སྤྱིར་ཡིན་ན་ཉིན་དེར་ངས་མ་སུ་རིའི་སློབ་མ་ཚོའི་གནད་དོན་དེར་རང་གི་བསམ་ཚུལ་ཙམ་དང་དེའི་འོག་ལ་གསལ་བཤད་ཀྱི་མཆན་གཅིག་བཀོད་པ་ཙམ་གྱིས་ཚང་མར་ཐུགས་ཕན་སོས་གི་རེད་འདོད་ཡོད་ཀྱང་། ང་ནོར་འདུག མང་པོ་ཞིག་གིས་སྐད་ཆ་དེ་ཚོ་ལ་འཁྱེར་ལུང་འཁྱེར་བྱས་སོང་། ད་ནི་རྗེས་ཟིན་ས་མ་རེད།
ང་ལྟ་བུ་ཞིག་ལ་མཚོན་ན་མ་སུ་རི་སློབ་གྲྭའི་སློབ་མའི་འཁྲིག་སྤྱོད་ཞབས་འདྲེན་ ( Students Sex Scandal ) གྱི་གནད་དོན་འདི་ནི་ཚན་རིག་པ་ཞིག་གིས་མ་གཏོགས་གསེད་གྲོལ་བྱེད་མི་ཐུབ་པའི་མགོ་རྙོག་དེ་འདྲ་མ་རེད།
ཁྲིམས་དང་སྒྲིག་གཞི། བོད་རང་གིས་ལོ་སྟོང་ཕྲག་གི་རིང་རྩིས་ཆེན་དང་རྩ་འཛིན་བྱེད་པའི་ལྷ་ཆོས་དང་མི་ཆོས་བཅས་ཕྱོགས་གང་ཐད་ནས་བལྟས་ཀྱང་། དུས་མིན་གནས་མིན་གྱི་དབང་གིས་འགལ་འཇོལ་དུ་སོང་བའི་དོན་དག་ཅིག་ཐག་གཅོད་ནན་མོ་བྱས་པ་ཙམ་རེད། ཐག་གཅོད་དེ་ཡང་ཁྱེད་ཚོའི་ཚིག་འགྲོས་ལྟར་མིན་པར། བདེན་ལུགས་དང་དྲང་ལུགས་གཞིར་བཞག་གི་ཐག་གཅོད་ཅིག་རེད།
ད་སྐབས་ང་མགོ་རྨོངས་ས་ནི་གནད་དོན་དེ་མིན་པར། དེའི་ཐོག་ལ་སྐད་རྒྱག་མཁན་ཚོ་རེད། ངས་ཉིན་འདི་འགར་ཁྱེད་ཚོས་འདི་ལྟ་བུའི་སྐད་ཅོར་ཅིག་བརྒྱབ་དོན་གང་ཡིན་ནམ་སྙམ་ནས་ཡུན་རིང་བསམ་བློ་བཏང་བ་ཡིན། མཐའ་མ་དེར་སེམས་ལ་འདི་སྙམ་དུ་འཁོར།
མ་གཞི་ནས་གཞོན་སྐྱེས་མང་པོ་ཞིག་ལ་དེང་སྐབས་མིད་པའི་ནང་དུ་སྐད་རྒྱག་འདོད་ཀྱི་ཟ་འཕྲུག་ཅིག་ལངས་བསྡད་འདུག དཔེར་ན། ད་ཐེངས་མ་སུ་རིའི་སློབ་གྲྭས་སློབ་མ་འདི་དག་ཕ་ཡུལ་ལ་ལམ་འཇུག་མ་བྱས་པར་སློབ་གྲྭའི་ར་སྐོར་གྱི་ཕྱི་ལོག་ལ་ཕུད་པ་ཡིན་ན་ཡང་ཁྱེད་ཚོས་སྐད་རྒྱག་གི་རེད། འདི་ཚོ་ཅིའི་ཕྱིར་སོ་སོའི་ཕ་མའི་འགྲམ་ལ་མ་བསྐྱལ་བ་ཡིན་ཅེས་སྐད་རྒྱག་གི་རེད། མ་མཐར་ཡང་བལ་ཡུལ་བར་དུ་སྐྱེལ་དགོས་པ་རེད་ཅེས་སྐད་རྒྱག་གི་རེད། མ་རེད་དམ།
