ལྷ་མོའི་འཁྲབ་གཞུང་འདི་བོད་པའི་མགྲིན་པར་མ་གཏོཊ་མི་འཐོན།

ལྷ་མོའི་གཞུང་འདི་ནི་བོད་པ་གཅིག་པུར་མ་གཏོགས་གཞན་སུ་གང་ལའང་མེད་པའི་གཞུང་ཁྱད་པར་བ་ཞིག་ཡིན། སྤྱིར་བཏང་གི་གླུ་གཞས་ཞབས་བྲོ་ལྟ་བུར་མཚོན་ན། འཛམ་གླིང་གི་མི་ཚང་མས་ལད་ཟློས་བྱ་ཐུབ་པ་ཞིག་དང་འཁྲབ་ཐུབ་པ་ཞིག་རེད། དེ་དག་མིའི་རྒྱུད་དུ་ཉོན་མོངས་འཕེལ་བྱེད་ཅིག་ཀྱང་ཆགས་ཀྱི་ཡོད། བོད་པའི་ལྷ་མོའི་གཞུང་འདི། བོད་པ་རང་གི་མགྲིན་པ་ལས་མ་གཏོགས་ལུང་པ་གཞན་སུ་གང་གིས་ཀྱང་ལད་ཟློས་བྱེད་མི་ཐུབ་པ་ཞིག་ཆགས་ཡོད་ཟེར།

བོད་གཞུང་ཟློས་གར་ཚོགས་པས་ལྔ་བཅུའི་དུས་དྲན་གྱི་ཆ་ཤས་སུ་ཉེ་ཆར་ཕྱི་ཚེས་ ༢༧ ནས་མགོ་འཛུགས་ཀྱིས་ཞོ་སྟོན་རྒྱས་པ་ཐེངས་ ༡༥ བ་དེ་དབུ་འཛུགས་བྱས་ཡོད་ཅིང་། ཕྱོགས་མཐའ་ཁག་ནས་ཆེད་ཕེབས་གནང་བའི་ལྷ་མོའི་ཚོགས་པ་བརྒྱད་ཀྱིས་བོད་ཀྱི་ཟློས་གར་ཆེན་མོ་བརྒྱད་དཀྱུལ་སྙིང་དུ་བཟུང་སྟེ། བཞུགས་སྒར་ཉེ་འཁོར་གྱི་སློབ་གྲྭ་ཁག་ཏུ་ལྷ་མོའི་འཁྲབ་གཞུང་སྣ་ཚོགས་གཟིགས་འབུལ་ཞུས་ཡོད། དེ་རིང་སྔ་དྲོར་བོད་གཞུང་ཟློས་གར་ཚོགས་པའི་ཐང་ཆེན་དུ་མཇུག་སྡོམ་མཛད་སྒོ་བསྡུས་ཡོད། མཛད་སྒོའི་སྐུ་མགྲོན་གཙོ་བོར་ཤེས་རིག་བཀའ་བློན་ཐུབ་བསྟན་ལུང་རིག་མཆོག་གཙོས་པའི་དམངས་གཙོའི་ཀ་བ་གསུམ་གྱི་སྐུ་ཚབ་དང་གཞུང་ཞབས་ལས་བྱེད་ཆེ་ཕྲ། གཞུང་འབྲེལ་མིན་པའི་ཚོགས་པ་ཁག་གི་མཛད་གཙོ་རྣམ་པ། ཕྱོགས་མཐའ་ཁག་ནས་ཕེབས་པའི་འཁྲབ་སྟོན་པ་རྣམ་པ། དེ་བཞིན་བཞུགས་སྒར་ཁུལ་གྱི་སེར་སྐྱ་མང་ཚོགས་བཅས་འདུ་འཛོམས་སར་བོད་གཞུང་ཟློས་གར་ཚོགས་པས་ཆོས་རྒྱལ་དྲི་མེད་ཀུན་ལྡན་གྱི་རྣམ་མཐར་འཁྲབ་སྟོན་བྱས་སོང་།

