ཆབ་བྲག་ཕོ་ཉ།
ཀ༽ རང་བྱུང་གི་ཁོར་ཡུག རི་དྭགས་ཀྱི་ཉལ་ས། གཅན་གཟན་གྱི་འདུར་ས། འདབ་ཆགས་ཀྱི་འཕུར་ས། ཉ་ཚོགས་ཀྱི་རྐྱལ་ས། མིའི་རིགས་ཀྱི་འཐབ་ས། ཡོད་ཚད་འཚོ་ས་ཁྱོད་ཡིན་ལ། ཐམས་ཅད་འཆི་ས་ཡང་ཁྱོད་ཡིན།
ཁ༽རྐང་གཉིས་མི་ཡི་ཧམ་སེམས་ཀྱིས། འཇམ་རླུང་དྭངས་མོར་དུག་རླངས་བསྲེས། གཙང་ཆབ་སྔོན་མོ་རྫས་ཀྱིས་རྙོག སྔོ་བསངས་ནམ་མཁའ་དུ་བས་བསླད། མ་ཡུམ་ས་གཞིར་རྡོག་བརྫིས་བཏང། རང་བྱུང་ཁམས་ལ་ན་ཚ་ཕོག
ག༽ས་ཆེན་འཇིགས་པའི་འདར་སིག་རེ་རེས། སེམས་ཅན་ཁྲི་སྟོང་ཚེ་སྲོག་འགགས། སྤྲིན་དཀར་གཟེར་ནས་སྐྱུགས་ཐེངས་གཅིག་གིས་ལུང་ཁུག་ཆེན་པོ་ཆུ་ཡིས་བཀྲུས། ཉི་མ་ཚ་བ་འབར་ཐེངས་གཅིག་གིས་རི་ལུང་ཆེན་པོ་ཐན་པས་བསྲེགས། ནམ་མཁའི་སྙིང་རླུང་སྟོད་ལ་འཚངས་ཏེ་ཡོད་ཚད་རླུང་ལ་སྐུར་རྩིས་བྱས།
ང༽ འགའ་རེས་གནས་འགའ་རེར་ཆུ་ལོག་རྒྱུགས་པར་ལྟད་མོ་བལྟས། ལ་ལས་ཕྱོགས་འགར་ཐན་པས་གདུངས་ཀྱང་མི་ཚོར་ལ། ལ་ལ་ཡུལ་འགར་ས་ཡོམ་བརྒྱབ་པར་དགའ་ཡང་མྱོང། ལ་ལས་ད་དུང་དམག་འཁྲུག་སློང་དགོས་ཀྱང་ཟེར། འདི་ལྟར་ཆགས་སྡང་གི་མིག་དབང་ཆེ་ཆུང་འདིས། མང་པོ་ཞིག་ལ་མི་རིགས་མཐུན་སྒྲིལ་གྱི་འདུ་ཤེས་ཆུང། མིའི་རིགས་གཅིག་གྱུར་གྱི་བརྩེ་སེམས་ཞན། ང་ཚོའི་སྙིང་རྗེ་དང་ང་ཚོའི་གདུང་སེམས། ང་ཚོའི་བྱམས་བརྩེ་འདི་དག་ནི་ཅི་འདྲའི་ཉམ་ཐག་དང་ཅི་འདྲའི་ཉི་ཚེ་བ་ཞིག་རེད་ཨང།
ཅ༽ཉམ་ཆུང་རི་དྭགས་ཚོགས་ལ་དགོངས་དག་ཞུ། ཁྱེད་ཅག་རྩྭ་ས་བརླག་མཁན་ང་ཚོ་ཡིན། གཏུམ་དྲག་གཅན་གཟན་ཚོགས་ལ་དགོངས་དག་ཞུ། ཁྱེད་ཅག་ཟས་སྐལ་འཕྲོག་མཁན་ང་ཚོ་ཡིན། གསེར་མིག་ཉ་མོའི་ཚོགས་ལ་དགོངས་དག་ཞུ། ཁྱེད་ཅག་གཙང་ཆབ་རྙོག་མཁན་ང་ཚོ་ཡིན། རང་དབང་འདབ་ཆགས་ཚོགས་ལ་དགོངས་དག་ཞུ། ཁྱེད་ཅག་ནམ་མཁའ་བསླད་མཁན་ང་ཚོ་ཡིན།
