བཙན་བྱོལ་ནས་དགའ་བཞིན་སྤྲོ་བཞིན་ཉམས་ཆག་ལ་བཏང་།

ད་ལྟ་ང་ཚོས་རྒྱ་ནག་གིས་བོད་པའི་དགོན་པ་སྟོང་ཕྲག་དྲུག་ཅུ་གཏོར་སོང་ཟེར་གྱིན་ཡོད་ཀྱང་། སྐུ་འདྲ་གཏོར་ཡང་བསྐྱར་དུ་བཟོ་ཆོག་ལ། དགོན་པ་གཏོར་ཡང་བསྐྱར་དུ་གསོ་ཆོག གྲྭ་བ་བསད་ཀྱང་བསྐྱར་དུ་བཟོ་ཆོག སྔོན་བྱོན་སྐྱེས་བུ་དམ་པ་ཚོའི་རྣམ་དཔྱོད་ཀྱི་རྩལ་ལས་ཐོན་པའི་བརྩམས་ཆོས་ཤིག་རྩ་བརླག་ཏུ་སོང་བ་ཡིན་ན། དེ་ནི་སླར་གསོ་མི་ཐུབ་པའི་གྱོང་གུད་ཆེན་པོ་ཞིག་རེད་ཟེར།

དེ་རིང་ཞོགས་པའི་ཆུ་ཚོད་ ༩ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་གསར་པ་སྒོ་འབྱེད་ཀྱི་མཛད་སྒོ་ཞིག་བསྡུས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བཙན་བྱོལ་བོད་གཞུང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་ཆུང་དང་བོད་མི་མང་སྤྱི་འཐུས་ཚོགས་གཙོས་དབུས་པའི་རྒྱུན་ལས་རྣམ་པ། བཀའ་བློན་ཁྲི་པས་དབུས་པའི་བཀའ་བློན་རྣམ་པ། དེ་བཞིན་ལྷན་ཁང་ཁག་གི་དྲུང་ཆེ་རྣམ་པ་དང་རང་དབང་གི་སྡེ་ཚན་ཁག་གི་འགན་འཛིན་རྣམ་པ་བཅས་ཕེབས་འདུག མཛད་སྒོའི་ཐོག་མར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་དཔེ་མཛོད་ཁང་གི་བྱུང་རིམ་དང་འབྲེལ་ལས་དོན་ཁག་ཅིག་ངོ་སྤྲོད་གནང་དོན། བོད་ཀྱི་དཔེ་མཛོད་ཁང་འདི་གསར་འཛུགས་བྱས་ཏེ་ད་བར་ལོ་ ༤༠ ཙམ་འགྲོ་བཞིན་ཡོད་ཅིང་། ༢༠༠༥ ལོར་ང་རང་གིས་དཔེ་མཛོད་ཁང་འདིའི་འགན་འཛིན་གྱི་མིང་འཁུར་བ་ཡིན། དེའི་རྗེས་༧གོང་ས་མཆོག་གིས་མ་འོངས་པར་དཔེ་མཛོད་ཁང་འདི་རྒྱ་ཆེ་རུ་གཏོང་རྒྱུར་བསམ་བློ་གཏོང་དགོས། བོད་པའི་དྲང་བདེན་གྱི་འཐབ་རྩོད་ལ་རྒྱལ་ཁ་ལེན་དགོས་ན། སོ་སོའི་ཆོས་དང་རིག་གཞུང་གཅེས་ཉར་བྱས་ཏེ་བོད་པའི་ངོ་བོ་སྲུང་ཐུབ་པ་བྱ་དགོས་གསུངས་སོང་། འདི་ག་དཔེ་མཛོད་ཁང་དུ་ཉིན་རེར་ནང་ཆོས་འཛིན་གྲྭ་གསུམ་རེ་ཆགས་མེད་ཚོགས་ཀྱིན་ཡོད་ཅིང་། ཉིན་ལྟར་བོད་ཀྱི་སྐད་ཡིག་འཛིན་གྲྭ་གསུམ་རེ་ཚོགས་ཀྱིན་ཡོད། ད་བར་དཔེ་དེབ་ ༥༠༠ ལྷག་དཔར་སྐྲུན་བྱས་ཟིན་ཞིང་། དེ་དག་སྐད་ཡིག་གསུམ་ནང་སྒྱུར་གྱིན་ཡོད། བོད་ཀྱི་ངག་རྒྱུན་ལོ་རྒྱུས་དེབ་ཕྲེང་ཉི་ཤུ་ལྷག་དཔར་ཡོད། ༢༠༠༦ ནས་ད་ལྟའི་བར་ཧིན་རྡུའི་སྐད་ནང་དཔེ་དེབ་དྲུག་བདུན་ཞིག་བཏོན་ཡོད། ང་རང་གིས་ལྡི་ལི་དང་མམ་བྷེ་སོགས་སུ་ཕྱིན་ཏེ་ནང་ཆོས་ངོ་སྤྲོད་བྱས་པར་ཕན་ཐོགས་གང་འཚམ་བྱུང་སོང་ལ། ལྷོ་ཨ་ཧྥི་རི་ཀའི་ས་ཁུལ་དྲུག་བདུན་ཞིག་དང་། ཨ་རིའི་ས་ཁུལ་ཁག་ཅིག ཨེ་ཤ་ཡའི་རྒྱལ་ཁབ་ཁག་ཅིག རྒྱ་གར་ནང་ཁུལ་བཅས་སུའང་ཕྱིན་པ་ཡིན། ཞེས་དང་།

བྷི་ར་ཛིལ་གྱི་གཙུག་ལག་སློབ་གྲྭ་ཞིག་དང་། ཨ་རིའི་ཨེ་མོ་རི་གཙུག་ལག་སློབ་གྲྭ སོག་པོའི་ཁལ་བཅས་དང་བོད་ཀྱི་དཔེ་མཛོད་ཁང་བར་མཉམ་ལས་ཀྱི་གན་རྒྱ་བཞག་ཡོད། ཕྱི་ལོ་ ༢༠༠༠ ལོ་ནས་དཔེ་མཛོད་ཁང་གིས་དགེ་འདུན་པ་ཚོར་ཚན་རིག་སློབ་པའི་ལས་གཞི་ཞིག་བརྩམས་ཡོད་ལ། འདས་པའི་ལོ་བདུན་བརྒྱད་ནང་དགེ་འདུན་པ་ ༥༠ ཙམ་ལ་ཚན་རིག་བསླབ་ཅིང་། དེའི་ཁྲོད་ཀྱི་དགེ་འདུན་པ་ ༣༠ དྲག་འདེམས་བྱས་ཏེ། ཚན་རིག་སྣེ་ཁྲིད་གཙོ་སྐྱོང་ཁང་ཟེར་བ་ཞིག་བཙུགས་ཡོད། ཨ་རིའི་ཨེ་མོ་རི་གཙུག་ལག་སློབ་གྲྭ་དང་མཉམ་འབྲེལ་འོག དགོན་སྡེ་ ༢༣ གྱི་དགེ་འདུན་པ་ ༩༠ ཙམ་ལ་ཟླ་འདིའི་ཚེས་ ༡༧ ནས་ཟླ་གཅིག་རིང་ཚན་རིག་ཟབ་སྦྱོང་ཐེངས་གཉིས་པ་སྤྲོད་རྒྱུ་ཡིན། མུ་མཐུད་ལོ་ལྔའི་རིང་ཟབ་སྦྱོང་སྤྲད་ཅིང་ཚན་རིག་གི་སློབ་དེབ་བཟོས་ཏེ་དགོན་སྡེ་ཁག་ལ་དགྲམ་འཆར་ཡོད། ཅེས་ངོ་སྤྲོད་གནང་སོང་།  

དེའི་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། འདས་པའི་ལོ་ ༤༠ རིང་བོད་ཀྱི་དཔེ་མཛོད་ཁང་འདིར་སྟག་མཚེར་རིན་པོ་ཆེ་དང་རྒྱ་མཚོ་ལགས། ཨ་མཆོག་རིན་པོ་ཆེ། དགེ་བཤེས་ལྷག་རྡོར་ལགས་བཅས་ནས་བོད་མིའི་ཆོས་དང་རིག་གཞུང་ཐད། བྱས་རྗེས་རླབས་ཆེན་བཞག་ཡོད། སྒྲིག་འཛུགས་དེ་ཡང་བཙན་བྱོལ་བོད་གཞུང་གི་འཛིན་སྐྱོང་འོག་མ་ཡིན་པར་རང་དབང་གི་སྡེ་ཚན་ཞིག་གི་ངོ་བོར་རྒྱ་གར་གཞུང་གིས་རོགས་སྐྱོར་བྱེད་ཀྱིན་ཡོད། དཔེ་མཛོད་ཁང་འདིར་བོད་ས་ཤོར་རྗེས་བོད་པ་མང་པོ་ཞིག་གིས་ཕྱག་དཔེ་རྙིང་པ་དང་ཡིག་རྙིང་། ཐང་ཀ་རྙིང་པ། སྐུ་བརྙན་རྙིང་པ། རྒྱལ་རབས་ཆོས་འབྱུང་། བཀའ་བསྟན། གཞུང་གི་ཡིག་ཚགས་སོགས་ཡིག་རིགས་རྙིང་པ་ ༣༣༠༠༠ ལྷག་དང་། དུས་རབས་བཅུ་བའི་སྐབས་ཀྱི་ཕྱག་དཔེ་རྙིང་པ་ ༢༢༠༠༠ ཙམ་ཉར་ཚགས་བྱས་ཡོད་ས་རེད། དེ་བཞིན་ངག་རྒྱུན་ལོ་རྒྱུས་མང་པོ་ཞིག་བསྡུ་རུབ་གནང་ཡོད། དཔེ་མཛོད་ཁང་འདིར་རྒྱ་གར་གཞུང་གིས་ཕྱི་ལོ་ ༡༩༩༡ ལོར་བོད་ཀྱི་རིག་གཞུང་ཞིབ་འཇུག་ལྟེ་གནས་ཁང་ཞེས་ངོས་འཛིན་གནང་ཡོད་ལ། བོད་མི་མང་སྤྱི་འཐུས་ལྷན་ཚོགས་ཀྱིས་ཀྱང་ ༡༩༩༦ ལོར་བོད་པའི་རིག་གཞུང་བསྟི་གནས་གལ་ཆེན་ཞིག་ལ་ངོས་འཛིན་གྱི་གྲོས་ཆོད་བཞག་ཡོད། ཅེས་གསུངས་སོང་།

མཇུག་ཏུ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། དཔེ་མཛོད་ཟེར་བའི་མིང་དེ་གནའ་སྔ་མོ་ནས་བོད་སྐད་ནང་བེད་སྤྱོད་གཏོང་གི་ཡོད་པ་ཞིག་རེད། དེང་སྐབས་དཔེ་མཛོད་ཉར་སྟངས་དེ་ཚན་རིག་ཅིག་དང་སློབ་ཚན་རང་སྐྱ་བ་ཞིག་ཆགས་ཡོད། དེའི་ཐོག་ལ་རབ་འབྱམས་པ་སོགས་ཀྱི་སློབ་སྦྱོང་ཆ་ཚང་བྱ་ཆོག་པའི་སློབ་ཚན་ཞིག་རེད། འོན་ཀྱང་། འདི་ཐོག་མར་རྒྱལ་ཁབ་གཞན་སུ་གང་ལ་མེད་དུས་བོད་པས་སྲོལ་གཏོད་པ་རེད་དྲན་ཡོད། དཔེ་མཛོད་ཀྱི་ཚན་རིག་སློབ་ཚན་ནང་སྡེ་ཚན་དབྱེ་བ་འབྱེད་རྒྱུ་དང་། དཀར་ཆག་སྒྲིག་རྒྱུ་གཉིས་གཙོ་བོ་རེད། དེ་གཉིས་ཀྱང་འཛམ་གླིང་གི་མི་སུ་གང་གིས་མ་དྲན་སྔོན་ལ་བོད་པའི་དྲན་པ་རེད། བོད་པའི་དཀར་ཆག་འབྲི་སྟངས་ལ་སྡེ་ཚན་ཕྱེས་ཡོད། ནུབ་ཕྱོགས་པ་ཚོའི་དཔེ་མཛོད་ཀྱི་སྡེ་ཚན་དབྱེ་བ་འབྱེད་སྟངས་དང་། དཀར་ཆག་སྒྲིག་སྟངས་དེ་ཤར་ཕྱོགས་ཀྱི་རིག་གནས་དང་ཏག་ཏག་བསྡད་མེད། འོན་ཀྱང་། ང་ཚོའི་ཆེས་གཏིང་ཟབ་པ་དང་ཆེས་རྒྱ་ཆེ་པའི་རིག་པའི་གཞུང་ལུགས་ཇི་ལྟར་བདག་ཉར་བྱེད་ཕྱོགས་ཀྱི་བསླབ་བྱ་ནུབ་ཕྱོགས་ནས་ལེན་མི་དགོས་པ་མ་ཟད། ང་ཚོས་ཕར་བསླབ་བྱ་སྤྲོད་ཆོག་པའི་གནས་སྟངས་ཆགས་ཡོད། དེ་ང་ཚོའི་གཞོན་སྐྱེས་ཚོས་ཤེས་དགོས་པ་གལ་ཆེན་པོ་རེད། ཅེས་གསུངས་སོང་།

མཐར་ཁོང་གིས་བོད་པའི་ཆོས་དང་རིག་གཞུང་ལ་བདག་གཅེས་བྱ་གལ་ཆེ་སྐོར་གསུངས་དོན། སྐད་ཡིག་གཅིག་ནས་སྐད་ཡིག་གཞན་ཞིག་ལ་བསྒྱུར་བའི་སྒྲ་སྒྱུར་གྱི་ཚན་རིག་ལྟ་བུར་མཚོན་ན། ཐོག་མར་སྲོལ་གཏོད་མཁན་བོད་པ་རེད། རང་གི་སྐད་ཡིག་ཐོག་བྲིས་པ་དང་སྐད་ཡིག་གཞན་ལས་བསྒྱུར་བ་མང་ཤོས་བོད་པ་ཆགས་ཡོད། དེ་ནི་མི་རབས་གོང་མ་ཚོའི་ལག་རྗེས་ཆེ་ཤོས་རེད། འདི་ལ་བདག་པོ་མ་བརྒྱབ་ན་མ་རབས་ཐ་ཤལ་རེད། ད་ལྟ་ང་ཚོས་རྒྱ་ནག་གིས་བོད་པའི་དགོན་པ་སྟོང་ཕྲག་དྲུག་ཅུ་གཏོར་སོང་ཟེར་གྱིན་ཡོད་ཀྱང་། སྐུ་འདྲ་གཏོར་ཡང་བསྐྱར་དུ་བཟོ་ཆོག་ལ། དགོན་པ་གཏོར་ཡང་བསྐྱར་དུ་གསོ་ཆོག གྲྭ་བ་བསད་ཀྱང་བསྐྱར་དུ་བཟོ་ཆོག སྔོན་བྱོན་སྐྱེས་བུ་དམ་པ་ཚོའི་རྣམ་དཔྱོད་ཀྱི་རྩལ་ལས་ཐོན་པའི་བརྩམས་ཆོས་ཤིག་རྩ་བརླག་ཏུ་སོང་བ་ཡིན་ན། དེ་ནི་སླར་གསོ་མི་ཐུབ་པའི་གྱོང་གུད་ཆེན་པོ་ཞིག་རེད། བོད་ནང་གཞན་གྱི་བཙན་དབང་འོག་གཏོར་བཤིག་བཏང་བ་རེད། འོན་ཀྱང་། བཙན་བྱོལ་ནང་རང་དབང་འོག་དགའ་བཞིན་སྤྲོ་བཞིན་དུ་ཉམས་ཆག་ལ་བཏང་བ་རེད། དགའ་བཞིན་སྤྲོ་བཞིན་ཉམས་ཆག་ལ་བཏང་བ་དེ། རྒྱ་ནག་གིས་བཙན་དབང་འོག་ཉམས་ཆག་ཏུ་བཏང་བ་ལས་ཀྱང་ཚབས་ཆེན་རེད། དེར་བརྟེན། དཔེ་མཛོད་ཁང་འདིར་ཕྱག་ལས་གནང་མཁན་ཚོའི་ལས་དོན་འདི་གངས་ཅན་སྐྱིད་གཤོངས་ཀྱི་ལས་ཀ་གཞན་དག་ཚང་མ་ལས་གལ་ཆེན་པོ་ཡིན་པ་ངོ་ཤེས་པ་གནང་དགོས་ལ། རིམ་གྱིས་མམ་བྷེ་དང་ལྡི་ལི་སོགས་སུ་ཡང་དཔེ་མཛོད་ཁང་འདིའི་ཡན་ལག་འཛུགས་རྒྱུར་དགོངས་པ་བཞེས་དགོས། ཞེས་བཀའ་གནང་སོང་།