ཡང་། སློབ་མ་དེ་ཚོའི་གཅིག་ཀྱང་སློབ་གྲྭ་ནས་ཕྱིར་མ་ཕུད་པར་རང་འཇགས་སློབ་གྲྭའི་ནང་ཉར་ཚེ་སླར་ཡང་ཁྱེད་ཚོས་འདི་ཚོ་ཅིའི་ཕྱིར་སློབ་གྲྭའི་སྒྲིག་ཁོངས་ནས་ཕྱིར་ཕུད་མ་བྱས་པ་ཡིན་ཟེར་ནས་སྐད་རྒྱག་གི་རེད། ད་དུང་མ་སུ་རིའི་སློབ་གྲྭ་ལ་ཁྲིམས་དང་སྒྲིག་གཞི་མེད་ལུགས་དང་། བྱིས་པ་ཚོ་འདིར་བསྐྱལ་མི་རུང་བའི་སྐད་རྒྱག་གི་རེད།
ཁྱེད་ཚོའི་རེ་བ་ལྟར། སློབ་མ་དེ་དག་གི་འགའ་རེ་ཕྱི་ལ་ཕུད། འགའ་རེ་མ་ཕུད་པར་སློབ་གྲྭའི་ནང་བཞག་ན་ཡང་ཁྱེད་ཚོས་སྐད་རྒྱག་གི་རེད། སློབ་མ་ལ་ཁྱད་པར་བཏོད་སོང་། གསར་རྙིང་གི་དབྱེ་འབྱེད་བྱས་སོང་། དྲང་པོ་མ་རེད་ཅེས་སྐད་སྣ་ཚོགས་རྒྱག་གི་རེད།
དེ་དང་འདྲ་བར། གནད་དོན་འདི་མ་སུ་རི་སློབ་གྲྭ་གཅིག་པུས་ཐག་བཅད་ཡོད་ཚེ་ཁྱེད་ཚོས་དེ་ལ་སྐྱོན་རྒྱག་གི་རེད། གནད་དོན་ཚབས་ཆེན་འདི་ལྟ་བུ་ཞིག་བོད་གཞུང་མཉམ་དུ་གྲོས་བསྡུར་མ་བྱས་པ་གང་ཡིན། བཀའ་སྤྱི་གཉིས་ཀྱིས་མ་ཐོས་མ་མཐོང་བར་ཐ་ན་བལ་ཡུལ་བར་དུ་བསྐྱལ་བ་ཡང་ཅི་འདྲའི་བློ་ཁོག་ལ་ཟེར་གི་རེད།
བོད་གཞུང་དང་མཉམ་དུ་གྲོས་བསྡུར་བྱས་ཏེ་ཕྱིར་འཕུད་བྱས་པ་ཡིན་ན་ཁྱེད་ཚོས་འདི་བོད་གཞུང་བར་དུ་ཁྱེར་ཡོང་དགོས་པ་ཞིག་མ་རེད། སློབ་གྲྭ་རང་ལ་དོན་དག་འདི་ཙམ་ཡང་ཐག་གཅོད་པའི་ལམ་དང་ལུགས་སྲོལ་མེད་པ་རེད་དམ་ཟེར་ནས་སྐད་རྒྱག་གི་རེད།
ད་སྐབས་ཁྱེད་ཚོ་གནས་སྟངས་འདི་འདྲ་ཞིག་ན་འདུག ཚད་གང་ལ་སླེབ་འདུག ཁྱེད་ཚོའི་ཁམས་དང་མཐུན་པའི་ཐག་གཅོད་ཅིག་བྱེད་ཤེས་ས་རེད་དམ།
