་ཁབ་ནང་། ཐད་ཀར་སྲིད་འཛིན་དང་སྲིད་གཞུང་ལ་སྐྱོན་བརྗོད་བྱེད་ཀྱི་འདུག འདི་ལ་ཞིབ་ཏུ་བསམས་ཤེས་ན། དངོས་གནས་ཀྱི་དམངས་གཙོའི་གནས་ཚད་དུ་སླེབས་ཡོད་མེད་ཀྱི་ཚད་གཞི་ཞིག་མཐོང་གི་རེད།
༥༽ འདི་ལྟར་བཤད་དུས་ང་༸རྒྱལ་བ་རིན་པོ་ཆེ་ལ་མ་དད་པ་དང་། ངོ་རྒོལ་བྱེད་མཁན་ཞིག་ཏུ་དགོངས་སྲིད། ༸རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་འདི་ང་ཚོ་བོད་ཀྱི་ནོར་བུ་རེད། ཡིད་བཞིན་ནོར་བུ་རེད། དེ་ལ་གུས་བརྩི་ཡོད། ང་ཚོས་ཁོང་ལ་སྲུང་སྐྱོབ་ཡིན་ཁུལ་གྱིས་མང་ཚོགས་ཀྱི་བསམ་ཚུལ་འབུར་འཇོམས་བྱས་ན་ནོར་བ་རེད། ཁོང་རླབས་ཆེན་ཞིག་ཡིན་པའི་རྟགས་སུ་དམངས་གཙོ་ལ་ཐུགས་དགྱེས་མཉེས་དང་རྒྱུན་དུ་བསམ་ཚུལ་གསར་པར་ཐུགས་སྣང་། ལྷག་པར་དུ་མི་རིགས་འདི་འགྱེལ་ས་ནས་ལངས་ཐུབ་པ་ཞིག་བཟོ་དགོས་དགོངས་བཞིན་ཡོད།
ང་ཚོས་དད་གུས་བྱེད་སྟངས་དེར་ཡང་བསམ་བློ་གཏོང་དགོས། ལྕེ་ནར་ནར་དང་ལུས་གུག་གུག་དེ་དད་གུས་ངོ་མ་མ་རེད། ཁོང་གིས་ཅི་བཤད་ལ་ཉན་པ་ལས་གཞན་དག་འབུར་འཇོམས་བྱེད་པ་དེ་དད་གུས་བྱེད་སྟངས་མ་རེད། ཤ་རིའི་བུ་དང་མོངྒལ་གྱི་བུ་སོགས་ཀྱིས་ཀྱང་སངས་རྒྱས་ཀྱི་གསུང་ལ་དོགས་འདྲི་དང་གླེང་སློང་། བརྒལ་བརྟག་གནང་ཡོད། དེ་ལྟར་གནང་བ་དེ་བླ་ན་མེད་པའི་དད་གུས་རེད། ང་ཚོས་སེམས་ནང་འདི་ཁྱད་མཚར་དྲན་ནའང་ཅི་མཛད་ལེགས་མཐོང་བྱེད་དགོས་ཞེས་མནན་གྱིན་ཡོད། ངའི་ལྟ་སྟངས་ལྟར་ན་དེ་ཚོ་དད་གུས་མ་རེད།
ངས་རང་གི་བསམ་ཚུལ་རྣམས་སྔོན་མ་བཤད་ཟིན་ལ་ད་ལྟའང་་བཤད་ཀྱིན་ཡོད། མ་འོངས་པར་ཡང་བཤད་ཀྱི་ཡིན། ངས་བཤད་པའི་བསམ་ཚུལ་རྣམས་༸རྒྱལ་བ་རིན་པོ་ཆེའི་དགོངས་པ་བྱེ་བྲག་གི་གནད་ཁ་ཤས་དང་མི་མཐུན་པ་ཡོང་གི་རེད། ཆོས་ཉིད་ཀྱི་དབང་གིས་དེ་ཡོང་ཆོག་པ་ཞིག་དང་ཡོང་དགོས་པ་ཞིག་རེད། ངས་བཤད་པ་རྣམས་ང་རང་གི་བསམ་ཚུལ་རེད། དེ་ཡང་དག་དང་མ་དག་དེ་ངས་བཤད་པའི་རྒྱུ་མཚན་ལ་བལྟ་རྒྱུ་རེད་མ་གཏོགས་བླ་ཆེན་མི་ཆེན་ཞིག་གི་དགོངས་པ་དང་མཐུན་མ་མཐུན་ལ་གཟིགས་རྒྱུ་མ་རེད།
འོན་ཀྱང་གསལ་པོ་བཟོ་དགོས་པ་ཞིག་ལ། བསམ་ཚུལ་མི་མཐུན་པ་བཤད་པའི་རྒྱུ་མཚན་གྱིས་༸རྒྱལ་བ་རིན་པོ་ཆེ་ལ་གུས་བརྩི་མེད་པའམ་ངོ་རྒོལ་བྱེད་མཁན་ཡིན་པར་བཤད་ན་སྤྱིར་བཏང་གི་འགྲོ་སྟངས་ཐོག་ནས་ནོར་བ་རེད་ལ། མཛངས་དཀྱེལ་ཆེ་བའི་༸གོང་ས་མཆོག་གི་དགོངས་པར་བབས་པའི་བྱ་བ་ཞིག་ཀྱང་མ་རེད།
༦༽ རྒྱ་ནག་གི་ནང་དུ་ཏཱ་ལའི་བླ་མ་ལ་དགག་པ་བརྒྱབ་ནས་འཚོ་བ་སྐྱེལ་མཁན་ཁྱུ་གཅིག་ཡོད་རེད། དྷ་རམ་ས་ལས་གཙོ་བོ་བྱས་པའི་རྒྱ་གར་ནང་དབུ་མའི་ལམ་དང་༸རྒྱལ་བ་རིན་པོ་ཆེར་བསྟོད་པ་འཐེན་ཏེ་འཚོ་བ་སྐྱེལ་མཁན་ཁྱུ་གཅིག་ཡོད་རེད། ཕྱི་མ་དེས་ཧ་ལམ་རང་ཉིད་༸རྒྱལ་བ་རིན་པོ་ཆེའི་དགོངས་པ་སྲུང་སྐྱོབས་དང་དར་སྤེལ་གཏོང་མཁན་གྱི་སྲུང་མ་ཡིན་དྲན་བཞིན་ཡོད། ༸རྒྱལ་བ་རིན་པོ་ཆེའི་དགོངས་པ་ཟེར་དུས་རྒྱ་ཆེན་པོ་རེད། དབུ་མའི་ལམ་ཙམ་མ་རེད། རང་བཙན་རྩོད་མཁན་ལ་རང་གི་སྐད་སྒྲ་སྒྲོག་སའི་ལམ་ཞིག་བསྐྲུན་དགོས་པ་དེ་ཡང་༸རྒྱལ་བ་རིན་པོ་ཆེའི་དགོངས་གཞི་རེད། ༸རྒྱལ་བ་རང་ཉིད་ཞལ་མ་བཞུགས་པའི་སྐབས་སུའང་བོད་དོན་མུ་མཐུད་དེ་གནས་དགོས་པ་དང་། དེ་ལྟར་གནས་ཐུབ་པའི་འགན་ལེན་བྱེད་དགོས་པ་དེ་ཡང་༸རྒྱལ་བ་རིན་པོ་ཆེའི་དགོངས་པ་རེད།
དེར་བརྟེན་༸རྒྱལ་བ་རིན་པོ་ཆེ་ཞལ་བཞུགས་ཐོག་འདིར་གནད་དོན་གང་ལའང་བློ་རྒྱ་ཆེན་པོས་སྦྱང་བཤད་བྱས། ཐབས་ལམ་གང་ལའང་བསམ་བློ་བཏང་སྟེ། མང་ཚོགས་རང་གིས་འགན་འཁྱེར་ཐུབ་པའི་གནས་སྟངས་ཤིག་ཏུ་འཁྲིད་དགོས་པ་དེ། བོད་དོན་འཐབ་རྩོད་ཀྱི་དགོས་མཁོ་རེད་ལ་༸རྒྱལ་བ་རིན་པོ་ཆེའི་དགོངས་པ་གལ་ཆེ་ཤོས་ཤིག་རེད། དེར་བརྟེན། རྟག་པར་ཡེ་ཤེས་དབྱིངས་དཔྱད་ཀྱི་ཐོག་ཏུ་འབབ་ཐབས་བྱེད་པ་འདི་མངོན་ཤེས་ལྟ་ཅི་རྗེས་དཔག་ཙམ་ཡང་མེད་པའི་སྲུང་མ་ཐ་ཆད་ཀྱི་བྱེད་སྟངས་རེད།
སྐུ་ཉིད་ཀྱིས་ང་མི་ཆུང་ཞིག་གི་བསམ་ཚུལ་ལ་ཐུགས་སྣང་གནང་བར་དགའ་བསུ་ཡོད། ཇི་ལྟར་ཤོག་བུའི་སྒོར་མོ་ཞིག་ལ་རྒྱབ་མདུན་གཉིས་ཡོད་པ་ཇི་བཞིན་༼བསམ་ཚུལ་འབུར་འཇོམས་དང་འུར་རྒྱག་པ་༽ཟེར་བ་དེ་ཤོག་སྒོར་གྱི་ངོས་གཅིག་རེད། དེ་མིན་གྱི་ངོས་གཞན་དེ་ཕྲན་གྱི་ཟིན་བྲིས་གཞན་དག་ལ་བཀོད་ཡོད་པས་དེར་གཟིགས་པར་འཚལ། ཁང་གསར་རྡོ་རྗེས་བྲེལ་སྟབས་སུ་བྲིས་ཏེ་ཕུལ།། །།
ང་ནི་ཁང་གསར་རྡོ་རྗེའི་རྩོམ་ཡིག་ཀློག་མཁན་ཞིག་ཡིན་པ་དང། ༸གོང་ས་མཆོག་གི་དགོངས་པ་བསམ་བློ་གཏོང་མཁན་ཞིག་ཡིན་པ། ད་དུང་བོད་སྤྱི་ཚོགས་ཀྱི་ཤེས་ཡོན་ཐད་ལ་སེམས་ཁྲལ་ཡོད་མཁན་ཞིག ལྷག་པར་བོད་མི་ཤེས་ཡོན་པའི་སྡེའི་བསམ་བློའི་རང་དབང་དང་སྟོབས་ཤུགས། སྒེར་ཚུགས་དང་དཔྱོད་ཤེས་བཅས་ལ་སེམས་ཁྲལ་བླ་མེད་ཡོད་མཁན་ཞིག་ཡིན།
ཁང་གསར་གྱིས་དཔྱོད་ཤེས་ཀྱི་སྒོ་ནས་དང། སྒེར་ཚུགས་ཡོད་པའི་སྒོ་ནས། རང་གི་ལྟ་བ་དེ་ཞིབ་ཚགས་ཀྱིས་བཤད་པ། ད་དུང་གང་ཟག་ལ་མི་རྟོན་ཆོས་ལ་རྟོན་ཞེས་པའི་གུ་ཡངས་ཤིང་གཏིང་ཟབ་པའི་སྒྲོམ་གཞི་ཞིག་ཕྱི་ནང་ན་གནས་ལུགས་ཀྱིས་ཤུགས་པའི་སྐད་ཆ་བཤད་པར་དགའ་ཡོད། ང་ཚོའི་སྤྱི་ཚོགས་ནང་མི་ཞིག་གིས་ལྟ་ཚུལ་གསར་བ་དང་ཁ་ཕྱོགས་གསར་བ་ཞིག་སྙེགས་འོང་དུས། དེ་ལ་རྒྱ་མིའི་སོ་ཉུལ་དང་ཆོས་ལ་མི་དགའ་མཁན། ༸གོང་ས་མཆོག་གི་ཐུགས་དང་འགལ་བའི་ངོ་ལོག་པ། བོད་གཞུང་ལ་མི་དགའ་བའི་རྒྱལ་ཚོང་བ་སོགས་ཀྱི་ཉེས་མིང་འོག་འགུལ་བསྐྱོད་རྒྱག་འཇུག་་གི་མ་རེད། དེ་བས་ནམ་ཡང་ཤེས་ཡོན་པ་ཚོ་ཨུ་ཚུགས་ཀྱིས་སྒྲོམ་གཞི་གི་ནང་ལ་བཅུགས་བཞག་ཡོད་པ་རེད། སྒྲོག་གཞི་དེའི་ཕྱི་ལོགས་ལ་ཅུང་སོང་ན་ཁ་གསུབ་བཏང་ན་གསོད་ཀི་རེད། གང་ལྟར་མདོ་དོན། ང་ཚོའི་སྤྱི་ཚོགས་ནང། བསམ་བློ་གསར་བ་དང་ཁ་ཕྱོགས་གསར་བ་གནས་སའི་ནམ་མཁའ་མི་འདུག འཆར་སྣང་དང་རང་དབང། གསར་གཏོད་ཀྱི་འོད་སྣང་འཆར་སའི་ནམ་མཁའ་མི་འདུག གང་དུ་བསམ་བློ་གསར་བ་དང་བསམ་བློའི་རང་དབང་ལ་འབུར་འཇོམ་གྱིས་གནས་ས་མེད་ན། དེ་ན་འགྱུར་བ་དང་ཡར་རྒྱས་ཟེར་བ་གཏན་ན་ཡོད་ནི་མ་རེད།