ཉིན་རྒྱབ་ཆུ་ཚོད་ ༤ སྟེང་ཤེས་རིག་བཀའ་བློན་ཐུབ་བསྟན་ལུང་རིག་མཆོག་གིས་མཇུག་སྡོམ་གྱི་གསུང་བཤད་གནང་དོན། ང་ཚོ་ཚང་མ་བཙན་བྱོལ་དུ་སླེབས་ཡོད་པ་རེད། ང་ཚོར་ལས་འཁུར་ཆེན་པོ་ཞིག་ཡོད་པ་ནི་བོད་དོན་བདེན་མཐའ་གསལ་ཐབས་སུ་འཐབ་རྩོད་ཀྱི་ལས་འགུལ་སྤེལ་རྒྱུ་དེ་ཡིན། ལས་འགུལ་སྣ་ཚོགས་ལས་རྩ་བ་དང་གལ་ཆེ་ཤོས་དེ་ན་གཞོན་ཚོས་ཤེས་ཡོན་སློབ་སྦྱོང་དང་། བོད་པའི་རིག་གཞུང་སྲུང་སྐྱོབ་དེ་རེད། དེར་བརྟེན། ཟློས་གར་ཚོགས་པ་འདིས་རྐང་འགན་བཞེས་པའི་ཐོག་ནས་གཞིས་ཆགས་ཁག་ཏུ་ལྷ་མོའི་ཚོགས་པ་བཙུགས་ཡོད། འདི་དག་གིས་བོད་དོན་བདེན་མཐའ་གསལ་ཐབས་ལ་ལས་འགུལ་རླབས་པོ་ཆེ་ཞིག་གྲུབ་ཡོད། ང་ཚོ་བཙན་བྱོལ་དུ་ཡོང་དགོས་དོན་གཙོ་གྲས་ཤིག་ཀྱང་། བོད་རང་གི་ཆོས་དང་རིག་གཞུང་མ་ཉམས་རྒྱུན་འཛིན་དང་ཉམས་པ་སླར་གསོ་བྱ་རྒྱུ་དེ་རེད། སྤྱིར་ཟློས་གར་རིགས་དང་། ཡང་སྒོས་ལྷ་མོའི་གཞུང་དེ་བོད་མི་རིགས་ཀྱི་འཚོ་བ་དང་བོད་མི་རིགས་ཀྱི་བསམ་བློའི་འཁྱེར་སོ། བོད་མིའི་རིག་གཞུང་མཚོན་བྱེད་ཐུན་མོང་མ་ཡིན་པ་ཞིག་ཆགས་ཡོད། དཔེར་ན། དྲི་མེད་ཀུན་ལྡན་ལྟ་བུར་ཆ་བཞག་ན། བོད་པའི་རིག་གཞུང་ཟམ་དུ་མ་ཟད། ཆོས་དང་འབྲེལ་བའི་བསླབ་བྱ་དང་ལས་རྒྱུ་འབྲས། མི་རྟག་པའི་སྐོར། བཟང་སྤྱོད་ཀྱི་བསླབ་བྱ་སོགས་ཀྱི་གཞུང་ཞིག་ཆགས་ཡོད། ལྷ་མོའི་གཞུང་འདི་ནི་བོད་པ་གཅིག་པུར་མ་གཏོགས་གཞན་སུ་གང་ལའང་མེད་པའི་གཞུང་ཁྱད་པར་བ་ཞིག་ཆགས་ཡོད། སྤྱིར་བཏང་གི་གླུ་གཞས་ཞབས་བྲོ་ལྟ་བུར་མཚོན་ན། འཛམ་གླིང་གི་མི་ཚང་མས་ལད་ཟློས་བྱ་ཐུབ་པ་ཞིག་དང་འཁྲབ་ཐུབ་པ་ཞིག་རེད། དེ་དག་མིའི་རྒྱུད་དུ་ཉོན་མོངས་འཕེལ་བྱེད་ཅིག་ཀྱང་ཆགས་ཀྱི་ཡོད། བོད་པའི་ལྷ་མོའི་གཞུང་འདི། བོད་པ་རང་གི་མགྲིན་པ་ལས་མ་གཏོགས་ལུང་པ་གཞན་སུ་གང་གིས་ཀྱང་ལད་ཟློས་བྱེད་མི་ཐུབ་པ་ཞིག་ཆགས་ཡོད། ཅེས་གསུངས་སོང་།

