དེ་རིང་བོད་རང་བཙན་སློབ་ཕྲུག་ཚོགས་པས་སྤྲུལ་སྐུ་བསྟན་འཛིན་བདེ་ལེགས་གློད་གྲོལ་ཆེད་མྱུར་འཕྲིན་བརྒྱུད་སྙན་ཞུ་དང་མཚན་རྟགས་བཞི་ཁྲི་རྒྱ་གཞུང་ལ་འབུལ་གྱིན་ཡོད་འདུག་ལ། རིན་པོ་ཆེ་ཁོང་ལ་ཁྲག་ཤེད་དང་སྙིང་ཁམས་ཀྱི་ན་ཚ་ཡོད་ཚུལ་འདུག
འདི་ལོ་བོད་རང་བཙན་སློབ་ཕྲུག་ཚོགས་པས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་གློད་གྲོལ་ཆེད་མཚན་རྟགས་བསྡུ་རུབ་ཀྱི་ལས་འགུལ་ཞིག་མགོ་འཛུགས་བྱས་ཡོད་ལ། ཉིན་འདི་གའི་རིང་ཁོང་ཚོ་དང་ཚོགས་པ་གཞན་གཉིས་མཉམ་རུབ་ཀྱིས་རྒྱ་ནག་གཞུང་ལ་གཏོང་འཆར་ཡོད་པའི་སྐོར་བརྗོད་ཀྱིན་ཡོད་སྟབས། ཕྱི་ཚེས་ ༡༦ ཉིན་འདི་གའི་གསར་འགོད་པ་དངོས་སུ་ཆས་ཏེ། ད་ལྟའི་བར་མཚན་རྟགས་ཅི་ཙམ་ཞིག་བསྡུ་རུབ་བྱས་ཡོད་མེད་དང་། སྙན་ཞུ་དང་མཚན་རྟགས་སོགས་ཐབས་ལམ་གང་འདྲ་ཞིག་བརྒྱུད་དེ་ཕུལ་འཆར་ཡོད་མེད་སོགས་ཀྱི་ཐད་བོད་རང་བཙན་སློབ་ཕྲུག་ཚོགས་པའི་ངྷ་ས་ས་གནས་ཚོགས་གཙོ་བསྟན་འཛིན་ཆོས་དབྱངས་ལགས་སུ་བཀའ་འདྲི་ཞུས་པར། ཁོང་གིས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་འཛིན་བཟུང་གི་དུས་ནས་བཟུང་ང་ཚོས་ཁོང་ཉིད་གློད་གྲོལ་ཡོང་ཆེད་ལས་འགུལ་འདྲ་མིན་སྤེལ་བ་རེད། འདི་ལོ་ཡང་ཁོང་གི་ཆེད་དུ་ས་ཡིག་བསྡུ་རུབ་བྱས་ཏེ་ད་ལྟའི་ཆར་མི་གྲངས་ ༤ ཁྲི་ཡི་མཚན་རྟགས་བསྡུ་རུབ་བྱས་ཡོད། ཉེ་ཆར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་བཙོན་ཁང་དུ་ཁྲག་ཤེད་དང་སྙིང་ཁམས། དམིགས་བསལ་རུས་པའི་ནད་ཚ་བྱུང་སྟེ་སྐུ་གཟུགས་ཀྱི་གནས་སྟངས་ཛ་དྲག་གི་གནས་སུ་གྱུར་ཡོད་ཚུལ་ཁོང་གི་གཅེན་གཅུང་གཉིས་ལ་རྒྱ་ནག་གཞུང་གིས་གསལ་བོར་འགྲེལ་བརྗོད་གནང་ཡོད་སྟབས། ང་ཚོས་འདི་ལོ་ནས་མགོ་འཛུགས་བྱས་པའི་མཚན་རྟགས་དང་སྙན་ཞུ་ཡི་གེ་དེ་སང་ཉིན་ཕྱི་ཚེས་ ༡༦ ཉིན་ང་ཚོའི་ཚོགས་པ་དང་བོད་ཀྱི་བུད་མེད་ལྷན་ཚོགས། དགུ་བཅུ་གསུམ་ལས་འགུལ་ཚོགས་པ་བཅས་ཀྱི་དབུས་དང་ས་གནས་མཉམ་རུབ་ཀྱིས་ཉིན་གཅིག་དུས་གཅིག་ལ་མྱུར་འཕྲིན་ Fax བརྒྱུད་རྒྱ་ནག་དབུས་ཆབ་སྲིད་ཅུའུ་རྒྱུན་ལས་དང་ཁྲིམས་སྲིད་འཐུས་ཚོགས་ཀྱི་ཚོགས་མི་ཀྲིག་ཡོན་ཁང་གཙོས། ཕྱི་རྒྱལ་དུ་ཡོད་པའི་རྒྱ་ནག་གི་གཞུང་ཚབ་ཁང་། རྒྱལ་སྤྱིའི་ནང་ཡོད་པའི་བོད་དོན་རྒྱབ་སྐྱོར་བ་སོགས་ལ་ཕུལ་འཆར་ཡོད་ལ། དེ་ཡང་གཙོ་བོ་རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་མཆོག་ལ་དྲང་བདེན་མིན་པའི་ཁྲིམས་ཐག་བཅད་པ་དེར་རྒྱ་ནག་གཞུང་ནས་ཡང་བསྐྱར་བསྐྱར་ཞིབ་བྱ་དགོས་པའི་རེ་བ་དང་འབོད་སྐུལ་བྱ་ཆེད་ཡིན་ཞེས་བརྗོད་བྱུང་།
སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ ༢༠༠༢ ལོའི་ཕྱི་ཟླ་ ༡༢ ནང་རྒྱ་གཞུང་གིས་འགད་རྫས་དོན་རྐྱེན་ཞིག་གིས་ཉེས་མིང་འོག་ཚེ་བཙོན་གྱིས་ཁྲིམས་ཆད་བྱས་པ་ནས་བཟུང། འཛམ་གླིང་ཡུལ་གྲུ་གང་སར་ཡོད་པའི་བོད་དོན་རྒྱབ་སྐྱོར་བ་ཚོས་ཁོང་ཉིད་གློད་གྲོལ་ཐད་རྒྱ་གཞུང་ལ་ངོ་རྒོལ་སྐད་འབོད་དང་མཚན་རྟགས་བསྡུ་རུབ་ཀྱི་ལས་འགུལ་སྤེལ་ཡོད་ལ། ལྷག་པར་ལི་ཐང་རྫོང་གི་དགེ་འདུན་པ་དང་ས་གནས་མི་མང་ ༤ ཁྲི་ལྷག་གིས་རྒྱ་གཞུང་ལ་རེ་སྐུལ་དང་མཚན་རྟགས་བསྡུ་རུབ་ཀྱིས་ཁོང་ཉིད་གློད་གྲོལ་གཏོང་དགོས་པའི་འབོད་སྐུལ་ཞུས་ཡོད་འདུག ཉེ་ཆར་འབྲེལ་ཡོད་ས་གནས་མི་སྣ་ཞིག་གིས་འགྲེལ་བརྗོད་གནང་བ་ལྟར་ན། འདི་ལོའི་ཕྱི་ཟླ་ ༤ པའི་ཚེས་ ༢༥ ཉིན་དཀར་མཛེས་བོད་རིགས་རང་སྐྱོང་ཁུལ་ལི་ཐང་རྫོང་གི་རྫོང་དཔོན་གཞོན་པ་དང་འབྲེལ་ཡོད་ཉེན་རྟོག་མི་སྣ་ཁག་ཅིག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཁྱིམ་དུ་འབྱོར་ཏེ། ནང་མིར་གཉེན་འཕྲད་དུ་ཕྱིན་ཆོག་པའི་མཆོག་མཆན་གནང་ཡོད་པ་ལྟར། ཟླ་བ་དེའི་ཕྱི་ཚེས་ ༢༧ ཉིན་རིན་པོ་ཆེའི་གཅེན་མོ་བསོད་ནམས་སྒྲོལ་མ་དང་གཅུང་མོ་སྒྲོལ་དཀར་གཉིས་བཙོན་ཁང་དུ་གཉེན་འཕྲད་དུ་ཕྱིན་ཡོད་འདུག་ལ། སྐབས་དེར་བཙོན་ཁང་གི་སྨན་པ་དང་འབྲེལ་ཡོད་མི་སྣས་ཁོང་གཉིས་ལ་རིན་པོ་ཆེར་ཁྲག་ཤེད་དང་སྙིང་ཁམས་ཀྱི་ནད་ཚ་བྱུང་ཡོད་ཚུལ་ཁས་ལེན་བྱས་ཡོད་པ་དང་། རིན་པོ་ཆེ་མཆོག་གི་སྐུ་གཟུགས་ཀྱི་གནས་སྟངས་སྐྱོ་བོ་ཡིན་ཚུལ་སོགས་ཤེས་རྟོགས་བྱུང་ཡོད་འདུག
པར་དང་པོ། དེ་རིང་ཆུ་ཚོད་ ༡༠ སྟེང་སྤྲུལ་སྐུ་བསྟན་འཛིན་བདེ་ལེགས་མཆོག་གློད་གྲོལ་ཆེད་ལས་འགུལ་སྤེལ་མགོ་བརྩམས་པ།
པར་གཉིས་པ། དེ་རིང་ཆུ་ཚོད་ ༡༠ ཡོལ་རྗེས་པེ་ཅེན་མཐོ་རིམ་མི་མང་ཁྲིམས་ཁང་དང་ལྡི་ལིའི་གཞུང་ཚབ་ཁང་དུ་མྱུར་འཕྲིན་གཏོང་བཞིན་པ།
པར་གསུམ་པ། མཚན་རྟགས་བསྡུ་རུབ་བྱས་པ་རྣམས་སྦྲགས་ཐོག་ནས་གཏོང་རྒྱུར་གྲ་སྒྲིག་བྱེད་བཞིན་པ།
གསར་འགོད་པ། དོན་གོ། པར་པ། ཨ་རིག་འགྱུར་མེད།
བཀུར་འོས་དུས་བབ་ཚན་པར་ཞུ་དོན། གོང་གི་གསར་འགྱུར་ནང་ཟླ་༤ པའི་ཚེས་༢༥ ཉིན་སྤྲུལ་སྐུའི་འབྲེལ་ཡོད་ལ་བརྡ་ལན་བཏང་བ་དང་། ཚེས་༢༧ ཉིན་དངོས་སུ་ཁོང་གི་སྲིང་མོ་གཉིས་རིན་པོ་ཆེ་དང་འཇལ་འཕྲད་བྱས་པ་ལྟབུ་དང་། རྫོང་དཔོན་གཞོན་པ། ཞེས་གསལ་པོར་བྲིས་པ་སོགས་གནས་ཚུལ་གྱི་ཁུངས་ངོ་སྤྲོད་གནང་རོགས། གང་ཡིན་ཟེར་ན། དངོས་སུ་ས་གནས་ཀྱི་མིས་བཤད་པ་ལྟར་ན། ཚེས་༢༧ གྱི་ཞོགས་པར་བརྡ་ལན་སྐྱེལ་བ་དང་འཇལ་འཕྲད་དུ་ཁྲིད་པ་དུས་གཅིག་ཏུ་བཤད་ཅིང་། ཉེན་རྟོག་གི་དཔོན་པོ་གཞོན་པ་ཡིན་པ་སོགས་གསལ་བཤད་འདུག་ན། ཡང་ན་གནས་ཚུལ་མཁོ་སྤྲོད་གནང་མཁན་གྱི་ཁ་པར་ཨང་གྲངས་སོགས་ཀྱི་འབྲེལ་ལམ་ངོ་སྤྲོད་དགོས་ཀྱི་འདུག་པས་ཐུགས་འཇགས་འཚལ།
སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་བཙོན་ཁང་ནང་ལ་ནང་མི་མཇལ་ཕྲད་གནང་བཅུག་པ་རྒྱ་་གཞུང་ལ་ཐུགས་རྗེ་ཞུ་བ་ཆབས་ཅིག ཁོང་གློད་གྲོལ་གྱིས་མི་མང་རྩིས་སྤྲོད་སྨན་དཔྱད་ཀྱི་གོ་སྐབས་གནང་ན་བོད་རྒྱའི་བདེ་འཇགས་ཕན་པ་མི་ཡོང་ངམ་དེང་གི་ཏང་མི་ཚོ།