བསྟན་འཛིན་ཤེས་རབ།
སྐྱེ་རྒུ་མདོར་ས་ཡོམ་གྱི་གོད་ཆག་ཐེབས་ཏེ་ཉིན་བདུན་འགོར་བའི་ཉིན་མོ་འདིར། ང་ཚོས་སྒྲུབ་དགོས་པའི་དོན་དག་མང་བོ་ཞིག་བསྒྲུབས་དང་སྒྲུབ་བཞིན་ཡོད་མོད། འོན་ཀྱང་བསམ་བློ་ཡང་དང་བསྐྱར་དུ་སྐོར་ཚེ། ད་དུང་ངེས་པར་སྒྲུབ་དགོས་པའི་དོན་དག་གལ་ཆེན་ཞིག་ལྷག་འདུག་སྟེ། དེ་ནི་གོད་ཆག་ཐེབས་ཤུལ་དུ་ལུས་པའི་དྭ་ཕྲུག་རྣམས་ཀྱི་འདུན་ལམ་ཡིན།
ད་ལྟ་གསར་འགྱུར་དང་དྲ་ཚིགས་དག་ལས་ཤེས་གསལ་ལྟར་ན། བོད་ནང་དང་རྒྱ་ནག་གི་ས་ཁུལ་རྣམས་སུ། གཞུང་སྒེར་དང་ཚོགས་པ་སོ་སོས་རྒུད་སྐྱོབ་ཀྱི་བྱ་འགུལ་སྤེལ་བའི་གནས་ཚུལ་ནི་ཚ་ཚ་འུར་འུར་རེད་ལ། ཞལ་འདེབས་བསྡུ་བའི་བྱ་འགུལ་གྱི་དགོང་ཚོགས་གཅིག་གི་སྟེང་ཡང་རྒྱ་སྒོར་དུང་ཕྱུར་བཅུ་ཕྲག་ལྷག་འདུས་འདུག་པས། ད་ནི་སྐྱེ་རྒུ་མདོའི་བསྐྱར་བསྐྲུན་གྱི་མ་དངུལ་ཐད་ང་ཚོར་སེམས་ཁྲལ་དེ་ཙམ་མེད་པར་སྣང་། འོན་ཀྱང་ཕྱོགས་གཉིས་པོ་གང་གིས་ཀྱང་ད་དུང་ཁ་མ་གྲགས་པའི་དྭ་ཕྲུག་རྣམས་ཀྱི་འདུན་ལམ་ཐད། ངས་བསམས་ན། རང་རེའི་སྲིད་གཞུང་གིས་གང་མྱུར་གྱིས་ཐབས་ལམ་ཅི་འདྲ་ཞིག་སྤྱོད་དགོས་རུང་སྤྱད་དེ། དྭ་ཕྲུག་རྣམས་བྱེས་ཀྱི་སློབ་གྲྭ་ཁག་ཏུ་ལེན་ཐབས་གནང་དགོས། འདི་ནི་དྭ་ཕྲུག་དེ་རྣམས་ཀྱི་གནས་སྐབས་ཀྱི་དཀའ་སྡུག་སེལ་བ་ཙམ་མ་ཡིན་པར། མི་ཚེ་གཅིག་གི་ལས་དབང་དང་སྦྲེལ་ཡོད་པར་མ་ཟད། ཐ་ན་བོད་མི་རྣམ་དག་ཅིག་ཏུ་འགྱུར་མིན་དང་ཡང་འབྲེལ་བ་ཡོད་པ་ཞིག་ཡིན་སྟབས། རང་རེའི་གཞུང་སྒེར་གང་ཡིན་རུང་སྒྲིམ་དགོས་པའི་དོན་ཞིག་རེད་དོ ། །
