སྲོག་ཁྲིམས་ཕྱིར་འཐེན་བྱ་དགོས།

རྒྱ་གཞུང་གིས་བསོད་ནམས་ཚེ་རིང་ལགས་ཀྱི་སྲོག་ཁྲིམས་ཕྱིར་འཐེན་བྱ་དགོས་པར་མ་ཟད། བོད་མི་གཞན་ལྔ་བོ་གློད་གྲོལ་གཏོང་དགོས་ཞེས་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གཞུང་ལ་དགོས་འདུན་བཏོན་ཡོད།

ཟླ་འདིའི་ཚེས་ ༢༥ ཉིན་ལྷ་ས་འབྲིང་རིམ་མི་དམངས་ཁྲིམས་ཁང་གིས་རང་ལོ་ ༢༣ ཡིན་པའི་བོད་རིགས་བསོད་ནམས་ཚེ་རིང་ལ་ལོ་གཉིས་དུས་འགྱངས་ཀྱི་སྲོག་ཐོག་ཁྲིམས་ཆད་དང༌། བཀྲ་ཤིས་ཆོས་སྒྲོན་དང་སྐལ་ཡོན་སོགས་བོད་མི་ལྔ་ལ་ལོ་ ༣ ནས་ལོ་ ༧ བར་གྱི་ཁྲིམས་ཐག་བཅད་ཡོད་པའི་གསལ་བསྒྲགས་གནང་ཡོད་སྟབས། ཁ་སང་ཕྱི་ཚེས་ ༢༨ ཉིན་གྱི་དགོང་དྲོ་བོད་གྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་དང་ས་གནས་གཞོན་ནུ་གཉིས་ཀྱིས་མར་མེ་ཁྲོམ་སྐོར་གྱི་ལས་འགུལ་ཞིག་གོ་སྒྲིག་གནང་སོང་ལ། སྐབས་དེར། བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་དོན་འགྲུབ་ལྷ་དར་ལགས་ཀྱིས། ལོ་དྲུག་ཅུའི་ནང་རྒྱ་ནག་གིས་བོད་མི་རིགས་དམར་གསོད་དང༌འཛིན་བཟུང་ཁྲིམས་ཆད། གནར་གཅོད་སོགས་ཀྱི་བྱ་ངན་མཚམས་འཇོག་མྱོང་མེད་ལ། ལྷག་པར་ ༢༠༠༨ ལོར་བོད་ནང་རླབས་ཆེན་གྱི་ཞི་བའི་སྒེར་ལངས་བྱུང་རྗེས། བོད་མི་རིགས་ཀྱི་མགོ་ཐོག་ཏུ་གདུག་རྩུབ་ཆེ་བའི་དྲག་གནོན་དམར་གསོད་དང༌། ཁྲིམས་ཆད་སྣ་ཚོགས་ཤིག་བཅད་པའི་ཁྲོད་དུ། ད་བར་ཡོངས་གྲགས་བོད་མི་བདུན་ལ་སྲོག་ཐོག་གི་ཁྲིམས་ཐག་བཅད་ཡོད། ཐེངས་འདིར་བསོད་ནམས་ཚེ་རིང་དང་བོད་མི་ལྔར་དེ་ལྟར་ཁྲིམས་ཐག་བཅད་པ་དེ། རྒྱལ་སྤྱིའི་ཁྲིམས་ལུགས་དང༌། ལྷག་པར་རྒྱ་ནག་རང་ཉིད་ཀྱི་ཁྲིམས་གཞི་ཁག ཡང་སྒོས་སུ་སྔ་ལོར་རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ལ་ཕུལ་བའི་ ༢༠༠༩ དང་ ༢༠༡༠ ལོའི་རྒྱ་ནག་གི་འགྲོ་བ་མིའི་ཐོབ་ཐང་གི་བྱ་སྤྱོད་འཆར་གཞི་དང་ཡོངས་སུ་འགལ་ཡོད་ཅེས་དང་།