ཁོང་གིས་མུ་མཐུད་དུ་ལྷ་མོ་ཚོགས་པ་ཁག་གིས་འཁྲབ་གཞུང་སྣ་གཅིག་རེ་གཙོ་འདོན་གྱིས་སྦྱང་གལ་ཆེ་སྐོར་གསུངས་དོན། སྔོན་མ་ཞོ་སྟོན་སྐབས་ཤིག་ལ་༧གོང་ས་མཆོག་གིས་བཀའ་སློབ་ཅིག་གནང་འདུག ལྷ་མོའི་འཁྲབ་སྟོན་དེ་ཡར་རྒྱས་སུ་གཏོང་རྒྱུར་ཐབས་ཤེས་མང་པོ་ཡོད་པ་རེད། ཐབས་ཤེས་དེ་དག་ནང་མང་ཚོགས་ཀྱི་དོ་སྣང་འདྲེན་དགོས་པའི་རིགས་ཤིག་དང་། ལྷག་པར་དུ་སློབ་ཕྲུག་ཚོར་ལྷ་མོའི་ཟློས་གར་མཐོང་ཐུབ་པ་དང་ཐོས་ཐུབ་པའི་ལམ་ཁ་ཞིག་བཟོ་ཐུབ་པ་ཡིན་ན། རིམ་གྱིས་གོམ་འཇགས་སུ་སོང་སྟེ་དོ་སྣང་སླེབས་པ་རེད། ཅེས་བཀའ་གནང་འདུག ཐེངས་འདིར་ཟློས་གར་ཚོགས་པས་ཕྱོགས་མཐའ་ཁག་གི་ལྷ་མོའི་ཚོགས་པ་ཁག་ལ་འགྲོ་སོང་བཏང་སྟེ་མགྲོན་འབོད་བྱས་པ་ལྟར། ངྷ་སའི་ཉེ་འཁོར་གྱི་སློབ་གྲྭ་ཁག་ནང་ལྷ་མོ་འཁྲབ་སྟོན་བྱས་འདུག དེ་ནི་རྒྱལ་བའི་བཀའ་བསྒྲུབས་པ་རེད། ཕྱི་ལོ་ ༡༩༩༦ ལོའི་ཞོ་སྟོན་སྐབས་༧གོང་ས་མཆོག་གིས་བཀའ་གནང་བཞག་པ་ཞིག་ད་དུང་ཡང་ལག་བསྟར་ཐུབ་ཀྱིན་མི་འདུག ལྷ་མོ་འཁྲབ་མཁན་སྐྱིད་སྡུག་ཚོགས་པ་ཁག་སོ་སོར་འགྲོ་སྟངས་འདྲ་མི་འདྲ་མང་པོ་ཡོད་པ་རེད། དེ་དག་ལས་སོ་སོས་སྣ་གཅིག་རེ་གཙོར་འདོན་བྱས་ཏེ་བདག་པོ་རྒྱག་ཐུབ་པ་ཡིན་ན་ཡག་པོ་རེད། ཅེས་བཀའ་གནང་འདུག ད་ལྟའི་ཆར་མང་ཆེ་བ་ཕྱོགས་གཅིག་ཡིན་པའི་བཟོ་འདྲ་བོ་འདུག སྔོན་མ་བོད་ནས་འཁྲབ་མྱོང་མཁན་ཡོད་ན། དེ་དག་ནང་ཏན་ཏན་བསྐྱར་གསོ་གནང་རྒྱུ་ཡོད་པ་རེད་སྙམ། ཐེངས་འདིར་ཕྱོགས་མཐའ་ནས་ཕེབས་མཁན་ཁྲོད་ལོ་གཞོན་མང་པོ་འདུག དེ་དག་རྣམ་འགྱུར་གསར་པ་ཞིག་དང་རེ་བ་གསར་པ་ཞིག་རེད། ཡང་དགུང་ལོ་དྲུག་ཅུ་བརྒལ་ཡོད་པ་འགའ་རེ་དང་། དགུང་ལོ་ ༩༠ སོན་པའི་འཁྲབ་སྟོན་པ་ཞིག་ཀྱང་ཡོད་རབས་འདུག འདི་དག་གཟི་བརྗིད་ཆེན་པོ་རེད། ཁོང་ཚོའི་སེམས་ཤུགས་དང་འཁྲབ་སྟོན་གནང་སྟངས་ཀྱིས་ན་གཞོན་ཚོར་མིག་དཔེ་ལྟ་ས་དང་སེམས་ཤུགས་འཕར་བྱེད་ཆགས་ཡོད། ཅེས་གསུངས་བྱུང་།