ཆ༽གནམ་གྱི་ལྷ་ལ་བཟོད་གསོལ་ཞུ། སྔར་བཞིན་ཕ་ལྟར་བཀུར་ན་བརྩེ་སྐྱོང་མཛོད། ས་ཡི་ལྷ་ལ་བཟོད་གསོལ་ཞུ། སྔར་བཞིན་མ་ལྟར་བཀུར་ན་བྱམས་སྐྱོང་མཛོད། ཆུ་ཡི་ལྷ་ལ་བཟོད་གསོལ་ཞུ། སྔར་བཞིན་བདུད་རྩིར་མཆོད་ན་སྐོམ་གདུང་སེལ། རླུང་གི་ལྷ་ལ་བཟོད་གསོལ་ཞུ། སྔར་བཞིན་རླུང་རྟས་བསུས་ན་མྱུར་སྐྱོབ་མཛོད། ཀྱེ་ཀྱེ། རང་བྱུང་ཁམས་ལ་བཟོད་གསོལ་ཞུ། འབྱུང་བ་སྙོམ་པར་གནས་པའི་སྐྱབས་འཇུག་ཞུའོ།
༢༠༡༠།༤།༢༢
འབྱུང་བཞིའི་གནོད་འགོགས།
ས་གཞི་ས་འཁྲེགས་གནས་དགོས་ན། །
ཉེས་སྡིག་མང་པོ་མ་བསོག་ཅིག། །
ཆུ་གཙང་དྭངས་གསལ་གནས་དགོས་ན། །
སྦགས་གཙོག་མང་པོ་མ་བྱེད་ཅིག །
མེ་ཉིའི་དྲོད་ཚད་རན་དགོས་ན། །
འདོད་རྔམས་ཚ་དྲོད་མ་སྤོར་ཅིག །
རླུང་བསིལ་ཡང་གཡོར་གནས་དགོས་ན། །
ངན་གཙོག་རྡུལ་ངན་མ་སྤེལ་ཅིག །
ཟས་སྤྱོད་རན་ལ་སྤྱོད་གཙང་སོགས། །
འགྲོ་འདུག་ཉལ་འཆག་སྤྱོད་པ་བཞིས། །
ལུས་ཀྱི་འབྱུང་བཞི་མཉམ་འགྱུར་ན། །
ལུས་བདེ་སེམས་སྐྱིད་མི་ཚེ་སྐྱིད། །
ད་ནི་ང་ཡིས་མིག་ཆུ་མི་འདོན། །
ལས་དབང་གནམ་གྱི་རྒྱལ་མོར་མི་བཅོལ། །
སེམས་དང་བསམ་པའི་ན་ཟུག་བར་ནས། །
ཨམ་གཙིགས་སྡོམ་བཞིན་གླུ་ཞིག་ལེན་འདོད། །
ཧཧཧ་་་ཧོ་ཧོ་ཧོ་་་་་རི་བོང་གནམ་རྡིབ་ཀྱི་དཀའ་ངལ་
དགོས་མེད་ཉོག་གཏམ་གྱི་རྩོད་གླེང་
གཞི་མེད་བསྙོན་འཛུགས་ཀྱི་གླེང་གཞི་་་་ཧཧཧཧཧཧཧཧཧཧཧཧཧཧཧ
དྲ་བདག་ལུང་རིགས་ལགས། ཡིན་དང་ཡིན། བདག་གི་ལྷུག་རྩོམ་དེ་ཉིད་ཀྱིས་གསུང་བ་ལྟར་ཕྱོགས་གང་སར་བཀོད་ཡོད། བསམ་ཚུལ་འགོད་སར་མ་བཞག་པའི་རྒྱུ་མཚན་ལ་ངས་གུས་བཀུར་ཞུ།
