ཡུ་རོབ་བོད་ཀྱི་གཞོན་ནུའི་གྲོས་ཚོགས་ཀྱི་གྲོས་ཆོད། བུ་ཆུང་ཚེ་རིང་།

ད་ལྟའི་དུས་ཚོད་དང་གནས་སྟངས་ལ་གཟིགས་ན། བཙན་བྱོལ་བོདགཞུང་་ལེགས་བཅོས་སྲ་བརྟན་བཟོ་ཐབས་དང་། བོད་མིའི་འཐབ་རྩོད་ཀྱི་ཐབས་ཇུས་ལ་ཕྱོགས་ཡོངས་ནས་ཞིབ་འཇུག་བྱེད་རྒྱུ་ནི་ཤིན་ཏུ་གལ་ཆེ་བས། འདིར་རང་གི་བསམ་ཚུལ་འགའ་ཞིག་རང་གཞུང་གིས་གསན་ཏེ་དགོངས་དཔྱད་གནང་ཐུབ་པའི་ཆེད་དུ་འགོད་ན།

བོད་གངས་ཅན་པའི་རྒྱལ་དམངས་ཀྱི་གནས་སྟངས་ཤིན་ཏུ་སྐྱོ་བའི་དུས་རབས་འདིར། མཁས་མཛངས་ལྡན་པའི་བོད་རིགས་རྣམས་ཀྱིས་གཞུང་སྒེར་གྱིས་མགྲོན་འབོད་བྱེད་པ་ལ་ནམ་ཡང་མི་སྒུག་པར། མ་བསྐུལ་དང་ལེན་གྱིས་བཙན་བྱོལ་བོད་གཞུང་གི་ལས་རིགས་ཁག་གི་ནང་དུ་གང་འགྱོགས་སྒོས་ཞུགས་ནས། རང་གི་ཤེས་འཇོན་ལྟར་བོད་དོན་རླབས་ཆེན་སྒྲུབ་དགོས་པ་ནི། རྒྱལ་སྤྱིའི་དུས་བབ་ཀྱིས་སྤྲད་པའི་སོ་སོ་མི་ཚེའི་ལས་འགན་རེད་ལ་ཤི་གསོན་བོད་འབངས་ཡོངས་ཀྱི་རེ་བ་ངོ་མ་ཡང་འདི་རེད། དེར་བརྟེན་བདག་གིས་ཀྱང་བོད་གཞུང་གི་ལས་རིགས་སུ་ཞུགས་ཏེ། དངོས་ཤུགས་བརྒྱུད་གསུམ་ནས་ཞབས་འདེགས་གང་ནུས་ཉིན་ལྟར་ཞུ་བཞིན་ཡོད་ལ། ད་དུང་བཙན་བྱོལ་བོད་གཞུང་གི་ལས་ཁང་ཁག་ལ་ངེས་པར་དུ་ཐབས་ཇུས་ལ་མཁས་པའི་ཤེས་འཇོན་ཅན་གྱི་བོད་མི་མང་པོ་ཡོད་དགོས་པ་འདི་གལ་གནད་ཤིན་ཏུ་ཆེ་བར་མཐོང་།

གལ་ཏེ་བཙན་བྱོལ་བོད་གཞུང་གིས། ཐབས་ཇུས་ལ་མཁས་པའི་ཤེས་འཇོན་ཅན་གྱི་བོད་མི་རྣམས་ལ། མཐོང་ཆུང་གིས་མཐོ་གནོན་དང་འབུར་འཇོམས་བྱས་ནས། ལས་གནས་མི་སྤྲད་པ་དང་ཐབས་ཇུས་གོང་འཕེལ་ཀྱི་བྱ་འགུལ་སྣ་ཚོགས་པ་ཞིག་སྤེལ་མ་བཅུག་ན། ང་ཚོའི་བོད་གཞུང་འདི་སྔར་གྱི་ལོ་རྒྱུས་རྙིང་པ་བཞིན་འཕེལ་མེད་སོར་གནས་དང་ནུས་མེད་ཉམས་རྒུད་ནས་རྩ་མེད་དུ་འགྲོ་ངེས་ཡིན་པ་ཀུན་གྱི་ཤེས་གསལ་རེད།

ད་ལྟ་བཙན་བྱོལ་བོད་གཞུང་གིས་ཛ་དྲག་གིས་བསྒྲུབ་དགོས་པའི་བྱ་བ་གལ་ཆེན་ཞིག་ནི། ༼བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས༽ཚད་ལྡན་ཕུན་སུམ་ཚོགས་པ་ཞིག་མྱུར་དུ་གསར་འཛུགས་བྱེད་རྒྱུ་འདི་རེད།