མཇུག་མཐར་ཁོང་གིས་ཟློས་གར་ཚོགས་པའི་ཚོགས་མི་ཚོ་གཅིག་ཐོན་གཉིས་ཐོན་མི་བྱ་རྒྱུར་འབོད་སྐུལ་གནང་དོན། ཞོ་སྟོན་ལ་ལྟ་སྐབས་ང་རང་གི་སེམས་ལ་འདི་འདྲ་ཞིག་འཁོར་མྱོང་ཡང་། ངས་ལྷ་མོ་འཁྲབ་སྟངས་མི་ཤེས་སྟབས་བཤད་རྒྱུའི་སྤོབས་པ་མི་འདུག་མོད། ༧གོང་ས་མཆོག་གི་བཀའ་སློབ་ཅིག་ཏུའང་བཀོད་འདུག ལྷ་མོ་འཁྲབ་པའི་བར་མཚམས་རེར་བཞད་བགད་སློང་རྒྱུ་ཞིག་འདུག དེ་ལ་ཅུང་ཙམ་ལེགས་བཅོས་གཏོང་རྒྱུ་མེད་དམ་སྙམ་སོང་། ལྷག་པར་དུ་ལྷ་མོ་འཁྲབ་སྐབས་ཁྱིམ་མཚེས་རྒྱལ་ཁབ་ཀྱི་མིང་སྨོས་དགོས་སྟབས། དེ་དག་ལ་དམའ་འབེབས་མི་འགྲོ་བ་དང་སྐྱུག་བྲོ་བོ་མ་ཡིན་པ་ཞིག་གནང་དགོས། ༧གོང་ས་མཆོག་གི་བཀའ་སློབ་ནང་། རྣམ་མཐར་དེ་དག་ལ་བཟོ་བཅོས་རྒྱག་དགོས་པ་མེད་པའི་བཟོ་འདྲ་བོ་རེད། འོན་ཀྱང་། གཏམ་བརྗོད་རིགས་ཁ་ཤས་དེ་རིང་ཁ་སང་གི་གནས་ཚུལ་དང་མཐུན་པར་ཏོག་ཙམ་ཚད་ལོང་པ་ཞིག་ལ་བཅོས་དགོས་པ་གལ་ཆེན་པོ་འདུག ཅེས་གསུངས་འདུག ཅེས་དང་།

བོད་གཞུང་ཟློས་གར་ཚོགས་པ་ཟེར་ན་འདྲ་ལ། ལྷ་མོའི་ཚོགས་པ་ཟེར་ནའང་འདྲ། བཞུགས་སྒར་ངྷ་རམ་ས་ལར་ཡོད་པའི་ཚོགས་པ་འདི་སྡོང་བོ་ལྟ་བུར་མཚོན་ན་རྩ་བ་ཆགས་ཡོད། འདི་སྲ་ཐག་ཐག་ཅིག་དང་ཡག་པོ་ཞིག་བྱུང་ན། ཕྱོགས་མཐའ་ཁག་གི་ལྷ་མོའི་ཚོགས་པ་ཚོས་དཔེ་ལྟ་ས་དང་སློབ་སྦྱོང་བྱ་ཡུལ་དུ་ཕན་ཐོགས་པ་རེད། དེའི་སྐོར་ལ་༧གོང་ས་མཆོག་གིས། ཟློས་གར་གྱི་མ་རྩ་ལྟ་བུ་དེ་ཟློས་གར་ཚོགས་པ་འདིའི་ཚོགས་མི་ཆགས་ཡོད། ཚོགས་མི་གཅིག་ཐོན་གཉིས་ཐོན་བྱས་ན་སྡོང་བོ་དེ་ཡར་རྒྱས་ལ་འགལ་རྐྱེན་དུ་འགྲོ་བ་རེད། འདིར་ཡོད་པ་ཚོས་མུ་མཐུད་ཤུགས་བརྒྱབས་ཏེ་ཚོགས་པ་འདི་ཡར་རྒྱས་སུ་གཏོང་དགོས། ཅེས་གསུངས་འདུག ང་རང་གིས་གོ་ཚོད་བྱས་པ་ཡིན་ན། ཕྱོགས་མཐའི་ལྷ་མོ་ཚོགས་པ་ཁ་ཤས་ལ་དགེ་རྒན་མེད་པ་འདྲ། གཞིས་ཆགས་ཁག་ནང་ཞེ་དྲག་དཀའ་ངལ་ཡོད། ཚང་མ་སོ་སོའི་ཉིན་རེའི་འཚོ་བའི་ཆེད་དུ་རྒྱུགས་དགོས་པ་རེད། འོན་ཀྱང་། འགན་ལེན་ཐོག་དེ་རིང་འདིར་ཞོ་སྟོན་གཟིགས་འབུལ་གྱི་གོ་སྐབས་བྱུང་བ་རེད། འདི་དག་རླབས་ཆེན་རེད། དགེ་རྒན་མེད་པ་དག་ལ་དབུས་དང་ས་གནས་ཁག་མཉམ་རུབ་ཐོག་དཀའ་ངལ་སེལ་ཐབས་བྱ་དགོས་པ་རེད། ཅེས་གསུངས་བྱུང་།