སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ་དང་ལྔ།

གྲོགས་པོ་རྡོར་རྗེ་སྐྱབས་ཀྱིས། འདང་ནུབ་ང་རང་ལ་གྲོགས་པོ་སུ་གང་གིས་ནང་དུ་ཡང་ཉལ་ས་མ་རེག་པར་ཕར་ཕྱོགས་ཀྱི་ཁང་སྟོང་ཞིག་གི་ནང་དུ་ཉལ་བ་ཡིན། ཉལ་ཆས་ཀྱང་དྲོན་པོ་ཞིག་མེད་སྟབས། གཉིད་ཡག་པོ་ཞིག་འཁུགས་ཐུབ་མ་སོང་། དེ་ནས་ད་སྔ་བོ་ནས་ཡོང་བ་ཡིན།

བློ་བཟང་གིས་སྐད་ཆ་དེར་གོ་བ་དང་ངོ་གནོང་བཞིན། དངོས་ནས་ཁྱེད་རང་ལ་དཀའ་ངལ་སྤྲད་པ་དེར་དགོངས་དག ད་སྐྱིད་པོ་བྱས་དེ་རང་གི་ཉལ་སའི་ནང་དུ་ཉལ་རོགས། ངེད་གཉིས་ཡར་བླངས་དེ་ཕྱི་རོལ་དུ་འཆམ་འཆམ་ཞིག་བྱེད་ཞོར་དུ་ཞོགས་ཇ་འཐུང་དུ་འགྲོ་ཡི་ཡིན། ཁྱེད་རང་ལ་ངས་ཟ་རྒྱུ་ཞིག་ཁུར་ནས་ཡོང་།

མཚན་མོ་དེར་བློ་བཟང་གིས་བདེ་འཚོའི་རེ་འདོད་ལྟར། ཁོ་གཉིས་བར་དུ་ལུས་འབྲེལ་བཞག་མེད་པ་མ་ཟད། ཁོ་གཉིས་ཀྱིས་ཕན་ཚུན་ལ་ག་ལེར་བརྟག་དཔྱད་བྱས་རྗེས་སུ། ཕྱོགས་གཉིས་སུ་རྙོག་དྲ་གང་ཡང་མེད་སོང་བ་ཡིན་ན། ད་གཟོད་མི་ཚེ་ཡི་ལམ་ཁར་ལྷན་གཅིག་དུ་བགྲོད་རྒྱུའི་ཕྱོགས་སུ་གྲོས་ཁ་འཆམ་པ་རེད།

བློ་བཟང་གིས། ཁྱེད་རང་གིས་ཤེས་གསལ་རེད། ངས་སྔོན་ཆད་ཉི་མ་ལྷ་སྒྲོན་ལ་ཡང་བཤད་མྱོང་ཡོད། ང་ལ་དེང་སྐབས་མཚམས་སྐྱིད་ཟེར་བའི་བུ་མོ་ཞིག་གིས་རྙོག་དྲ་བཟོ་བཞིན་ཡོད་པ་དང་གཅིག་བྱས་ན་ང་རང་རྡ་སར་སོང་དུས་ཁོ་མོས་སྒུག་ནས་ཡོད་སྲིད་པ་ཡིན་ལ། དེ་དུས་དོན་དག་དེ་ཡང་ལེགས་པོའི་སྒོ་ནས་ཐག་གཅོད་མ་ཐུབ་པ་ཡིན་ན། འུ་གཉིས་ཀྱི་མི་ཚེ་ལ་བར་ཆད་ཡོང་སྲིད་པ་རེད། དེ་ཐག་གཅོད་བྱུང་མིན་སྐོར་ལ་ང་རང་རྡ་སར་འབྱོར་ནས་ཁྱེད་རང་ལ་ཁ་པར་གཏོང་ཆོག་གི་རེད། དེ་ཡི་བར་དུ་འུ་གཉིས་ཀྱི་བར་དུ་ལུས་འབྲེལ་མ་བཞག་པ་ཡིན་ན་དངོས་ནས་འཚམ་པོ་རེད། ངས་ཀྱང་ཁྱེད་རང་གི་མི་ཚེའི་ནང་དུ་བར་ཆད་གཏོང་འདོད་མེད།