ཁང་གསར་གྱི་དཔྱོད་ཤེས་དང་སྒེར་ཚུགས། བསམ་བློ་དང་ལྟ་བ་གསར་བའི་ལྗང་མདོག་ལ་དགའ་བསུ་ཡོད།
མུ་ཏིག་ཆུང་ཆུང་གི་གསུང་སྟངས་དེ་ག་སྤྱད་དེ་ཁོ་རང་ལ་གཅིག་བཤད་ན་འདུག་སེ་རེད། མུ་ཏིག་ཆུང་ཆུང་འདི་ལ་༸རྒྱལ་བ་རིན་པོ་ཆེ་ལ་སྐྱོན་བརྗོད་བྱེད་མཁན་ཞིག་དགོས་ཀྱི་ཡོད་རེད། ཁོ་རང་ལ་དེ་འདྲའི་བློ་ཁོག་དང་ཤེས་རྒྱ་མེད་ཙང་། མི་གཞན་དག་ལ་ངར་བསླངས། ཁོག་པ་བརྒྱངས་ཏེ་མི་དེ་ཚོའི་ཁ་ནས་༸རྒྱལ་བ་རིན་པོ་ཆེ་ལ་སྐྱོན་བརྗོད་བྱེད་བཅུག ཐ་མ་དེར་ཁོ་རང་སྲུང་མ་གཙོ་བོ་བྱེད་འདོད་ཡོད་རེད།
དེ་ནས་སྒྲུང་ཐ་ཆད་དེའི་ཐད་ལ་བྲིས་ན།
སྔོན་མ་གང་ཟག་བཅུ་ཆུ་བརྒལ་བར་སོང་བ་རེད། ཆུ་དེས་ཁྱོད་ཚོ་མི་ག་ཚོད་ཡོད་ལབ་པ་རེད། དེའི་ཁྲོད་ཀྱི་གླེན་ལྐུགས་ཤིག་གིས་བཅུ་ཡོད་ལབ་པ་རེད། ཆུ་དེས་མི་དྲུག་ལས་མི་འདུག་ལབ་པ་རེད། ཚང་མས་མི་བཅུ་ཡོད་ལབ་པ་རེད། ཆུ་དེས་བཅུ་མི་འདུག ཁྱོད་ཚོའི་ནང་གི་བཞི་མི་མ་རེད། གང་ཡིན་ཟེར་ན་མིའི་ཀླད་པ་མི་འདུག་ལབ་པ་རེད། བྱས་ཙང་སྒྲུང་གི་ནང་ལ་མི་ལུས་ཐོབ་ཚད་མི་ལ་མི་བརྩི་བའི་སྐབས་ཡོད་རེད། གོ་རྒྱུ་ཅན་གྱི་སྒྲུང་འདི་འདྲ་འབྲི་བ་ལ་ཁང་གསར་རྡོ་རྗེར་ཁྱོད་ཀྱིས་དོ་གི་མ་རེད་ལོ།།
ཁྱེད་རང་གི་བཤད་སྟངས་དེ་འདྲ་ཞིག་རེད།
ཁང་གསར་རྡོ་རྗེ་དང་ལྷམ་ཀོག་ལྟ་བུའི་ཟིན་བྲིས་པ་སེམས་ཁུང་ན་ཡོད་པ་དེ་སོར་རྩེའི་ནས་བཀྲོམ་ཐུབ་པའི་སྙིང་སྟོབས་ཅན་ཁ་ཤས་ཡོད་ན་བོད་པའི་སྨྲར་བརྗོད་རང་དབང་ལ་རེ་བ་ཡོ་གི་ དངོས་གནས་ཡག་པོ་བྲིས་འདུག
Just always remember:critics need real and strong reasons.
ཁང་གསར་འདི་མི་ཁ་རུ་ཁ་ ཐུག་འཇམ་དབྱངས་ནོར་བུ་ལྟ་བུ་ཞིག་རེད། འཇམ་དབྱངས་ནོར་བུས་ཀྱང་བོད་ཡིག་ཡག་པོ་ཞིག་ཤེས་རྒྱུ་ན་འདི་འདྲ་རྐྱང་རྐྱང་ བྲིས་ཡོད་པ་གདོན་མི་ཟ། ད་དུང་འདི་ལས་ཚིག་གི་ཟུར་ཁ་རྣོ་བ་གང་མང་ཞིག་བྲིས་ཡོད་ངེས་ཅན་རེད། ཁང་གསར་ལྟ་བུ་མེད་ན་ང་ཚོ་ཡེ་ཤེས་དབྱིངས་དཔྱད་ཡར་འབུལ་ཁོ་ནའི་ཁོར་ཡུག་ཏུ་ གཉིད་དུ་ཡུར་ནས་འདུག་དགོས་ཀྱི་རེད། གོང་ས་མཆོག་གིས་དུས་བསྟུན་དམངས་གཙོའི་ལམ་སྲོལ་འདི་རང་རེའི་བཙན་བྱོལ་སྤྱི་ ཚོགས་ལག་མཐིལ་འདྲ་བོ་འདིའི་ནང་དུ་རྒྱ་གར་བའི་སྤྱི་ཚོགས་ཀྱི་འགྲོ་ལུགས་བཞིན་ ལག་ལེན་བྱེད་ཐུབ་ན་ཞེས་བཀའ་སློབ་བསྩལ་པ་བཞིན་ལག་ལེན་ཡང་གང་འཚམ་བྱེད་བཞིན་ པའི་ཁུལ་དུ་ཡོད་ཀྱང་། ཁང་གསར་བས་བརྗོད་པ་བཞིན་ད་དུང་མི་འདང་ས་གང་མང་ཡོད་པ་ནི་དངོས་ཡོད་གནས་ཚུལ་ རེད། གོང་ས་མཆོག་གི་ཕྱག་ལས་གནང་བ་ཚང་མ་ཡེ་ཤེས་དབྱིངས་དཔྱད་(ཁོང་གིས་མི་གནང་ཀ་མེད་བྱུང་བའི་གནས་ཚུལ་གང་མང་ཡོད།)ཡིན་པའི་ངེས་པ་མེད་ཅིང་། གལ་སྲིད་ཡིན་ན་ཡང་དམངས་གཙོའི་འགྲོ་ལུགས་བཞིན་དང་ནང་པའི་སྲེག་བཅད་བརྡར་བའི་ གསེར་གྱི་ལུང་འདྲེན་དེའི་ལུགས་སུ་བྱས་ན་ཁོང་གི་ཡེ་ཤེས་དབྱིངས་དོན་ཐོག་ཏུ་ འབེབ་པ་ལ་ཡང་མང་ཚོགས་ཀྱི་གཏི་མུག་མུན་དཔྱད་ཀྱི་འགག་འཕྲང་ཞིག་མ་བརྒྱུད་ཐབས་ མེད་ཡིན་པ་ནི་ང་ཚོ་ཀླད་ལྡིབ་བྱུང་མེད་པ་ཚོས་ལོས་ཀྱང་ཤེས།
མཆན་ཐེངས་ཁ་ཤས་བྲིས་ཀྱང་ཡར་འཛུལ་རོགས་བྱེད་ཀྱི་མི་འདུག མཆན་གྱི་དོན་དག་ཁ་ཤས་ཁང་རྡོར་ལགས་ཀྱི་མཆན་གཉིས་པའི་ནང་བརྗོད་ཟིན་འདུག ལྔ་བཅུ་ང་དགུ་ལོའི་གོང་དུ་སངས་རྒྱས་བསྟན་པ་ཁ་ལ་ཁྱེར་ནས་ལས་དོན་གསར་པ་ཚང་མ་འབུར་འཇོམས་བྱས་ཟིན་པ་རེད། ད་ལྟ་གཞིས་བྱེས་གཉིས་ཀས་དེའི་འབྲས་བུ་མྱོང་བཞིན་ཡོད། ད་ལྟ་༧གོང་ས་མཆོག་གི་དགོངས་པ་ཁ་ལ་ཁྱེར་ནས་བསམ་ཚུལ་གསར་པ་འབུར་འཇོམས་མ་བྱེད་རོགས། ༧གོང་ས་མཆོག་སྐུ་མ་བཞུགས་པའི་ཉིན་མོ་དེ་ནས་ང་ཚོས་ཅི་ཡང་མི་ཐུབ་པ་ཞིག་གི་ཉེན་ཁ་འདུག བཀྲ་ཤིས་པའི་སྐད་ཆ་མ་ཡིན་ཡང་། དངོས་ཡོད་ཀྱི་གནས་ཚུལ་རེད།
ཆད་གསུབ། གནའ་སྔ་མོར་མི་བཅུ་གོམ་པ་བརྒྱབ་ནས་ལྷ་སར་མཇལ་དུ་འགྲོ་སྐབས། ཆུ་ཆེན་པོ་རེ་བརྒལ་བ་དང་མི་བཅུ་ཚང་ཡོད་མེད་བརྩིས་བརྒྱག་བཞིན་སོང་བ་རེད། ཐེངས་གཅིག་མི་གླེན་ཤོས་དེས་གྲངས་ཀ་བརྒྱག་སྐབས་ཁོ་རང་གྲངས་ཀའི་ནང་བརྩི་མ་ཤེས་པར། མི་བཅུ་ཚང་མི་འདུག་ཟེར་ནས་འདྲོགས་ལངས་པ་རེད།
ཁང་སར་ལགས་ཀྱིས་སྐད་ཆའི་ཡང་སྙིང་༧རྒྱལ་བ་རིན་པོ་ཆེ་ལ་སྐྱོན་བརྗོད་བྱེད་རྒྱུའི་ཐོབ་ཐང་དགོས་ཟེར་བ་དེ་རེད། ཁོ་རང་གིས་དབང་བོ་ལྔ་བོའི་ནུས་པ་ཡོད་ཚད་སྤྱད་ནས་༧རྒྱལ་བ་སྐུ་ཕྲེང་ལ་སྐྱོན་བརྗོད་དང་ཟུར་ཟའི་རྩོམ་ཡིག་ནར་རེ་སྤེལ་བཞིན་དུ། ད་དུང་བོད་པའི་སྤྱི་ཚོགས་ནང་༧རྒྱལ་བ་རིན་པོ་ཆེར་སྐྱོན་བརྗོད་བྱེད་འཇུག་གི་མི་འདུག་ཟེར་བའི་བྱེད་སྟངས་འདི་བཤད་ཤེས་མ་སོང་།
གནའ་སྔ་མོར་མི་བཅུ་གོམ་པ་བརྒྱབ་ནས་ལྷ་སར་མཇལ་དུ་འགྲོ་སྐབས། ཆུ་ཆེན་པོ་རེ་བརྒལ་བ་མི་བཅུ་ཚང་ཡོད་མེད་བརྩིས་བརྒྱག་བཞིན་སོང་བ་རེད། ཐེངས་གཅིག་མི་གླེན་ཤོས་དེས་གྲངས་ཀ་བརྒྱག་སྐབས་ཁོ་རང་གྲངས་ཀའི་ནང་བརྩི་མ་ཤེས་པར། མི་བཅུ་ཚང་མི་འདུག་ཟེར་ནས་འདྲོགས་ལངས་པ་རེད།
གླེན་སྒྲུང་དེ་དང་འདྲ་བར་ཁང་སར་གྱིས་རང་དབང་ལྡན་པའི་ཐོག་ནས་“རྒྱལ་བ་རིན་པོ་ཆེའི་སྲུང་མ་དང་འབུར་འཇོམས་”སོགས་༧རྒྱལ་བ་རིན་པོ་ཆེར་སྐྱོན་བརྗོད་དང་ཟུར་ཟའི་ཟིན་བྲིས་ནར་རེ་འབྲི་བཞིན་དུ། ད་དུང་༧གོང་ས་མཆོག་ལ་སྐྱོན་བརྗོད་བྱེད་ཆོག་གི་མི་འདུག་ཟེར་ནས་སྐད་བརྒྱག་བཞིན་པ་དགོད་སྤྱད་རེད། ཁྱེད་ཀྱི་རྩོམ་ཡིག་འདི་དག་སྐྱོན་བརྗོད་ཀྱི་ནང་དུ་བརྩི་རྒྱུ་བརྗེད་སོང་བ་མ་རེད་དམ། ངས་བསམ་པར་ཁྱེད་ཀྱི་ཟིན་བྲིས་འདི་གཅིག་པོས་བོད་པའི་སྤྱི་ཚོགས་ནང་༧གོང་ས་མཆོག་ལ་སྐྱོན་བརྗོད་བྱེད་ཆོག་པ་མ་ཟད། སྐྱོན་བརྗོད་དང་ཟུར་ཟ་ནར་རེ་བྱེད་ཀྱི་ཡོད་པའི་དཔང་རྟགས་འདང་ངེས་རེད་མི་འདུག་གམ། འོན་ཀྱང་སྐྱོན་བརྗོད་བྱེད་མཁན་གྱིས་སྐྱོན་བརྗོད་བྱེད་ཤེས་ཀྱི་མི་འདུག