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བསྟན་འཛིན་ཤེས་རབ་ལགས། བོད་ནང་དུ་ཤེས་ཡོན་ཅན་དང་དཔལ་འབྱོར་གྱི་ཆ་རྐྱེན་བཟང་པོའི་བུ་ཕྲུག་རྣམས་རྒྱ་ནང་དུ་སློབ་གྲར་གཏོང་གང་ཐུབ་བྱེད་བཞིན་པ་མ་ཡིན་ནམ། རྒྱ་གར་གཙོས་པའི་བཙན་བྱོལ་ནང་དུའང་རང་གི་བུ་ཕྲུག་གི་མ་འོངས་པའི་མདུན་ལམ་ཆེད་དཀའ་ལས་ཆེ་ཡང་ཨ་རི་སོགས་ནུབ་ཕྱོགས་རྒྱལ་ཁབ་ཏུ་འགྲོ་མཁན་དང་། ཁ་དབང་ཡོད་ཚད་ཀྱིས་ཐོངས་མཆན་ཉོས་ནས་འགྲོ་མཁན་ཡོད་པ་དེ་དག་གི་བུ་རབས་ཚ་རྒྱུད་བོད་མི་དག་མ་བྱེད་མ་དགོས་པར། ད་ལྟ་དཀའ་ངལ་འཕྲད་འདུག་པ་དང་ཕ་མ་དང་གཞི་རྟེན་གང་ཡང་མེད་པའི་ད་ཕྲུག་དེ་ཚོ་དག་མ་ཞིག་གི་ཆེད་དུ་རང་ཉིད་ཀྱི་མདུན་ལམ་དང་གོ་སྐབས་ཡོད་ཚད་བློས་གཏོང་དགོས་པ་ཡིན་ནམ།
སྔོན་ཆད་ཟི་ཁྲོན་བུན་ཁྲོན་གྱི་ས་ཡོམ་སྐབས་ངས་གནས་ཚུལ་འདི་འདྲ་ཞིག་མཐོང་མྱངས། དོན་དམ་པར་སེམས་བསམ་པའི་གཏིང་ནས་རོགས་སྐྱོར་བྱས་མིན་གང་ལྟར་རུང་། སྲིད་གཞུང་དང་སྒེར་གྱི་བར་དང་། ཚོགས་པ་དང་ཚོགས་པའི་བར་དག་ཏུ་རོགས་སྐྱོར་བྱས་པའི་དགེ་ཁ་ཛ་དྲག་གིས་རྩོད་བཞིན་འདུག་ལ། གོད་ཆག་ཐེབས་ཤུལ་གྱི་མི་མང་བོ་ཞིག་རོགས་སྐྱོར་བྱས་པའི་མིང་ཐོག་ནས་རྒྱ་ནག་གི་ས་ཆ་ག་ས་གར་བགོས་སོང་། དེ་ཙམ་མ་ཟད་ཕ་མེད་མ་མེད་དང་། ཕ་ཕྱེད་མ་ཕྱེད་ཀྱི་དྭ་ཕྲུག་མང་བོ་ཞིག་ཀྱང་དགེ་ཁ་བརྩོན་ལེན་གྱི་ཆེད་ཕྱོགས་ཕྱོགས་སུ་ཁྲིད་སོང་། རྗེས་སུ་གོ་ཐོས་ལྟར་ན། གནས་སྤོར་བྱས་པའི་མི་དམངས་དེ་དག་གིས་གཞན་ཡུལ་གྱི་གནམ་གཤིས་དང་ས་ཆུ་མ་འཕྲོད་པའི་དཀའ་ངལ་མྱོང་བཞིན་འདུག་ཟེར་ལ། ལྷག་དོན་ཐོག་མའི་རོགས་སྐྱོར་གྱི་རྣམ་གྲངས་དེ་ཙམ་གྱིས་རྒྱུན་རིང་གི་འཚོ་བར་འདང་ཐབས་མེད་པ་དང་། ཆགས་ས་བརྟེན་ས་མེད་ཅིང་ཐོག་མའི་ཁ་ཡག་ཚིག་འཇམ་གྱི་རྣམ་འགྱུར་དེ་ཚོ་ཡང་ཡལ་ཚར་བས། ཁོང་ཚོ་དཀའ་ངལ་གསར་བ་ཞིག་གི་འོབས་དོང་དུ་ལྷུང་འདུག་ཟེར།