ཤེས་རབ་གསལ་ཞིང་ཉམས་མྱོང་ཆེ་བའི་བོད་རིགས་ལྷག་བསམ་ཅན་རྣམས། བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས་འདིར་གང་འགྱོགས་ཕྱོགས་གཅིག་ཏུ་བསྡུས་ནས། འཆར་གཞི་ཡོད་པའི་སྒོ་ནས་ཉམས་ཞིབ་སྡེ་ཚན་དུ་མ་རྩ་འཛུགས་བྱས་ཏེ། ཞིབ་འཇུག་པ་རྣམས་ཀྱིས་ཉིན་ལྟར་ཆུ་ཚོད་བརྒྱད་རེ། བློ་དང་རིག་པ་སྣ་ཚོགས་པས་བོད་ཀྱི་རྒྱ་ཆེའི་ལས་དོན་སྤྱི་ལ་ཞིབ་དཔྱོད་བྱེད་རྒྱུ་དང་། ཡང་སྐབས་རེ་བློ་སེམས་རྩེ་གཅིག་གིས་ཟབ་མོའི་ལས་དོན་དམིགས་བསལ་ལ་ཞིབ་འཇུག་མཐར་ཕྱིན་པ་བྱས་ནས་ཐབས་ཇུས་ཀྱི་བསྡོམས་རྩིས་ཐོབ་པར་བྱེད་བཅུག་དགོས།

བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས་འདིའི་ལས་འགན་ནི། བོད་གངས་ཅན་ལྗོངས་ཀྱི་ཆོས་ལྡན་མི་རིགས་འདིའི། གནས་སྐབས་དང་མཐར་ཐུག་གི་དམིགས་ཡུལ་རྣམས་སྒྲུབ་ཐུབ་པའི་མཐུན་རྐྱེན་དུ། གོ་རིམ་ཡོད་པའི་འཆར་གཞི་དང་། ཕན་ནུས་ཆེ་བའི་ཐབས་ཇུས། སྣ་ཚོགས་མཉམ་འབྲེལ་ཀྱི་ལས་འགུལ་སོགས་དུས་ཐོག་ཏུ་བོད་གཞུང་གི་ལས་རིགས་སོ་སོའི་ལས་བྱེད་པ་རྣམས་ལ་ཐབས་ཇུས་བསླབ་སྟོན་དང་གནས་ཚུལ་མཁོ་འདོན་བྱེད་རྒྱུ་དེ་ཡིན།

བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས་འདིའི་མེད་ན་མི་རུང་བའི་འབྲེལ་ཡོད་ལས་ཁང་གལ་ཆེན་ཞིག་ནི། ཕྱི་ནང་གི་དགོས་ངེས་གནས་ཚུལ་རྣམས་འཚོལ་སྡུད་ཐུབ་པའི་༼བོད་ཀྱི་ཆེས་མཐོའི་གསང་བའི་ལས་ཁང༽ཞིག་ཡོད་དགོས་ལ། བོད་ཀྱི་ཆེས་མཐོའི་གསང་བའི་ལས་ཁང་འདིས་ངེས་པར་དུ་གནས་ཚུལ་མཁོ་སྤྲོད་བྱེད་ཐུབ་པའི་མི་སྣ་སྤྱང་གྲུང་འཛོམས་པ་མང་པོ་སྦྱོང་བརྡར་བྱས་ནས། རྒྱལ་ཁབ་ཕྱི་ནང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པའམ་སྒེར་བ་རྣམས་དང་། འབྲེལ་བ་མངོན་ལྐོག་གཉིས་ནས་བྱས་ཏེ་འབྲེལ་ཡོད་དགོས་ངེས་ཀྱི་གནས་ཚུལ་རྣམས་དུས་ཐོག་ཏུ་རག་ཐུབ་པ་བྱེད་དགོས།