ཨོ་མདོ་ཁང་བ་དང་སྐུ་ཉིད་ཀྱི་ཁ་རྩོད་དེའི་བར་དུ་རང་བཞིན་གྱིས་ལྷུང་སོང་བ་མ་གཏོགས། ངས་ཆེད་དུ་དེ་ལྟར་བྱས་པ་མིན་ཞེས་བཀུར་འོས་དྲ་བདག་ལགས་ལ་ཞུས་པ་ཡིན། རྗེས་མར་ཡང་འདི་དང་འདྲའི་ཕྱོགས་ལ་རང་ཉིད་ཀྱིས་འབད་པས་གཟབ་པར་ཁས་ལེན་བྱས་པ་ཡིན།
གནམ་ལྕགས་ལགས། ཉིད་ཀྱི་རྩོམ་ཡིག་དེ་སྤྱིར་བཏང་བསམ་ཚུལ་གྱི་ཁོངས་སུ་བཞག་མ་ཆོག་པ་མི་འདུག་ཀྱང་། གཅིག་ནས། ཁྱེད་ཀྱི་ཟིན་བྲིས་ཀྱི་ནང་དུ་སྤེལ་འདུག གཉིས་ནས། རྩོམ་ཡིག་གཞན་གྱི་མཆན་དུ་བཀོད་འདུག གསུམ་ནས། ཉིད་ཀྱི་རེ་སྐུལ་དེ་ཚིག་རྩོད་ཅིག་དང་མཉམ་དུ་དྲུད་ཡོང་བ་རེད། འགྲན་བཙུགས་པ་འདྲ་བོ་རེད། བརྙས་བརྐོས་པ་འདྲ་བོའང་རེད། དེ་བས་དགོངས་དག ཉིད་ཀྱི་ལྷུག་རྩོམ་དེ་བསམ་ཚུལ་གྱི་ཁོངས་སུ་བཀོད་མེད། ད་བར་དུ་ཉིད་ཀྱིས་བྲིས་པའི་རྩོམ་ཡིག་སྤུས་ལེགས་དེ་འདྲ་མང་པོ་ཞིག་ཀློག་རྒྱུ་བྱུང་བར་ཐུགས་རྗེ་ཆེ།
མདོ་ཁང་བ་ལགས། ཉིད་ཀྱི་བསམ་ཚུལ་ལ་ཤེས་ཚོད་ནུས་ཚོད་ཀྱི་བརྩི་བཀུར་བྱས་ཡོད། མང་པོ་བཤད་འདོད་མི་འདུག
བསམ་ཚུལ་འདི་ངས་མ་བཤད་སྔོན་ལ་གནམ་ལྕགས་ཀྱིས་བཤད་ཚར་འདུག ཆབ་བྲག་ཕོ་ཉའི་འཛམ་གླིང་ཉིན་མོའི་ཆེད་དུ་བྲིས་བ་རེད་ཟེར་བའི་ལྷུག་རྩོམ་འདི་བསམ་ཚུལ་གྱི་ཁོངས་སུ་འོས་ཤིང་འཚམས་ན། གནམ་ལྕགས་ལགས་ཀྱིས་སྐྱེ་རྒུ་མདོའི་ས་ཡོམ་སྐོར་ལ་བྲིས་བའི་ལྷུག་རྩོམ་དེ་དེ་བས་ཀྱང་འཇོག་པར་འོས། དུས་བབ་རྩོམ་སྒྲིག་པས་མིག་མ་བཙུམ་པར་གནམ་ལྕགས་ཀྱི་ལྷུག་རྩོམ་དེ་ཡང་བསམ་ཚུལ་གྱི་ཁོངས་སུ་འཇོག་རོགས་གནང་། ངས་ཀྱང་རེ་བ་ཞུ་གི་ཡིན།
མི་ནག་ཚང་ལགས། བདག་གིས་ཀྱང་བསམ་ཚུལ་ཡིན་ལ་ལྷུག་རྩོམ་ཡང་ཡིན་པའི་རྩོམ་ཡིག་ཅིག་ཟིན་བྲིས་སུ་བཞག་ཡོད་པ་དེ། འདི་གའི་བསམ་ཚུལ་འགོད་སར་འཇོག་པའི་ཚད་མེད་གཟིགས་རོགས་ཞུ།