ཉམས་མྱོང་དེ་དག་ལས་བླངས་ཏེ། ད་ལྟ་ང་ཚོས་ཀྱང་སྐྱེ་རྒུའི་དྭ་ཕྲུག་རྣམས་ལ་སེམས་ཁྲལ་མི་བྱེད་རང་བྱེད་རེད། བུན་ཁྲོན་གྱི་དྭ་ཕྲུག་ནི་ཕན་ཚུན་གཉིས་ཀ་རྒྱ་རིགས་ཡིན་པས་གནད་དོན་དེ་ཙམ་ཡོད་མི་སྲིད་མོད། འོན་ཀྱང་སྐྱེ་རྒུའི་དྭ་ཕྲུག་རྣམས་ནི་བོད་རིགས་ཡིན་ལ། གལ་སྲིད་རྒྱ་ཁོག་དག་ཏུ་ཁྲིད་ཕྱིན་ཚེ། སྐད་རིགས་གོམས་གཤིས་སོགས་སྣ་སྒོར་མོ་ནས་ཐ་དད་ཡིན་སྟབས་དཀའ་ངལ་མི་དམན་པ་ཞིག་འཕྲད་རྒྱུར་མ་ཟད། རྨང་གཞིའི་ས་བོན་ནས་བཟུང་སྟེ་རྒྱའི་རིག་གནས་ཀྱིས་བསྐྲུན་ངེས་ཡིན་པས་བོད་མི་དག་མ་ཞིག་ཏུ་འགྱུར་ཐབས་མེད་པ་དང་། ཕྱིས་འཚར་ལོངས་དང་འདང་ཕོག་ཐུབ་དུས་ཁོང་ཚོར་ན་ཟུག་དེ་ལས་ཆེ་བ་ཞིག་ག་ལ་ཡོད། ཡང་གཅིག་བཤད་ན་ང་ཚོས་འདས་པོའི་ཤུལ་གྱི་གསོན་ཕྲུག་ལ་བདག་པོ་རྒྱག་མ་ཐུབ་པར་གྱུར་པ་རེད།
རོགས་ཚོགས་ཁག་ནས་གཟིགས་སྐྱོང་གནང་ན་ཡང་། ཕུགས་རྒྱང་རིང་བོར་བསམ་བློ་བཏང་ཚེ་ཡོད་ཚད་བདེ་ལེགས་སུ་འགྱུར་འགྲོ་བའི་ངེས་པ་མེད་པ་དང་། དྭ་ཕྲུག་དེ་དག་རྒྱ་གར་དུ་ཁྲིད་ཡོང་རྒྱུ་ཞེས་ན་ཡང་རྒྱ་ནག་གི་ཆོག་མཆན་ཐོབ་མིན་བཅས་ཀྱིས་ལས་སླ་བོ་ཞིག་མེད་པ་ཧ་ཅང་གསལ་བོ་རེད། ད་ནི་གང་ལྟར་རུང་ཐབས་ཤེས་གང་དྲག་སྤྱད་དེ། སྐྱེ་རྒུའི་དྭ་ཕྲུག་རྣམས་རྒྱ་ཁོག་ཏུ་ཆ་བགོས་བྱེད་མི་འཇུག་རྒྱུའི་དོན་ལ་འབད་རྒྱུ་ནི་་སྐབས་སུ་བབས་པའི་ཁ་ཚ་དགོས་ཀྱི་དོན་ཞིག་རེད།
སྐྱེ་རྒུའི་དྭ་ཕྲུག་འདི་དག་གི་འདུན་ལམ་ཐད། རྒྱ་ནག་གིས་གོད་སྒྲིག་ཅིག་བྱེད་བཞིན་པ་རྣམ་པ་ཚོ་ལས་གསར་དུ་ཐོས་པ་ཡིན་ལ། ད་ལྟ་ནི་སེམས་པར་དངངས་སྐྲག་ཅིག་གིས་ཁྱབ་བཞིན་འདུག
གྲོགས་པོ་ཚོ།བང་ཆེན་ཚང་གིས་འདྲ་པར་དང་ལྡན་པའི་གསར་འགྱུར་ལ་བལྟས་ན།རྒྱ་ཚང་གིས་ད་ལྟ་ནས་ཡུལ་ཤུལ་ས་གནས་ནས་རྐུ་འཁྱེར་བྱེད་ཡག་གི་འགོ་ཚུགས་འདུག་གོ།ད་ཅི་བྱེད་དགོས་ལེ་རེད།