མ་སུ་རི་སློབ་གྲྭའི་འཁྲིག་སྤྱོད་ཞབས་འདྲེན་གྱི་གནད་དོན་འདི་མ་བྱུང་བའི་ཡར་སྔོན་ཏག་ཏག་དེར་ཡང་ངྷ་སའི་གཞོན་བྱིས་སྐོར་ཞིག་གིས་རྒྱལ་སྤྱིའི་བཟོ་ཚོང་ཞིག་ལ་སྐད་འབོད་བྱས་སོང་། སྐད་ཅོར་དེ་ཡང་དཔེ་མཚོན་ཙམ་ཡིན།
ད་ནི་ངས་བསྐྱར་དུ་བཤད་རྒྱུར། མ་སུ་རི་སློབ་གྲྭའི་ཐག་གཅོད་དེ་ཧ་ཅང་འཚམ་པོ་ཞིག་རེད། ཐོག་མར་གནད་དོན་འདི་ཚབས་ཆེན་ལ་བརྩིས་པ་རེད། དེ་ནས་རང་ཚོད་ཀྱི་ཐག་གཅོད་མ་བྱས་པར། བོད་མི་དམངས་ཀྱིས་ཐད་ཀར་འོས་འདེམས་གནང་བའི་མི་དབང་བཀའ་ཁྲི་ཟམ་གདོང་རིན་པོ་ཆེ་མཆོག་དང་ཤེས་རིག་བཀའ་བློན་རྣམ་པ་གཉིས་ལ་དགོངས་ཚུལ་ཞུས་པ་རེད། མཐའ་མ་དེར། མ་གོང་རིམ་གྱི་ལམ་སྟོན་ལྟར། མ་འོངས་པའི་སོན་རྩ་ཁྲི་ཕྲག་མང་པོ་དང་། ལྷག་པར་དུ་ཧི་མ་ལ་ཡའི་རི་རྒྱུད་བརྒལ་ནས་ཡོང་མཁན་བྱིས་པ་ཚོར་ཉེན་བརྡ་དང་བཅས་བལ་ཡུལ་བར་དུ་ལམ་འཇུག་བྱས་པ་རེད།
ཐག་གཅོད་འདི་ལ་དོན་མེད་ཀུ་ཅོ་འདོན་པ་ལས། ལ་ཕར་རྒྱབ་དང་ཚུར་རྒྱབ་གཉིས་ཀར་ཡོད་པའི་ཤེས་ལྡན་པ་དང་། ལྷག་བསམ་ཅན། རིགས་ཞེན་ཅན། ལ་རྒྱ་ཅན། བློ་གྲོས་ཅན། མིག་རྒྱང་ཅན་ཚང་མས་ཐག་གཅོད་འདི་ལ་རྒྱབ་སྐྱོར་དང་གུས་བརྩི་བྱེད་པ་དང་། མ་འོངས་སོན་རྩ་རྣམས་ལ་སློབ་གསོ་བརྒྱབ་རྒྱུ་གལ་ཆེ་ཤོས་དེ་རེད་འདོད།
དྲ་གྲོགས་རྭ་ལོ་ལགས་ནས་དངོས་གནས་ཡག་པོ་བྲིས་འདུག རྒྱུ་མཚན་འདུག ར་ལོའི་གསུང་བ་དང་
ཁང་གསར་རྡོ་རྗེ་གཉིས་ནས་དཔེ་དང་བཅས་གསུང་བ་དེ། དཔེ་ཡག་པོ་རེད། རྒྱལ་བ་རིན་པོ་ཆེ་དང་
བཙན་བྱོལ་སྤྱི་ཚོགས་ལ་བློ་དཀར་སེམས་དཀར་རེད། རྗེས་སུ་ཡི་རང་དང་བསྔགས་བརྗོད་ཡོད།