ཡང་སྙིང་ཁྱེད་ཀྱིས་༧གོང་མཆོག་ལ་སྐྱོན་བརྗོད་བྱེད་དུ་འཇུག་དགོས་ཟེར་ནས་དོན་མེད་ཀྱི་ཀུ་ཅོ་འདི་འདྲ་བཏོན་བསྡད་པ་ལས། ༧གོང་ས་མཆོག་གིས་འདི་དང་འདི་ན་འཇོན་གི་མི་འདུག་དང་། འདི་དང་དེ་ན་ཁོང་ནོར་འདུག་ཟེར་ནས། སྐོར་བ་མང་པོ་མ་བརྒྱབ་པར་ཐད་ཀར་ཁོང་གི་ནོར་འཁྲུལ་ལ་མཛུབ་མོ་བཙུགས་ནས་གསལ་བཤད་བྱས་ན་ཡག་པོ་རེད། དེ་མིན་དེང་སང་༧རྒྱལ་བ་རིན་པོ་ཆེར་སྐྱོན་བཤད་མི་ཆོག་པ་ག་རེ་རེད་ཟེར་ནས་ངར་ངར་བྱེད་སྟངས་འདི་དཔེ་གསར་འདྲ་བོ་ཆགས་འདུག་ཀྱང་། མི་ཞིག་ལ་སྐྱོན་མེད་ན་ངེས་པར་དུ་སྐྱོན་བརྗོད་བྱེད་ཆོག་དགོས་ཟེར་ནས་སྐྱོན་བརྗོད་པར་རྒྱུ་མཚན་མ་མཐོང་། སྐྱོན་ཡོད་ན་སྐྱོན་ཁོ་རང་ལ་འཇུས་དམར་རྗེན་མར་བཤད་དགོས་པ་ལས། དེ་མིན་དང་པོ་སྐྱོན་བརྗོད་བྱེད་དུ་འཇུག་དགོས་ཟེར་ནས་ཐོབ་ཐང་བརྩད་དེ་བོད་ཀྱི་སྤྱི་ཚོགས་ཀྱི་དབུས་སུ་གོང་ས་མཆོག་ལ་སྐྱོན་བརྗོད་བྱེད་སའི་སྡིངས་ཆ་ཆེན་པོ་བསྐྲུན་གྲུབ་རྗེས། གཞི་ནས་སྡིངས་ཆ་དེའི་སྒང་ལ་འཛེག་ནས་༧གོང་ས་མཆོག་ལ་སྐྱོན་བརྗོད་བྱེད་འདོད་པ་ལྟ་བ་ཡག་པོ་མ་རེད།
མཐའ་མ་ཁང་སར་བཤད་རྒྱུར། ཐེངས་རྗེས་མར་༧གོང་ས་མཆོག་ལ་སྐྱོན་བརྗོད་བྱེད་དུ་འཇུག་དགོས་མདོག་མདོག་གི་ཉོག་རྩོམ་འདི་འདྲ་མི་འབྲི་བར། ཐད་ཀར་༧གོང་མཆོག་གི་དབུ་མའི་ལམ་ལྟ་བུ་གང་ལྟར་ཁོང་གི་དགོངས་གཞི་བྱེ་བྲག་པ་གང་ཞིག་ལ་འདོད་པ་དང་ངོས་ལེན་མེད་ན། འདོད་པ་མེད་སའི་དགོངས་པ་དེ་རང་དཔྱད་གཞིར་བཞག་ནས་རྒྱུ་མཚན་དང་རིག་པ་ཡང་དག་པ་སྤྱད་ནས་ཁོང་གི་ཞན་ཆ་དང་ནོར་འཁྲུལ་གསལ་འདོན་བྱས་པའི་ཟིན་བྲིས་དོན་སྙིང་ཅན་འདྲ་སྤེལ་ཐུབ་ན་མུ་མཐུད་ཁ་བརྡ་ཡོད།
ད་དུང་ཁྱེད་གནད་དོན་ག་རེའི་སྒང་ལ་འདོད་པ་མེད་པ་གསལ་བོར་བཤད་མི་འདུག ཉིན་འདི་དག་ལ་ཁྱེད་ཀྱི་༧གོང་ས་མཆོག་ལ་སྐྱོན་བརྗོད་བྱེད་སའི་སྡིངས་ཆ་བསྐྲུན་བཞིན་པའི་སྐབས་རེད། དེ་ལྟར་ཆུ་ཚོད་འཕྲོ་བརླག་ཏུ་བཏང་བ་ལས་དང་པོ་ནས་སྐྱོན་བརྗོད་དངོས་གཞི་དེ་ག་རེ་ཡིན་མིན་བཤད་ན་གོ་བདེ། ཁ་སངས་ན་གོ་བདེ་ཟེར་བ་མ་རེད་དམ།
ཁང་གསར་རྡོ་རྗེས། ༸རྒྱལ་མཆོག་ལྔ་བ་ལ་སྲིད་ཕྱོགས་ཀྱི་སྐྱོན་བརྗོད་བྱས་པ་ནི། ཀུན་དང་མི་མཐུན་ལ་མི་ཁྱོད་ལ་བོད་ཞེན་ཞན་པའི་རྟགས་རེད།
འདས་པའི་ཞན་ཆ་ལ་ཁོང་ར་གཏོང་། སོང་ཉིན་ཕན་ཆོད་དུ་གང་ལེགས་ཀྱི་གྲོས་བསྡུར་གང་ཡང་མེད་པའི་ཀླད་སྟོང་མི་ཁྱམས་སྣ་མེད་རྣམས་ཀྱིས་བྲིས་པའི་ཟིན་བྲིས་དང་དཔྱད་རྩོམ་ལ་བལྟ་ཁོམས་བྱུང་མ་སོང་།
ང་རང་ཚོ་བཙན་བྱོལ་གསར་ཚར་རྣམས་ལ་རང་དབང་ཡོད། རྒྱབ་སྐྱོར་ཡོད། རང་རང་སོ་སོས་འཇོན་ན་ས་དམིགས་ག་འགའ་ཡོད་ཀྱང་། སོ་སོའི་གཟའ་བཏུང་ཆེད་དུ་མགོ་འཁོར་ནས་རྒྱ་གར་གཞུང་གིས་གོ་སྐབས་སྤྲད་པའི་གཙུག་ལག་སློབ་གྲྭ་ཆེན་མོའི་ས་དམིགས་སྐང་མཁན་རྒྱ་གར་བ་གཏོང་དགོས་ཀྱི་ཡོད་པ་འདི་ལ་ཞིབ་བལྟ་ཞིག་གྱིས་དང་། འདས་པའི་མིས་མ་འཇོན་པའི་རྒྱུ་མཚན་གྱིས་རེད་འདུག་གམ། བོད་མི་རང་ལ་རྣམ་དཔྱོད་དང་བརྩོན་འགྲུས། སྤོབ་པ་སོགས་རང་བཞིན་གྱིས་ཞན་པའི་ཆ་ཡོད་པའི་རྒྱུ་མཚན་གྱིས་རེད་མི་འདུག་གམ འདས་པ་ལ་ཁང་ར་བྱེད་ཐུབ་པའི་རྣམ་དཔྱོད་པ་ལས། ད་ཡར་རྒྱས་གང་འདྲ་བྱེད་ནས་གཏོང་དགོས་ཀྱི་ཡོད་མིན་དཔྱད་ཐུབ་ན་ལེགས།
ད་བསམ་ཚུལ་འདི་ཚོ་ལ་ག་རེ་བཤད་དགོས་རེད། དངོས་གནས་ཡག་པོ་རང་ཤེས་ཀི་མི་འདུག
༡༽ ༸རྒྱལ་བ་རིན་པོ་ཆེ་སྐུ་ཕྲེང་རིམ་བྱོན་གྱིས་དགོན་པ་བཙུགས་པ་དེ་བྲིས་མི་འདུག་གསུངས་འདུག དེ་འབྲི་དགོས་པའི་གནད་དོན་ཞིག་ལ་ཐུག་མ་སོང་། ཆེད་དུ་མ་བྲིས་པ་དེ་འདྲ་མ་རེད། དགོན་པས་སློབ་གྲྭའི་གོ་ཆོད་ཀྱི་ཡོད་ན། བཙན་བྱོལ་ནང་ལ་ཕེབས་རྗེས་སློབ་གྲྭ་ཟུར་དུ་འཛུགས་དགོས་དོན་མི་འདུག
༢༽ ཡེ་ཤེས་དབྱིངས་དཔྱད་ཐོག་ལ་བབས་པར་སྐྱོན་ག་རེ་བྱུང་འདུག་གསུངས་འདུག ད་བསམ་ཚུལ་འདྲ་མ་འདྲ་ཡོད་ན། མ་འོངས་པར་བྱ་ལམ་བྱེད་བདེའི་འཆར་གཞི་འཁྱེར་ཤོག་གསུངས་ན་འགྲིག་གི་རེད། འགྲིག་གི་མི་འདུག་ན། དགོངས་པ་ཞུ་གི་ཡིན། ཁྱེད་རང་ཚོས་འགན་ཆ་ཚང་ལེན་དགོས་རེད་གསུངས་པ་དེ་ཡག་པོ་རང་མཐོང་མ་སོང་དྲན་གྱི་འདུག དེའི་ནང་ཕྲན་བུའི་བཙན་ཤེད་ཀྱི་རྣམ་པ་འདུག
སྤྱིར་བཏང་དེང་གི་གནས་སྟངས་ཐོག་ནས་བལྟས་ན། ཡེ་ཤེས་དབྱིངས་དཔྱད་ཐོག་ལ་བབས་ན་ཁེ་ཕན་ཆེ་ཤོས་ཡིན་པ་དེར་མོས་མཐུན་བྱེད་ཀྱི་ཡོད། དེའི་ཐད་དགོས་མཁོ་བྱུང་ན་ཟིན་བྲིས་གཞན་ཞིག་སྤེལ་ན་དྲན་བཞིན་ཡོད།
༣༽ ཤེལ་དཀར་བློ་བཟང་གི་སྙིང་ཚིམ་བྱེད་སྟངས་དེ་མཐོང་དུས། མི་ལ་རས་པའི་ཨ་མ་གྲོང་གསེབ་མ་དེ་མཐོང་ཡོང་གི་འདུག ཕར་དཀྱོག་ཚུར་དཀྱོག་བྱས་ཆོག་ཆོག་རེད། འདི་ནས་མི་རིང་བའི་ཉིན་གཅིག་ཁྱོད་ཀྱིས་ངའི་ལྟ་ཚུལ་ལ་མཐེ་བོང་ཀེར་ནས་བསྔགས་བརྗོད་བྱེད་ངེས་རེད། དེར་བརྟེན་མི་འདི་ཚོས་བསྟོད་པ་འཐེན་ན་དགའ་དགོས་དོན་མེད་ལ། དམའ་འབེབས་བྱས་ན་སྡུག་དགོས་དོན་ཡང་མེད།
ང་ལ་དམའ་འབེབས་ཅི་ཙམ་བྱེད་འདོད་པ་དེ་ཙམ་གནང་རོགས། ངས་དེ་ཚོ་ལ་སེམས་འཛིན་བྱེད་ཀྱི་མ་རེད། དྲྭ་ལམ་ལ་དམག་བརྒྱབ་དྲག་ནས་ད་ནི་གོམས་ཚར་འདུག དེར་བརྟེན་ཁྱེད་རང་ཚོའི་སྡང་སེམས་ཀྱི་རླུང་དེ་ཞི་ཐུབ་ཀྱི་འདུག་ན། ངའི་ཐོག་ལ་ངར་ཤོག་ལོ།