སྐུ་ཞབས་བསྟན་འཛིན་ཤེས་རབ་ལགས། སྐྱེ་རྒུ་མདོའི་བུ་ཕྲུག་ཚོའི་ཆེད་དུ་རྒྱ་ནག་དབུས་གཞུང་གིས་ཁ་སྔོན་ནས་ཐེངས་དང་པོར་སློབ་གྲྭ་ཁག་ ༢༢ བསྐྲུན་རྒྱུའི་སླད་དུ་རྒྱ་སྒོར་དུང་ཕྱུར་ ༡ དང་བྱེ་ ༨ ས་ཡ་༦ འབུམ་༧ ལྷག་གི་མང་དངུལ་བཏང་ནས་འཆར་འགོད་ཆེད་བཀོད་ཁྱབ་བཏང་ཟིན་པ་རེད།
ད་དུང་པེ་ཅིང་དུ་ཞལ་འདེབས་ཆེད་མཚན་ཚོགས་གཉེར་སྐྱོང་གི་སྐབས་སུ་རྒྱ་སྒོར་དུང་ཕྱུར་ ༢༡ ལྷག་བྱུང་ཡོད་པའི་གསལ་བསྒྲགས་སྤེལ་ཟིན་འདུག
གྱོང་གུན་ཐེབས་མཁན་ཚོ་ནི་གོད་ཆག་ཁྲོད་ཤི་བ་དང་། རྨས་པ། སྐྱོན་ཅན་དུ་དུ་གྱུར་པ་དག་རེད། འོན་ཀྱང་ཤུལ་ལུས་ཅན་ཚོའི་འབྱུང་འགྱུར་གྱི་འཚོ་གནས་ལ་གནས་སྐབས་ཙམ་མ་གཏོགས་སྔར་ལས་ལྷག་པའི་ཡར་རྒཡས་དང་འཛུགས་སྐྲུན྄ཡོང་རྒྱུར་ཐེ་ཚོམ་ཁྱོན་ནས་མེད་པ་རེད།
ངས་ཚེས་ ༢༠ ཉིན་སྐྱེ་རྒུ་མདོ་ས་ཁུལ་ལ་ཉིན་རེར་ཐེངས་ཉི་ཤུ་ནས་སུམ་བཅུ་བར་འབྲེལ་བ་བྱེད་མཁན་ཞིག་ལ་བཅར་འདྲི་ཞིག་བྱས་པ་ཡིན། སྐབས་དེར་བཅར་འདྲི་བྱེད་ཡུལ་དེས་བརྗོད་དོན་ལ། སྐྱེ་རྒུ་མདོ་ས་ཁུལ་གྱི་དྭ་ཕྲུག་སྟོང་ཕྲག་གཅིག་པེ་ཅིང་གི་སློབ་གྲྭ་གྲགས་ཆེ་བ་ཞིག་གིས་ལེན་རྒྱུ་ཡིན་པའི་ཁས་ལེན་བྱས་ཡོད་འདུག་ལ། མགྱོགས་མྱུར་དྭ་ཕྲུག་དེ་དག་བསྡུ་བར་ཡོང་གི་ཡོད་འདུག་པའི་གླེང་གི་འདུག དྭ་ཕྲུག་ཚོ་ལ་སློབ་སྦྱོང་སྤྲོད་རྒྱུའི་བསམ་བློ་གཏོང་བར་ཡག་པོ་ཡིན་པའི་ངོས་འཛིན་བྱེད་བཞིན་འདུག་ཀྱང་། སྐྱེ་རྒུ་མདོ་ས་ཁུལ་གྱི་བོད་མི་ཚོའི་སེམས་ཁྲལ་ཆེ་ཤོས་ནི་བོད་ཕྲུག་དེ་དག་མ་འོངས་པར་སོ་སོ་བོད་མི་ཡིན་པ་མི་ཤེས་མཁན་ཞིག་དང་། བོད་ཀྱི་ཐུན་མིན་རིག་གཞུང་གི་དྲི་མ་མེད་པའི་མི་རབས་ཤིག་ཏུ་འགྱུར་བར་སེམས་ཁྲལ་བྱེད་བཞིན་འདུག དེར་བརྟེན་སྐྱེ་རྒུ་མདོ་ས་ཁུལ་རང་དུ་སློབ་གྲྭ་རྒྱག་ཐབས་སམ་ཡང་ན་བོད་མི་འདུས་སྡོད་ཀྱི་ས་ཁུལ་ཁག་གི་སློབ་གྲྭར་གཏོང་བའི་རེ་བ་བྱེད་བཞིན་འདུག འདིའི་སྐོར་ཚེས་ ༢༠ ཉིན་གྱི་ཨ་རིའི་རླུང་འཕྲིན་ནས་གསན་ཐུབ།