རང་སེམས་ཡ་ཡོ་མི་བརྟན་པའི་རང་བཞིན་ཅན་དེ་གཞན་རིགས་ལ་དཔེ་སུ་སྦྱར་ནས་དེ་ཡིན་པར་ཐལ་དགོས་པའི་ཉིད་ཀྱི་བརྗོད་སྟངས་འདི་ནི། རང་ཞེན་ཆགས་སྡང་གི་དབང་དུ་མ་སོང་བར་གནད་དོན་དངོས་ལ་དཔྱད་ཀྱང་བརྟག་ཏེ་དྲང་པོར་བརྗོད་པའི་གཟུར་གནས་བློ་ལྡན་དག་གི་འཇུག་ཡུལ་དུ་མཐོང་མ་སོང་།
སློབ་མ་བཅུ་དང་ཁྱིམ་ཚང་ཕ་མ་གཉིས་རྒྱང་ཕུད་གཏོང་བ་ལས། སློབ་སྤྱི་གཅིག་དང་དགེ་ཆེ་གཅིག་ལས་དབྱུང་བཏང་བ་དེས་སློབ་གྲྭའི་སྒྲིག་གཞི་སྤྱི་ཡོངས་ནས་ཚགས་ཚུད་ཡོང་བར་གནོད་ཤུགས་སྤྲོད་ཐུབ་རྒྱུ་རེད། སྤྱི་ཚོགས་གང་ཞིག་ཏུ་དུས་རྒྱུན་གནད་དོན་ཅི་ཞིག་ལྷག་ཀྱང་མཐོ་རིམ་དཔོན་རིགས་ཚོའི་རྐུབས་སྟེགས་འགྱུར་མེད་རྡོ་རྗེ་བྲག་རི་ལྟར་བཀྲ་ཤིས་བདེ་ལེགས་ཡིན་པའི་ལུགས་སྲོལ་དག་ནི། སྤྱི་ཚོགས་གང་དེའི་སྒྲོམ་གཞིའི་ཀ་ཆེན་དག་ལ་གཡའ་དང་དྲེག་པས་ཟེགས་ཡོད་པ་མཚོན་ཡོད་དེ། དམར་ཕྱོགས་སྒེར་གཅོད་རང་ལུགས་པའི་ནག་ཉེས་ཆེ་ཤོས་དེ་ཡང་འདི་ལ་ཐུག་འདུག་པ་མ་ཡིན་ནམ། སྤྱི་ཚོགས་གང་ཞིག་ཡིན་ཡང་། ནག་ཉེས་ཡོད་ཚད་དམངས་མི་སེར་གྱི་སྟེང་ནས་འཚོལ་བ་དང་ཁྲིམས་ཆད་མཐའ་དག་དམངས་མི་སེར་གྱི་ཐོག་ཏུ་འབེབས་པ་དེ་ནི་སྤྱི་ཚོགས་ཡར་རྒྱས་ཚགས་ཚུད་ཡོང་བའི་རྒྱུ་མ་ཡིན་པར། སྤྱི་ཚོགས་གང་དེའི་སྒྲིག་གཞི་མཐའ་དག་རུལ་ཟེགས་སུ་འགྱུར་ཉེན་ཡོད་པའི་བརྡ་རྟགས་མངོན་གསལ་ཅན་དེ་རེད།
རཱ་ལོ། ཁྱོད་ཀྱི་རྩོམ་འདི་མཐའ་གཅིག་ཏུ་གནས་ལུགས་ཀྱིས་ཁེངས་འདུག་ཟེར་ཐུབ་ཀྱི་མི་འདུག་མོད། རྩོད་བརྒྱབ་ནས་མཐར་འབབ་ས་མེད་དུས་ངས་ཀྱང་མང་བོ་བཤད་པས་དགོས་དོན་མི་འགྲུབ་པ་གསལ་བོར་རྟོགས་ཡོད། ཡིན་ནའང་། ཐེངས་འདིར་ཁྱོད་ཀྱིས་རིག་པས་དགག་སྟེངས་འདི་ཅུང་ཙམ་ལེགས་པོར་མཐོང་། འདི་གཅིག་བྱས་ན་ད་ནས་བཟུང་བྱེད་སྟངས་གསར་བ་ཞིག་ཏུའང་འགྱུར་སྲིད། དེང་སྐབས་མི་ཚང་མས་གཅིག་གིས་ཅིག་བཤད་དུས་ལམ་སེང་གཞན་ཞིག་གིས་དེར་རྒྱག་རྒྱུ་ཡིན་ཟེར་གི དེ་ཚོར་འདིས་ཕན་ཐོགས་འབྱུང་སྲིད། དེ་ཙམ་ཡིན།
