རྔ་པ་རྫོང་འབྲིང་རིམ་མི་དམངས་ཁྲིམས་ཁང་གིས་ས་བྱི་ཞི་རྒོལ་ཆེན་མོ་དང་འབྲེལ་བ་ཡོད་པའི་ཉེས་མིང་འོག་བོད་མི་གསུམ་ལ་ལོ་དྲུག་ནས་བཅུ་གསུམ་བར་གྱི་ཁྲིམས་ཐག་བཅད་ཡོད་འདུག
བཞུགས་སྒར་ཀིརྟི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་གིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རྔ་པའི་ཇོ་ལེབ་སྡེ་བའི་ཇོ་ཤེར་ཚང་གི་རྔ་པ་ཀིརྟི་དགོན་གྱི་གྲྭ་ཆོས་དར། རང་ལོ་ ༣༤ ཡིན་པ་ཁོང་ཕྱི་ལོ་ ༢༠༠༩ ཟླ་ ༨ ཚེས་ ༢༥ ཡས་མས་སུ་འཛིན་བཟུང་བྱས་ནས་ད་བར་ཐག་གཅོད་གང་ཡང་མ་བྱས་ཀྱང་འདི་ཟླའི་ཚེས་ ༩ ཉིན་རྔ་པ་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་རྔ་པའི་ས་བྱི་ཞི་རྒོལ་ཆེན་མོའི་སྣེ་ཁྲིད་པ་དང༌། ཆབ་སྲིད་བཙོན་ཟུར་ཡིན་པའི་ཉེས་མིང་འོག་བཙོན་འཇུག་ཁྲིམས་ཐག་ལོ་ ༡༣ བཅད་ཡོད་འདུག་ལ། ཁོང་འཛིན་བཟུང་མ་བྱས་སྔོན་དུ་འཛིན་བཟུང་བརྡ་ཡིག་མང་པོ་སྦྱར་བར་མ་ཟད། ཁོང་རྒྱ་གཞུང་ལ་སྤྲོད་མཁན་ཡོད་ན་རྒྱ་སྒོར་འབུམ་གཉིས་ནས་གསུམ་བར་གྱི་རྔན་པ་སྤྲོད་རྒྱུ་ཡིན་ཚུལ་སོགས་ཀྱང་བརྡ་ཁྱབ་ཡི་གེ་སྔ་ཕྱིའི་ནང་འཁོད་འདུག་མོད། གོང་ཚེས་བར་ཁོང་བྲོས་བྱོལ་བྱས་ནས་ཐར་ཙམ་བྱུང་ཡང་སྐབས་དེར་ཁོང་རྔ་པ་རྫོང་ཐོག་གི་དོན་ཁོ་རྒྱག་པ་ཚང་ནས་འཛིན་བཟུང་བྱས་ཤིང་དོན་ཁོ་རྒྱག་པ་དང་ཁོང་གི་གཟའ་ཟླ་བསོད་ལྷ་གཉིས་ཀྱང་བཀག་ཉར་བྱས་པ་དང༌། བསོད་ལྷ་གློད་གྲོལ་བྱས་ཀྱང་དོན་ཁོ་ད་དུང་གློད་མི་འདུག ༡༩༩༨ ལོར་རྔ་པའི་དགོན་པ་ཁག་ལ་རྒྱལ་གཅེས་ཆོས་གཅེས་ཀྱི་ལས་འགུལ་ཟེར་བ་བཙན་སྤེལ་བྱེད་སྐབས་ཁོང་ལ་བོད་རང་བཙན་གྱི་ཡི་གེ་མང་པོ་སྦྱར་འགྲེམས་བྱས་པའི་ཉེས་མིང་འོག་ལོ་ ༥ བཙོན་འཇུག་ཁྲིམས་ཐག་བཅད་དེ་ ༢༠༠༣ ལོར་བཙོན་གྲོལ་ཐོབ་ཡོད།
