ཆབ་སྲིད་དང་མ་འབྲེལ་བའི་མྱ་ངན་རོགས་སྐྱོར། དགེ་བསྟན།

དགེ་བསྟན།

༤་༡༤ དོན་རྐྱེན་བྱུང་བ་ནས་བཟུང་དེ་རང་གི་བར་ཉིན་བརྒྱད་འགྲོ་མུས་ཡིན་ཞིང་། ས་འགུལ་བྱུང་བའི་ཉིན་དེ་ནས་བཟུང་རྒྱ་ནག་གཞུང་མང་གཉིས་ཀའི་མྱུར་སྐྱོབ་ཀྱི་ལས་དོན་ཐད་བློ་རྩེ་གཅིག་བསྒྲིལ་གྱིས་མྱུར་སྐྱོབ་དཔུང་ཁག་གང་མང་གནོད་འཚེ་ཐེབས་སའི་ས་གནས་སུ་གཅིག་རྗེས་གཉིས་མཐུད་ཀྱིས་བཏང་སྟེ་རྒུད་སྐྱོབ་ལས་དོན་ཉིན་མཚན་དབྱེར་མེད་དུ་གཞོལ་བཞིན་པ་མ་ཟད། ཅ་དངོས་སྐྱེལ་འདྲེན་དང་རྨས་མ་འོར་འདྲེན་སོགས་ཀྱི་ཆེད་དུ་སྐྱེལ་འདྲེན་རླངས་འཁོར་གྱི་གྲངས་འབོར་ལྟ་ཅི། གནམ་གྲུ་ཆེ་ཆུང་འདྲ་མིན་འཕུར་ཐེངས་སུམ་བརྒྱ་ཙམ་ཆེད་གཏོང་བྱས་པ། ལྷག་དོན་རྒྱལ་ཁབ་ཀྱི་གཙོ་འཛིན་རྣམ་པ་རིམ་པར་ས་གནས་སུ་ཆེད་ཕེབས་ཀྱིས་མང་ཚོགས་ལ་སེམས་གསོ་དང་འབྱུང་འགྱུར་འཛུགས་བསྐྲུན་ལ་དགོངས་བཞེས་གནང་པ་སོགས་ལ་ང་ཚོ་བོད་རིགས་ཚོས་ཐུགས་རྗེ་ཆེ་ཞུ་དགོས་ངེས་ཡིན། ཡིན་ནའང་གནོད་འཚེ་ཐེབས་སའི་ས་གནས་ནས་བཏང་བའི་གནས་ཚུལ་ལྟར་ན་དེ་དག་ནི་རྒྱ་གཞུང་གིས་རྒྱལ་སྤྱིའི་ཐོག་ཕྱིའི་རྣམ་པ་ཙམ་ཡིན་པ་ལས་དོན་དམ་གྱིས་མྱུར་སྐྱོབ་བྱེད་མཁན་བོད་རིགས་སེར་སྐྱ་མང་ཚོགས་ཡིན་པའི་གནས་ཚུལ་མཁོ་སྤྲོད་བྱས་ཡོད། ངས་གནས་ཚུལ་དེ་ལ་བསམ་ཞིབ་བྱེད་སྐབས་ཁོང་ཚོའི་སྐད་ཆ་དེ་བདེན་པ་མིན་ཞེས་བཤད་དཀའ། རྒྱུ་མཚན་ནི། ཐེངས་འདིའི་གནོད་འཚེ་ནི་གཞི་རྒྱ་ཆེ་ཞིང་ཧ་ཅང་ཚབས་ཆེན་གྱི་རང་བཞིན་ཡིན་པའི་དབང་གིས་མྱུར་སྐྱོབ་རུ་ཁག་གང་སར་ཁྱབ་མ་ཐུབ་པའི་དཀའ་ངལ་འཕྲད་པ་ཏན་ཏན་ཡོད་སྲིད། ཡིན་ན་ཡང་སྤྱིའི་ཆ་ནས་རྒྱ་ནག་གཞུང་གི་རྒུད་སྐྱོབ་བཀོད་འདོམ་དང་མྱུར་སྐྱོབ་བྱེད་ཚད་ལྟོས་འཇོག་གིས་ཧ་ཅང་མྱུར་པ་དང་། རྒྱ་ཆེའི་བོད་རིགས་མང་ཚོགས་ཀྱི་ལྷག་བསམ་ཟོལ་མེད་ངང་རང་ནུས་གང་ལྕོགས་ བྱས་ཡོད་པའི་ཉེར་ལེན་ལ་གནོད་འཚེའི་གཞི་རྒྱ་ལ་དཔག་པའི་མྱུར་སྐྱོབ་ལས་དོན་ཚགས་ཚུད་པོ་བྱུང་སོང་སྙམ་པའི་སྣང་བ་བྱུང་། འོན་ཀྱང་གནད་དོན་རེ་ཟུང་ལྷག་སྲིད་པས་དེ་ལ་ང་ཚོ་ཚང་མས་གུ་ཡངས་དཀྱེལ་ཆེ་གནང་གལ་ཆེ། གནད་འགག་འདི་འདྲའི་སྐབས་དོན་དག་ཕྲན་ཚེགས་ལ་ཁག་དཀྲིས་ཏེ་ཕན་ཚུན་ལ་ཁ་རྡུང་བྱེད་པ་ནི་དོན་དངོས་ལས་དོན་སྒྲུབ་པའི་གེགས་སུ་འགྱུར་སྲིད་པས་གསར་ལམ་ཁག་ནས་ཡིད་གཟབ་ཡོང་བ་ཞེས་འབོད་བསྐུལ་ཞུ་རྒྱུ་ཡིན། ལྷག་དོན་ད་ལམ་རྒྱ་ནག་སྲིད་གཞུང་དང་བཙན་བྱོལ་སྲིད་གཞུང་གཉིས་ཀས་ རེ་ཞིག་བོད་རྒྱའི་གནད་དོན་དེ་ཟུར་འཇོག་བྱས་ཏེ། ཐུན་མོང་གི་བསྒྲུབ་བྱ་གཅིག་དང་། དམིགས་ཡུལ་གཅིག རྨི་ལམ་གཅིག ལྟ་སྟངས་གཅིག་གི་འོག་ནས་ཡུལ་ཤུལ་མི་མང་གི་གོད་ཆག་གནས་བབ་སླར་གསོ་བྱ་རྒྱུ་དེ་གཙོ་བོར་འཛིན་ཐུབ་པའི་གུ་ཡངས་དཀྱེལ་ཆེ་གནང་དགོས་ལ། གནང་བའི་ཡིད་ཆེས་ཡང་ཡོད།

ས་འགུལ་གྱི་གོད་ཆག་བྱུང་བའི་ཞོགས་པ་དེ་ག་རང་དུ་༧གོང་ས་མཆོག་གིས་ཐུགས་སྨོན་མཚམས་སྦྱོར་དང་། སེམས་གསོའི་འཚམས་འཕྲིན་ཕུལ་ཡོད་པར་མ་ཟད། ཚེས་ ༡༧ ཉིན་ཐེག་ཆེན་ཆོས་གླིང་གཙུག་ལག་ཁང་དུ་གསར་འགོད་གསལ་བསྒྲགས་ཐོག་གོད་ཆག་འོག་ཤི་རྨས་བྱུང་རིགས་ལ་ཐུགས་སྨོན་སྐྱབས་འཇུག་དང་། རྒུད་སྐྱོབ་ལས་དོན་ནང་མཉམ་ཞུགས་གནང་མཁན་བོད་རིགས་སེར་སྐྱ་ཡོངས་དང་། ལྷག་པར་སྲིད་བློན་ཝུན་ཅཱ་པོའོ་ནས་ཐུགས་ཁུར་ཆེ་བཞེས་ཀྱིས་ས་གནས་སུ་ངོ་ཕེབས་གནང་བ་ལ་ཐུགས་རྗེ་ཆེ་ཞུས་ཀྱི་བསྔགས་བརྗོད་གནང་ཡོད།

ཡང་༧གོང་ས་མཆོག་ནས་ཕྱི་ལོ་ ༢༠༠༨ ལོར་སི་ཁྲོན་དུ་དེ་འདྲའི་ས་འགུལ་བྱུང་སྐབས་རྒྱ་ནག་དབུས་སའི་གཞུང་དང༌། ཆེས་མཐོའི་དབུ་ཁྲིད་རྣམ་པས་ཐུགས་སྣང་ཆེན་པོས་ཉེན་སྐྱོབ་ཀྱི་ལས་དོན་ཚགས་ཚུད་དང༌། ལྷག་པར་གསར་འགྱུར་བརྒྱུད་ལམ་ལ་ཚོད་འཛིན་མ་བྱས་པར་ཕྱི་གསལ་ནང་གསལ། དེ་བཞིན་རྒྱལ་སྤྱིའི་ཉེན་སྐྱོབ་མཐུན་རྐྱེན་རྣམས་དཀའ་ཚེགས་མེད་པར་ས་གནས་ས་ཐོག་ཏུ་འབྱོར་ཐུབ་པ་བྱུང་བ་བཅས་ལ་ཡི་རངས་བསྔགས་བརྗོད་གནང་ཡོད་ཅིང༌། ད་ལམ་ཡང་དེ་དང་མཚུངས་པ་ཡོང་བའི་རེ་བསྐུལ་ཞུ་རྒྱུ་ཡིན། ཞེས་གསུང་པ་ལྟར་ད་ལྟའི་ཆར་རྒྱ་ནག་གཞུང་མང་གཉིས་ཀས་རྒུད་སྐྱོབ་ལས་དོན་གཙོ་གནད་དུ་བཟུང་སྟེ་ལས་རིམ་སྣ་མང་སྤེལ་བཞིན་ཡོད་པ་ལ་བལྟས་ན་ཧ་ཅང་ཚགས་ཚུད་ཡོད་པས་བསྔགས་སུ་མཐོང་། གཞན་ཡང་༧གོང་ས