སྨྱོ་རྫས་ཀྱི་ཁོར་ཡུག་སྐྲུན་མཁན་ང་རང་ཚོ་རེད་ཟེར།

ང་ཚོའི་སྤྱི་ཚོགས་ནང་སྨྱོ་རྫས་སྤྱོད་མཁན་མང་པོ་འདུག་ལ། དམིགས་བསལ་སློབ་གྲྭའི་ནང་དེའི་རིགས་དར་སྲོལ་དང་ཤུགས་ཆེར་འགྲོ་བཞིན་པ་དེ་ཕ་ཚབ་མ་ཚབ་དང་དགེ་རྒན། ཁྱིམ་གྱི་ཕ་མ་དང་གྲོགས་པོ་སོགས་ཁོར་ཡུག་རང་གིས་བཟོས་པའི་སྐྱོན་རེད་ཅེས་ངྷ་སྟེང་བོད་ཁྱིམ་འཕྲོད་བསྟེན་ཚོགས་ཆུང་གི་ཚོགས་གཙོ་བསྟན་འཛིན་འཇམ་དབྱངས་ལགས་ཀྱིས་བརྗོད་བྱུང་།

ཁ་སང་སྟེ་ཕྱི་ཚེས་ ༢༤ ཉིན་གྱི་ཕྱི་དྲོ་ངྷ་སྟེང་བོད་ཁྱིམ་སློབ་གྲྭའི་འཕྲོད་བསྟེན་ཚོགས་ཆུང་དང་ཁོར་ཡུག་སྡེ་ཚན། རྒྱ་གར་གྱི་ TANDA Medical College (Kangra) སྨན་པའི་མཐོ་སློབ་བཅས་མཉམ་རུབ་ཐོག་རྒྱལ་སྤྱིའི་སྨྱོ་རྫས་སྔོན་འགོག་གི་ཉིན་མོ་སླེབས་ལ་ཉེ་བའི་སྐབས་དང་བསྟུན་ཏེ། མེག་གྷན་རླངས་འཁོར་ས་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་ཁྲོམ་སྐོར་གྱི་ལས་འགུལ་སྤེལ་ཡོད། སྐབས་དེར་ངྷ་སྟེང་བོད་ཁྱིམ་འཕྲོད་བསྟེན་ཚོགས་ཆུང་གི་ཚོགས་གཙོ་བསྟན་འཛིན་འཇམ་དབྱངས་ལགས་ཀྱིས་ཐེངས་འདིའི་ལས་འགུལ་གྱི་དམིགས་ཡུལ་དང་འབྲེལ་བརྗོད་དོན། དེང་སང་ང་ཚོའི་བཙན་བྱོལ་སྤྱི་ཚོགས་ནང་སྨྱོ་རྫས་བེད་སྤྱོད་བྱེད་མཁན་མང་དུ་འགྲོ་བཞིན་འདུག་ལ།  ལྷག་པར་དུ་གཞོན་སྐྱེས་ཁྲོད་སྨྱོ་རྫས་སྤྱོད་པ་དེ་དར་སྲོལ་ཆེ་ཤོས་ཤིག་ཆགས་ཡོད་སྟབས། ང་ཚོས་དེ་དག་མེད་པར་བཟོ་ཆེད་ལས་འགུལ་འདི་སྤེལ་བ་ཡིན། གལ་སྲིད། སྨྱོ་རྫས་རིགས་ཀྱི་ཐ་མ་འཐེན་པ་ཡིན་ན་མིའི་ལུས་པོར་གནོད་པ་འབྱུང་གི་ཡོད་པར་མ་ཟད། དེ་ལ་བརྟེན་ནས་རེག་དུག་གི་ན་ཚ་འབྱུང་བར་ཐག་ཉེ་བོ་ཆགས་ཀྱི་ཡོད་ལ། རེག་དུག་གི་ན་ཚ་མང་པོ་ཞིག་སྨྱོ་རྫས་ལ་བརྟེན་ནས་ཡོང་གི་ཡོད་པ་རེད། མེག་ལོར་ལ་མཚོན་ན་བོད་ནས་ཡོང་བསྡད་པའི་གཞོན་སྐྱེས་གང་མང་ཞིག་ལ་སྨྱོ་རྫས་སྤྱད་ཡུན་རིང་བའི་དབང་གིས་དཀའ་ངལ་འཕྲད་བསྡད་པ་གང་མང་ཞིག་ཡོད་པ་རེད། དེ་དང་དེ་ལྟ་བུའི་གནས་ཚུལ་གང་མང་ལ་བརྟེན་ནས་ང་ཚོས་མ་འོངས་སྔོན་འགོག་དང་གོ་རྟོགས་སྤེལ་ཆེད་ལས་འགུལ་སྤེལ་བ་ཡིན་ཞེས་བརྗོད་བྱུང་ལ། ཡང་ཁོང་གིས། མི་རིགས་ཤིག་གི་འཐབ་རྩོད་ལ་མི་བུ་རེ་རེ་མེད་ཐབས་མེད་སྟབས། ང་ཚོས་རང་དབང་ཁོ་ནའི་ཆེད་དུ་སྐད་འབོད་དང་ངོ་རྒོལ་མི་བྱེད་པར་འདིའི་རིགས་ཀྱི་སྔོན་འགོག་དང་དར་ཁྱབ་མི་འགྲོ་བའི་ཐད་ལས་འགུལ་སྤེལ་དགོས་པ་གལ་ཆེན་པོ་རེད། ད་ལྟའི་ཆར་ངྷ་སའི་ཀུན་ཕན་ཚོགས་པས་སྨྱོ་རྫས་སྤྱད་པའི་རིགས་ལ་ཚན་རིག་གི་ལམ་ནས་སྔོན་འགོག་དང་ཚར་གཅོད་བྱེད་ཐབས་བྱས་དང་བྱེད་ཀྱིན་ཡོད་ཀྱང་། ང་ཚོས་སྤྱི་ཚོགས་ཀྱི་གཞོན་སྐྱེས་གང་མང་ཞིག་གིས་ག་རེ་ཡིན་ཡང་ཚོད་ལྟ་བྱེད་དགོས་པའི་ཀུན་སློང་འཁྱེར་ཏེ་སྨྱོ་རྫས་རིགས་སྤྱད་ཅིང་། རྗེས་སུ་འགོག་མི་ཐུབ་པའི་གནས་སུ་བསྐྱལ་གྱིན་འདུག  དེའི་རིགས་སློབ་མའི་ནང་ཤུགས་ཆེན་པོ་རེད། སྨྱོ་རྫས་རིགས་འགོག་པ་ལ་སྤྱི་ཚོགས་དང་ཁོར་ཡུག་ཚང་མར་འབྲེལ་ཡོད་པ་རེད། སློབ་གྲྭའི་ཕ་ཚབ་མ་ཚབ་དང་དགེ་རྒན། ཁྱིམ་ཚང་གི་ཕ་མ་སོགས་ཀྱིས་ཀྱང་ཤུགས་རྐྱེན་ངན་པ་ཐེབས་ཀྱིན་འདུག་ལ། དེ་བཞིན་གྲོགས་པོ་སོགས་ཀྱིས་ང་ཚོ་རང་ཉིད་ཀྱི་ཁོར་ཡུག་ནང་སྨྱོ་རྫས་སྤྱོད་མཁན་སྐྱེད་སྲིང་བྱེད་ཀྱིན་པའི་ཚོར་སྣང་སྤྲད་འོག་གི་འདུག་ཅེས་བརྗོད་བྱུང་།

