བོད་ཀྱི་བདུན་ཕྲག་དུས་སྟོན་ཞེས་པ་དེ་ཉིན་ ༦ རིང་ཨ་རིའི་ཨ་ཊི་ལན་ཊ་གྲོང་ཁྱེར་ཉེ་འདབས་ཀྱི་ཨེ་མོ་རི་གཙུག་ལག་སློབ་གཉེར་ཁང་དུ་འཚོགས་ཡོད་པ་རེད།
ཨེ་མོ་རི་དང་བོད་ཀྱི་མཐུན་ཚོགས་ཀྱིས་ཕྱི་ལོ་ ༢༠༡༠ ཟླ་ ༣ ཚེས་ ༢༢ ནས་ ༢༧ བར་ཨ་རིའི་ཨ་ཊི་ལན་ཊ་གྲོང་ཁྱེར་ཉེ་འདབས་ཀྱི་ཨེ་མོ་རི་གཙུག་ལག་སློབ་གཉེར་ཁང་དུ་བོད་ཀྱི་བདུན་ཕྲག་ཐེངས་བཅུ་བའི་དུས་སྟོན་དེ་གོ་སྒྲིག་ཞུས་འདུག་ཅིང་། དུས་སྟོན་ཀྱི་ཉིན་དྲུག་རིང་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་དང་རྡ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་རྣམ་གཉིས་ཀྱིས་༼སྤྱི་ནོར་ ༧གོང་ས་བཅུ་བཞི་བ་མཆོག་གི་དགོངས་གཞི་སྟེ་འགན་ཁུར་གསུམ་༽གྱི་སྐོར་ངོ་སྤྲོད་གསུང་བཤད་གནང་། འབྲས་སྤུངས་བློ་གསལ་གླིང་གི་དགེ་འདུན་པས་དཀྱིལ་འཁོར་བཞེངས་སྟོན་དང་གར་འཆམ་འཁྲབ་སྟོན། ནོར་བུ་གླིང་གའི་ལྷ་བྲིས་པས་ཐང་ག་འབྲི་སྟོན་ངོ་སྤྲོད། དགེ་འདུན་པ་དང་སྒོམ་སྒྲུབ་ཉམས་ལེན་པས་བློ་སྦྱོང་སྒོམ་སྒྲུབ་སྐོར་ངོ་སྤྲོད། བོད་རང་དབང་སློབ་ཕྲུག་ཚོགས་པས་བོད་སྐོར་གློག་བརྙན་སྟོན་འབུལ། ཉིག་ཡོག་གྲོང་ཁྱེར་དུ་ཡོད་པའི་རུ་སྤན་འགྲེམ་སྟོན་ཁང་གི་ལས་བྱེད་ཀྱིས་ ༼༧ གོང་ས་སྐུ་ཕྲེང་རིམ་བྱོན་གྱི་ལོ་རྒྱུས་༽བརྙན་པར་ལམ་ནས་ངོ་སྤྲོད་གཏམ་བཤད། ཨེ་མོ་རི་དང་བོད་ཀྱི་དཔེ་མཛོད་ཁང་གཉིས་ཀྱི་ཚན་རིག་ལས་རིམ་གྱི་དགེ་རྒན་རྣམ་པས་ཚན་རིག་ལས་རིམ་སྐོར་ངོ་སྤྲོད་དང་བོད་ཀྱི་དགོན་སྡེ་ཁག་ལ་ཚན་རིག་སློབ་ཁྲིད་བྱེད་པའི་དཀའ་ངལ་དང་དགེ་ཕན་སྐོར་ལ་བགྲོ་གླེང་། ཚན་རིག་དང་ནང་ཆོས་མཉམ་འབྲེལ་ཐོག་ཤེས་ཡོན་སྤེལ་ཐབས། ཀོ་ལུམ་སྦི་ཡ་སློབ་གྲྭ་ཆེན་མོའི་ནང་ཆོས་མཁས་པ་རོ་སྦིར་ ཐུར་རྨན་གྱིས་༼ཏཱ་ལའི་བླ་མ་སྔར་ལས་གནད་འགག་ཆེ་༽ཞེས་པའི་བརྗོད་གཞི་ཐོག་གཏམ་བཤད། ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་གྱིས་༼དཀྱིལ་འཁོར་གྱི་མཚོན་རྟགས་༽ཞེས་པའི་བརྗོད་གཞིའི་ཐོག་གཏམ་བཤད་བཅས་བོད་ཀྱི་རིག་གཞུང་དང་འབྲེལ་བའི་བྱེད་སྒོ་ལས་རིམ་མང་པོ་སྤེལ་འདུག་པར། དུས་སྟོན་འདིར་ཨེ་མོ་རི་དང་བློ་གསལ་གླིང་དགོན་པའི་དགེ་སློབ་ལས་བྱེད་གཙོས་པའི་ས་དེ་གའི་ཡུལ་མི་སྟོང་ཕྲག་མང་པོ་ཆེད་བཅར་མཉམ་ཞུགས་བྱས་ཡོད།
ཨེ་མོ་རི་དང་རྡ་ས་བོད་ཀྱི་དཔེ་མཛོད་ཁང་གི་ཚན་རིག་ལས་རིམ་གྱི་ཆ་ཤས་ཤིག་ནི་དེང་དུས་ཚན་རིག་གི་ཐ་སྙད་རྣམས་བོད་སྐད་དུ་ཕབ་སྒྱུར་བྱ་རྒྱུ་དེ་ཡིན་སྟབས། ལས་རིམ་དེ་དོན་ཕན་ལྡན་པ་ཞིག་ཡོང་ཆེད་ཨེ་མོ་རི་དང་བོད་ཀྱི་མཐུན་ཚོགས་ཀྱིས་རྒྱལ་སྤྱིའི་བོད་ཀྱི་ཚན་རིག་ཡིག་སྒྱུར་བྱ་བའི་བགྲོ་གླེང་ཚོགས་འདུ་ཞིག་ཨེ་མོ་རི་གཙུག་ལག་སློབ་གཉེར་ཁང་དུ་གོ་སྒྲིག་ཞུ་བཞིན་ཡོད་པ་དང་། ཐེངས་གཉིས་པའི་རྒྱལ་སྤྱིའི་བོད་ཀྱི་ལོ་ཙཱའི་བགྲོ་གླེང་ཚོགས་འདུ་དེ་དུས་སྟོན་འདི་དང་བསྟུན་ཏེ་གོ་སྒྲིག་བྱས་འདུག་པར། རྒྱ་གར་དང་ཨ་རིའི་མཐོ་སློབ་ཁག་གི་བོད་ཀྱི་རིག་གཞུང་དོན་གཉེར་པ། ཨེ་མོ་རིའི་དགེ་རྒན་དང་ཚན་རིག་དོན་གཉེར་པ་མང་པོ་ཞིག་གིས་ཉིན་བཞིའི་རིང་སོ་སོའི་བསམ་ཚུལ་དང་ཉམས་མྱོང་། ཡིག་སྒྱུར་བྱེད་ཐབས་ཀྱི་དཀའ་གནད། ཚན་རིག་གི་ཐ་སྙད་ཉིས་བརྒྱ་ལྷག་གི་སྟེང་བགྲོ་གླེང་ལྷུག་པོ་བྱས་ཡོད།
ཕྱི་ལོ་ ༢༠༠༧ ལོར་ཨེ་མོ་རི་གཙུག་ལག་སློབ་གཉེར་ཁང་གིས་སྤྱི་ནོར་ ༧ གོང་ས་བཅུ་བཞི་བ་མཆོག་ལ་ Presidential Distinguished Professor མཚན་ཐོབ་ཕུལ་ཞིང་། ༧ གོང་ས་མཆོག་ནང་ཆོས་ཚན་རིག་དང་འབྲེལ་བའི་མཛད་རིམ་མང་པོ་ཞིག་གི་ཆེད་འདི་ལོའི་ཕྱི་ཟླ་ ༡༠ ཚེས་ ༡༧ ནས་ ༡༩ བར་སླར་ཡང་ཨེ་མོ་རི་གཙུག་ལག་སློབ་གཉེར་ཁང་དུ་ཆིབས་སྒྱུར་གནང་གཏན་འཁེལ་འདུག
གསར་འགྱུར་མཁོ་སྤྲོད་པ། གཡང་འབུམ་རྒྱལ།
ལས་དོན་འདི་ལ་རྗེས་སུ་ཡི་རངས་ཡོད།
ལས་དོན་དེ་རྣམས་ནི་སོ་སོ་གིས་དཔལ་འབྱོར་དང་རྒྱལ་ཁབ་གྱི་ལམ་ལུགས་གཉིས་ཀ་ལ་ཕན་ངེས་ཡིནལ་བློ་གསལ་གླིང་ནི་ཕྱུག་པོ་གང་ལ་ཕྱུག་བ།།