ཡང་རྔ་པ་ཇོ་ལེབ་སྡེ་བའི་ཞས་ཁོ་མ་ཚང་གི་འཇིགས་མེད། རང་ལོ་ ༤༠ ཡིན་པ་ཁོང་ཕྱི་ལོ་ ༢༠༠༩ ཟླ་ ༢ ཚེས་ ༧ ཉིན་འཛིན་བཀག་ཉར་བྱས་ནས་ད་བར་ཐག་གཅོད་གང་ཡང་མ་བྱས་པར་ལུས་མོད་འདི་ཟླའི་ཚེས་ ༩ ཉིན་རྔ་པ་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་ཁོང་ལ་ཕྱི་ལོ་ ༢༠༠༦ ལོ་ནས་ཕྱི་ཕྱོགས་སུ་འབྲེལ་བ་ཡོད་པར་མ་ཟད། རྒྱལ་ཁབ་ཀྱི་གསང་བ་ཕྱི་བསྒྲགས་བྱས་ཡོད་པའི་ཉེས་མིང་འོག་བཙོན་འཇུག་ཁྲིམས་ཐག་ལོ་ ༧ བཅད་ཡོད་འདུག་ལ། ཁོང་དེ་སྔོན་རྔ་པ་ཀིརྟི་དགོན་པའི་གྲྭ་པ་ཡིན་ཞིང༌། ཕྱི་ལོ་ ༡༩༩༢ ལོར་བོད་རང་བཙན་གྱི་ཡི་གེ་སྦྱར་འགྲེམས་བྱས་པའི་ནག་ཉེས་འོག་ལོ་གཅིག་ལྷག་རིང་ཐག་གཅོད་གང་ཡང་མ་བྱས་པར་རྔ་པ་ནས་བཀག་ཉར་བྱས།
རྔ་པ་ཇོ་ལེབ་སྡེ་བའི་མགོ་ཚང་གི་རྔ་པ་ཀིརྟི་དགོན་པའི་གྲྭ་འཇམ་དབྱངས་ཕུན་ཚོགས་<འཇང་ཁོ༌>། རང་ལོ་ ༣༦ ཡིན་པ་ཁོང་ཕྱི་ལོ་ ༢༠༠༩ ཟླ་ ༣ ཚེས་ ༣ ཉིན་གྱི་མཚན་མོ་རང་ཤག་ནས་འཛིན་བཟུང་བྱས་པ་དེ་ནས་བཟུང་ད་བར་གར་ཡོད་ཙམ་གྱི་གནས་ཚུལ་འབྲེལ་ཡོད་ཚོས་ཤེས་རྟོགས་མ་བྱུང་བར་ལྷག་ཅིང༌། འདི་ཟླའི་ཚེས་ ༩ ཉིན་རྔ་པ་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་ཕྱི་ལོ་ ༢༠༠༦ ལོ་ནས་ཕྱི་ཕྱོགས་སུ་འབྲེལ་བ་ཡོད་པ་དང་རྒྱལ་ཁབ་ཀྱི་གསང་བ་ཕྱི་བསྒྲགས་བྱས་པའི་ཉེས་མིང་འོག་བཙོན་འཇུག་ཁྲིམས་ཐག་ལོ་ ༦ བཅད་ཡོད་འདུག་ལ། ལོ་སྔོན་མར་རྔ་པ་ཀིརྟི་དགོན་པའི་བཀྲ་བྷེས་རང་ལུས་མེར་སྲེག་གཏོང་སྐབས་ཉེན་རྟོག་པས་བཀྲ་བྷེར་མེ་མདའ་རྒྱབ་པའི་གནས་ཚུལ་འཇང་ཁོས་རྫུན་བཟོ་བྱས་པ་ཡིན་ཚུལ་འཇང་ཁོ་ཁོ་རང་གིས་ཁས་བླངས་སོང་ཞེས་གནས་ཚུལ་རྫུན་བཟོ་བྱས་པ་རྒྱ་ནག་གཞུང་འབྲེལ་ཤིན་ཧཱ་དྲ་བའི་ཐོག་ལ་ཐེངས་ཁ་ཤས་བཀོད།
