ཚེ་རིང་རྒྱལ།
ཕྱི་ཟླ་ ༤ ཚེས་ ༡༥ ཉིན་དེ། རྒྱ་ནག་དམར་ཤོག་དྲུང་ཆེ་ཧའོ་ཡའོ་པང་འདས་ནས་ལོ་ ༢༡ འགོར་བའི་དུས་དྲན་ཀྱི་སྐབས་དང་བསྟུན་ནས། སྲིད་བློན་ཝུན་ཇ་པའོ་ཡིས་རྒྱ་ནག་གཞུང་འབྲེལ་གསར་ཤོག་<<མི་དམངས་ཉིན་རེའི་གསར་ཤོག>> ཅེས་པའི་ཐོག་ཁོང་ལ་རྗེས་དྲན་གྱི་རྩོམ་ཡིག་ཅིག་སྤེལ་ཡོད་པ་དང་། རྗེས་དྲན་རྩོམ་ཡིག་དེར་མཚོ་འགག་གཉིས་ཀྱི་རྒྱ་རིགས་མི་མང་ཁྲོད་གླེང་སློང་ཤུགས་ཆེན་འབྱུང་བཞིན་ཡོད།
ཧའོ་ཡའོ་པང་གི་གནད་དོན་དེ་དྲུག་བཞིའི་སློབ་མའི་ཡར་ལངས་དང་འབྲེལ་ནས་ཡོད། དྲུག་བཞིའི་སློབ་མའི་ཡར་ལངས་ནི་ཧའོ་ཡའོ་པང་འདས་རྗེས་སློབ་གྲྭ་ཆེན་མོ་བ་དག་གིས་ཏིན་ཞའོ་ཕིན་གྱིས་ཧའོ་ཡའོ་པང་ལས་གནས་ནས་ཕུད་པར་ཡི་མ་རངས་པར་བྱུང་བ་ཞིག་ཡིན་པ་དང་། དེ་རྗེས་ཀྲའོ་ཙི་ཡང་གིས་རྒྱལ་ཁབ་ཀྱི་དམག་མིས་སློབ་མར་དྲག་གནོན་བྱ་རྒྱུར་མོས་མཐུན་མ་བྱས་པ་བཅས་ལ་བརྟེན་ནས་བྱུང་བའི་ཆབ་སྲིད་ལམ་ཕྱོགས་ཀྱི་འགལ་བ་ཞིག་རེད། ད་ལྟ་རྒྱ་ནག་དམར་ཤོག་དྲུང་ཆེ་ཟུར་བ་ཧའོ་ཡའོ་པང་དང་ཀྲའོ་ཙི་ཡང་གཉིས་རྒྱ་ནག་གི་ཆབ་སྲིད་གར་སྟེགས་སྟེང་ནས་སྔ་ཕྱིར་ཡལ་ཟིན་ནའང་། དམར་ཤོག་མགོ་ཁྲིད་འདི་གཉིས་ལ་ཇི་ལྟར་གདེང་འཇོག་བྱེད་མིན་ཐད་ལ་རྒྱ་ནག་དམར་ཤོག་མགོ་ཁྲིད་ཚོའི་ཁྲོད་གཟེད་གྲོལ་དཀའ་བའི་གནད་དོན་ཆེན་པོ་ཞིག་གི་འཐབ་རྩོད་ལྷག་བསྡད་ཡོད་པ་རེད། ཧའོ་ཡའོ་པང་དང་དྲུག་བཞིའི་སློབ་མའི་ཡར་ལངས་ཐད་འབྲེལ་བ་དམ་ཟབ་ཡོད་ནའང་། སྲིད་བློན་ཝུན་ཇ་པའོ་ཡིས་དམར་ཤོག་གཞུང་འབྲེལ་གསར་ཤོག་སྟེང་ཡོངས་ཁྱབ་ཀྱི་རྗེས་དྲན་རྩོམ་ཡིག་ཅིག་སྤེལ་བ་དེས་རྒྱ་ནག་གི་སྤྱི་ཚོགས་སུ་ཕྱོགས་ཡོངས་ནས་དོགས་སློང་དང་དབྱེ་ཞིབ་ཀྱི་སྒོ་མོ་ཞིག་ཕྱེ་ཡོད་འདུག
