རང་ལོ་ ༡༣ ཡིན་པའི་ཨ་རིའི་བུ་ལོ་མག་ལཊ་ཇོ་མོ་གླང་མར་འཛེགས་ཏེ་འཛམ་གླིང་གི་ཟིན་ཐོ་གཏོར་ཡོད་འདུག
ཕྱི་ཚེས་ ༢༢ ཉིན་བྷི་བྷི་སེ་གསར་ཁང་གིས་གནས་ཚུལ་སྤེལ་བ་ལྟར་ན། གོང་ཚེས་ཉིན་སྐྱེས་ཡུལ་ཨ་རིའི་ཁ་ལི་ཧྥོར་ནི་ཡ་ནས་ཡིན་ཞིང་། ད་ལྟ་རང་ལོ་ ༡༣ ལ་སོན་པའི་བུ་ཇོལ་ཌན་ལོ་མག་མཆོག་ཇོ་མོ་གླང་མའི་རི་རྩེར་འཛེགས་ཐུབ་ཡོད་བྱུང་པར་མ་ཟད། ཁོང་ནི་འཛམ་གླིང་ཐོག་ཇོ་མོ་གླང་མར་འཛེགས་མཁན་གྱི་རི་འཛུགས་པ་ཆུང་ཤོས་ཐོག་མ་དེ་ཆགས་ཏེ་ལོ་རྒྱུས་ཀྱི་ཟིན་ཐོ་གཏོར་ཐུབ་པ་བྱུང་ཡོད། སྔོན་མའི་ལོ་ན་ཆུང་ཤོས་ཀྱི་རི་འཛེགས་པ་དེ་བལ་ཡུལ་ནས་ཡིན་པའི་བུ་ཐི་ཤུ་ལཱ་ལཊ་ཡིན་པ་དང་། ཁོང་ནི་ ༢༠༠༡ ལོར་ཇོ་མོ་གླང་མར་འཛེགས་ཏེ་ལོ་རྒྱུས་ཀྱི་ཟིན་ཐོར་བཀོད་ཡོད་ལ་སྐབས་དེར་ཁོང་ལོ་ ༡༦ ཡིན་འདུག བུ་ལོ་མག་ལཊ་རང་ལོ་བཅུའི་ཐོག་ཨ་ཧྥི་རི་ཁའི་མཱ་ཊ་ལོའི་རི་བོའི་སྟེང་འཛེགས་མྱོང་ཡོད་ལ། ད་དུང་ཡང་ཁོང་འཛམ་གླིང་ཐོག་གི་རི་མཐོ་ས་ཚང་མར་འཛེགས་རྒྱུར་གྲ་སྒྲིག་ཡོད་པར་མ་ཟད། འདི་ལོའི་ཟླ་ ༡༢ པའི་ནང་ལྷོ་སྣེ་ཝུན་སིན་རི་བོའི་ཐོག་འཛེགས་རྒྱུ་ཡིན་ཚུལ་ཁོང་གིས་འགྲེལ་བརྗོད་བྱས་འདུག ཤེས་གསལ་ལྟར་ན་རི་བོ་དེའི་མཐོ་ཚད་ལ་རྨིད་ ༥༡༤༠ ཙམ་ཞིག་ཡོད་འདུག
གསར་འགྱུར་འབྲི་མཁན། དཔལ་ལྡན་རྒྱ་མཚོ།
རི་འཛེགས་འཛམ་གླིང་ཟིན་ཐོ་དང་གཉིས་ནི།
བོད་རིགས་བསྟན་འཛིན་ནོར་རྒྱས་ཀྱིས། །
རི་བོ་མཐོ་ཤོས་ཐོག་མར་འཛེགས། །
རི་བོ་ཇོ་མོ་གླང་མའི་རྩེར། །
བོད་དང་བལ་པོའི་རྒྱལ་དར་བཙུགས། །
བཅུ་གསུམ་ལོ་ལོན་མེཀ་ལོཊ་ཀྱིས། །
ལོ་ཆུང་འཛམ་གླིང་ཟིན་ཐོ་གཏོར། །
ཇོ་མོ་གླང་མའི་རི་བོའི་རྩེར། །
ཨ་བོད་རྒྱལ་དར་བཙུགས་ཡོད་དམ། །