༤༽ གསལ་པོ་བཟོ་དགོས་པ་ཞིག་ལ། ངའི་སྐད་ཆའི་ནང་《༸རྒྱལ་བ་སྐུ་ཕྲེང་ལྔ་པ་ནས་བརྩིས་པའི་བོད་ཀྱི་དབུ་ཁྲིད་དང་ལས་སྣེ་ཚོས། བསམ་བཞིན་དུའང་བསམ་བཞིན་མ་ཡིན་པར། བོད་མི་དམངས་རྣམས་མུན་འཐོམ་དུ་བཞག་པ་དང་འབྲེལ་བ་ཡོད་པ་དེ་ཡང་དོན་དངོས་རེད། མདོར་བསྡུས་ནས་བཤད་ན། ༡༩༥༩ གོང་དུ་༸རྒྱལ་བ་རིན་པོ་ཆེས་དབུ་འཁྲིད་པའི་བོད་གཞུང་དགའ་ལྡན་ཕོ་བྲང་གིས་བོད་མི་དཀྱུས་མ་ཚོ་ལ་ཕན་པའི་སློབ་གྲྭ་ག་ཚོད་བཙུགས་འདུག་གམ། འདི་གཅིག་པུ་ལ་བསམ་བློ་བཏང་ན་ཤེས།》ཞེས་བཤད་ཡོད། འདིའི་ནང་ལ་མང་པོ་ཞིག་ཚུད་ཡོད། འོན་ཀྱང་ཁྱེད་ཅག་གིས་དགག་ཡོང་དུས་འདིའི་ནང་ནས་༸རྒྱལ་བ་རིན་པོ་ཆེ་གཅིག་པུ་བཏོན་ཡོང་སྟེ་བཤད་ཀྱི་འདུག འདིས་ག་རེ་བསྟན་གྱིན་ཡོད་རེད། ངས་བཤད་པ་དེ་འགྲིག་པ་བསྟན་པ་རེད། བཟང་བཟང་བླ་མ་དང་ངན་ངན་མང་ཚོགས་ཡིན་ཤག་སུ་བརྩིས་སྟབས། ད་ངར་ཡོང་གི་ཡོད་རེད།
༥༽ ༸རྒྱལ་བ་སྐུ་ཕྲེང་བཅུ་གསུམ་པས་ཡུན་ཐུང་ཞིག་ལ་དབྱིན་ཇིའི་སློབ་གྲྭ་བཙུགས་པ་རེད། དབྱིན་ཡུལ་དུའང་སློབ་ཕྲུག་ཁ་ཤས་བཏང་བ་རེད། རྒྱ་གར་ལའང་ཁ་ཤས་བཏང་བ་རེད། འོན་ཀྱང་ཁོང་གི་སྲུང་མར་རློམ་ཡང་རྗེས་དཔག་གི་ཡོན་ཏན་ཡང་མེད་པ་དེ་ཚོས་མཚམས་བཅད་བཅུག་པ་རེད། སྒོ་བརྒྱབ་པ་རེད། སྲུང་མ་ངན་པ་དེ་ཚོ་སླེབས་དུས། སྤྱན་རས་གཟིགས་ཕྱག་སྟོང་སྤྱན་སྟོང་ཡང་སྐབས་རེ་ནུས་པ་མེད་པ་འདྲ་བོ་བཟོ་གི་འདུག ད་དུང་ཡང་མི་བཟོ་བའི་ངེས་པ་མེད།
༦༽ ཟ་ལེ་རྒྱལ་འདི་སྙན་ངག་པ་རྗེས་དཔག་གི་ནུས་པ་ལྡན་པ་ཞིག་རེད། སྐད་ཆ་ལ་འཇུ་ས་དང་གོ་རྒྱུ་འདུག
ད་ཆ་ལེ་ཆོ་ལེ་བྲིས་ཡོང་ན་ལན་རྒྱག་གི་མིན། དོན་ངོ་མའི་བགྲོ་གླེང་གི་བསམ་འཆར་བྱུང་ན་ལན་བཏབ་ཆོག ལན་མ་བཏབ་པ་དེ་མཐོང་ཆུང་བྱས་པ་མིན། བཤད་ཟིན་པ་ཞིག་བསྐྱར་བཤད་ཡང་བཤད་ཀྱི་དགོས་པ་མ་མཐོང་བས་ཡིན།
འོན་ཀྱང་བཟང་ངན་ག་རེ་བྲིས་ཀྱང་ཐེངས་རེ་ཀློག་གི་ཡིན།
རྒྱལ་དབང་སྐུ་འཕྲེང་ན་རིམ་གྱིས་དགོན་པ་མང་བོ་བཙུག་ཡོད་པ་འབྲི་རྒྱུ་ལུས་འདུག། དགོན་པ་དེ་དག་གི་ནང་ནས། བོད་སྤྱི་ཚོགས་ལ་ཕན་ཐོག་པའི་མཁས་པ་བྱུང་ཡོད་པ་མ་ཟད། ནང་ཆོས་ཀྱི་མཚན་ཉིད་རིག་པ། ནང་ཆོས་ཀྱི་ཚན་རིག་སོགས་ཀྱི་མ་ལག་ཡར་རྒྱས་བཏངས་བས་བཀའ་དྲིན་ལ་བརྟེན་ནས། བོད་ཀྱི་རིག་གནས་ལ་མཐོང་ཆེན་བྱེད་མཁན་ཤིན་དུ་མང་བ་བཤད་རྒྱུ་ལུས་འདུག
ལས་ཀ་ལ་ཡོད་པས་མི་ཁོམ།
སོ་སོའི་ལྟ་ཚུལ་ཁ་གསལ་པོ་དང་བློ་ཁོག་ཆེན་པོས་བྲིས་འདུག གོ་རྒྱུ་ཡང་ཆེན་པོ་འདུག བསམས་དགོས་པ་ཡང་མང་པོ་འདུག
དོན་དག་རྡོག་རྡོག་ཡེ་ཤེས་དབྱིངས་དཔྱད་ཀྱི་ཐོག་ལ་བབས་ཟིན་པ་རེད། བོད་མི་མང་སྤྱི་འཐུས་ཀྱིས་རང་དབང་ཐོག་ནས་ཐག་བཅད་པ་རེད། བཀའ་ཤག་དང་རྒྱལ་བ་རིན་པོ་ཆེས་སྤྱི་འཐུས་ལ་དབང་ཆ་གནང་ཡང་། ཁོང་ཚོས་རང་འཇགས་ཡར་ཕུལ་བ་རེད། དེའི་བརྒྱུད་རིམ་ལ་སྐྱོན་ག་རེ་འདུག མ་འགྲིགས་པ་ཅི་བྱུང་སོང་། རྩོད་གཞི་གཙོ་བོ་འདི་རེད། དེ་ལ་གསལ་བཤད་གནང་རོགས།
དེ་སྔོན་ཁང་གསར་ཁྱོད་ཀྱིས་རང་གི་ཤ་ལས་མཆེད་པའི་ཕྲུ་གུས་རང་ཉིད་བཙོན་ཁང་ལ་བཅུག་པའི་ཟིན་བྲིས་མཐོང་སྐབས་སུ། ཁྱོད་ལ་སྙིང་རྗེ་དང་ཁྱེད་ཀྱི་བུ་ལ་སྡང་སེམས་སྐྱེས་མྱོང་ཡོད། འོན་ཀྱང་ད་ཆ་ཁྱོད་ཀྱི་ཁ་ལ་གཞིགས་ན་འདི་འདྲ་ཞིག་མ་བྱེད་ཐབས་མེད་ཆགས་པ་འདྲ། བུ་ཁྱོད་ཁག་མི་འདུག
ཁང་གསར་རྡོ་རྗེ་ལགས། ༧རྒྱལ་བ་ལྔ་པ་དང་། དྲུག་པ། བདུན་པ་བཅས་ཀྱིས་སློབ་གྲ་མ་བཙུགས་པ་སོགས་མ་འགྲིགས་མ་འཐུས་མང་པོ་གསུངས་འདུག་ཀྱང་། ༧རྒྱལ་བ་སྐུ་ཕྲེང་བཅུ་གསུམ་པ་ཆེན་པོས་སྐུ་སྒེར་དང་། བོད་གཞུང་ནས་འགྲོ་སོང་ནར་གཏོང་གིས་སྨན་རྩིས་ཁང་སོགས་བོད་རྒྱ་ཁྱབ་ལ་སློབ་གྲ་བཙུགས་པས་མ་ཚད། བོད་དེ་འཛམ་གླིང་ཕྱི་ལ་སྒོ་མོ་ཕྱེ་ཐབས་དང་། དེང་དུས་ཅན་དུ་བསྒྱུར་རྒྱུའི་ཆེད་དུ་དབྱིན་ཇི་དང་འབྲེལ་བ་གནང་སྟེ་དབྱིན་ཇིའི་སློབ་གྲ་བཙུགས་པ་སྒོ་རྒྱབ་བཅུགས་ཏེ་༧རྒྱལ་བ་རིན་པོ་ཆེའི་དགོངས་པར་ཡོད་པ་ལམ་ལྷོངས་བཏང་མེད་པའི་སྐོར་གསུངས་རྒྱུ་ལུས་འདུག་ག།
བསམ་བློ་གསར་བ་རེ་འེ་ཡོད་བསམ་སྟེ་ཚང་མ་ཞུབ་དུ་ཀློག་པ་ཡིན། འཚམ་རེ་ཀླད་པ་བེད་སྤྱོད་བྱས་ནས་བདེན་པ་འདྲ་བོ་རེ་བྲིས་འདུག་མོད། འོན་གྱང་ནང་འགལ་མང་དྲག་པས་རྐྱེན་གྱིས། ཕན་ཐོག་པ་གཅིག་ལེན་རྒྱུ་ཞིག་རེག་མ་སོང་།
མཚམས་མཚམས་ཡིན་པའི་བཟོ་འདྲ་བོ། མཚམས་མཚམས་མིན་པའི་བཟོ་འདྲ་བོ།
༧གོང་ས་མཆོག་གི་སྲུང་མ་འདི་དག་གིས་དགྲ་གྲོགས་གཉིས་ཀ་ཐག་རིང་ནས་བཀག་ཏེ་སྐུའི་བདེ་སྲུང་གི་ནུས་བར་འབད་པ་བྱེད་ཀྱིན་འདུག ང་རང་ཆབ་སྲིད་མི་ཤེས་བའི་ལྟད་མོ་ཞིག་ཡིན་ནའང་༧སྐུའི་བདེ་སྲུང་གི་འགན་འཁུར་དེ་ང་ལའང་ཡོད་པས་ངས་ཞིབ་ལྟ་བྱས་བ་ཡིན། ཁང་གསར་རྡོ་རྗེ་འདི་འདྲེ་ཞིག་རེད་ཅེས་སྲུང་མ་ལ་ལས་སྐད་འབོད་བྱེད་མོད། ངས་བལྟས་ན་འདྲེ་ཞིག་ཡིན་ནའང་གདོན་འདྲེ་ཞིག་མིན་པ་འདྲ།
མི་ཁ་གཅིག་གིས་སོ་སོས་ཉེན་རྟོགས་པ་ཡིན་པ་ནང་བཞིན་གང་ཟག་ལ་འདྲི་བརྩད་གནང་གི་འདུག་པ་འདི་མི་འཛེས་ དེ་ལྟར་མ་ཡིན་པ་བསམ་ཚུལ་ལ་བགྲོ་གླེང་གནང་རོགས།
ཁང་གསར་ལགས་དང་ ལྷམ་ཀོག་འདི་གཉིས་བློ་གྲོས་ཆེ་ལ་རང་གི་མི་རིག་ལ་ཤ་ཚའི་སྐད་ཆ་ཤོད་བཞིན་འདུག་པ་འདྲ་པོ་འདུག་ འོན་ཀྱང་སྐད་ཆ་ ཆ་ཤས་ཙམ་གླེང་བ་ལས་དོན་ཧྲིལ་གྱིས་བསྒྲིལ་ནས་ འདི་བྱེད་ན་འདི་ཡོང་ འདི་མ་བྱེད་འདི་མི་ཡོང་ ཞེས་ཐག་གཅོད་ཀྱི་མི་འདུག་ དཔེར་ན་ཁོང་གིས་རང་ཉིད༸རྒྱལ་བ་རིན་པོ་ཆེའི་དགོངས་པ་སྲུང་སྐྱོབས་དང་དར་སྤེལ་གཏོང་མཁན་གྱི་སྲུང་མ་ཡིན་དྲན་བཞིན་ཡོད། ཞེས གསུངས་ཡ་འདི་ ༸རྒྱལ་བ་རིན་པོ་ཆེའི་དགོངས་པ་སྲུང་སྐྱོབས་དང་དར་སྤེལ་གཏོང་མཁན་གྱི་སྲུང་མ་མ་བྱེད་
སྲུང་མ་བྱེད་ན་ཉེས་པ་འདི་ཡོད་རེད་ སྲུང་མ་མ་བྱེད་ན་ཕན་ཐོགས་འདི་ཡོ་རེད་ཅེས་ཁ་གསལ་པོ་མེད་པ་ལྟ་བུ་རེད། འདི་འདྲ་རེད་མི་འདུག་པས?