ཨ་པ་ཞེས་པ་དེ་རྒྱ་སྐད་ཡིན་མིན་ཐེ་ཚོམ་ཡིན་ལ་དེ་ནི་རྒྱའི་ལོ་རྒྱུས་ནང་དུ་གསལ་བོ་ཞིག་བྲིས་མི་འདུག བཤད་སྟངས་གཞན་ཞིག་ནས་མངའ་པ་ཞེས་པའི་སྒྲའི་ཟུར་ཆགས་ནས་རྒྱ་སྐད་དུ་ཨ་པ་ཞེས་འབོད་ཀྱིན་པར་བཤད་མཁན་ཁག་གཅིག་འདུག་ལ། རྒྱུ་མཚན་ནི་རྔ་བ་ཞེས་པ་དེ་སྟོད་མངའ་རུ་ནས་ཡུལ་ཆད་ནས་ད་ལྟའི་ཨ་མདོ་རྔ་བ་ཞེས་འབོད་པ་དེར་གཞིས་པ་ནས་བཟུང་མངའ་བ་ཆད་པའི་མངའ་རུ་པ་ཞེས་བཏགས་བཤད་ལ། དེ་བཞིན་རྒྱ་རིགས་བོད་སྐད་མི་འཁྱོངས་པ་དག་གིས་མངའ་པ་ལ་ཨ་པ་ཞེས་འབོད་འགོ་ཚུགས་པར་བཤད་མོད། འོན་ཀྱང་། རྔ་བ་རང་གི་ཡིག་རྙིང་དག་ཏུ་རྔ་བ་ཞེས་བྲིས་འདུག་པ་ལས་རྔ་པ་ཞེས་བྲིས་པ་བྱེས་བསྡོད་བོད་པ་ཚང་གི་ཚགས་པར་དག་དང་དཔེ་དེབ་ཁག་གཅིག་ལས་མ་མཐོང་། སྤྱིར་བཏང་ནས་རྔ་བ་ཞེས་པ་དེ་རྒྱ་ཆེ་ལ་ད་ལྟའི་རྒྱ་གཞུང་གིས་དབྱེ་སྟངས་བྱས་ན། རྔ་བ་ནི་ཁུལ་ཞིག་ཡིན་པ་དང་། དེའི་ནང་དུ་རྫོང་ཁག་བཅུ་གསུམ་ཙམ་དང་། ལྷག་པར་དུ་དེའི་ནང་གི་རྫོང་གཅིག་ལ་རྔ་བ་རྫོང་ཞེས་འབོད་པ་དེ། ད་སྐབས་ཡོངས་གྲགས་སུ་ཨ་མདོ་རྔ་བ་ཞེས་པ་དེ་རེད། དེ་བཞིན་རྫོང་ཁག་གཞན་གཞིས་ལ་ཡང་རྔ་བ་མཛོད་དགེ་དང་། རྔ་བ་ཧུང་ཡོན་ཞེས་འབོད་མོད། འོན་ཀྱང་། རྔ་བ་རང་གི་མི་མང་གིས་བཤད་སྟངས་བྱས་ན། མཛོད་དགེ་དང་ཧུང་ཡོན་སོགས་ནི་རྔ་བ་ཁུལ་གྱི་ཁོངས་གཏོགས་ཡིན་རུང་། རྔ་བ་རྫོང་གི་ཁོངས་སུ་མི་གཏོགས་སྟབས་མཛོད་དགེ་རྫོང་དང་། ཆུ་ཆེན་རྫོང་། ཟུང་ཆུ་རྫོང་སོགས་འབོད་པ་ལས། རྔ་བ་ཞེས་པའི་འབོད་ཚིག་དེ་དང་པོར་མི་སྦྱོར། གང་ལྟར་རྔ་བ་ཁུལ་འདི་ནི་རྫོང་ཁག་བཅུ་གསུམ་དང་། གྲུབ་མཐའ་ལྔ། རུང་འབྲོག་གཉིས་བཅས་ཀྱིས་གྲུབ་པའི་ས་ཁུལ་ཞིག་ཡིན་ལ། འདི་ནི་ལོ་རྒྱུས་ཀྱི་རང་བཞིན་ལྡན་པའི་བོད་ཀྱི་གྲུབ་ཆ་མེད་དུ་མི་རུང་བ་ཞིག་ཀྱང་ཡིན། དེར་བརྟེན་མདོ་སྨད་ཀྱི་ཡིག་ཚང་དག་ཏུ་ད་ལྟའི་བར་དུ་རྔ་བ་ཞེས་བྲིས་འདུག་པ་ལས་རྔ་པ་ཞེས་བྲིས་བ་གཅིག་ཀྱང་མཐོང་རྒྱུ་མི་སྣང་། དེ་ལྟར་ན་རྗེས་ཕྱོགས་ཅི་ནས་ཀྱང་རྔ་བ་ནི་རྔ་བ་རང་གི་མིང་ཐོག་ནས་གནས་ཐུབ་པར་བྱེད་རོགས་ཞུ་རྒྱུ་དང་། གལ་