དེ་སྔའི་རྒྱ་ནག་གསར་སྤེལ་ཁང་གི་གསར་འགོད་པ་ཟུར་བ། ད་ལྟ་པེ་ཅིན་དུ་སྡོད་པའི་རང་དབང་དཔྱད་བརྗོད་པ་ཀོ་ཞན་གྱིས་བརྗོད་དོན། ངས་བསམ་ན་དེ་ནི་ཧའོ་ཡའོ་པང་དཀར་འདོན་བྱ་བའི་ཆེད་དུ་མ་རེད། ཧའོ་ཡའོ་པང་ལ་རྒྱ་ནག་གི་ཤེས་ལྡན་པ་དང་མི་དམངས་ཁྲོད་དུ་བཀུར་བརྩི་ཆེན་པོ་ལྡན་པའི་རྐྱེན་གྱིས། ད་ལྟའི་འགལ་བ་དང་འཐབ་རྩོད་ཀྱིས་ཁེངས་བའི་རྒྱ་ནག་སྤྱི་ཚོགས་དེ་དམར་ཤོག་སྒེར་གཅོད་ལམ་ལུགས་འོག་བརྟན་ལྷིང་ཡོང་ཆེད་རྗེས་དྲན་རྩོམ་ཡིག་སོགས་སྤེལ་ཏེ་དམངས་སེམས་འགུག་ཐབས་ཙམ་ལས་ཅི་ཡང་མ་རེད་ཅེས་བརྗོད་ཡོད།
རྒྱ་ནག་དམར་ཤོག་དྲིལ་བསྒྲགས་ཁང་གི་མགོ་གཙོ་ཟུར་བ་ཀྲུང་ཧྲི་ཀྲང་གིས་ཀྱང་། དེ་སྔོན་ཧའོ་ཡའོ་པང་གི་དོན་གནད་དང་འབྲེལ་བའི་བགྲོ་གླེང་ཞིག་གི་ཐོག རྒྱ་ནག་དུ་མོའོ་ཙེ་ཏུང་དང་ཧའོ་ཡའོ་པང་གཉིས་བྱུང་ཡོད་པ་རེད། མའོ་ཙེ་ཏུང་སྙན་གྲགས་བརྩི་མཐོང་ལྡན་ཡང་བྱས་ཉེས་གཉིས་ལྡན་ཞིག་རེད། ཡིན་ནའང་། ཧའོ་ཡའོ་པང་ནི་རྒྱ་ནག་དམར་ཤོག་རིང་ལུགས་ཀྱི་མགོ་ཁྲིད་ཡག་པོ་ཞིག་རེད། ཧའོ་ཡའོ་པང་དང་ཀྲའོ་ཙི་ཡང་གིས་ཆབ་སྲིད་ལས་འགན་ཁུར་ཏེ་རྒྱ་ནག་རང་དབང་དམངས་གཙོར་སྐུལ་བར་བརྟེན་ནས་ད་ལྟའི་རྒྱ་ནག་གི་འཕེལ་རྒྱས་ཀྱི་རྣམ་པ་འདི་བྱུང་བ་རེད་ཅེས་བརྗོད་ཡོད་པ་རེད།
ཡང་དཔྱད་བརྗོད་པ་རེ་འགས་འདི་ཡིས་རྒྱ་ནག་དམར་ཤོག་མཐོ་རིམ་དཔོན་རིགས་ནང་ཁུལ་གྱི་འགལ་བ་རྣོ་ངར་ཆེ་རུ་འགྲོ་བཞིན་པ་བསྟན་ཡོད་ལ། ཅང་ཙེ་མིན་ཤོག་ཁག་དང་རྒྱལ་སྲས་ཚོགས་པའི་ཤོག་ཁག་གི་སྟོབས་ཤུགས་ཕྱོགས་ཡོང་ནས་ཉམས་རྒུད་དུ་གྱུར་ཏེ་ཝུན་ཤོག་ཁག་གི་ཆབ་སྲིད་དབང་ཤུགས་མངོན་བཞིན་པ་ཡིན་ཚུལ་བརྗོད་ཡོད།
གཞན་རྒྱ་ནག་གི་གསར་འགྱུར་ལས་རིགས་པ་དག་གིས། ཧའོ་ཡའོ་པང་དཀར་འདོན་བྱ་ཐུབ་མིན་གྱི་གླེང་གཞི་ངོ་མ་དེ་ལོ་རྗེས་མའི་ཕྱི་ཟླ་ ༧ པའི་ཚེས་ ༡ ཉིན་དེ་རྒྱ་ནག་དམར་པོའི་ཤོག་ཁག་བཙུགས་ནས་ལོ་ ༩༠ ལོན་པའི་དུས་དྲན་ཚོགས་འདུའི་སྐབས་ཡིན་པ་དང་། དེ་དུས་ཧའོ་ཅིན་ཐའོ་དང་ཝུན་ཇ་པའོ་གཉིས་ཀྱིས་ཇི་ལྟར་ཧའོ་ཡའོ་པང་ལ་གདེང་འཇོག་བྱ་མིན་ལ་ཐུག་ཡོད་ཚུལ་བརྗོད་ཀྱིན་ཡོད།
ཧའོ་ཡའོ་པང་དེ་རྒྱ་ནག་གི་ལས་བྱེད་བདུག་རྩུབ་ཅན་ནང་ནས་དྲང་ཤོས་ཅིག་བྱུང་བ་ཡིན་པ་འདྲ།