རྭ་ལོ་ལགས། ཁྱོད་ཀྱི་ར་རྩེ་ཅུང་རྣོ་སེ་བྱུང་།
བདེན་པ་སུ་ལ་ཡོད་མེད་མ་ཤེས། ཡིན་ན་ཡང་། གནས་ལུགས་ཤིག་གི་སྟེང་ལ་སོ་བརྒྱབ་ནས་འདུག་པ་དང་། སོ་སོའི་བདེན་པ་དེ་ཚོ་ཡང་གོ་རིམ་ཡོད་པ་དང་། བཤད་མཁས་པ་བཅས་ཀྱིས་མི་སུ་ཡིན་རུང་སེམས་འཁྲིག་གཞི་ཞིག་བཟོས་འདུག
ངའི་མཆན་ངོ་མ་ནི་གཤམ་གྱི་འདི་ཡིན།
སྐབས་རེར་ལྷག་བསམ་གྱིས་གནས་ལུགས་ཟ་གི་འདུག
ཁྲིམས་བརྒལ་ཁྲིམས་ས་ནས་འབུད་ཐུབ་པ་དང་མི་འདོད་བཞིན་དུ་བོད་ལ་ལོག་མི་དགོས་ཙམ་བྱུང་ན་དགོས་རྒྱུ་པགས་ལ་པགས་ཁུ་ད་ར་ཟེར་ན་དེ་རེད།
ཁྱོད་རང་གིས་བཤད་པ་དངོས་་གནས་རེད། མི་ཚང་མས་མཉམ་དུ་འགྲིག་ཤག་ཟེར་བའི་ཚིག་ཏེ་དངོས་གནས་ཡོང་མི་ཐུབ།
དྲག་གི ཟ་འཕྲུག་གང་ནས་གང་ན་དེ་ནས་འཕྲུག་དགོས། ཟ་འཕྲུག་ཆེ་རུ་སོང་ན་ལྷག་པར་འཕྲུགས་ཁྲག་བཞུར་རྒྱུ་རེད། སྤྱི་ཚོགས་ཀྱི་གནད་དོན་འདི་རིགས་ལ་ཚང་མས་མཐོ་རྒྱག་དང་དམའ་རྒྱག་མེད་པར་བསམ་ཚུལ་དྲང་མོ་རེ་བཤད་རྒྱུ་ཧ་ཅང་གལ་ཆེ། སྐབས་འདི་རང་ལ་མ་ཕན་ཡང་ཐེངས་ཕྱིན་ཆད་ལ་བསམ་བློ་གཏོང་རྒྱུར་ཕན།
སྐད་རྒྱག་མཁན་ཚང་མ་དེ་འདྲ་ཨེ་ཡིན་མི་ཤེས་ཏེ། མང་པོ་ཞིག་དེ་འདྲ་ཡིན་པའི་མཐོང་ཚུལ་ང་ལའང་བྱུང། ཕལ་ཆེ་བ་སྨྲ་བརྗོད་རང་དབང་བེད་སྤྱོད་གཏོང་རྒྱུ་ལ་དགའ་དྲགས་པ་དང་། འཁྲུག་ཆ་དོད་པོ་བཟོ་རྒྱུར་དགའ་བ་ཙམ་རེད། གནས་ལུགས་ལ་བསམ་བློ་གཏོང་མཁན་དཀོན་པོ་རེད།