ཏེ་རྒྱ་གཞུང་གིས་འདོད་པ་བཞིན་རྙོག་དྲ་གསར་བ་ཞིག་འགོ་བརྩམ་པར་འདོད་པ་ཡིན་ན། དེ་བཞིན་གྱིས་ཀྱང་། ང་ཚོས་མུ་མཐུད་ནས་ནང་ཁུལ་རྩོད། མདོར་བསྡུས་ནས་བཤད་ན། རྔ་བ་ལ་རྔ་པ་ཞེས་བྲིས་པ་ནི་ལྷ་སའི་ཡུལ་སྐད་ལ་ངོ་སོ་བསྟོད་རྒྱུ་མང་སོང་བའམ། ཡང་ན་མ་དག་རྒྱུན་འབྱམས་དང་། རང་སྣང་གང་དྲན། ཡུལ་མི་ལ་མཐོང་ཆུང་། བཙན་སྐུལ་དང་དབང་ཤད་བྱས་པ་ཞིག་ལས། ཡིག་ངག་གཉིས་ཐོག་ནས་རྔ་བ་ཞེས་ཡོངས་སུ་གྲགས་ཟིན་པ་ཞིག་ལ་རྔ་པ་ཞེས་འབྲེལ་མེད་དོན་ཞིག་ཏུ་བསྒྱུར་ཐབས་བྱས་པ་དེར་རྙོག་དྲ་གསར་བ་ཞིག་ལས་གཞན་གང་ཡང་མ་མཐོང་།
རྔ་བའི་མི་མང་པོར་ཁྱོད་གང་ནས་ཡིན་ཞེས་དྲིས་ཚེ་ང་ཨ་པ་ནས་ཡིན་ཞེས་རྗོད་ཀྱིན་འདུག ཚིག་འདི་རྒྱ་སྐད་རེད། རྔ་བ་ནས་ཡིན་ལོབས་ཟེར་དུས་འཚེར་སྣང་བྱེད་མཁན་ཡང་འདུག ཆབ་ཆའི་མིའི་ཁྲོད་དུ་ཡང་ང་གུང་ཧོ་ནས་ཡིན་ཟེར་བ་ལས་ང་ཆབ་ཆ་ནས་ཡིན་ཞེས་བརྗོད་རྒྱུར་འཚེར་སྣང་ཅན་འདུག
གོང་གསལ་གནས་ཚུལ་དེ་ཨ་མདོ་རྔ་བའི་ཀིརྟི་དགོན་པའི་གྲྭ་བ་དག་ལ་བྱུང་བ་རེད་དམ་ཡང་ན་དེ་ལས་གཞན་པའི་རྔ་པ་ཞིག་ཡོད་པ་རེད། གལ་ཏེ་གནས་ཚུལ་དེ་ཨ་མདོ་རྔ་བའི་ཀིརྟི་དགོན་པར་བྱུང་བ་ཡིན་ན། གཞུགས་ཕྱོགས་” རྔ་བ་”ཞེས་འབྲི་དགོས་པ་ལས། རྔ་པ་ཞེས་གཏད་ནས་མི་འབྲི། གང་ཡིན་ཞེས་ན་རྔ་བ་ཞེས་པ་དེ་སྔ་མོ་ནས་ཡིག་ངག་གཉིས་ཐད་ནས་ཡོངས་གྲགས་སུ་རྔ་བ་ཞེས་འབྲི་བ་ལས་རྔ་པ་ཞེས་བྲིས་མེད། དེར་བརྟེན་འདི་བཞིན་ལོ་རྒྱུས་དང་འབྲེལ་བ་ཡོད་པའི་མིང་ཚིག་གང་ཞིག་བྲིས་རུང་ངག་ལ་གང་བདེ་དང་ལག་པར་ཅི་ཐོག་གིས་ལོ་རྒྱུས་ལ་ནག་གསུབ་མ་མཏོང་རོགས་ཞུ་རྒྱུ་དང་། གོང་གསལ་དགེ་འདུན་པ་དེ་གསུམ་ལ་རྗེས་སུ་ཡི་རངས་ཞུ།
དངོས་གནས་མི་གཅིག་གི་མི་ཚེའི་ནང་མི་ལོ་༡༣དང་། ༧ ་ ༦ བཅས་བཙོན་ཁང་ནང་མི་ཚེ་སྐྱེལ་རྒྱུ་ནི་ལས་སླ་པོ་ཞིག་མ་རེད། སྙིང་རྗེ།
འཕགས་མཆོག་ཕྱག་ན་པདྨོ་ཡིས།