འདིར་ངེས་པར་དུ་ཤེས་དགོས་ཞིག་ནི།

བོད་ནི་རྒྱ་ནག་གི་ཆ་ཤས་ནམ་ཡང་བྱེད་མ་མྱོང་ལ། བོད་ནི་རང་བཙན་ཆ་ཚང་ཡོད་པའི་རྒྱལ་ཁབ་གཅིག་ཡིན་པ་ནི་ལོ་རྒྱུས་ཀྱིས་བདེན་དཔང་བྱས་ཡོད་པས། སུས་ཀྱང་ལོ་རྒྱུས་ལ་འགྱུར་བ་བཏང་མི་ཐུབ། རྒྱ་དམར་གྱིས་བསམ་བཞིན་བོད་ལ་བཙན་འཛུལ་བྱས་ནས་བོད་ཡུལ་རྒྱ་ནག་གི་མི་སེར་སྤེལ་ཡུལ་བྱེད་བཞིན་པ་ནི། རྒྱ་སྤྱིའི་ཁྲིམས་དང་ཡོངས་སུ་འགལ་བའི་ཉེས་སྤྱོད་ཚབས་ཆེན་ཞིག་རེད། དེར་བརྟེན་བོད་མི་དམངས་རྣམས་ལ་བོད་རང་དབང་རང་བཙན་རྩོད་རྒྱུའི་ཐོབ་ཐང་ཆ་ཚང་ཡོད་ལ། བོད་མི་དམངས་རྣམས་ལ་རང་དབང་རང་བཙན་རྩོད་རྒྱུ་ནི་དུས་རབས་ཀྱིས་སྤྲད་པའི་ལས་འགན་ཞིག་ཡིན།

འོན་ཀྱང་གོང་ས་སྐྱབས་མགོན་ཏཱ་ལའི་བླ་མས། རྒྱ་བོད་མི་རིགས་ཕྱོགས་གཉིས་ཀྱི་གནས་སྐབས་དང་ཡུན་རིང་གི་ཞི་བདེའི་ངང་མཉམ་གནས་ཡོང་ཆེད། ཕྱོགས་གཉིས་ལ་ཕན་པའི་དབུ་མའི་ལམ་གྱི་ཐབས་ཇུས་ལ་བརྟེན་ནས་རྒྱ་བོད་གྱི་འགལ་ཟླ་རྣམས་བསལ་ཐུབ་པའི་དགོངས་ཚུལ་གསུངས་ཡོད། དབུ་མའི་ལམ་ཐབས་ཇུས་ནི་སྔར་བྱུང་ལོ་རྒྱུས་རྣམས་བྱུང་ཚར་བ་ཞིག་ཡིན་པས་རྩོད་ལེན་མི་བྱེད་པ། གཙོ་ཆེ་ཤོས་ཕྱིས་འབྱུང་རྒྱ་བོད་མི་རིགས་གཉིས་ཞི་བདེ་ཡུན་གནས་ཡོང་བའི་ཕྱིར། རྒྱལ་བ་རིན་པོ་ཆེས་ཐུགས་བརྩེ་བས་རླབས་ཆེན་གྱི་དགོངས་པ་དབུ་མའི་ལམ་གྱི་ཐབས་ཇུས་འདི་སྟོན་ཡོད་པ་ལས། ལོ་རྒྱུས་ཐོག་བོད་རང་བཙན་མིན་པས་དབུ་མའི་ལམ་འདི་སྟོན་པ་ཞིག་མ་རེད།
འོན་ཀྱང་ཤེས་ལྡན་ཁང་གསར་རྡོ་རྗེས། ད་ལྟའི་རྒྱ་ནག་དམར་པོའི་གཞུང་འདི་ལ་གཞི་རིམ་གྱི་འགྱུར་བ་ཧ་ཅང་ཆེན་པོ་ཞིག་མ་སོང་གི་བར་དུ། རང་བཙན་དང་རང་སྐྱོང་གཉིས་ཕར་བཞག ལྷ་ས་གྲོང་ཁྱེར་གྱི་ས་ཆ་ཆུང་ཆུང་དེ་ཙམ་ཞིག་ཀྱང་བདག་ཅག་ལ་རྩ་བ་ནས་སྤྲོད་ཀྱི་མ་རེད། སྤྲད་ཀྱང་ཡུན་རིང་གནས་ཀྱི་མ་རེད། ནམ་རྒྱ་ནག་དམར་པོའི་གཞུང་འདི་འཐོར་བ་ན། དེ་དུས་རང་བཙན་དང་རང་སྐྱོང་གཉིས་ཀ་ལ་གོ་སྐབས་འདྲ་མཉམ་དུ་ཡོད་པ་རེད། གསུངས་པ་ལྟར་ང་ཚོས་ཞུམ་པ་མེད་པའི་སྙིང་སྟོབས་དང་ལྷག་བསམ་རྣམ་དག་གིས་སྔར་ལས་ལྷག་པའི་ཞིབ་འཇུག་དང་། སྔར་ལས་ལྷག་པའི་འཆར་གཞི་དང་། སྔར་ལས་ལྷག་པའི་ཐབས་ཇུས་དང་། སྔར་ལས་ལྷག་པའི་ལས་འགུལ་སྣ་ཚོགས་ཞིག་བོད་འབངས་ཡོངས་ཀྱི་མངོན་འདོད་མ་འགྲུ་བར་དུ་ཕྱོགས་ཀུན་ནས་གཏིང་ཟབ་སྤེལ་དགོས་སོ།