བསྟན་འཛིན་ཤེས་རབ་ལགས། ད་ལན་གནད་འགག་ཆེ་ས་ནས་གླེང་འདུག་པས་དགའ་ཡོད།
དངོས་གནས་བདེན་པ་རེད། དྭ་ཕྲུག་དེ་རྣམས་བདག་སྐྱོང་ཚད་ལྡན་ཞིག་ཡོང་བ་བྱེད་རྒྱུ་ཤིན་ཏུ་གལ་ཆེན་པོ་རེད། དེར་བརྟེན་ནུས་ལྡན་རྣམས་ཀྱིས་དམིགས་བསལ་གྱི་དོ་སྣང་གནང་རོགས། ༸གོང་ས་མཆོག་གིས་ཀྱང་དམིགས་ཡུལ་དང་པོར་ས་གནས་དེ་ཡི་སློབ་གྲྭ་ཁག་གི་སློབ་སྦྱོང་ལ་འཐུས་ཤོར་མ་ཤོར་བར་གང་མགྱོགས་སློབ་སྦྱོང་སྤྲོད་ཐུབ་པའི་རེ་སྐུལ་གནང་འདུག
བསམ་ཚུལ་ཡག་པོ་འདུག ཐུགས་རྗེ་ཆེ།
ད་རེར་རང་རེའི་སྲིད་བློན་ཟམ་གདོང་བས་སྐད་ཆ་གང་ཡང་མ་བཤད་པ་དེར་དངོས་གནས་བློ་ཕམ་ཆེན་པོ་ཡོད།
བཙན་བྱོལ་བོད་གཞུང་གིས་ཁ་ཚ་དགོས་བཏུགས་ཐོག་བཙན་བྱོལ་དུ་ཡོད་པའི་སྐྱེ་དགུ་མདོའི་ཕྲུ་གུ་རྣམས་ལ་བདག་སྐྱོང་དམིགས་བསལ་བྱེད་དགོས་ཡོད། ཟམ་གདོང་བླ་མ་བཞྀན་ལྟ་བ་འཁྲིགས་འཛིན་བྱེད་མི་ཉན།
འདིར་གཟིགས་པར་ཞུ།http://picasaweb.google.com.au/aenpokyabgon/AllKyegu2010EarthquakePhotos#
http://picasaweb.google.com.au/aenpokyabgon/AllKyegu2010EarthquakePhotos#
ཕྱི་ཚེས་ ༡༨ ཉིན་སྐྱེ་རྒུ་མདོའི་བྱིས་པ་ ༦༠ ལྷག་ཕོ་བྲང་དུ་དམིགས་བསལ་མཇལ་ཁར་བཅར་འདུག ཚང་མ་སུ་ཇཱ་སློབ་གྲྭ་ནས་ཡོང་བ་རེད། འདི་ཕྱོགས་ནས་དེ་དག་གི་མདུན་ལམ་ཧྲ་ཐག་ཐག་ཅིག་བཟོ་ཐུབ་སོང་ན་འགྲིག་གི་རེད། ད་དུང་ངྷ་སྟེང་བོད་ཁྱིམ་དང་མ་སུ་རི་ན་སྐྱེ་རྒུ་མདོའི་བྱིས་པ་ག་ཚོད་ཅིག་ཡོད་མེད་མ་ཤེས།