བསྟན་དང་དེ་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོད་ཡོངས་བཏང་སྟེ།།
དཀའ་བ་བརྒྱ་ཕྲག་བསྒྲུབ་པའི་སྐྱེ་བོ་རྣམས།།
གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད།།
ཅེས་ཇི་སྐད་སྨོན་པ་ལྟར་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ།།
དངོས་གནས་འདི་དག་མཐཽང་དུས་རྒྱ་ནག་གཞུང་ལ་ཁོང་ཁྲོ་གཏིང་ནས་ལང་གི་འདུག ད་གང་དྲག་བོད་མི་ཚོ།
བསྟན་དང་དེ་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོད་ཡོངས་བཏང་བའི།།
དཀའ་བ་བརྒྱ་ཕྲག་བསྒྲུབ་པའི་སྐྱེ་བོ་རྣམས།།
གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད།།
ཕྱག་ན་པདྨོའི་བྱིན་རླབས་བདུད་རྩིའི་རྒྱུན།།
བདག་སོགས་སྙིང་གི་ཟུངས་སུ་རྟག་སྨིན་ཅིང་།།
བཀའ་བཞིན་བསྒྲུབ་པའི་མཆོག་པས་རབ་མཉེས་ནས།།
ཀུན་བཟང་སྤྱོད་མཆོག་རྒྱ་མཚོ་མཐར་ཕྱིན་ཤོག།
ཉག་རོང་གི་ངོ་རྒོལ་ཞེས་པའི་མཆན་ལས་བཤུས།
རིགས་དང་རུས་ལ་གཙོ་ཕལ་ཞིག་བཅོམ་ལྡན་འདས་ཀྱི་འདུལ་བའི་གཞུང་ནའང་ཚད་བཀག་མཛད་ཡོད། དེ་ཙམ་མ་ཟད་མི་ཞིག་ཡིནཔའི་འདུ་ཤེས་ཀྱིས་ལ་རྒྱ་ཞེས་པ་ཞིག་ངོ་ཤེས་དགོས་པ་དེ་ཡང་ཡང་དག་པའི་སྨྲར་ཤེས་དོན་གོ་བ་ཞིག་ལ་ཚང་དགོས་པའི་གྲུབ་ཆ་གལ་ཆེན་ཞིག་རེད།
མདོར་ན་བོད་མི་རིགས་ཡིན་པའི་ཟུངས་ཁྲག་གི་གྲུབ་ཆ་འདི་བཙན་པོ་ཚང་གི་ཨ་མྱེས་བཀའ་དྲིན་ཅན་ཚོས་མི་རབས་ཕྱི་མར་གནང་བའི་ལེགས་སྐྱེས་ཤིག་རེད། འདི་ནི་རྒྱ་གུང་ཁྲན་གྱི་ཤོག་དངུལ་ཁ་ཤས་ཀྱིས་བརྗེ་བསྒྱུར་བྱེད་མི་ཐུབ་ལ། གལ་སྲིད་ཐུབ་མཁན་ཞིག་ཡོད་ན་དེ་ཨ་མའི་བུ་ཞིག་མིན་པར་རྣམ་དཔྱོད་ཅན་ཡོངས་ཀྱིས་ངོས་འཛིན་བྱས་ན་འགྲིག
དེང་སང་ཡ་མཚར་བ་ཞིག་ནི་རང་གི་ཁང་མིག་ནང་གི་དུག་སྦྲང་དང་རྒྱ་ཤུག་གི་སོ་བརྒྱབ་པར་བཟོད་བསྒོམ་མི་ཐུབ་པའི་མི་བུ་མང་པོ་ཞིག་གིས་འཛམ་བུ་གླིང་དང་། འགྲོ་དྲུག་སེམས་ཅན་ཐམས་ཅད་ཀྱི་སྐད་ཆ་སྦོམ་པོ་བཤད་ཀྱིན་འདུག