ཐོག་མར་ཡོ་རོབ་ཁུལ་གྱི་བོད་རིགས་གཞོན་ནུའི་ཚོགས་ཆེན་ཐེངས་དང་པོའི་སྐོར་དྲ་ལམ་ནས་མཐོང་བྱུང་བས་དགའ་སྤོབས་ལྡན་པ་ཞིག་རེད་དྲན། འོན་ཀྱང་བརྙན་འཕྲིན་ལམ་ནས་བོད་ཕྲུག་ཚོས་སྤྱི་ནོར་༸གོང་ས་མཆོག་ལ་དྲི་བ་བཏང་པའི་ནང་དོན་དང། བོད་སྐད་ཤོད་སྟངས། བོད་ཀྱི་གནད་དོན་ཐད་གོ་རྟོགས་ཇི་ཡོད་སོགས་ལ་གཞིགས་ན། དུས་རྒྱུན་ནས་བོད་མི་རིགས་ཀྱི་གནས་སྟངས་ཐད་དོ་འཁུར་དེ་ཙམ་མེད་པ་གསལ་པོ་མཚོན་ཐུབ་ཀྱི་འདུག རྒྱུ་མཚན་དང་པོ། ངའི་བསམ་ཚོད་ལ་བྱས་ན་སྤྱི་ནོར་༸གོང་ས་མཆོག་དབུ་བཞུགས་ཐོག་ཚོགས་ཆེན་ལ་སྐད་ཆ་བཤད་དགོས་དུས། ཐོག་མ་ནས་གྲ་སྒྲིག་གང་ལེགས་བྱས་ཡོད་ངེས་ཀྱང། གཞོན་ནུའི་ཚོགས་གཙོ་དང་། དྲི་བ་འདོན་མཁན་རྣམས་ཀྱི་བོད་སྐད་སྐྱོན་སྟངས་ལ་བལྟས་ན་ངོ་མ་ཕྱི་རྒྱལ་མ་མི་རིགས་ཤིག་གིས་བོད་སྐད་ཟླ་བ་ཁ་ཤས་སྦྱངས་པ་དང་ཨ་ན་མ་ན་རེད། རྒྱུ་མཚན་གཉིས་པ། དྲི་བའི་ནང་དོན་ལ་གཞིགས་ན་བོད་ཀྱི་རྩ་དོན་ཐད་གོ་རྟོགས་ཇི་ཙམ་ཡོད་མིན་གསལ་པོ་མཚོན་ཐུབ་ཀྱི་འདུག དེ་ཡང་དུས་རྒྱུན་དུ་སྒོར་མོ་དང་རང་དོན་སྙིང་ལ་བཅངས་པ་དང། ༸གོང་ས་མཆོག་ཕེབས་སྐབས་བོད་དོན་རྩོད་མདོག་བྱེད་པ་ནི་༸༌ཁོང་ལ་དབུ་བསྐོར་ཞུས་པ་ཞིག་མ་ཡིན་ནམ།

