ཁམས་འབའ་ཐང་བོད་མིའི་དཀའ་ངལ།

རྒྱ་གཞུང་གིས་གཏེར་ཁ་བསྔོགས་འདོན་བྱས་ཏེ་ལོ་ཉི་ཤུ་ལྷག་འདས་ཟིན་ཡང་། ས་གནས་ས་ཐོག་གི་བོད་མི་ཚོར་ཁེ་ཕན་ཅི་ཡང་མེད་ཁར་ད་དུང་གཅར་རྡུང་དང་འཛིན་བཟུང་བྱ་རྒྱུའི་ཉེན་བརྡ་བཏང་འདུག་ཟེར།

ངྷ་སར་གནས་སྡོད་ཁམས་འབའ་ཐང་ནས་ཡིན་པ་བསོད་ནམས་བསྟན་འཛིན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། སྔར་ལོའི་ཕྱི་ཟླ་ ༡༠ པའི་ནང་ཁམས་འབའ་ཐང་གླིང་ཁ་གཤིས་ཡ་སོའི་ཚ་ལུ་གྲོང་སྡེའི་ཕ་ར་ལ་དང་མ་བདེ་ཆེན་ལྷ་མོ་གཉིས་ཀྱི་བུ་རང་ལོ་ ༡༨ ཡིན་པའི་རྗེ་དགའ་འབོད་པས། འབའ་ཐང་རྫོང་ཐོག་ཏུ་བོད་ཀྱི་རྒྱལ་དར་འཕྱར་བཞིན་༧གོང་ས་མཆོག་བོད་ལ་ཕེབས་དགོས་པ་དང་བོད་རང་བཙན་གཙང་མ་ཡིན། ང་ཚོ་ལ་འགྲོ་བ་མིའི་ཐོབ་ཐང་དགོས། བོད་ནང་གཏེར་ཁ་བསྔོགས་འདོན་མཚམས་འཇོག་བྱ་དགོས་ཞེས་ཞི་བའི་ཁྲོམ་བསྐོར་བྱས་སྟབས། ཉེན་རྟོག་མི་སྣས་འཛིན་བཟུང་གཅར་རྡུང་བྱས་ཏེ་རྗེས་བཙོན་འཇུག་བྱས་ཡོད་པ་དང་། བཙོན་ཁང་དུ་ཚུད་རྗེས་སུའང་ཁོང་གིས་ཉེན་རྟོག་མི་སྣར། ཁོང་གིས་བཤད་པའི་སྐད་ཆ་དེ་དག་བདེན་པ་ཡིན་པ་དང་ཁྱེད་ཚོས་ང་བསད་ཀྱང་ཆོག་ལ། གཏུབ་ཀྱང་རུང་། བདེན་པའི་ཆེད་དུ་ངས་སྐད་འབོད་བྱེད་ངེས་ཡིན་ཞེས་བརྗོད་ཡོད་པ་རེད། ད་ལྟའི་ཆར་ཁོང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་ཐུབ་ཀྱིན་མེད་སྟབས། ཁོང་གི་ནང་མི་སེམས་ཁྲལ་གྱི་གནས་སུ་ལྷུང་འདུག་ཅེས་འགྲེལ་བརྗོད་གནང་བྱུང་ལ། དེ་བཞིན། འདི་ལོ་ཕྱི་ཟླ་ ༤ བའི་ཚེས་ ༡༩ ཉིན་ཁམས་འབའ་སྡེ་གླིང་ཁ་གཤིས་ཡ་སོའི་ནེ་བོ་གྲོང་སྡེ་ནས་ཡིན་ཞིང་ཕ་བསོད་ནམས་དབང་ཕྱུག་དང་མ་དགའ་མོ་གཉིས་ཀྱི་བུ་རང་ལོ་ ༢༣ ཡིན་པའི་གྲྭ་པད་ཕྲུག་གིས་ཀྱང་གོང་གསལ་གྱི་འབོད་ཚིག་བསྒྲགས་པ་དང་ཡིག་ཆ་གཏོར་བའི་ནག་ཉེས་འོག་འབའ་ཐང་རྫོང་གི་བཙོན་ཁང་ཞིག་ཏུ་བཀག་ཉར་བྱས་ཡོད་འདུག

གནས་ཚུལ་འགྲེལ་བརྗོད་པས་བརྗོད་དོན་ལྟར་ན། རྒྱ་གཞུང་གིས་འབའ་སྡེ་མངའ་རིའི་ཞིང་ཁམས་དང་ལྷག་པར་དུ་གླིང་ཁའི་ཡུལ་དུ་གཏེར་ཁ་བསྔོགས་འདོན་བྱས་ཏེ་ལོ་ ༢༠ ལྷག་འགོར་ཡོད་ཀྱང་། དེར་ཡོད་ས་གནས་མི་དམངས་ལ་ཁེ་ཕན་ཅི་ཡང་མེད་པར་མ་ཟད། མི་ཕྱུགས་གཉིས་ཀ་ཉེན་ཁའི་གནས་སུ་བསྐྱལ་ཡོད་པ་དང་། སྔར་ལོར་ཡུལ་མི་དང་གཏེར་ཁ་བསྔོག་མཁན་བར་ལ་རྩོད་པ་ཤོར་རྗེས་ཚུལ་ཁྲིམས་ཆོས་འཕེལ་འབོད་པར་གཅར་རྡུང་བྱས་ཏེ་འདས་གྲོངས་སུ་ཕྱིན་པ་དང་། ཡུལ་མི་ ༢༠ ལྷག་འཛིན་བཟུང་བྱས་ཡོད་སྟབས། ད་ལྟའི་དུས་འདིར་ཡང་རྩོད་རྙོག་མུ་མཐུད་ཤུགས་ཆེ་རུ་སོང་སྟེ། མི་ཕྱུགས་གཉིས་ལ་དཀའ་ངལ་འཕྲད་ཀྱིན་ཡོད་འདུག་ལ། གཏེར་ཁ་བསྔོགས་འདོན་བཀག་འགོག་བྱས་པའི་དབང་གིས་ཡུལ་མི་ཁག་ཅིག་ལ་རྒྱ་གཞུང་གིས་འཛིན་བཟུང་བྱ་རྒྱུའི་ཉེན་བརྡ་བཏང་ཡོད་འདུག ཅེས་གནས་ཚུལ་འགྲེལ་བརྗོད་གནང་བྱུང།