ངས་རྟག་པར་གུང་ཐང་རིན་པོ་ཆེ་བཀའ་སློབ་ཞིག་དྲན་གྱིན་ཡོད། གཞན་འདི་ཕྱིའི་སྐྱབས་འཇུག་ཁས་ལེན་དེ།། རང་གར་འགྲོ་གཏོད་མེད་ཡི་རེ་མུག་ཞེས་པ་དེ་ཡིན།
ངོ་མ་བཤད་ན་འུ་ཚང་གིས་མིན་ན་ཡིན་མདོག་མདོག་དང་། མེད་ཀྱང་ཡོད་མདོག་གིས་ཚུལ་འཆོས་ཀྱི་ཕྱི་པགས་དེ་གཡུག་ཐུབ་ན་རེད།
རྩོམ་པ་པོ་རྔ་བ་ཤེས་རབ་ལགས་ཀྱི་རྩོམ་ཚིག་ཅིག་ངས་སྣང་བར་འགྲོ་བཞིན་ཡོད། ཁོང་གིས། གཞན་ལ་ཡོད་ཚུལ་དང་བཟང་ཚད་རྐྱང་རྐྱང་གླེང་ནས། རང་ལ་གང་ཡང་མེད་པ་ནི་ཅི་འདྲའི་སྐྱོའང་ལྟ་བུ་ཞིག་བྲིས་ཡོད།《ཚིག་ཟིན་ཇི་བཞིན་མ་ཐུབ།》
༸གོང་ས་མཆོག་གིས་ཀྱང་བོད་དོན་ནི་སངས་རྒྱས་ཀྱི་བསྟན་པ་དང་འབྲེལ་བའི་གནས་ཚུལ་ཞིག་ཡིན་པ་དང་། དུས་ཚོད་གཉན་འཕྲང་གི་སྐབས་འདིར་བོད་དོན་ཆེད་གོམ་པ་གཅིག་བརྒྱབ་པ་དེ་ཁ་བཏོན་དགེ་སྦྱོར་སྟོང་ཕྲག་ལས་ལྷག་ཡིན་པར་གསུངས་ཡོད།
དེང་སང་ཁ་ཤས་ཀྱིས་༸གོང་ས་མཆོག་མཐོང་སྐབས་ལག་པས་ཐལ་མོ་སྦྱོར། གུས་གུས་ཞུམ་ཞུམ་བྱེད། ཁོང་ཉིད་མདུན་ན་མེད་པའི་སྐབས་ཁོང་གི་བཀའ་སློབ་དང་དགོངས་ཚང་མ་རྣ་བའི་རྒྱབ་ཏུ་གཡུག་བཞིན་ཡོད། འདི་གྲས་དེ་ལྷག་པར་ཆོས་པར་རློམ་མཁན་ཚོས་ནང་ན་མང་། རྒྱལ་བ་རིན་པོ་ཆེ་གསུང་ཆོས་གལ་ཆེན་རེད་ཟེར་མཁན་ཚོས་ནང་ན་མང་།
སངས་རྒྱས་བསྟན་པ་ལ་ཤ་ཚ་ཡོད་ཟེར་མཁན་ཚོས་ནང་ན་མང་།
ལེ་དབར་སྟོང་ཕྲག་མང་པོའི་མཚམས་སུ་སྐྱབས་བཅོལ་བའི་མིང་བྱང་འཁུར་མཁན་ཚོའི་ནང་ན་མང་།
རིག་ཞེན་དང་ལ་རྒྱའི་སྤོབས་པ་མཐོ་བའི་མི་བུ་དག་གཅིག་རེ་གཉིས་རེ་བྱས་ནས་མུན་ནག་གི་གྲུ་ཟུར་ཞིག་ན་བཏང་འགྲོ་གི་འདུག ཤེས་མེད་ཚོར་མེད་དུ་ལུས་པའི་བྱེས་བཞུགས་པ་ཚོས་རང་རང་གི་ཁ་ཕོར་ཤོར་དོགས་ཀྱིས་འཁྲེགས་ཤིང་རྙིང་བའི་མགོ་བོ་དེ་དག་སུ་ཞིག་གི་རྒྱབ་དཔུང་ལ་ཁེན་གྱིན་འདུག ད་ཅི་ཞིག་བྱ།