ཆབ་བྲག་ཕོ་ཉའི་ལྷུག་རྩོམ་འདིའི་ཆེད་དུ་བསམ་ཚུལ་མང་པོ་བཤད་རྒྱུའི་དུས་ཚོད་ཡོང་གི་མི་འདུག་ལ་དུས་བབ་རྩོམ་སྒྲིག་པ་དང་མཉམ་དུ་རྩོམ་རིག་གི་སྐོར་ཕྱོགས་རྩོད་འདོད་ཀྱང་མེད། ཟླ་ངོ་འགའི་རྗེས་སུ་དུས་བབ་དྲ་ཚིགས་འདི་ཡང་ལྷུག་རྩོམ་སྙན་ངག་སོགས་སྙན་ངག་གི་ཕ་ས་ཞིག་ཆགས་པའི་སྨོན་ལམ་འདེབས། དུས་བབ་རྩོམ་སྒྲིག་པ་མཆོག་ཀྱང་ཨ་མཆོག་དང་མིག་གཉིས་ཀ་བཙུམས་ནས་བསམ་ཚུལ་འབྲི་མཁན་ཞིག་ཆགས་པར་སྨོན། བདེ་མོ་བྱོས།
ལྷུག་རྩོམ་དང་བསམ་ཚུལ་ཞེས་པ་གཉིས་ལ་གོ་བ་ཇི་ལྟར་བླངས་པ་ཡིན།
ལྷུག་རྩོམ་གྱི་ནང་དུ་བསམ་ཚུལ་མི་འདུག་ཟེར་གི་ཡོད་དམ། བསམ་ཚུལ་ཞེས་པ་དེ་རྩོམ་ལུས་ཤིག་ལ་གོ་བ་བླངས་པ་ཡིན་ནམ།
འདི་ལ་འགོད་དགོས་པའི་རྒྱུ་མཚན་གོང་དུ་བཤད་ཟིན། དམིགས་བསལ་གྱིས་བཀོད་པ་ཡིན། མ་གཞི་ནས་དགོངས་ཚུལ་བཏོན་པར་ཐུགས་རྗེ་ཆེ། ཉིད་ཀྱིས་གསུངས་པ་ལྟར། རྗེས་ཕྱོགས་དྲ་ངོས་གཙང་སྦྲའི་ཐད་ལ་ཤུགས་སྣོན་རྒྱག་གི་ཡིན།
ཁ་སྔོན་དུས་བབ་རྩོམ་སྒྲིག་པས་ཨམ་ཅོག་བཀབ་སྟེ་རྩོད་པར་ཞུགས་པ་ཟེར་བའི་ཟིན་བྲིས་ཞིག་སྤེལ་འདུག དེ་རིང་གི་ལྷུག་རྩོམ་འདི་དུས་བབ་ཚང་གིས་མིག་བཀབ་སྟེ་བསམ་ཚུལ་གྱི་ཁོངས་སུ་བཞག་འདུག
ངས་ཀྱང་སའི་གོ་ལར་ཉིན་མོར་རང་མོས་སྙན་ངག་ཞིག་བྲིས་ཡོད་པས་ཁྱེད་ཚོར་བསྐུར་ན་བསམ་ཚུལ་གྱི་ཁོངས་སུ་འགོད་ཀྱི་ཡིན་ནམ།
གཞན་ལ་བཤད་པ་གཅིག་པོ་མིན་པར་ཁྱེད་ཚོས་དྲ་ངོས་ཆུང་ཆུང་འདི་གཙང་སྦྲ་ཡག་པོ་ཞིག་བྱེད་ཐུབ་ཀྱི་མེད་པ་དེ་ལ་བཤད་པ་ཡིན། བཀྲ་ཤིས་ཀྱིས་གསུངས་བ་ནང་བཞིན་བསམ་ཚུལ་བསམ་ཚུལ་གྱི་ཁོངས་སུ་བཞག་ན་ཕན་པ་ཆེ་མ་གཏོགས་ལྷུག་རྩོམ་ཞིག་འདི་ལ་དྲུད་ཡོང་ནས་ད་དུང་དེས་སྔ་མ་སྐྱོར་ན་སེམས་གཏིང་ནས་བགད་མོ་དགོད་རྒྱུ་ཡོང་གི
གོ་ན་རྣ་བའི་བདུད་རྩི་བྱས་མི་གོ་ན་གཡུག་ཞོག
བསམ་ཚུལ་ལ་རྫོགས་མཐའ་མེད་པས་ཡོད་བཤད་ས་འདི་མ་ཡིན། དུས་ཚོད་ལ་ཚོད་འཛིན་ཡོང་ཆེད་གནད་ལ་ཁེལ་བའི་དགོངས་ཚུལ་དང་། དུས་དང་མཐུན་པའི་སྐབས་སུ་བབས་པའི་དགོངས་ཚུལ་ཡོད་ན་་ང་ཚོའི་རེ་བ་སྟོང་ཟད་དུ་མི་འགྲོ་བས་ཁ་ནང་་དུཕྱོགས་ནས་ཟིན་བྲིས་ལ་གཟིགས་དང་བསམ་བློ་བ།
མདོ་ཁང་ལགས། ག་དུས་ཡིན་ཡང་དཀའ་རྙོག་ཅིག་གི་ཆ་ཤས་བླངས་ནས་བསྡད་ན་སྐྱིད་པོ་འདུག་གམ། དེ་རིང་ནི་སའི་གོ་ལའི་ཉིན་མོ་རེད། ལྷུག་རྩོམ་འདི་ལ་ཉིན་མོ་འདི་དྲན་སྐུལ་གྱི་རིན་ཐང་ཡོད་པ་དངོས་ཡོད་རེད།
གཞན་ལ་ཅིག་བཤད་ནས་འདུག་པ་ལས་རང་ཉིད་ཀྱི་བསམ་ཚུལ་རེ་འགོད་ཐུབ་ན་དགེ་མཚན་ཆེན་པོ་འདུག་སྟབས། དེ་དོན་གཞེན་སྐུལ་ཞུ་བ་ལགས།
དུས་བབ་ཚང་གིས་ཆབ་བྲག་ཕོ་ཉའི་ལྷུག་རྩོམ་ཞིག་བསམ་ཚུལ་གྱི་ཁོངས་སུ་འཇོག་པ་དང་བུ་ཆུང་ཚེ་རིང་གི་ཟིན་བྲིས་གད་སྙིགས་འདྲ་བ་དེ་ཚོ་བསམ་ཚུལ་གྱི་གཏེར་དུ་སྦས་བ་འདི་གཉིས་ནི། དུས་བབ་ཚང་ལ་བསམ་ཚུལ་གྱི་མུ་གེ་བྱུང་བའི་མངོན་རྟགས་རེད།
ནོར་བཅོས། བཟོད་གསོལ། རྒྱ་རྒན་གྱི།
ཆུ་ཐིགས་སྔོན་མོ་ལགས། སྐད་ཆ་དེ་ཡང་ཅུང་ཐལ་དྲགས་པ་མིན་འགྲོ
འབྲོག་རྒན་ལགས། ད་ནི་དོན་མེད་སྙན་ཚིག་འདི་རིགས་འབྲི་བའི་དུས་ཤིག་མ་རེད། རྒྱ་ནག་གཞུང་ནི་བོད་ཀྱི་ཆོས་ལུགས་རིག་གནས་ཀྱི་སྲོག་ཤིང་ཡིན་པའི་བྱམས་སྙིང་རྗེ་དང་། བྱང་ཆུབ་སེམས་དཔའ། སྟོང་ཉིད་བདག་མེད། བདག་གཞན་མཉམ་བརྗེ་ཡི་ཉམས་ལེན་མཁན་མ་ཡིན་ལ། ཁོ་ཚོའི་སྲིད་ཇུས་སུའང་གདུང་སེམས་མཉམ་སྐྱེད་དང་ནང་མི་ཕུ་ནུ་སོགས་ཀྱི་བསམ་བློ་ལྟ་བ་འདུག་ནའང་། “བདག”ལ་ཁེ་ཕན་མེད་ཚེ་གཞན་ལ་རོགས་གྲོགས་མི་བྱེད་ཅིང་། རྟག་ཏུ་རང་དབང་དང་འདྲ་མཉམ་དང་ཐོབ་ཐང་དང་དམངས་གཙོ་སོགས་ཡི་གེར་བྲིས་ཤིང་ཁ་ལ་ཁྱེར་ཏེ་རྒྱུག་ནའང་། སྔོན་འགྲོ་ནི“བདག”སྟེ་རྒྱ་གཞུང་རང་གི་ཁེ་ཕན་ཁོ་ན་ལས་མ་འདས་པ་བདེན་དུ་ཆུག་ཀྱང་། ད་ཐཻངས་རང་གཞུང་ལ་གཟའ་ནད་ཕོག་དགོས་དོན་གང་ཡིན་ནམ། དབང་དང་རྒྱུ་ནོར་གྱི་ཕོངས་བ་བདེན་ཡང་སེམས་ཚོར་གྱི་ཕོངས་དགོས་དོན་གང་ཡིན་ནམ།
ས་ཆེན་པོའི་དོན་སྣོད་རྒྱ་ཡིས་དཀྲུགས།
ཐུགས་ཁྲོས་པའི་གདུག་རྩུབ་བོད་ལ་བསྟན།
ང་ཉེས་མེད་ཉམས་ཆུང་གདོང་དམར་ཚོས།
མགོ་སྒུར་ནས་བཟོས་གསོལ་ཞུ་དོན་མེད།
རི་བརྒྱ་ཀླུང་བརྒྱ་བོད་ཀྱིས་བསྡམས།
རི་བརྒྱ་ཀླུང་བརྒྱ་རྒྱ་ཡིས་སློག
རི་བརྒྱའི་སྙིང་པོ་རྒྱ་ལ་ཁྱེར།
ར་བརྒྱའི་རོ་ཡིས་བོད་པ་མནན།
ལས་འབྲས་མེད་པའི་ས་ཆེན་གྱིས།
ལས་ངན་བོད་ལ་བརྙས་བཅོས་བྱེད།
ལས་འབྲས་མེད་པའི་རྒྱ་རྒན་གྱིས།
ལས་དང་རླུང་ཡར་ལ་འདེགས།
ལྷ་ཀླུ་གཉེན་གསུམ་ལ་བཟོད་གསོལ་མེད་ལ་གཏོར་མའང་འབུལ་རྒྱུ་མེད་་་་ཡོད་ཚད་ཚར་སོང་་་་་ཡོད་ཚད་ཤི་སོང་་་་་མཆོད་མཆོད་ནས་མཐར་བསླུས་སོང་་་་བཀུར་བཀུར་ནས་མཐར་གཡུགས་སོང་་་་ད་ཅི་ཡང་མི་དགོས་ལ་ཅི་ཡང་མི་འདོད་་་་རང་ཉིད་ཀྱི་རང་གི་མགོན་དང་སྐྱབས་ཡིན་་་
ལྷ་ཀླུ་གཉེན་གསུམ་ལ་བཟོད་གསོལ་མེད་ལ་གཏོར་མའང་འབུལ་མེད་་་་ཡོད་ཚད་ཚར་སོང་་་་་ཡོད་ཚད་ཤི་སོང་་་་་མཆོད་མཆོད་ནས་མཐར་བསླུས་སོང་་་་བཀུར་བཀུར་ནས་མཐར་གཡུགས་སོང་་་་ད་ཅི་ཡང་མི་དགོས་ལ་ཅི་ཡང་མི་འདོད་་་་རང་ཉིད་ཀྱི་རང་གི་མགོན་དང་སྐྱབས་ཡིན་་་
རྩོམ་ཡིག་འདིའི་ནང་དོན་གྱི་ཆ་ནས་ཤིན་ཏུ་ལེགས་ཀྱང་། རྗོད་བྱེད་ཚིག་སྦྱོར་དང་ནང་དོན་བརྡ་སྤྲོད་སྟངས་ཀྱི་རྣམ་པ་ནི་ད་དུང་བདག་གི་བློ་ལ་མི་འབབ། རྒན་ཆབ་བྲག་ལགས་ཀྱིས་དུས་དང་ནམ་དུ་ཡང་རྩོམ་ཡིག་གསོན་ཉམས་ལྡན་པ་ཞིག་འབྲི་མི་ཐུབ་པ་ནི་ཀློག་པ་པོ་བདག་གི་ཕངས་སེམས་ཉག་བུ་དེ་ཡིན།