་མཆོག་གོད་ཆག་བྱུང་སའི་ས་ཐོག་ཏུ་ཕེབས་རྒྱུའི་ཐུགས་འདུན་ཡོད་པའི་སྐོར་གསུང་དོན། རྐྱེན་ངན་གོད་ཆགས་ཀྱི་འོག་སྡུག་བསྔལ་གྱིས་མནར་བ་ཚོ་དང་ངོ་ཐུག་གིས་སྡུག་བསྔལ་མཉམ་མྱོང་དང་སྨོན་ལམ་རེ་འདེབས་ཐུབ་ན་སྙམ་པའི་རེ་བས་དེ་སྔོན་སི་ཁྲོན་དུ་གོད་ཆག་བྱུང་སྐབས་འགྲོ་འདོད་བྱུང་ཡང་ཐབས་ཤེས་བྲལ། སྔ་ལོ་ཐའེ་ཝན་དུ་ཆུ་ཉེན་བྱུང་སྐབས་ངོས་རང་ངོ་བསྐྱོད་ཀྱིས་མང་ཚོགས་དང་མཉམ་དུ་ཐུག་འཕྲད་དང༌། སེམས་གསོ་སྨོན་ལམ་བྱ་རྒྱུའི་གོ་སྐབས་ཐོབ་པ་དེས་རང་ཉིད་ཡིད་བློ་ཚིམས་པ་མ་ཟད། མང་ཚོགས་ལའང་ཕན་ཐོགས་གང་ལེགས་བྱུང་སོང་སྙམ། ད་རེས་ས་འགུལ་གྱི་གོད་ཆག་བྱུང་སའི་ས་ཁུལ་མཚོ་སྔོན་ཞིང་ཆེན་ནི་ངོས་དང་༧པཎ་ཆེན་སྐུ་གོང་མ་གཉིས་ཀའི་སྐྱེས་ཡུལ་ཡིན་སྟབས། ངོས་རང་ངོ་བསྐྱོད་ཀྱིས་མང་ཚོགས་ཀྱི་རེ་འདོད་བསྐངས་ཏེ་སེམས་གསོ་བྱ་རྒྱུའི་འདུན་པ་ཤིན་ཏུ་ཆེ། ཞེས་གསུངས་པ་དང་། ཕྱི་ཚེས་ ༡༩ ཉིན་ཅ་ཆིན་ལེན་གྱིས་ཕྱི་རྒྱལ་དུ་ཡོད་པའི་བོད་རིགས་སྤུན་ཟླས་རྒྱལ་ནང་དུ་མྱ་ངན་ཞུ་བ་དང་ཞལ་འདེབས་འབུལ་བར་ཡོང་བའི་རེ་བ་བཏོན་ཚེ། ཕྱི་རྒྱལ་དུ་ཡོད་པའི་རང་རྒྱལ་གྱི་གཞུང་ཚབ་ཁང་གིས་ལྷག་བསམ་རྣམ་དག་གིས་སྣེ་ལེན་བྱེད་དགོས་ཤིང་། གནོད་སེལ་རྒུད་སྐྱོབ་དང་རྒྱལ་ནང་གི་གནས་ཚུལ་ངོ་མ་མཚམས་སྦྱོར་བྱེད་དགོས་ལ། ཁོ་ཚོའི་ལུགས་མཐུན་གྱི་རེ་བར་རྒྱུས་ལོན་བྱས་ཏེ་དགོས་ངེས་ཀྱི་རོགས་རམ་བྱེད་དགོས་ཞེས་ནན་གྱིས་བསྟན། ཞེས་གསུངས་ཡོད་པས་ང་ཚོས་ད་ལྟ་༧གོང་ས་མཆོག་གི་ཐུགས་རེ་དང་ཅ་ཆིན་ལེན་གྱིས་བཤད་དོན་གཉིས་གཞི་ལ་བཞག་ནས་སྐྱེ་དགུ་མདོའི་རང་བྱུང་གནོད་སྐྱོན་ཉིད་ལ་ཁ་ཕྱོགས་ཏེ་ཞལ་འདེབས་གང་མང་བསྡུས་ཏེ་༧གོང་ས་མཆོག་གནོད་སྐྱོན་བྱུང་སའི་ས་ཐོག་ཏུ་ཆེད་ཕེབས་ཀྱི་གོ་སྐབས་བསྐྲུན་ཐུབ་བྱ་རྒྱུ་དང་དེ་མཚུངས་ ༤་༡༤ གནོད་སེལ་ཚོགས་པའི་མིང་ཐོག་ནས་བསྡུ་རུབ་བྱེད་བཞིན་པའི་ཞལ་འདེབས་ཁྱེར་ཏེ་སྐུ་ཚབ་རོགས་སྐྱོབ་ཚོགས་པ་ཞིག་འཕྲལ་གཏོང་ཐུབ་ཐབས་ལ་འབད་བརྩོན་བྱ་རྒྱུ་ནི་ང་ཚོའི་མདུན་དུ་ལྷག་པའི་ལས་དོན་གལ་ཆེན་ཞིག་ཏུ་མངོན།