ཁ་སང་ཕྱི་དྲོ་ངྷ་སྟེང་བོད་ཁྱིམ་འཕྲོད་བསྟེན་ཚོགས་ཆུང་གི་དགེ་སློབ་དང་། རྒྱ་གར་གྱི་སྨན་ཕའི་མཐོ་སློབ་ཀྱི་དགེ་སློབ་བཅས་མི་ ༡༠༠ ལྷག་མཉམ་འབྲེལ་གྱིས་སྨྱོ་རྫས་སྔོན་འགོག་གི་ལས་འགུལ་སྤེལ་ཡོད་ལ། ཟླ་འདིའི་ཚེས་ ༢༦ ཉིན་བོད་གཞུང་འཕྲོད་བསྟེན་ལས་ཁུངས་དང་ཀུན་ཕན་ཚོགས་པ། ངྷ་སྟེང་བོད་ཁྱིམ་འཕྲོད་བསྟེན་ཚོགས་ཆུང་བཅས་མཉམ་རུབ་ཐོག་སྨྱོ་རྫས་སྔོན་འགོག་གི་མི་མང་ལ་དེའི་ཐད་ཀྱི་ཡིག་ཆ་བཀྲམས་པ་དང་གོ་རྟོགས་སྤེལ་བའི་ལས་འགུལ་སྤེལ་འཆར་ཡོད་འདུག 

གསར་འགོད་པ་དོན་གོ།