མཱ་སུ་རི་བོད་ཁྱིམ་དུ་སློབ་ཕྲུག་བུ་མོ་གཅིག་དང་སློབ་ཕྲུག་བུ་ ༩ ཡི་བར་འཁྲིག་སྤྱོད་ཀྱི་གནས་ཚུལ་བྱུང་སྟེ་ཁྱོན་སློབ་མ་བཅུ་དང། ཁྱིམ་ཚང་གི་ཕ་ཚབ་མ་ཚབ་གཉིས་བཅས་ཕྱིར་ཕུད་བཏང་ཡོད་འདུག
མཱ་སུ་རི་བོད་ཁྱིམ་གྱི་སློབ་མ་ཟུར་པ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་སྔོན་མའི་ཕྱི་ཚེས་ ༢༣ ཉིན་མཱ་སུ་རི་བོད་ཁྱིམ་སློབ་གྲྭའི་འཛིན་རིམ་ ༣ པའི་བུ་ཞིག་དང་འཛིན་རིམ་ ༦ པའི་བུ་མོ་ཞིག་གིས་འཛིན་གྲྭ་གྲོལ་བ་དང་སློབ་གྲོགས་རྣམས་འཛིན་ཁང་ནས་ཕྱིར་ལོག་རྗེས། འཛིན་གྲྭ་ ༤ པའི་སློབ་ཁང་དུ་ཚུལ་མིན་འཁྲིག་སྤྱོད་བྱེད་བཞིན་པ་དེར་ཡོད་སློབ་མ་མང་པོ་ཞིག་གིས་མཐོང་ཡོད་འདུག་ལ། ཕྱིས་སུ་སློབ་མ་ཚོས་སློབ་གྲྭའི་སྒྲིག་སྲོལ་དགེ་རྒན་སྐད་བཏང་སྟེ་ཁོ་གཉིས་འཇུས་ཡོད་པ་དང་། འབྲེལ་ཡོད་དགེ་རྒན་གྱིས་བུ་མོར་གནས་ཚུལ་དེའི་ཐད་འདྲི་གཅོད་བྱས་རྗེས་གོང་གསལ་བུ་དེ་གཅིག་པུ་མིན་པར། མོའི་མཉམ་དུ་འཁྲིག་སྤྱོད་བྱེད་མཁན་ཁྱོན་སློབ་ཕྲུག་བུ་ ༩ བྱུང་ཡོད་འདུག དེ་དག་ནི་འཛིན་གྲྭ་ ༡༡ ཡིན་པའི་བུ་ཞིག་དང་འཛིན་གྲྭ་ ༦ པ་ཡིན་པའི་བུ་གསུམ། འཛིན་གྲྭ་ ༣ པ་ཡིན་པའི་བུ་གཅིག། འཛིན་གྲྭ་ ༡༢ ཡིན་པའི་བུ་ཞིག འཛིན་གྲྭ་ ༣ པའི་བུ་ཞིག་དང་འཛིན་གྲྭ་གསལ་ཁ་མེད་པའི་བུ་གཉིས་བཅས་ཁྱོན་བུ་ ༩ ཡོད་འདུག
སློབ་གྲྭའི་ངོས་ནས་བུ་མོ་མོ་རང་དང་མོའི་མཉམ་དུ་འཁྲིག་སྤྱོད་བརྟེན་རོགས་བུ་ ༩། གཞན་ཡང་བུ་མོ་དེ་སྡོད་སའི་ཁྱིམ་ཚང་གི་ཕ་ཚབ་མ་ཚབ་བཅས་མི་ ༡༢ ཕྱིར་འབུད་བཏང་ཡོད་འདུག
གོང་གསལ་གྱི་གནས་ཚུལ་ཐད་འདི་གའི་གསར་འགོད་པས་ཁ་པར་བརྒྱུད་མཱ་སུ་རི་བོད་ཁྱིམ་གྱི་དྲུང་ཆེ་ལས་ཚབ་རྒན་དགེ་འདུན་རིན་ཆེན་ལགས་སུ་བཀའ་འདྲི་ཞུས་པར་ཁོང་གིས། ཁྱེད་རང་ཚོས་གོ་ཟིན་པའི་གནས་ཚུལ་དེ་བདེན་པ་རེད། སློབ་མ་རྩ་དགོངས་ལ་གཏོང་དགོས་དོན་དེ། ང་ཚོ་སློབ་གྲྭ་ཞིག་ཡིན་པ་དང་སློབ་མའི་སྒྲིག་སྲོལ་ནང་ཆོག་དང་མ་ཆོག་གི་ལས་ཀ་ཡོད་པ་ལྟར། ཐེངས་འདིའི་སློབ་མའི་བྱེད་སྟངས་དེ་མ་ཆོག་པ་ཞིག་ཆགས་ཡོད་པ་དང་། ཁ་ཐུག་ཏུ་འགན་འཁུར་མཁན་ཁྱིམ་ཚང་གི་ཕ་ཚབ་མ་ཚབ་ལ་མཚོན་ནའང་ཕྲུ་གུར་ལྟ་རྟོག་བྱས་པ་མ་འདང་བའི་དབང་གིས་རྩ་དགོངས་ལ་གཏོང་དགོས་བྱུང་བ་རེད་ཅེས་བརྗོད་བྱུང་ལ། གལ་སྲིད། སྤྱི་ཚོགས་ནང་བཙན་གཡེམ་གྱི་དོན་རྐྱེན་བྱུང་ཚུལ་བརྗོད་ཀྱིན་ཡོད་པ་ཡིན་ན་དེ་བདེན་པ་མ་རེད། ཐེངས་འདིའི་འཁྲིག་སྤྱོད་དེ་ལོ་མང་རིང་ནས་བྱུང་བསྡད་པ་ཞིག་འདུག་ལ། དེ་ཡང་གཙོ་བོ་ཕོ་མོ་ཁོ་མོར་བུ་གཅིག་དང་གཉིས་བྱས་ཏེ་རིམ་པའི་འཁྲིག་སྤྱོད་བྱས་ཡོད་པའི་གནས་ཚུལ་བརྒྱུད་དེ། ད་ལྟའི་བར་དུས་ཡུན་གང་འཚམ་ཞིག་ལ་བུ་མང་པོ་དང་མཉམ་དུ་འབྲེལ་བ་བྱུང་བ་དེ་འདྲ་ཡིན་སྟབས། དེའི་དབང་གིས་ང་ཚོས་ཐེངས་འདིར་མོ་དང་འབྲེལ་ཡོད་ཀྱི་བུ་དགུ་རྩ་དགོངས་བཏང་བར་མ་ཟད། དེ་བཞིན་ཁྱིམ་ཚང་གི་ཕ་ཚབ་མ་ཚབ་གཉིས་ཀྱིས་ཀྱང་རྒྱུན་རིང་པར་ཁྱིམ་ཚང་དེའི་ནང་བུ་ཕྲུག་ཕན་ཚུན་བར་འབྲེལ་བ་བྱུང་ཡང་འགན་མ་འཁུར་བའི་རྒྱུ་མཚན་གྱིས་རྩ་དགོངས་གཏོང་དགོས་བྱུང་བ་རེད་ལ། གནས་ཚུལ་འདི་དགེ་རྒན་གྱི་སློབ་གསོ་དང་ཕ་མའི་བདག་སྐྱོང་སོགས་འདི་རེད་ཅེས་ང་རང་གིས་བཤད་ཐུབ་མ་སོང་ཅེས་བརྗོད་བྱུང་།
ཡང་ཁོང་གིས། སློབ་གྲྭའི་ནང་སློབ་མ་སུ་སྒྲིག་སྲོལ་དང་འགལ་ཡོད་མེད་ལྟ་རྒྱུ་ལས། བོད་ནས་ཡོང་བ་དང་རྒྱ་གར་ནས་སྐྱེས་པ་སོགས་ཀྱི་དབྱེ་བ་རྩ་བ་ནས་མེད་སྟབས། ཉེ་ཆར་རྩ་དགོངས་བཏང་རྗེས་སློབ་གྲྭའི་ངོས་ནས་བལ་ཡུལ་སྣེ་ལེན་ཁང་ལ་འབྲེལ་བ་ཞུས་རྗེས་ལས་བྱེད་མངགས་གཏོང་བྱས་ཏེ་ཁོང་ཚོ་བལ་ཡུལ་ཏུ་བསྐྱལ་ཡོད། ང་རང་བོད་ཁྱིམ་གྱི་འགན་ཆ་ཚང་འཁུར་མཁན་ཞིག་མིན་ཡང་། ང་རང་ལས་བྱེད་རྒན་པ་ཞིག་དང་དྲུང་ཆེའི་ལས་ཚབ་ཡིན་པའི་ཆ་ནས་ང་ཚོའི་དགེ་རྒན་དང་ཕ་ཚབ་མ་ཚབ་ཚང་མས་མ་འོངས་པར་གཟབ་དགོས་པའི་