ད་ལྟ་འདི་གར་ཞོགས་པའི་ཆུ་ཚོད་དྲུག་པ་ཡོལ་ཙམ་རེད། ཡར་ལངས་པ་དང་ཐོག་མར་དུས་བབ་ཀྱི་དྲྭ་རྒྱར་བལྟས་པ་ཡིན། ངའི་རྩོམ་ཡིག་དེ་རྩོམ་སྒྲིག་པས་དུས་ཐོག་སྤེལ་འདུག་ལ། དེའི་མཇུག་ཏུ་མཆན་གསུམ་ཅུ་བཀོད་འདུག མཆན་དེ་ཚོར་ཁ་ཡ་བྱས་ན་ལེགས་སམ་མ་བྱས་ན་ལེགས་ཞེས་བསམ་བློ་བཏང་། ཐ་མ་རང་གི་རྩོམ་ཞིག་འདི་ལྟར་དྲྭ་ཐོག་ཏུ་སྤེལ་རྗེས་བསམ་ཚུལ་བྱུང་བ་རྣམས་བཀླགས་པའི་བརྡ་ཙམ་མ་བསྟན་ན་མི་འཚམས་དྲན།
མཆན་རྣམས་སྡེ་ཚན་ལ་དགར་ན། ཡག་པོ་བྲིས་འདུག་ཟེར་མཁན་དང་ཡག་པོ་བྲིས་མི་འདུག་ཟེར་མཁན་བཅས་རྩ་བའི་རིགས་གཉིས་རེད་འདུག ཡག་པོ་བྲིས་འདུག་གསུང་མཁན་ཚོར་ད་ལྟ་ངས་གང་ཡང་ཞུ་གི་མིན།
ཡག་པོ་བྲིས་མི་འདུག་ཟེར་མཁན་ཚོའི་ནང་ལ། ༡༽ དོན་དངོས་རེད་དེ་རྣ་བར་འགྲོ་གི་མི་འདུག་ཟེར་བ་དང་། ༢༽ ཁང་གསར་རྡོ་རྗེ་མི་རྫུན་མ་རེད། དོགས་པ་ཡོད། ༣༽ གཞན་ལ་བལྟ་བའི་མིག་ཡོད་ཀྱང་རང་ཉིད་བལྟ་ན་མེ་ལོང་དགོས་ཟེར་བ། ༤༽ ༸རྒྱལ་མཆོག་རིམ་པས་ཡག་པོ་གནང་བ་རེད། ཡག་པོ་མ་བྱེད་མཁན་དགའ་ལྡན་ཕོ་བྲང་རེད། དགའ་ལྡན་ཕོ་བྲང་གིས་༸རྒྱལ་བ་སྐུ་ཕྲེང་རིམ་བྱོན་ནང་ནས་མང་པོ་ཞིག་ལ་སྡུག་པོ་བཏང་བ་རེད། ༥༽ ཁང་གསར་ཁྱོད་ཀྱིས་ག་རེ་འཇོན་བཞག་བཅས་གཙོ་བོ་དེ་ཙམ་རེད།
༡༽ དོན་དངོས་རེད་དེ་རྣ་བར་འགྲོ་གི་མི་འདུག་ཟེར་བ་དེ་བཤད་སྟངས་ཁྱད་མཚར་རེད་དེ་སྐད་ཆ་དྲང་པོ་རེད། རང་གིས་ཡིད་ཆེས་དང་དད་གུས་ཡོད་ས་ཞིག་ལ་དེ་འདྲ་བཤད་ན་དོན་དངོས་ཡིན་ཡང་རྣ་བར་མི་འགྲོ་བ་འདི་རང་རེ་ཚང་མར་ཡང་ཡང་འབྱུང་གི་འདུག ང་རང་རྒྱ་མི་དང་ཡང་ཡང་ཐུག་གི་ཡོད། ཁོང་ཚོས་བོད་དང་༸རྒྱལ་བ་རིན་པོ་ཆེའི་སྐོར་ལ་དོན་དངོས་དང་འབྲེལ་ལ་ངའི་རྣ་བར་མི་འགྲོ་བ་མང་པོ་བཤད་ཡོང་གི་འདུག དེ་ཚོར་ཡུན་རིང་ཨུ་ཚུགས་བརྒྱབ་སྟེ་དགག་པ་རྒྱག་པའམ་གསལ་བཤད་བྱས་རྗེས། ད་ངས་ག་རེ་བྱེད་ཀི་ཡོད་རེད། དོན་དངོས་ཁས་ལེན་པའི་བློ་སྟོབས་མི་འདུག་དྲན་ཡོང་གི་འདུག ཁྱེད་རང་གི་གནས་སྟངས་ཀྱང་དེ་རང་རེད། ངས་འདིར་བཤད་ཀི་ཡོད་པ་དེ་ཕྱི་ལ་མ་རེད་ནང་ལ་རེད། ང་རང་ཚོ་ནང་ཁུལ་བློ་སྐྱེད་ཅིག་བྱུང་ན་སྙམ་པ་ཙམ་ཡིན།
༢༽ ཁང་གསར་རྡོ་རྗེ་མི་རྫུན་མ་རེད། དོགས་པ་ཡོད་ཅེས་པ་དེ་ལ་ངས་མང་པོ་བཤད་ཀི་མིན། ང་རང་བོད་དབུས་སྟོད་ལུང་སྐྱར་པོ་རྩེ་ཁང་གསར་གྱི་བུ་བཞི་པ་རྡོ་རྗེ་ཡིན། དབུས་གཙང་ཕྱོགས་ལ་ཆ་རྒྱུས་ཅུང་ཟད་ཡོད་མཁན་ཞིག་ཡིན་ན་མི་ཚང་འདིའི་སྐོར་དྲིས་དང་མ་ཤེས་མཁན་ཉུང་ཉུང་རེད། ད་ལྟ་ཊོ་རོན་ཊོ་ལ་ཡོད། ཁེ་ཎ་ཊ་ལ་ཡོད་པའི་ལྡུམ་ཁང་ཕུན་ཚོགས་དང་དེ་མིན་འཕན་ཡུལ་འབྱོར་ལྡན་ཁང་གསར་བའི་མི་ངོ་འཚོ་བཞུགས་ཡོད་པ་དེ་ཚོར་སྐད་ཆ་དྲིས། ང་འདིར་གསོན་པོར་ཡར་འགྲོ་མར་འགྲོ་བྱས་ནས་བསྡད་ཡོད། ཁྲིམས་ལ་གཏུགས་ཀྱི་ཡིན་ནའང་གཏུགས་ཤོག ངས་ཁྲིམས་ཁང་ལ་ཡོང་ཆོག
༣༽ གཞན་ལ་བལྟ་བའི་མིག་ཡོད་ཀྱང་རང་ཉིད་བལྟ་ན་མེ་ལོང་དགོས་ཟེར་བ་དང་ཞིབ་ཚགས་བྱོས་ཟེར་མཁན་ཚོ་ལ། དེ་དེ་བཞིན་རེད། ངས་ཀྱང་ཞུ། ཁྱོད་ཚོས་ཀྱང་དེ་བཞིན་གྱིས་ཟེར་བ་དང་མཉམ་དུ། རང་གི་སེམས་ནང་གི་སྐད་ཆ་རང་གི་ལག་པས་དྲང་པོར་བྲིས་པ་འདི་ནོར་ཡང་རུང་། འགྲིགས་ཀྱང་རུང་། རང་གི་མི་ཚེའི་སྤོབས་པ་ཞིག་ལ་སེམས་བཞིན་ཡོད་ཅེས་ཞུ་རྒྱུ་ཡིན།
༤༽ ༸རྒྱལ་མཆོག་རིམ་པས་ཡག་པོ་གནང་བ་རེད། ཡག་པོ་མ་བྱེད་མཁན་དགའ་ལྡན་ཕོ་བྲང་རེད། དགའ་ལྡན་ཕོ་བྲང་གིས་༸རྒྱལ་བ་སྐུ་ཕྲེང་རིམ་བྱོན་ནང་ནས་མང་པོ་ཞིག་ལ་སྡུག་པོ་བཏང་བ་རེད། ཅེས་པ་འདིའི་རྒྱུ་མཚན་མཐར་ཐུག་པ་ནི་༸རྒྱལ་བ་སྐུ་ཕྲེང་ཁ་ཤས་སྐུ་ཚེ་ཡུན་རིང་མ་བཞུགས་པ་དེ་དྲངས་འདུག ༸རྒྱལ་བ་སྐུ་ཕྲེང་ཁ་ཤས་སྐུ་ཚེ་རིང་པོ་མ་བཞུགས་པ་དེ་གཞན་གྱིས་བཀྲོངས་པ་ཡིན་དང་མིན་གསལ་པོ་མེད་ལ། བཀྲོངས་པ་ཡིན་ན། བྱེད་གཏེ་རྒྱའི་ཨམ་བན་ཡིན་དང་བོད་ཡིན། ལྷ་ཡིན་དང་འདྲེ་ཡིན་ང་ཚོར་གསལ་པོ་མེད་བཞིན་དུ། ལམ་སེང་བྱས་ཉེས་ཡོད་ཚད་བོད་གཞུང་དགའ་ལྡན་ཕོ་བྲང་གི་ཐོག་ལ་བཀལ་ཡོང་བ་འདི་དཔྱོད་ལྡན་གྱི་བྱེད་སྟངས་མ་རེད། ༸རྒྱལ་བ་རིན་པོ་ཆེས་ཀྱང་། གསར་འབྱོར་བ་ཚོས། རྒྱ་གར་ལ་༸རྒྱལ་བ་རིན་པོ་ཆེ་བཞུགས་པ་མ་གཏོགས་བོད་གཞུང་ལ་ལྟ་བཟོ་གང་ཡང་མི་འདུག་ཅེས་བཤད་པ་དེར་བཀའ་བསྐྱོན་གནང་ཡོད། ང་རང་ཚོའི་ཞན་ཆ་ཡང་དེ་ག་རེད། དངོས་གནས་བྱས་ན། ངེད་ཅག་བོད་ཀྱི་ཡུལ་མི་ཞིག་ཡིན་པའི་ཆ་ནས། བོད་གཞུང་དང་བོད་རྒྱལ་ཁབ་ཅེས་པ་དེ་བླ་མ་གཅིག་གི་གོང་ལ་འཇོག་དགོས་པ་རེད་མ་གཏོགས་འདི་ལྟར་ཚོད་ཚོད་བྱས་ཏེ་བོད་གཞུང་ནག་པོ་བཟོ་ཤག་ཤག་བྱས་ན་ནོར་འཁྲུལ་རེད། རྒྱབ་རྟེན་དཔང་རྟགས་བརྟན་པོ་ཞིག་ཡོད་ན་བསམ་རྒྱུ་ཞིག་ཡོད་རེད། དེ་འདྲ་གང་ཡང་མེད་པར། བཀྲོངས་པ་རེད། བཀྲོངས་མཁན་དགའ་ལྡན་ཕོ་བྲང་རེད་ལབ་ན་རང་གི་མགོ་ལ་རང་གིས་བཙོག་པ་བྱུགས་པ་དང་གཅིག་པ་རེད།
ཕྱོགས་གཞན་ནས་བསམས་ན། བསམ་བློ་གཏོང་སྟངས་འདི་ངས་གོང་དུ། བཟང་བཟང་བླ་མ་དང་ངན་ངན་མང་ཚོགས་ཞེས་པའི་གཏམ་དཔེ་གསར་རྩོམ་བྱས་པ་དེ་ག་རེད། བླ་མ་དཀར་པོ་བཟོ་ཐུབ་ན་གཞན་དག་ནག་པོ་བཟོ་བ་ལ་ཡ་ང་བག་ཚ་མེད་པ་རེད།