བདེ་འཚོས། ཁྱེད་རང་གིས་དེ་འདྲའི་བསམ་བློ་སྡུག་ཐུག་དེ་འདྲ་གཏོང་དགོས་དོན་ཡོད་པ་མ་རེད། ངས་ལོ་ངོ་ག་ཚོད་ཅིག་ལ་སྒུག་དགོས་ཀྱང་སྒུག་ཐུབ་ཀྱི་ཡོད། ཁྱེད་རང་གི་ཕྱོགས་ནས་ང་རང་ལ་དངོས་ནས་སེམས་ཐག་ཆོད་པོའི་ལན་ཞིག་སླེབས་སོང་བ་ཡིན་ན། ང་རང་གི་རེ་བ་ལ་ཁྱེད་རང་གིས་བུ་མོ་དེ་དང་ཐག་གཅོད་ཡག་པོ་ཞིག་བྱེད་ཐུབ་རྒྱུ་རེད་འདོད་ཀི ཡིན་ཡང་། ཁྱེད་རང་གི་བཤད་ཚུལ་བལྟས་པ་ཡིན་ན་དངོས་ནས་བུ་མོ་དེ་ནི་ཁྱེད་རང་ལ་སེམས་གཏིང་ནས་དགའ་བཞིན་ཡོད་པ་འདྲ།

བློ་བཟང་གིས། རེད། རེད། ངས་ཀྱང་སྔོན་ཆད་ཁོ་མོ་དངོས་ནས་ང་རང་ལ་སེམས་གཏིང་ནས་དགའ་མཁན་ཞིག་རེད་བསམ་མྱོང་ཡོད། སྔོན་ཆད་དེང་སྐབས་ཁོ་མོས་བཤད་སྟངས་བྱེད་སྟངས་ཚང་མར་བརྟག་དཔྱད་བྱས་རྗེས་སུ། ང་རང་ཁོ་མོའི་དགའ་སྟངས་དེ་ལ་དོགས་པ་ཡོང་གི་འདུག་ལ། ཁོ་མོའི་དགའ་བ་དེ་ནི་སྒེར་སེམས་ཁོ་ན་ལས་ཕྱོགས་གཉིས་ཀྱི་མི་ཚེ་ལ་བསམ་བློ་གཏོང་བའི་དགའ་བ་ཞིག་གཏན་ནས་རེད་མི་འདུག དེ་ཡི་སྟབས་ཀྱིས་དགའ་སྟངས་འདིའི་རིགས་ལ་བརྩེ་དུང་ཟབ་མོ་ཞིག་ཡོད་མི་སྲིད་པ་ཡིན། གང་ལྟར། ཁྱེད་རང་གིས་ཕྱོགས་ཡར་མར་མང་བོ་ལ་བསམ་བློ་མ་གཏོང་། ངས་ཁྱེད་རང་ལ་འབྲེལ་བ་བྱེད་ཁོ་ཐག་ཡིན། ད་དུང་ངེད་གཉིས་ལ་འདི་ནས་འགྲོག་ཡུན་ཡང་བདུན་ཕྲག་གཉིས་གསུམ་ཞིག་འདུག ག་ལེར་བཤད་ཆོག་གི་རེད།

ཁོ་གཉིས་ལག་པའི་ནང་དུ་ལག་པ་བཞག་ནས་གློག་བརྙན་ལས་ཁུངས་ཀྱི་ར་སྐོར་ནང་དུ་འབྱོར་དུས་སུ། ཉི་མ་ལྷ་སྒྲོན་ཡང་གུང་སེང་གི་དུས་ཚོད་རྫོགས་པ་དང་ཁོ་མོའི་ཁྱོ་ག་ཡང་ཕྱིར་དམག་སྒར་དུ་སོང་ཟིན་པ་དང་ཁོ་མོ་ཕྱིར་ལས་ཀར་ཡོང་བ་དང་འཕྲད་པ་རེད།