ཡང་ཁོང་གིས། ཐེངས་འདིའི་ཁྲིམས་ཆད་དེ་ནི་བོད་ཀྱི་ལས་དོན་དང་འབྲེལ་བའི་བཞུགས་མོལ་ཚོགས་འདུ་ཐེངས་ལྔ་པའི་རྗེས་དང༌། ཨ་རིའི་ཕྱི་སྲིད་དྲུང་ཆེ་སོགས་རྒྱལ་སྤྱིའི་གནད་ཡོད་མི་སྣ་ཁག་ཅིག་རྒྱ་ནག་ཏུ་སྐྱོད་པའི་དུས་མཚམས་དང་ཡང་འཁེལ་ཡོད་ཀྱང་། རྒྱ་ནག་གིས་འཛེམས་ཟོན་མེད་པར་བོད་མིའི་ཐོག་ལག་བསྟར་བྱེད་ཀྱིན་པའི་གདུག་རྩུབ་ཀྱི་བྱ་སྤྱོད་དང་། མི་རིགས་རྩ་མེད་བྱ་རྒྱུའི་ངན་ཇུས་ལ་འགྱུར་བ་གང་ཡང་མེད་པ་དང༌། རྒྱལ་སྤྱིའི་འགྲོ་བ་མིའི་ཐོབ་ཐང་གི་ལྟ་སྐུལ་ལ་བདག་སྤྲོད་བྱེད་པའི་བཟང་ཕྱོགས་ཀྱི་ཆོད་སེམས་རྒྱ་ནག་གཞུང་ལ་མེད་པ་མཚོན་ཐུབ་པར་མ་ཟད། ལྷག་པར་དུ་མཉམ་འབྲེལ་རྒྱལ་ཚོགས་དང་ཨ་རི་སོགས་རྒྱལ་སྤྱིའི་སྒྲིག་འཛུགས་ཁག་གིས་འགྲོ་བ་མིའི་ཐོབ་ཐང་ལ་ལྟ་སྐུལ་བྱེད་པའི་འགན་འཁུར་ཚུལ་བཞིན་སྒྲུབ་ཐུབ་ཀྱི་མེད་པའི་གནས་སྟངས་ཚབས་ཆེ་རུ་འགྲོ་བཞིན་པའི་ངོ་ཚ་ཞིག་ཀྱང་ཆགས་ཡོད། དུས་རབས་ཉི་ཤུའི་ལོ་རབས་དགུ་བཅུ་པ་སོགས་ཀྱི་ནང་ཨ་རི་སོགས་རྒྱལ་སྤྱིའི་དཔོན་རིགས་ཁག་རྒྱ་ནག་ཏུ་སྐྱོད་སྐབས། བོད་མིའི་ཆབ་སྲིད་བཙོན་པ་གློད་གྲོལ་སོགས། རང་དབང་ལ་ལྟ་སྐུལ་གྱི་མཚོན་རྟགས་གང་འཚམ་ཡོད་མོད། འོན་ཀྱང་ད་ཆ་དེ་ལས་ཡོངས་སུ་གོ་ཟློག་པའི་གནས་ཚུལ་ཐོན་བཞིན་ཡོད་ཅིང༌། དེ་ནི་འཛམ་གླིང་ཧྲིལ་པོའི་མི་མང་སྤྱི་དང༌། ལྷག་པར་རྒྱ་ནག་གི་བཙན་འཛུལ་འོག་ཡོད་པའི་བོད་མི་མང་གི་རང་དབང་དང་ཚེ་སྲོག་གི་འཇིགས་སྣང་ཞིག་ཆགས་ཡོད། དེར་བརྟེན། བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གཞུང་གི་དམག་ཤེད་དང་གདུག་རྩུབ་ཆེ་བའི་ཁྲིམས་ཆད་དེར་ངོ་རྒོལ་བྱ་རྒྱུ་མ་ཟད། མཉམ་འབྲེལ་རྒྱལ་ཚོགས་དང་ཨ་རི་སོགས་རྒྱལ་སྤྱིའི་ཚོགས་སྡེ་དང་སྲིད་གཞུང་ཁག་ལ་རྒྱ་ནག་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ནུས་ལྡན་གྱིས་ཚོད་འཛིན་བྱ་དགོས་པའི་རེ་འདུན་བཏོན་པར་མ་ཟད། བསོད་ནམས་ཚེ་རིང་ལགས་ཀྱི་སྲོག་ཁྲིམས་ཕྱིར་འཐེན་དང་ཁོང་རྣམས་འཕྲལ་དུ་གློད་གྲོལ་དགོས་པའི་དགོས་འདུན་ཡང་བཏོན་གནང་སོང།

གསར་འགོད་པ་དོན་གོ།