ཕར་ཕྱོགས་ཀྱི་དྭ་ཕྲུག་དེ་དག་ལ་གཟིགས་སྐྱོང་གནང་འདོད་ཡོད་ན་ངེས་པར་བཙན་བྱོལ་སྤྱི་ཚོགས་སུ་ཁྲིད་ཡོང་དགོས་དོན་མི་འདུག དེང་སྐབས་བོད་ནང་གི་སློབ་གསོ་ལ་རོགས་པ་བྱེད་མཁན་ཚོགས་སྡེ་མང་པོ་འདུག མ་ཅིག་དང་བོད་ཀྱི་ཐེབས་རྩ། ཀུན་ཕན་ཐེབས་རྩ་སོགས་མང་པོ་འདུག ཚོགས་སྡེ་འདི་དག་མཉམ་རུབ་ཀྱིས་ཁོང་ཚོར་དམིགས་བསལ་གྱི་སློབ་གྲྭ་ཞིག་འཛུགས་ཐུབ་ན་དགེ་མཚན་ཆེ། དངུས་དངོས་ཀྱི་རོགས་སྐྱོར་འབུལ་མཁན་ཡོད་ན་འབུལ་ཆོག་གི་རེད།
ངས་བསམ་ན། ཁོང་ཚོ་ངེས་པར་དུ་སྐྱེ་རྒུ་མདོ་ནས་ནར་སོན་དགོས་པ་རེད། སྐྱེ་རྒུ་མདོའི་མི་རབས་གསར་པ་དག་རེད། ཤི་བོའི་རྗེས་ཀྱི་གསོན་པོ་ཚོ་རེད། སློབ་གྲྭའང་དེར་བརྒྱབ་ན་ཡག་གི་རེད། དེ་ནས་འཚར་ལོངས་བྱུང་། ཁོང་ཚོའི་རྨི་ལམ་དང་སྐྱིད་སྡུག་ཡོད་ཚད་ས་དེའི་རི་ཆུ་ནགས་གསུམ་དང་ཁ་མ་བྲལ་ན་ཡག་གི་རེད།
སྐྱོ་གདུང་གི་ངུ་ངག་དང་ཡིག་དྲུག་གི་དབྱངས་རྟའི་ཁྲོད་འཐིམ་པའི་ཡུལ་ཤུལ། ཕམ་སེམས་ཀྱི་སྡུག་བསྔལ་དང་རྨ་ཁ་ཡི་ན་ཟུག་ཁྲོད་འཇགས་པའི་ཡུལ་ཤུལ། ཁྱོད་ནི་དུས་ལ་བབ་པའི་འབར་གས་ཆུང་ཆུང་ཞིག་དང་འདྲ་བར་འདི་ལྟར་མཁའ་ལ་འཕྱུར་བ་དང་གཏིང་ལ་སྣུབ་པའི་ཟང་ཟིང་གི་དུས་ཚོད་ཐུང་ཐུང་དེའི་ནང་དུ། བདག་གིས་ད་དུང་ཡང་ཁྱོད་ཀྱི་ཕྱོགས་ངོས་གཞན་ཞིག་གི་ཕམ་ཁ་མང་བོ་མཐོང་བྱུང་། ཨ་བདག་གི་ཡུལ་ཤུལ། ངེས་དོན་གྱི་ཡུལ་ཙམ་དང་ཤུལ་ཙམ་དུ་གྱུར་བའི་ཨར་འདམ་ཧྲལ་ཧྲིལ་གྱི་སྙིགས་རོ་ཡ།
སྔོན་ཆད་ཅིག་ལ། བདག་གིས་ཡུལ་ཤུལ་ལ་ཁངས་ཆག་ལྷུང་བ་གོ་མྱོང་། སྔོན་ཆད་ཅིག་ལ། བདག་གིས་ཡུལ་ཤུལ་གྱི་ཁྱི་གོང་ཆེ་བ་ཐོས་མྱོང་། སྔོན་ཆད་ཅིག་ལ། བདག་ནི་ཡུལ་ཤུལ་ལ་ཤིན་ཏུ་དུངས་མྱོང་། ཨ་བདག་གི་ཡུལ་ཤུལ། དུས་ཚོད་ཐུང་ཐུང་ཞིག་ལ་རྨེག་མེད་དུ་གྱུར་བའི་ཨར་འདམ་གྱི་སྙིགས་རོ་ཧྲལ་ཧྲིལ། ཁྱོད་ནི་དེ་རིང་གི་འདི་ལྟར། ས་ཡ་དྲུག་གི་མིག་ཆུའི་ཀློང་ལ་འཐིམ་འགྲོ་བ་སུ་ཡིས་དྲན་མྱོང་།
སྲིད་གཞུང་གིས་ཁྱེད་རང་བསྐྱབས་པར་དམག་དཔུང་བཏང་ནའང་། དམག་མི་ཡིས་ཁྱོད་ཀྱི་སྒོ་ཁྱི་ཚུན་ཆད་རྐུས་ནས་བུད་ཐལ། ད་ནི་ཁྱོད་ལ་ཅི་ཞིག་ལྷག་སོང་། བདག་གི་ཡུལ་ཤུལ་ཡ། ད་རེའི་གོད་ཆག་འདིས་སྲིད་གཞུང་ལ་འཁྲབ་སྟོན་ཐེངས་གཅིག་བསླངས་སོང་ལ། སྲིད་གཞུང་གིས་ཀྱང་གོ་སྐབས་དམ་འཛིན་བྱས་སོང་། ཁྱོད་ཀྱིས་ད་དུང་སུ་ཞིག་ལ་སྒུག་ཡོད་ཨ།
ང་ཁྱོད་ཀྱི་གཡོ་འགུལ་དེར་མི་སྐྲག ང་ཁྱོད་ཀྱི་ཕམ་ཉེས་ལའང་མི་སྡུག ཡིན་ནའང་ངས་སྲིད་གཞུང་གི་གོ་སྐབས་དམ་འཛིན་དེར་བསྟུན་ནས་ཁྱོད་ཀྱི་སེམས་འགུལ་ལྷུག་ལྷུག་གི་ངང་ཚུལ་དེ་མཐོང་བྱུང་། ངས་ཕྱི་རོལ་སྦྲང་རྩིས་བསྟིམ་པའི་ནང་གི་དུག་དྲི་དེ་ཚོར་བྱུང་། ངས་ཁ་གཡང་སྙན་མོའི་ཤུགས་ཀྱི་འཆར་གཞི་གསར་བ་དེ་མཐོང་བྱུང་། ཨ་བདག་གི་ཡུལ་ཤུལ། གཤིན་པོ་ཁྲི་ཕྲག་གི་རྣམ་ཤེས་ཀྱི་བསྟི་གནས།
གནའ་བོའི་འབྲོང་ཁྱུ་གཤར་སའི་ལྷད་མེད་ཀྱི་འབྲོག་ཐང་། རྨ་འབྲི་རྫ་གསུམ་འབྱུང་སའི་ཡིད་འོང་གི་འབྲོག་ཐང་། རང་བྱུང་ལྷུན་དུ་རྫོགས་པའི་དྭངས་གཙང་གི་འབྲོག་ཐང་། ཁྱོད་ནི་གློ་བུར་དུ་སྒྱུ་མའི་ཨར་འདམ་གྱི་སྙིགས་རོར་གྱུར་དོན་ཅི། ཁྱོད་ནི་གློ་བུར་དུ་རྡུལ་ཕྲན་དུག་རྫས་ཀྱི་ཡུལ་དུ་གྱུར་དོན་ཅི། ད་དུང་གློ་བུར་དུ་་་་་་་་
ངས་ཁྱོད་ཀྱི་ངོ་གདོང་ནས་གོ་བ་གཞན་ཞིག་ལེན་འདོད། ངས་ཁྱོད་ཀྱི་རྒྱབ་ལོགས་ནས་ལས་འགུལ་གཞན་ཞིག་བརྩམས་འདོད། ཨ་ཡུལ་ཤུལ་ལགས། ཁྱོད་ཀྱི་བདག་པོ་ནི་ལམ་ལམ་འབར་བའི་དུར་ཁྲོད་ཀྱི་མེ་ལྕེ་དེ་ཡིན། ཁྱོད་ཀྱི་རེ་བ་ནི་གཡོ་འགུལ་ཁྲོད་གྱེར་བའི་ངུ་ངག་གི་དབྱངས་རྟ་དེ་ཡིན།