སྐོར་བརྗོད་རྒྱུ་དང་། སློབ་མ་ཚོར་ཡང་དེའི་ཕྱོགས་ལ་སློབ་གསོ་རྒྱག་རྒྱུ་དེ་ད་ལྟའི་བར་བྱས་པ་རེད་ལ། མ་འོངས་པར་ཡང་བྱ་ངེས་ཡིན། དེ་མ་གཏོགས་པའི་རྒྱ་གར་ཉེན་རྟོག་མི་སྣ་སྐད་བཏང་སྟེ་གནས་ཚུལ་ཐག་གཅོད་བྱས་པ་དེ་འདྲ་ཡོད་པ་མ་རེད་ཅེས་དང་། ད་ལྟའི་བར་མཱ་སུ་རི་བོད་ཁྱིམ་གྱི་དགེ་ལས་ཡར་འཇུག་མར་ལེན་དང་གླ་ཆ་སྤྲོད་རྒྱུ་སོགས་བོད་ཁྱིམ་རང་གིས་ལས་ཀྱིན་ཡོད་པ་ལས། ད་ལྟའི་བར་ཡུལ་མིའི་ཁྲིམས་ཀྱིས་ལག་བསྟར་བྱེད་དགོས་པ་དེ་འདྲ་བྱུང་མེད། གལ་སྲིད་མི་མང་གི་ངོས་ནས་ཁྲིམས་ལ་སྦྱར་དགོས་པའི་རེ་བ་དེ་འདྲ་བཏོན་པ་ཡིན་ན་ང་ཚོས་གནས་སྟངས་ལ་ཕབ་པའི་ལས་ཀ་བྱ་དགོས་པ་རེད། ཅེས་གསུངས་བྱུང།
འདི་གའི་གསར་འགོད་པས་གནས་ཚུལ་རྒྱུས་ལོན་བྱས་ཏེ་ཤེས་རྟོགས་བྱུང་བ་ལྟར་ན། མཱ་སུ་རི་བོད་ཁྱིམ་ནང་ད་ལྟའི་བར་དགེ་རྒན་དང་སློབ་མ། ཕ་ཚབ་དང་སློབ་མ། སློབ་མ་དང་སློབ་མའི་དབར་བཙན་གཡེམ་དང་འཁྲིག་སྤྱོད་ཀྱི་དོན་རྐྱེན་གང་འཚམ་བྱུང་ཡོད་འདུག་ལ། ཐེངས་འདིའི་འཁྲིག་སྤྱོད་ཀྱི་གནད་དོན་ནི་སློབ་ཕྲུག་རྩ་དགོས་བཏང་བ་མང་ཤོས་དེ་ཆགས་ཡོད་པ་དང་། བོད་ནས་འབྱོར་བའི་སློབ་མ་དགུ་དང་བཞུགས་སྒར་གྱི་ལས་བྱེད་ཞིག་གི་བུ་ཕྲུག་གཅིག་བཅས་ཡོད་འདུག
གསར་འགོད་པ། དོན་གོ།
རེད་རེད་གངས་ལྷ་མེ་ཏོག་གསུངས་པ་བདེན་པ་རེད་ཁྱུམ་ཚང་ཕ་མ་གཉིས་ཕྱིར་ཕུད་གཏང་བ་དེ་མོས་མཐུན་མེད།
ད་དུང་སློབ་ཕྲུག་དེ་ཚོ་སློབ་གྲཱ་ནས་ཕྲིར་ཕུད་གཏང་ཀྱང་ཆོག་བཙན་བྱོལ་སྤྱི་ཚོགས་ནང་ནས་ཕྱིར་ཕིད་གཏང་བའི་ཆོག་ཆེན་སུའི་སྤྲད་པ་རེད།
བཙན་བྱོལ་བོད་མིའི་སློབ་གྲྭ་ཁག་གི་ནང་དུ་སྣང་ཚུལ་ལ་ཆེས་གྲ་འགྲིག་འགྲིག་གི་རྣམ་པ་ཞིག་རང་བཞིན་གྱིས་མངོན་ཡོང་ཡང་། དོན་དངོས་ཐོག་ཕྲུ་གུའི་ལུས་སེམས་འཚར་ལོངས་ལ་ཕྱོགས་ཡོངས་ནས་སློབ་གསོའི་ཆ་རྐྱེན་གྱིས་འདང་གི་མི་འདུག་སྙམ།
དོན་རྐྱེན་དེར་ད་དུང་དཔྱད་པ་རྒྱུ་འདུག