༧གོང་ས་མཆོག་གིས་རྒྱ་གར་གྱི་མངའ་སྡེ་ཨུ་ཊར་ཀན་ཌར་གྱི་མཛད་འཕྲིན་ཡོངས་སུ་གྲུབ་སྟེ་ཕྱི་ཚེས་ ༥ ཉིན་སི་ལོ་ཝི་ནི་ཡའི་ནང་ཞབས་སོར་བདེ་བར་འཁོད་ཡོད་པ་རེད།
ཟླ་འདིའི་ཕྱི་ཚེས་ ༣ ཉིན་གྱི་ཞོགས་པར་༧གོང་ས་མཆོག་བཞུགས་སྒར་ནས་ཆིབས་བསྒྱུར་གྱིས་ཨུ་ཊར་ཀན་ཌར་མངའ་སྡེའི་ནང་ཞབས་སོར་བདེ་བར་འཁོད་ཡོད་པ་དང་། ཕྱི་ཚེས་ ༤ ཉིན་ཧིན་རྡུའི་གནས་མཆོག་ཧ་རི་ཌ་ཝར་དུ་ཧིན་རྡུའི་བླ་ཆེན་བླ་ཆེན་ Swami Gurusharanandji Maharaj མཆོག་དང་ Uttarkhand མངའ་སྡེ་གཉིས་ཟུང་འབྲེལ་ཐོག་གྲོང་ཁྱེར་རི་ཤི་ཀི་ཤིའི་ནང་ཆུ་བོ་གངྒཱ་གཙང་བཟོའི་མཛད་སྒོ་ཞིག་འཚོགས་པའོ་ཐོག་ཆིབས་བསྒྱུར་བསྐྱངས་ཏེ། དེར་ཡོད་ཆོས་ལུགས་ཁག་གི་དབུ་ཁྲིད་དང་བྷེ་ཇེ་པེ་ B J P དཔོན་རིགས། མངའ་སྡེ་བློན་ཆེན་བཅས་གནད་ཡོད་མི་སྣ་མང་པོ་ལྷན་འཛོམས་ཐོག་༧གོང་ས་མཆོག་གིས་བཀའ་སློབ་གསུང་བཤད་གནང་ཡོད་པ་རེད། ཉིན་དེར་༧གོང་ས་མཆོག་གིས་གསུང་དོན། དེང་སང་འཛམ་གླིང་གི་ཡུལ་གྲུ་མང་པོའི་ནང་དུ་ཆུ་མ་འདང་བའི་དཀའ་ངལ་འཕྲད་བཞིན་ཡོད་སྟབས། ང་ཚོས་འཛམ་གླིང་འདིར་བདག་གཅེས་བྱ་རྒྱུ་ཧ་ཅང་གལ་ཆེན་ཡིན་པ་མ་ཟད། འབྱུང་འགྱུར་གྱི་མི་རབས་རྣམས་ལ་བསམ་གཞིགས་བྱ་རྒྱུ་དེ་བས་ཀྱང་གལ་ཆེན་པོ་ཡིན་པའི་བཀའ་སློབ་གནང་ཡོད་པར་མ་ཟད། ཡང་༧གོང་ས་མཆོག་གིས། ཨེ་ཤ་ཡའི་གླིང་ཕྲན་ནང་ཡོད་པའི་གཙང་ཆུ་དེ་དག་ལ་བརྟེན་ནས་མི་ས་ཡ་མང་པོའི་འཚོ་བ་སྐྱེལ་བཞིན་ཡོད་པ་དང་། གཙང་བོ་དེ་དག་གི་འབྱུང་ཁུངས་གཙོ་བོ་བོད་ཆགས་ཡོད། ཚ་དྲོད་ཀྱི་དབང་གིས་མཐོ་སྒང་བོད་ཀྱི་གངས་རི་ཞུ་ནས་ཁོར་ཡུག་ལ་འཕོ་འགྱུར་ཤུགས་ཆེ་འགྲོ་གིན་ཡོད་སྟབས། གཙང་ཆུ་དེ་དག་ལ་དམིགས་བསལ་གྱི་བདག་གཅེས་བྱ་དགོས་པ་དང་། དེ་བཞིན་བོད་འདི་འཛམ་གླིང་ཐོག་འཁྱགས་རོམ་གསུམ་པ་ཞིག་ཏུ་བརྩིས་ཡོད་སྟབས། བོད་ཀྱི་ཁོར་ཡུག་ལ་རྒྱ་ནག་གཞུང་ནས་བདག་གཅེས་དགོས་པའི་འབོད་སྐུལ་ཡང་གནང་ཡོད་པ་རེད། ཐེངས་འདིའི་ མཛད་སྒོའི་ཐོག་བླ་ཆེན་སཱ་མི་རཱམ་ཌིབ་ཇི་ལགས་ཀྱི་སྣེ་ཁྲིད་འོག་མ་འོངས་པར་ཆུ་བོ་གངྒཱ་གཙང་མར་ཉར་རྒྱུའི་ཐད་ཆོས་ལུགས་ཁག་གི་གནད་ཡོད་བླ་ཆེན་རྣམ་པས་དམ་བཅའ་བཞག་ཡོད་འདུག
ཕྱི་ཚེས་ ༤ ཉིན་རྒྱ་གར་མངའ་སྡེ་ཁག་གི་མཛད་འཕྲིན་ཡོངས་སུ་གྲུབ་རྗེས་༧གོང་ས་མཆོག་སི་ལོ་ཝི་ནི་ཡའི་གྲོང་ཁྱེར་སྤྱི་ཁྱབ་སྐུ་ཞབས་ཧྤུ་རན་ཁི་ཁེན་ལེའར Franc kangler དང་ཡུལ་དེའི་ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་ Ivo Vajgl རྣམ་གཉིས་གཙོས་པའི་གནད་ཡོད་མི་སྣ་དང་དེར་ཡོད་བཙན་བྱོལ་བོད་མི་བཅས་མི་སྣ་ ༢༠༠ ལྷག་གི་ཕེབས་བསུའི་ཁྲོད་ཕྱི་ཚེས་ ༥ ཉིན་སི་ལོ་ཝི་ནི་ཡའི་རྒྱལ་སའི་གནམ་ཐང་དུ་ཞབས་སོར་བདེ་བར་འཁོད་ཡོད་པ་དང་། དེ་རིང་སྔ་དྲོ་ྋགོང་ས་མཆོག་གིས་མ་རི་བྷོར་གྲོང་ཁྱེར་གྱི་སྐྱེད་མོས་ཚལ་ཞིག་ཏུ་ཆིབས་བསྒྱུར་གྱིས་ལྗོན་ཤིང་འདེབས་འཛུགས་གནང་རྗེས། མ་རི་བྷོར་སློབ་གྲྭ་ཆེན་མོའི་མདུན་ཐང་དུ་སློབ་ཕྲུག་ ༡༠༠༠ བརྒལ་བར་བཀའ་སློབ་བསྩལ་ཡོད་འདུག་ལ། ཉིན་རྒྱབ་ཌོབ་རཱ་ནཱ་ཊ་བྷོར་ཚོགས་ཁང་ཆེན་མོའི་ནང་མང་ཚོགས་ ༥༠༠༠ ཙམ་ལ་སྟོང་ལོ་གསར་པའི་ཀུན་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་རེད། ཕྱི་ཚེས་ ༧ ཉིན་ནས་བཟུང་༧གོང་ས་མཆོག་གིས་ཡུ་རོབ་ཤེས་ཡོན་དང་སྒྱུ་རྩལ་བསྟི་གནས་ཁང་དང༌མ་རི་བྷོར་གཙུག་ལག་སློབ་ཁང་གཉིས་ཀྱི་གདན་ཞུའི་ཐོག་ཤེས་ལྡན་མི་སྣ་དང་གྲོས་ཚོགས་འཐུས་མི། དེ་བཞིན་ཆེད་མངགས་གདན་ཞུ་གནང་བའི་སྐུ་མགྲོན་བཅས་མི་གྲངས་ ༨༨༠ ལྷག་ལ་རྒྱལ་ཡོངས་འཁྲབ་སྟོན་ཚོགས་ཁང་ཆེན་མོའི་ནང་བྱམས་བརྩེའི་བརྗོད་གཞིའི་ཐོག་བཀའ་སློབ་གནང་འཆར་ཡོད་པ་རེད།
རྗེ་བཙུན་བླ་མའི་སྐུ་ཚེ་རབ་བརྟན་ཅིང་།
རྣམ་དཀར་འཕྲིན་ལས་ཕྱོགས་བཅུར་རྒྱས་པར་ཤོག།