ངས་སྐད་ཆ་རྡོག་རྡོག་གཅིག་བཤད། ༸རྒྱལ་བ་ལྔ་པ་ཆེན་པོས་འབྲི་དགོས་པ་བཀའ་ཤོག་མང་ཙམ་བྲིས་ཏེ་མདོ་སྟོད་སྨད་དུ་བཀྲམས་ནས་དེ་ཚོ་དབང་དུ་བསྡུ་ཐབས་མི་བྱེད་པར་འབྲི་མི་དགོས་པ་སྙན་ངག་བྲིས་ནས་བཞུགས་པ་དེ་སློབ་གྲྭ་འཛུགས་པའི་དུས་ཚོད་མ་བྱུང་ནས་རེད་དུས་ཚོད་བྱུང་ནས་རེད། དབང་ཆ་སྤྲོད་དགོས་ས་བོད་པ་ཞིག་ལ་དབང་མ་སྤྲད་པར་སྤྲོད་མི་དགོས་ས་སོག་རིགས་ཤིག་ལ་༸རྒྱལ་པོའི་དབང་གནང་བ་འདི་ཅི་རེད།
༸རྒྱལ་བ་ཚངས་དབྱངས་རྒྱ་མཚོས་ལས་དགོས་པ་ཆབ་སྲིད་ཀྱི་ལས་ཀ་མ་ལས་པར། ལས་མི་དགོས་པ་ནག་ཆང་བུད་མེད་བསྟེན་ཏེ་ཐ་ན་རང་དང་སྡེ་སྲིད་སངས་རྒྱམ་པ་བཅས་པའི་སྐུ་སྲོག་ཤོར་བ་འདི་བོད་ལ་བརྩེ་དྲག་ནས་རེད་གལ་ཆེ་ཆུང་མ་ཤེས་ནས་རེད།
༸རྒྱལ་བ་སྐུ་ཕྲེང་བདུན་པ་དབུས་ལ་ཕེབས་དུས་རྒྱ་དམག་མཉམ་དུ་ཁྲིད་དོན་ཅི་རེད། གནང་དགོས་པའི་ཆབ་སྲིད་ཀྱི་ཕྱག་ལས་ཧྲ་ཐག་ཐག་ཅིག་མ་གནང་བར། ག་དུས་ཡིན་ནའང་ང་རི་ཁྲོད་ལ་འགྲོ་འདོད་འདུག་ཅེས་བཞུགས་པ་འདི་ག་རེ་རེད། ཁོང་རྣམ་པ་གསུམ་གྱིས་ཧྲ་མོ་ཧྲ་མོ་ཞིག་གནང་ཡོད་ན། དེའི་རྗེས་ནས་དཀའ་ངལ་ཡོང་ས་ཨེ་འདུག
༸རྒྱལ་བ་སྐུ་ཕྲེང་བརྒྱད་པ་ནས་བཅུ་གཉིས་པ་བར་རྣམས་ཡུན་རིང་མ་བཞུགས་པ་དེ་གཞན་གྱི་སྦྱོར་བ་ངན་པར་ཐུག་པའི་དབང་དུ་བཏང་རུང་། དེ་ནི་༸རྒྱལ་བ་ལྔ་པ་ནས་བདུན་པ་བར་གྱིས་སྐུ་ཕྲེང་ཕྱི་མ་རྣམས་བདག་པོ་ཡག་པོ་རྒྱག་པའི་ལམ་ལུགས་ཡག་པོ་ཞིག་མ་བཟོས་པ་དེའི་སྐྱོན་རེད་མ་གཏོགས། ཆབ་སྲིད་ཀྱི་དབང་ཆ་རྩོད་མཁན་ཚོས་དབང་ཆ་ལ་ཧབ་ཐོབ་རྒྱག་པ་འདི་ལ་འཁང་ས་ཅི་ཡང་མེད། ༸རྒྱལ་བ་ལྔ་པས་ཀྱང་གཙང་པ་རྒྱལ་པོ་དང་བེ་རི་རྒྱལ་པོ་བཅོམ་ནས་དབང་ཆ་བླངས་པ་རེད།
དངོས་གནས་བྱས་ན། ཡབ་གཞིས་ཡོད་རེད། སློབ་མ་དེ་ཙམ་ཡོད་རེད། འཁོར་གཡོག་དེ་ཙམ་ཡོད་རེད། དེ་ཚོ་བཀོད་སྒྲིག་ཡག་པོ་ཞིག་གནང་བ་ཡིན་ན། སྐུ་ཕྲེང་རྗེས་མ་ཚོའི་སྐུ་ཕྱྭ་ལ་འཇིགས་པ་འབྱུང་དགོས་དོན་ཞིག་འདུག་གམ།
འདི་ཚོ་འདས་ཚར་བ་རེད། འདི་ལས་བསླབ་བྱ་བླངས་ཏེ་ཁྱོད་ཚོ་༸རྒྱལ་བ་རིན་པོ་ཆེའི་སྲུང་མར་རློམ་པ་ཚོས་མ་འོངས་པར་ལོ་རྒྱུས་བསྐྱར་ཟློས་མ་ཡོང་བའི་ཐབས་ཤེས་འཚོལ་དགོས།
༥༽ ཁང་གསར་ཁྱོད་ཀྱིས་ག་རེ་འཇོན་བཞག་ཡོད་ཅེས་པ་དེ་ལ། གཞན་གང་ཡང་འཇོན་མེད། གཅིག་འཇོན་པ་དེ་ རང་གིས་རང་ལ་མགོ་བསྐོར་བཏང་མེད་པ་དེ་ཡིན་ཞེས་ཞུ་འདོད་བྱུང་་། ད་ལས་ཀ་ལ་འགྲོ་བ་ལ་དུས་ཚོད་ཅུང་འདུག རྒྱུག་ཤར་གཅིག་གློད། ཞོགས་ཟས་ཤིག་ཉོ་རུ་འགྲོ་གི་ཡིན།
བསམ་ཚུལ་རིན་ཐང་ཅན་འདྲ་འདུག་ན། ཆུ་ཚོད་བཅུ་པ་བཅུ་གཅིག་ལ་ལས་ཀའི་བར་གསེང་ཡོད། དེ་དུས་བལྟ།
ཐུགས་རྗེ་ཆེ།
མཛད་པ་ཀུན་ལས་གསུང་གིས་ནི། །
མཛད་པ་མཆོག་ཡིན་འདི་ཡང་ནི། །
འདི་ཉིད་ཡིན་ཕྱིར་མཁས་པ་ཡིས། །
འདི་ལས་སངས་རྒྱས་རྗེས་དྲན་བྱོས། །
ཅེས་འཇམ་དབྱངས་བླ་མ་ཤར་ཙོང་པ་ཆེན་པོས་ཇི་ལྟར་གསུངས་པ་བཞིན། ཁང་གསར་རྗོ་རྗེ་འདིས་ཀྱང་བླ་མེད་གསུང་གི་མཛད་འཕྲིན་སྐྱོང་བཞིན་འདུག་ན། དྲ་གྲོགས་ཚོས་སངས་རྒྱས་རྗེས་དྲན་གསུངས་པ་བཞིན་ཁོང་གི་རྗེས་འཇུག་ཞིག་བྱས་ན་སྐྱོན་ཡོང་ས་མ་རེད་སེམས།
གང་ཡིན་ཟེར་ན། དྲ་གྲོགས་མང་པོ་ཞིག་གིས་ཁོང་གི་དགོངས་དོན་སློབ་སྦྱོང་བྱས་ཏེ་བཀའ་མོལ་གནང་དགོས་ཀྱི་འདུག
ཁང་གསར་ལགས། ཁྱོད་ནས་བཤད་རྒྱུ་ལ་བོད་མི་རིགས་འདི་ལ་ཤ་ཚ་ཆེ་མདོག་ཁ་པོ་འདུག འོན་ཀྱང་ཁྱོད་རང་ངོས་ནས་ད་བར་བོད་དོན་ལ་ཕན་པའི་ལས་ཀ་མངོན་གསལ་དེ་འདྲ་ཡོད་དམ།
རྒྱལ་མཆོག་ལྔ་བ་དང་བདུན་པ། བཅུ་གསུམ་དང་བཅུ་བཞི་མ་གཏོགས་རྒྱལ་བ་གཞན་ཚང་མ་ནག་ཁུངས་ནང་མེད་པ་ཆགས་སོང་བ་རེད། གོ་སྐབས་བྱུང་མྱོང་མཁན་གྱི་རྒྱལ་བ་བཞི་བོས་བོད་ལ་འགྲིག་ཐག་ཆོད་གནང་བཞག་དྲན་གྱི་ཡོད། བོད་ལ་སློབ་གྲྭ་འཛུགས་མཁན་ཐོག་མའང་གོ་སྐབས་ཐོབ་མྱོང་བའི་རྒྱལ་བ་བཞི་བོ་རེད་མི་འདུག་གམ། འདིར་ནན་ཏན་བཤད་རྒྱུར། ཁང་ལགས་དཔྱད་རྩོམ་འབྲི་ན་བསམ་བློ་ཞིབ་ཚགས་པོ་དང་རྒྱུ་མཚན་ཆ་ཚང་ལ་ལྟ་དགོས་ཀྱི་འདུག དེ་མིན་དབྱིབས་ཚོད་བྱས་ནས་རྒན་མོ་དེའི་སྐད་ཆ་ནང་བཞིན་བཤད་ན་ཆོ་མཐོང་གི་མི་འདུག
རྩོམ་ཡིག་ཡག་པོ་བྲིས་འདུག ཞོར་འདྲོགས་དང་གཡམ་རྒྱུགས་མིན་པར་སོ་སོའི་བསམ་ཚུལ་རྗེན་བཤད་བྱས་པའི་རྣམ་འགྱུར་མངོན་འདུག་ལ་ལྟ་བ་རང་ཚུགས་ཐུབ་པ་ཞིག་འདུག འོན་ཏེ་ཡིག་ནོར་དང་ཚིག་སྐྱོན་ཁ་ཤས་འདུག་སྙམ།
ནོར་བཅོས། ་་་་་་་་་་་རྒྱལ་བ་སྐུ་ཕྲེང་རིན་བྱོན་ནི་དགའ་ལྡན་ཕོ་བྲང་གིས་གནོད་འཚེ་ཕོག་ས་ཆེ་ཤོས་དེ་ཆགས་མེད་འགྲོ་དཔྱད་པ་གནང་དགོས། རང་གི་སྐུ་སྲོག་ཀྱང་མ་དབང་བའི་རྒྱལ་བ་རིན་པོ་ཆེ་ལ་སློབ་གྲྭ་བཙུགས་མི་འདུག་ཅེས་སྐྱོན་བརྗོད་བྱེས་ན་དགོད་སྤྱད་མ་རེད་དམ། ་་་་་་་་་་་་་་་་་
ཁང་སར་ལགས་ཀྱི་བསམ་ཚུལ་སྔ་ཕྱི་ལ་ཁ་ཕྱོགས་གཅིག་མི་འདུག་པས་དམིགས་བསལ་ཡག་ཉེས་བཤད་མི་ཐུབ། ཡིན་ནའང་ངས་ཁོང་ལ་དྲན་གསོ་བྱེད་པ་གཅིག་ནི། ལོ་བརྒྱ་ཕྲག་གི་ལོ་རྒྱུས་ལྡན་པའི་བོད་གཞུང་དགའ་ལྡན་ཕོ་བྲང་གིས་སྲིད་ཀྱི་སྣེ་མོ་བ་དང་འོག་རིམ་གྱི་ལས་བྱེད་ཚོས་བོད་མི་མང་ལས་ཀྱང་༧རྒྱལ་བ་རིན་པོ་ཆེ་ལ་མནར་གཅོད་མང་བ་བཏང་ཡོད་པ་རེད། དཔེར་ན༧རྒྱལ་དབང་སྐུ་ཕྲེང་ལྔ་བ། བདུན་པ་དང་བཅུ་བཞི་མ་གཏོགས་བོད་མི་མི་རིགས་ཀྱི་ཆེད་དུ་ཆོས་སྲིད་ཀྱི་འགན་ཁུར་ནས་ཕྱག་ལས་གནང་རྒྱུའི་གོ་སྐབས་བྱུང་ཡོད་པ་མ་རེད། སྐུ་ཕྲེང་གཞན་ཚང་མ་པོ་ཏྰ་ལའི་སྦུགས་ནས་ནག་ཁུངས་ནང་དགོངས་ལོ་གཞོན་ཐོག་ལ་མེད་སོང་བ་རེད། དེའི་ཕྱིར་དགའ་ལྡན་ཕོ་བྲང་གིས་བོད་རྒྱལ་ཁབ་ལ་སློབ་གྲྭ་དང་༧རྒྱལ་བ་རིན་པོ་ཆེ་གཉིས་ཀ་མཉམ་གཅིག་ཏུ་ཡོད་བཅུག་མྱོང་ཡོད་པ་མ་རེད་ཟེར་ན་འདོད་སོང་། རྒྱལ་བ་སྐུ་ཕྲེང་རིན་བྱོན་ནི་དགའ་ལྡན་གྱིས་གནོད་འཚེ་ཕོག་ས་ཆེ་ཤོས་དེ་ཆགས་མེད་འགྲོ་དཔྱད་པ་གནང་དགོས། རང་གི་ཚེ་སྲོག་ཀྱང་མ་དབང་བ་ཞིག་ལ་སློབ་གྲྭ་བཙུགས་མི་འདུག་ཅེས་སྐྱོན་བརྗོད་ན་དགོད་སྤྱད་མ་རེད་དམ།
