དེ་རིང་སྔ་དྲོ་ཆུ་ཚོད་ ༡༠ དང་ཕྱེད་ཀའི་སྟེང་། བཞུགས་སྒར་ངྷ་རམ་ས་ལའི་ཀིརྟི་བྱེས་པ་གྲྭ་ཚང་གི་ཕྱག་མཛོད་མདོ་སྔགས་ལགས་དང་། ཀིརྟི་དགེ་རྩ་ཚོགས་པའི་ཚོགས་གཙོ་ཕུན་ཚོགས་སྤྲུལ་སྐུ་ལགས་བཅས་དགེ་འདུན་པ་གསུམ་འདི་གའི་གསར་ཁང་ལ་ཆེད་ཕེབས་ཀྱིས་ཐེངས་འདིར་བོད་ནང་གི་ཡུལ་ཤུལ་སྐྱེ་རྒུ་མདོའི་ས་ཡོམ་གྱི་གོད་ཆག་ཁྲོད། བློའི་ཡུལ་དུ་ཤོང་དཀའ་བའི་ཤི་རྨས་ཀྱི་དོན་རྐྱེན་ཚབས་ཆེན་བྱུང་བའི་ཐད། གདོང་སེམས་མཉམ་སྐྱེད་དང་། ཤུལ་ལུས་རྣམས་ལ་འཚོ་བའི་རྒྱབ་རོགས་ཙམ་གྱི་ཆེད། ཀིརྟིའི་དགེ་རྩ་ཚོགས་པ་ནས་ཧིན་སྒོར་ཆིག་འབུམ་ ༡༠༠༠༠༠ དང་། ཀིརྟིའི་བྱེས་པ་གྲྭ་ཚང་ཧིན་སྒོར་ལྔ་ཁྲི་ ༥༠༠༠༠ བཅས་ཁྱོན་བསྡོམས་ཧིན་སྒོར་ཆིག་འབུམ་ལྔ་ཁྲི་ ༡༥༠༠༠༠ ཙམ་བོད་གཞུང་ནང་སྲིད་ལས་ཁུངས་བརྒྱུད་ཞལ་འདེབས་སུ་འབུལ་ལམ་ཞུ་རྒྱུ་ཡིན་པའི་གནས་ཚུལ་བསྐྱལ་བྱུང་།
ཞལ་འདེབས་ཕུལ་ཡིག་དེའི་ནང་བཀོད་དོན། ད་ལམ་རྫ་སྐྱེ་རྒུ་མདོར་བོད་རིགས་གནས་སའི་ས་ཁུལ་དུ་འབྱུང་བའི་གནོད་འཚེ་ཚབས་ཆེན་ཕོག་པའི་ས་གནས་དེའི་འདས་གསོན་ཡོངས་ལ་འདི་ཕྱིར་དགེ་བའི་བསྔོ་སྨོན་ཟབ་ནན་ཞུ་བ་དང་། བོད་མིའི་སྐྱིད་སྡུག་མཉམ་མྱོང་གིས་ཐུགས་གཙོ་དང་རོགས་སྐྱོར་ལས་འགུལ་མཚོན་བྱེད་དུ་ཀིརྟི་དགེ་རྩ་ཚོགས་པ་ནས་ཧིན་སྒོར་འབུམ་གཅིག་ ༡༠༠༠༠༠ དང་། ཀིརྟི་བྱེས་པ་གྲྭ་ཚང་ནས་ཧིན་སྒོར་ལྔ་ཁྲི་ ༥༠༠༠༠ བཅས་བོད་གཞུང་ནང་སྲིད་ལས་ཁུངས་བརྒྱུད་ཞལ་འདེབས་སུ་འབུལ་ལམ་ཞུས་པ་ལགས་ན། ས་གནས་མང་ཚོགས་ཀྱི་བདེ་དོན་ཆེད་འབྱོར་ཐུབ་པའི་རོགས་མགོན་སྐྱབས་འཇུག་ཡོང་བ་ཞུ། ཞེས་བཀོད་འདུག
ཀིརྟི་བྱེས་པ་གྲྭ་ཚང་གི་ཕྱག་མཛོད་མདོ་སྔགས་ལགས་སུ་བཅར་འདྲི་ཞུས་པར་ཁོང་གིས་གསུངས་དོན། སྤྱིར་ཡིན་ན། རང་རིགས་སྤུན་ཟླ་ཚོར་འདི་ལྟ་བུའི་དཀའ་ངལ་འཕྲད་སྐབས། ཤི་ན་མཉམ་ཤི་དང་གསོན་ན་མཉམ་གསོན་གྱི་གོ་སྐབས་མེད་ཀྱང་། ས་གནས་ས་ཐོག་ལ་དངོས་སུ་བཅར་ཏེ་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་གི་ཆ་ཤས་ལེན་དགོས་པ་ཞིག་ཆགས་ཡོད་མོད། འོན་ཀྱང་དུས་ཚོད་དང་ས་ཐག གནས་སྟངས་སོགས་མང་པོ་ཞིག་གི་དབང་གིས་བསམ་བློའི་གཞི་ཆད་ཅང་འོག་རྟའི་བང་ཟད་པ་ལྟར། སེམས་ལ་དྲན་ཡང་ལག་ལེན་ཡོང་ཐབས་མེད་པ་ཞིག་ཆགས་ཡོད། དེར་བརྟེན། ང་ཚོའི་དངུལ་འདི་ཙམ་གྱིས་ཕན་ཆེན་པོ་ཞིག་ཐོགས་དཀའ་ཡང་། གཞིས་ལུས་སྤུན་ཟླར་དཀའ་ངལ་བྱུང་ན། བྱིས་འབྱོར་མི་མང་གི་སེམས་མཚོན་བྱེད་ཙམ་ཡིན་ལ། ཕྱོགས་གཞན་ཞིག་ནས་རྐྱེན་ངན་དགེ་བའི་གྲོགས་སུ་འགྱུར་རྒྱུ་ཧ་ཅང་གལ་ཆེན་པོ་རེད། ལས་དབང་ཞིག་གི་དབང་གིས་ཐེངས་འདིར་བོད་ནང་ལ་དོན་རྐྱེན་དེ་ལྟ་བུ་བྱུང་བ་རེད། དཀའ་ངལ་འདི་ལྟ་བའི་གནས་སྐབས་སུ་བོད་གཞིས་བྱེས་གཉིས་དམ་ཚིག་ལྡོག་རྩ་གཅིག་སྒྲིལ་དང་། སྐྱིད་སྡུག་བསམ་པ་གཅིག་མཐུན་འོག བོད་གཞིས་བྱིས་གཉིས་ཀྱི་མཛའ་བརྩེ་མཐུན་ལམ་མཚོན་ཆེད་ཡིན། ཞེས་གསུངས་སོང་།