གཞོན་ནུས་ལས་འགན་གཅིག་ནི། རང་བཙན་དང་འབྲེལ་བའི་ཡིག་ཆ་རྙིང་པ་དང་གསར་པ་ཡོད་ཚད་དབྱིང་ཡིག་སོགས་སྐད་ཡིག་ཆེ་ཁག་ཐོག་ཏུ་བསྒྱུར་ནས་འཛམ་གླིམ་མི་དམངས་ཀྱི་མི་ལམ་དུ་བསྟན་ན་བསམ། དེ་བཞིན་རྩོམ་རིག་གི་མི་ན་གང་མང་ཡོད་པའི་ཚོགས་པ་ཞིག་ཐོག་ནས་བོད་འདི་སྔར་ཡང་རང་བཙན་ཡིན་པ་མ་ཚད་ཕྱིན་ཆད་ལ་ཡང་རང་བཙན་ཡིན་དགོས་པའི་བསམ་ཚུལ་གང་ཡོད་འཛམ་གླིང་གི་སྐད་ཡིག་ཆེ་ཁག་དང་ཚག་པར་ཆེ་ཁག་དེ་བཞིན་དུས་དེབ་ཆེ་ཁག་ཐོག་ཏུ་འགོད་ཐུབ་དགོས། མདོར་ན་རྒྱ་ནག་གིས་ལོག་བཤད་ལ་ཁ་ཐད་ཀྱི་ལས་འགུར་དེ་འདྲ་ཤིག་དུས་ལ་བབ་པ་རེད། མི་ཁ་ཤས་ཀྱི་རྩོམ་རིག་གི་ལས་འགུལ་མ་གཏོགས་མེད་པ་འདི་ནི་བོད་མི་རིགས་ཀྱི་ནང་ལ་ཤེས་ཡོན་གྱི་མི་སྣ་ཉིན་ཁར་གྱི་སྐར་མ་ཙམ་ལས་མེད་པར་མངོན།

བུ་ཆུང་ཚེ་རིང་ལགས་ཀྱིས་གནད་ལ་འཁེལ་བ་ཞིག་གསུངས་འདུགའོན་ཀྱང་ཡོ་རོབ་གཞོན་ནུས་བོད་མི་རིགས་ཀྱི་འཐབ་བརྩོད་ཀྱི་ཁ་ཕྱོགས་ལ་སྣེ་འཁྲིད་ཐུབ་མིན་དེ་ནི་གནད་དོན་གཞན་ཞིག་རེད། འདིར་ངས་གནད་དོན་གཅིག་གི་ཐད་མདོ་ཙམ་བརྗོད་པར་འདོད། དེ་སྔོན་དང་མི་འདྲ་བར་བོད་རིགས་མི་ཉུང་བ་ཞིག་ནུབ་གླིང་ས་ཕྱོགས་མི་ཉུང་བ་ཞིག་གི་ནང་གནས་སྡོད་བྱེད་ཀྱི་ཡོད་པ་མ་ཟད་དེ་དག་གི་ཁྲོད་ནས་བོད་རིགས་མི་ཉུང་བ་ཞིག་རང་ཉིད་གནས་ཡུལ་གྱི་རྒྱལ་ཁབ་དེ་དང་དེའི་སྤྱི་འབངས་ཆགས་ཡོད་པ་རེད། སྤྱི་འབངས་ཀྱི་ཐོབ་ཐང་ཡོད་པ་དེས་གོ་སྐབས་གསར་པ་ཞིག་སྤྲོད་ཀྱི་ཡོད་པ་ནི་ཡུལ་གྲུ་དེ་དང་དེའི་ཆབ་སྲིད་ཀྱི་དཀྱིལ་འཁོར་དང་ལས་རིགས་ཀྱི་ཁྱབ་ཁོངས་སྣ་ཚོགས་ནང་འཛུལ་ཞུགས་བྱེད་ཆོག་གི་ཡོད་པ་རེད། དེར་བརྟེན་ཡོ་རོབ་ནང་འཚོ་གནས་བྱེད་མཁན་མཁན་གྱི་སྤུན་ཟླ་ཙམ་མིན་པར་ནུབ་གླིང་ས་ཆ་གང་སར་འཚོ་བའི་བོད་རིགས་ཚོས་རང་རིགས་ཀྱི་ལས་འཐབ་བརྩོད་ལ་དངོས་ཤུགས་ཕན་འབྲས་འདོན་ཐུབ་པའི་ལས་སྣེ་དང་ཆབ་སྲིད་ནང་ཞུགས་དགོས་པར་སེམས། དེ་ཡང་ཁོ་བོར་བསམ་པར་བོད་རིགས་གཞོན་སྐྱེས་ཚོས་གསར་འགོད་ལས་རིགས་དང་། རྒྱལ་སྤྱིའི་ཚོགས་སྡེ་ཁག་སོགས་ཀྱི་ནང་ཞུགས་ནས་དེ་དག་བརྒྱུད་ནས་རང་ཉིད་ཀྱིས་བོད་ལ་སྨན་པའི་ནུས་པ་འདོན་དགོས་པར་འདོད། གོ་སྐབས་དེ་ནི་མང་པོ་མིན་ན་ཡང་མེད་པ་མིན།