སྐུ་ཕྲེང་བཅུ་གསུམ་པ་ཕྲག་ལས་གནང་བཞིན་པའི་སྐབས་སུ་གློ་བུར་གྲོངས་པ་དང་། བླ་སྨན་པ་གཅིག་ལ་དོགས་ཉེས་འོག་ཉེས་ཆད་ཀྱང་ཕོག་ཡོད་པ་རེད།
དེ་ཡང་ཁ་སངས་ནས་བཤད་ན་བོད་གཞུང་དགའ་ལྡན་ཕོ་བྲང་ངམ་༧རྒྱལ་བ་སྐུ་ཕྲེང་རིམ་བྱོན་གྱི་བཀའ་སྒྲུབ་མཁན་གྱི་མིང་ཡོད་པའི་འོག་གི་སྲིད་ཀྱི་སྣེ་མོར་གཏོགས་པ་ཚོས་འཆར་ཅན་༧རྒྱལ་བ་ཚང་མ་ལྐོག་བསོད་བཏང་བ་མིན་འགྲོ་དྲན། དེ་མིན་༧རྒྱལ་བ་རིན་པོ་ཆེ་ཕལ་ཆེ་བ་ཆུང་ཆུང་ནས་གྲོངས་འགྲོ་བའི་རྒྱུ་མཚན་གཞན་མཐོང་གི་མི་འདུག
དེའི་ཕྱིར་བོད་ལ་ལོ་བརྒྱ་ཕྲག་རིང་སློབ་གྲྭ་མ་བཙུགས་པ་སོགས་ཀྱི་ནག་ཉེས་༧རྒྱལ་བ་སྐུ་ཕྲེང་རིམ་བྱོན་ལ་འགེལ་ཐབས་ཡོད་པ་མ་རེད། ༧རྒྱལ་བ་རིན་པོ་ཆེ་མང་ཆེ་བར་བོད་མི་རིགས་ཀྱི་ཆེད་དུ་ཡག་སྡུག་གང་ཡང་ལས་རྒྱུའི་གོ་སྐབས་ཐོབ་ཡོད་པ་མ་རེད།
དེའི་ཁྱེད་ཀྱི་༧རྒྱལ་བ་རིན་པོ་ཆེའི་མ་འཇོན་པ་དང་མ་དྲང་བ་ཡོད་མེད་དཔྱད་པ་བྱེད་ན་སྐུ་ཕྲེང་རེ་རེའི་དགོངས་ལོ་དང་བཅས་པར་ལྟ་དགོས་པ་རེད། སྔ་མོ་དཀར་མེ་མེད་པའི་ནག་ཁུང་ནས་ཟ་མ་ཟ་དུས་ཤིག་ལ། ཁྱོ་གས་རྒན་མོར་མཐོང་གི་མི་འདུག་དཀར་མེ་སྤར་རོགས་ཟེར་དུས། རྒན་མོས་དཀར་མེ་མི་དགོས། སྣ་གི་འོག་ལ་བཞག་ན་ཟ་འགྲོ་མཁན་གྱི་འདྲེ་ཞིག་ཡོད་ཟེར་མྱོང་བ་ནང་ཡིད་ཚོད་བྱས་ནས་འུར་གཏམ་བཤད་ནས་ཡག་པོ་མེད་རེད།
ཁང་གསར་རྒད་པོའི་སྙུག་རྩེ་ཁྱིམ་ཚང་གི་གྱོད་གཞི་ནས་རྒྱལ་ཁབ་ཀྱི་སྟེང་ལ་སླེབས་འདུག
༧རྒྱལ་བ་རིན་པོའི་སྲུང་མ་བོད་མགོ་ནག་ཡོངས་ཡིན།
༧རྒྱལ་བ་རིན་པོ་ཆེའི་སྲུང་མ་བོད་ཆོལ་ཁ་གསུམ་ཡིན།
༧རྒྱལ་བ་རིན་པོ་ཆེའི་སྲུང་མ་གཙོ་བོ་གཞིས་ལུས་སྤུན་ཟླ་ཡིན།
༧རྒྱལ་བ་རིན་པོ་ཆེའི་སྲུང་མ་དད་པ་དམ་ཚིག་གཙང་བའི་རིགས་ཡིན།
༧རྒྱལ་བ་རིན་པོ་ཆེའི་སྲུང་མ་ཞི་བདེ་ལ་དགའ་མཁན་ཚོ་ཡིན།
༧རྒྱལ་བ་རིན་པོ་ཆེའི་སྲུང་མ་རིས་མེད་ཀྱི་བསྟན་འཛིན་སྐྱེས་ཆེན་དག་ཡིན།
༧རྒྱལ་བ་རིན་པོ་ཆེའི་སྲུང་མའི་མཐའ་མ་ཨ་རིག་དགེ་མཐོང་བདག་ཡིན།
༄༅།། བསམ་ཚུལ་ཡག་པོ་གསུང་འདུག
་ཕར་ཆེར་དངོས་་བྱུང་ལྟ་བུ་རེད།
འོན་ཀྱང་ཁག་ངན་ཡོད་དོ་ཅོག་གོང་ལྟར་བཀལ་ན་མི་འོས་
རྒྱུ་མཚན་དེ་དུས་བོད་གཅིག་པོ་མིན་པ་གཡས་གཡོན་གྱི་རྒྱལ་ཁབ་འགའ་ཡང་བོད་དང་གཅིག་པ་འདྲ་བོ་རེད། དེའི་ཕྱིར་གཙོ་བོ་དུས་དབང་གིས་རེད།
ཁང་གསར་རྡོ་རྗེ་ཟེར་བ་དེས་སྔ་ཕྱིར་བསམ་ཚུལ་རིན་ཐང་བྲལ་བ་གཉིས་སྤེལ་སོང་། འདི་ལྟ་བུའི་རྩ་དོན་གྱི་གནད་ཆེ་ས་ནས་གླེང་དུས་སུ་ཡིན་དང་། བློར་མི་ཤོང་བའི་བསམ་ཚུལ་འདོན་པ་འདི་མང་ཚོགས་ནང་གི་ཅི་ཡང་མི་ཤེས་མཁན་ཚོར་ཡོད་པའི་གནས་སྟངས་དངོས་དེ་རེད། མི་འདི་ཚོ་དམིགས་བསལ་བྱས་ནས་བཞག་ན་འགྲིག་གི་རེད།
དཱ་ང་ཚོ་རྩ་དོན་རང་གི་ཐོག་ལ་བགྲོ་གླེང་བྱེད།
རྩོམ་པ་པོ་ཁང་གསར་རྡོ་རྗེ་ལགས། རྩོམ་ཡིག་འདི་གངས་ལྗོངས་ཕོ་ཉ་ཞེས་པའི་དྲ་ཚིགས་སུ་འདྲེན་བཀོད་བྱས་ཡོད་ན་སྐུ་ཉིད་ནས་དེ་ལྟར་དགོངས་ཁྲོལ་ཡོང་བའི་རེ་བ་ཡོད།
བོད་འདི་མུན་འཐོམ་ལ་བཞག་པའི་ལེ་ཁག་དེ་དགའ་ལྡན་ཕོ་བྲང་ལ་བཞག་ན་ཐལ་ཆ་ཆེ་དྲགས་པ་མིན་ནམ། མུན་འཐོམ་འགོ་ཚུགས་པའི་དུས་ཚོད་བོད་ཀྱི་རྒྱལ་པོ་གླང་དར་མ་བཀྲོངས་པ་ནས་རེད་འདུག་གོ།
ཁ་བཤད་ཆུ་ཡི་ལྦུ་བ།
ལག་ལེན་གསེར་གྱི་ཐིག་པ།
གཞན་ལ་ལྟ་བའི་མིག་ཡོད་ཀྱང་།
རང་ཉིད་ལྟ་ན་མེ་ལོང་དགོས།
ཞེས་པ་ཁང་གསར་ཁྱོད་ཀྱིས་ཨེ་གོ།
མདོ་ཁང་བ་ལགས། ངས་སྐུ་ཉིད་ཀྱི་ཁ་པར་ཨང་གྲངས་མི་ཤེས་པར་ཁ་པར་ཇི་ལྟར་གཏོང་། ཡང་གཅིག་བཤད་ན་སྐུ་ཉིད་ཀྱང་སུ་ཡིན་མི་ཤེས་ལགས། ང་ཚོས་འདི་ལྟའི་སྐོར་ལ་གླེང་མོལ་བྱེད་སྐབས། དོན་མེད་ཀྱི་རྙོག་གཏམ་དུས་གཏན་ཏུ་སྤང་ན་ལེགས་སྙམ་ནས་བདག་གིས་ཁྱེད་ལ་གཞེན་སྐུལ་ཙམ་བྱས་པ་དེ་ཡིན།
ཨོ་ཁྱོད་ཀྱི་ཨང་གྲངས་ང་ལ་གནང་རོགས་ཞུ།
མིང་གི་དག་ཆ་བཅོས་ནས་ཡོད། །
གནམ་ལྕགས་ལགས་ལ་ཐུགས་རྗེ་ཆེ། །
ཁང་གསར་ལགས་ལ་བཟོད་གསོལ་ཞུ། །
ལུང་རིགས་ངོས་ནས་འགྱོད་བཤགས་ཞུ།།
གནམ་ལྕགས་ཁྱོད་ལ་ཁོམ་པ་ཡོད་ན་དོ་དགོང་ལས་ཁུངས་གྲོལ་ན་ང་ལ་ཁ་པར་ཐོངས་ར་་དེ་ནས་སྐད་ཆ་བཤད་ཡ།
རྩོམ་དང་རྩོམ་འབྲི་མཁན་གཉིས་ལ་རྒྱབ་ཤད་རྒྱག་དགོས་དོན་མེད་ལ་རྒྱག་རྩིས་སེམས་བསམ་པའི་ཡུལ་ན་མེད། དངོས་ཡོད་གང་ཡིན་པ་དེ་ཁྱེད་ཚོར་བཤད་པ་ཡིན། རྫུན་བཤད་མཁན་ལ་རྫུན་བཤད་མཁན་རེད་ལབ་ན་ང་ལ་སྐྱོན་མེད། ཁང་གསར་རྡོ་རྗེ་ལྷང་ལ་བུད་ཡོང་གི་རེད།
དག་ཡིག་ངག་གི་སྒྲོན་མ་ལ།།མ་དག་པ་ཞིག་མགོ་ན་ཡོད།།ཅེས་པ་ལྟར་ད་ཐེངས་ཀྱིས་ཁང་གསར་བའི་རྩོམ་ཡིག་གི་ཁ་བྱང་འོག་གི་ཁོང་གི་མིང་ལ་ཡིག་ནོར་ཐེབས་འདུག
མདོ་ཁང་བསྟན་འཛིན་ཡོན་ཏན་ལགས། སྐུ་ཉིད་ཀྱིས་བཤད་སྟངས་དེ་ནི་ཤིན་ཏུ་མ་འོས། ལམ་སེང་ཁང་གསར་ལ་རྒྱབ་བཤད་རྒྱག་གྲབས་བྱེད་ཀྱི་འདུག་གཱ དེ་ནི་ང་ཚོའི་སྤྱི་ཚོགས་ཀྱི་ན་ཚ་སྡུག་ཤོས་དེ་རེད། ཁོང་གི་རྩོམ་ཡིག་གི་སྐོར་གླེང་ན་ཆོ་མེད་པའི་སྐད་ཆ་དེ་ཚོ་ནམ་གླེང་བར་མི་འོས།
ཡང་གཅིག་བཤད་ན། དེང་སང་རྒད་པོ་ཁང་གསར་བ་ཁོང་དུས་བབ་དྲ་ཚིགས་དང་ཟིན་བྲིས་པའི་སྡེ་ན་གླེང་རིན་ཡོད་པ་ཞིག་ཏུ་ཆགས་ནས་ཡོང་གི་ཡོད་དུས། ཁ་ཐུག་གིས་དེའི་གཉའ་ནས་མནན་རྒྱུའི་ལོ་བརྒྱའི་ནད་རྙིང་དེ་སངས་ན་ལེགས། ད་ལྟའི་ང་ཚོ་ལ་མཁོ་བ་དེ་གཏན་ནས་མིན།
ད་གསལ་པོ་བཟོ་གི་ཡིན། ངས་ནི་ཁང་གསར་རྡོ་རྗེ་འབུར་འཇོམས་བྱེད་རྩིས་མེད། སྐད་ཆ་འདི་ཚོ་ཡང་དྲང་པོ་རེད། འོན་ཀྱང་ང་ཚོའི་སྤྱི་ཚོགས་ཀྱི་གནས་སྟངས་དང་ང་དང་ང་འདྲ་བའི་མི་ཚོའི་ཁམས་དང་མོས་པ་ལ་བསམ་བློ་བཏང་ནས་སྐད་ཆ་འདི་ཚོ་གནས་སྐབས་མ་བཤད་ན་བཟང་། སེམས་ལ་གནོད་ཀྱི་འདུག་ཟེར་གྱི་ཡོད། དེ་མིན་ཁང་གསར་རྡོ་རྗེ་ཁེ་ཎ་ཌ་ལ་ཡོད་པ་ཁེ་ཎ་ཌའི་མི་ཁ་ཤས་ཀྱིས་ལབ་མྱོང་། ངས་དོགས་པ་ཡོད་ཟེར་བ་དེ། མི་རྫུན་མ་རེད་ཟེར་གྱི་མེད་ལ། རྒྱ་ནག་གི་སོ་པ་རེད་ཟེར་གྱི་མེད། སྤྱིར་བཏང་གི་མི་ལྐོག་གྱུར་ཞིག་རེད་འདུག་ཟེར་གྱི་ཡོད་ལོ
ངས་བལྟས་ན་ཁང་གསར་རྡོ་རྗེའི་རྩོམ་འདིའི་སྟེང་ན་འབུར་འཇོམས་བྱེད་རྒྱུ་ཅང་མི་འདུག བསམ་ཚུལ་འདི་ནི་རྒད་པོ་ཁོས་ཁོག་ལ་མ་སྦས་པར་ཁ་ལ་ཐོན་པ་རེད་མ་གཏོགས། དེང་སང་གི་གཞོན་སྐྱེས་མང་བོ་ཞིག་གི་སེམས་དང་བསམ་པའི་ངོས་ན་ཁྲིག་ཁྲིག་ཡོད་པ་རེད། དེའི་སྟབས་ཀྱིས་ད་ཐེངས་རྒད་པོ་ཁང་གསར་བས་དབུ་ཁྲིད་ཀྱིས་རང་རེའི་སྤྱི་ཚོགས་ཀྱི་སྒྲན་ནད་ཅིག་གཤགས་བཅོས་བྱེད་ཀྱིན་ཡོད་པ་འདྲ། ཁོག་གི་སྐད་ཆ་ཁ་ལ་ཐོན་པ་ནི་བསྔགས་པར་འོས། འདི་ལ་སྐྱོན་བརྗོད་དང་འབུར་འཇོམས་ཀྱིས་མནན་ན་མི་འཚམ་མོ།།
ཁང་གསར་རྡོ་རྗེ་བརྩད་གཅོད་དགོས་རྒྱུའི་རྩ་ཆེན་དེ་འདྲ་མ་རེད། ཁང་གསར་རྡོ་རྗེ་ཟེར་མཁན་དེ་སུ་ཡིན་མིན་ཁོང་གི་ཆང་འཐུང་རོགས་ཚོ་ལ་སྐད་ཆ་དྲིས་དང་ལན་དེ་ནས་རག་གི་རེད།
ད་ཁྱོད་ཚོས་ཁང་གསར་རྡོ་རྗེ་འབུར་འཇོམས་བྱེད་རྩིས་རེད་འདུག་ག ངས་དེ་ཡོང་རྒྱུ་ཡིན་པ་དང་པོ་རྩོམ་འདི་མཐོང་དུས་ནས་ཤེས་བྱུང་།
ཀུན་དགའ་བདེ་ཆེན། དེ་ལོས་ཡིན། ཁང་གསར་རྡོ་རྗེ་ལགས་བོད་ཡུལ་ནས་བལ་ཡུལ་དང་དེ་ནས་ཁ་ན་སྒྲ་ལ་སོང་། དེ་ནས་ཕྱིར་རྡོར་གླིང་དུ་ལོག་ནས་བསྡད་ཡོད་ཚུལ་ཞིག་ཁོ་རང་གིས་གསལ་ཞིང་རྒྱས་པར་བཤད་ཚར་སོང་། སྤྱིར་ན་བསམ་ཚུལ་རྩད་གཅོད་བྱེད་དགོས་པ་ལས་མི་རྩད་གཅོད་བྱས་ནས་ཅི་བྱེད་བསམ་པ་ཡིན།
རྩོམ་འདི་ཚོའི་རིགས་ལ་དགོས་བ་རྒྱུ་མཚན་མི་མཐོང་། འདི་ལས་ད་ལྟ་བར་གྱི་སོ་སོའི་བྱ་བའི་བརྒྱུད་རིམ་དང་ཉམས་མྱོང་སོགས་གཞོན་སྐྱེས་ཚོར་བགོ་བཤའ་རྒྱག་ཐུབ་ན་ཡག་པོ་འདུག ཡིབ་ནས་སྐྱོན་བརྗོད་བྱེད་པ་འདི་ཡག་པོ་མ་རེད། ཁ་ཎ་སྒྲ་ན་ཡོད་མདོག་དང་གཙུག་ལག་སློབ་ཁང་གི་ལས་ཀ་བྱེད་ཀྱི་ཡོད་མདོག་གི་རྫུན་ཆ་ལེ་ཆོ་ལེ་དེ་ཚོར་སྤངས་ནས་། ཟིན་བྲིས་བ་ཚོ་བླུན་པོར་མ་བརྩིས་པར་རྗེས་མ་ནས་བསམ་ཚུལ་དྲང་པོར་བཤད་རོགས། མི་སྒེར་བ་ཡིབ་སྡོད་མཁན་ཁྱེད་ལྟ་བུའི་རིགས་ལ་དགའ་མི་དགའི་སྐད་ཆ་མེད།
སྤོབས་པ་མཐའ་ཡས། འདི་ཤ་ཚའི་སྒོ་ནས་བཤད་མིན་ངས་མི་ཤེས། སེམས་ལ་འགྲོ་གི་མི་འདུག ཁང་གསར་རྡོ་རྗེ་ཟེར་བ་འདི་ཡང་མི་ཁྱད་མཚར་ཞིག་རེད། ཁོས་སྐད་ཡིག་ཁ་ཤས་ནི་ཤེས་ཀྱི་འདུག ཉམས་མྱོང་དང་མཐོང་རྒྱ་ཡང་ཆེ་བ་འདྲ། བསམ་གཞིགས་ཀྱི་ནུས་པ་ཡང་ཟབ་ཟབ་འདྲ་ཞིག་འདུག ངས་མི་འདི་རྩད་གཅོད་བྱས་པ་ཡིན། ཁ་ཤས་ཀྱིས་རྡོར་གླིང་ལ་འདུག་ཟེར། ཁ་ཤས་ཀྱིས་ཁེ་ཎ་ཌ་ལ་འདུག་ཟེར། མི་ཁོ་རང་ལ་དོགས་པ་ཡོད།
ཀུན་དགའ་བདེ་ཆེན་། ཤ་ཚ་བའི་གཏམ་ལ་སྙན་མོ་མེད༎ནད་འཁྲིས་པའི་སྨན་ལ་ཞིམ་པོ་མེད་ཟེར་བ་དེ་རེད། ཁྱོད་ལ་ཁག་མེད།
ད་ག་རེ་བཤད་དགོས་མིན་ཤེས་མ་སོང་། བཤད་པ་ལ་རྒྱུ་མཚན་ནི་འདུག རྣ་བར་འགྲོ་གི་མི་འདུག ༸རྒྱལ་བ་སྐུ་ཕྲེང་རིམ་བྱོན་ནག་པོ་རེད་མདོག་མདོག་འདྲ་བོ། སློབ་གྲྭ་བཙུགས་མི་འདུག་མདོག་མདོག་བཤད་འདུག དེ་ཚོ་བཤད་དུས་ཁས་ལེན་ཐུབ་ཀྱི་མི་འདུག
དེ་ནས་འགྲིགས་ན་བླ་མའི་བྱས་རྗེས་དང་ནོར་ན་འབངས་ཀྱི་ནོར་འཁྲུལ་ཟེར་བ་དེ་ཡང་དངོས་གནས་ཡིན་ས་རེད་ཀྱང་། འདི་འདྲ་ཟེ་ཁ་ཐུག་བཤད་ཡོང་ན་ཁས་ལེན་ཐུབ་ཀྱི་མི་འདུག
ཁང་གསར་རྡོ་རྗེའི་རྩོམ་ལ་སྔོན་མ་དགའ་པོ་ཡོད། བསམ་ཚུལ་འབུར་འཛོམས་ཞེས་པ་དང་ད་ལྟའི་འདི་ཚོ་ལ་དགའ་པོ་ཞེ་དྲག་མ་བྱུང་།
མ་འོངས་པར་ཕ་བུའི་སྒྲུང་དེ་འདྲ་རང་མང་ཙམ་འབྲི་རོགས་གནང་ཞུ་འདོད་བྱུང་། འདི་ཚོ་ང་ཚོའི་བློ་ལ་འཚམས་ཀྱི་མི་འདུག
ཁང་གསར་རྡོ་རྗེ། བདེན་པ་ནི་བདེན་པ་རེད་དེ། ཁོར་ཡུགས་དང་བསྟུན་པའི་སྐད་ཆ་ཞིག་མ་བཤད་ན་འབུར་འཇོམས་ངོ་མ་ཁྱེད་རང་བྱེད་ཡོང་ངོ་༎
བྲེལ་སྟབས་ཡིན་མིན་གང་ཤེས་ཏེ། རྒད་པོ་ཁང་གསར་བའི་དཔྱད་བརྗོད་གཏམ་གླེང་ཁ་གསལ་བོ་ཞིག་གནང་འདུག མ་གཞི་རྩོམ་ཡིག་འདིའི་ཕྱི་ཤུན་གྱི་ཕུགས་ན་ད་དུང་ག་རེ་ཡོད་མིན་བཤད་དཀའ་ཡང་། ངོ་གདོང་གི་གོ་བ་ནི་ལྗིད་ཁོག་ཚ་བོ་ཞིག་ཏུ་སྣང་།
མུ་མཐུད་ནས་འདི་ལྟར་དོན་ལ་འབབ་ཐུབ་པའི་རྩོམ་ཡིག་མང་དུ་སྤེལ་བའི་རེ་བ་ཤིན་ཏུ་ཆེ།