ད་རེས་ཀྱི་མ་སུ་རིའི་གནད་དོན་ཐག་གཅོད་གནང་སྟངས་འདི་ཁོང་ཚོའི་སྒྲིག་གཞི་ལྟར་གནང་བ་ཞིག་ཡིན་ཚུལ་གསུང་གི་ཡོད་པས། གལ་སྲིད་འགྲིག་མེད་ན་སྒྲིག་གཞིས་མ་འགྲིག་པ་ཡིན་པས་སྒྲིག་གཞི་བསྐྱར་བཅོས་བྱེད་དགོས་པ་ལས། ལས་ཀྱི་སྣེ་མོ་བར་དེ་ཙམ་བཤད་དུ་ཨེ་ཡོད།
འདི་རྭ་ལོས་ཡག་པོ་ཞིག་བྲིས་འདུག རྒྱུ་མཚན་འདྲེན་སྟངས་དེ་ཚོར་བསྔགས་བརྗོད་ཡོད།
སྔོན་མ་ཕ་རྒས་པོ་ཞིག་དང་བུ་ཞིག་བོང་བུ་བཞོན་ནས་ཕྱིན་པ་རེད། ལམ་བར་དུ་མི་ཚོས། དཔེ་མི་སྲིད། དེ་འདྲའི་ཕ་བུ་གཉིས་ཀྱི་བྱེད་སྟངས་ངན་པ་ལ། བོང་བུ་ཤི་ཆོག་ཆོག་དེ་ལ་ཕ་བུ་གཉིས་ཀས་ཉིས་བཞོན་བྱས་འདུག་ཅེས་བཤད་པ་རེད། དེར་ཕ་བུ་གཉིས་ངོ་ཚ་སྟེ། བུ་དེ་བོང་བུ་ནས་བབས། ཕས་བཞོན་པ་རེད། ཡང་མི་ཚོས། ཕ་དེའི་སྡུག་ག་ལ། བུ་ཆུང་ཆུང་དེ་རྐང་ཐང་དུ་བཏང་། ཁོ་རང་སྐྱིད་པོ་བྱས་བོང་བུ་བཞོན་འདུག་ཅེས་བཤད་པ་རེད། དེར་ཕ་ངོ་ཚ་ནས། བུ་ལ་བཞོན་བཅུག་པ་རེད། ཡང་མི་ཚོས། བུ་དེའི་བྱེད་སྟངས་ལ་ལྟོས་དང་། ཕ་རྒན་རྐང་ཐང་དུ་བོང་བུ་འཁྲིད་བཅུག ཁོ་རང་ཤ་དར་ཁྲག་དར་ཡིན་རུང་བོང་བུར་བཞོན་འདུག དེ་འདྲའི་གུས་ཞབས་མེད་པའི་བྱེད་སྟངས་ཞེས་བཤད་པ་རེད། ཐ་མ་ཕ་བུ་གཉིས་ཀས་བོང་བུ་མ་བཞོན་པར་སོང་བར་འཁྲིད་ཕྱིན་པ་རེད། ཡང་མི་ཚོས། ཕ་བུ་དེ་གཉིས་ཀྱི་ཆོ་མེད་པ་ལ། བོང་བུ་མ་བཞོན་པར་རྐང་ཐང་དུ་འགྲོ་གི་འདུག་ཅེས་བཤད་པ་རེད། སྒྲུང་དེ་དང་འདྲ་ཙམ་བཤད་འདུག
ངས་མ་སུ་རི་བོད་ཁྱིམ་གྱི་འཁྲིག་སྤྱོད་དོན་རྐྱེན་དེ་ལ་ཐག་གཅོད་བྱེད་དགོས་ཟེར་གྱི་ཡོད། འོན་ཀྱང་ཐག་གཅོད་གང་བྱས་ཀྱང་བཙན་བྱོལ་བོད་མིའི་བཅའ་ཁྲིམས་དང་དེའི་དགོངས་དོན་རྒྱལ་སྤྱིའི་ཁྲིམས་དང་མ་འགལ་བ་བྱེད་དགོས་ཟེར་གྱི་ཡོད།
དེ་རིང་རྭ་ལོའི་མིད་པར་ཟ་འཕྲུག་ཅིག་ལངས་པ་མ་གཏོགས་ཅང་ཤོད་མི་འདུག ད་བཤད་ཀི་བཤད་ཀི་ཉོག་འགྲོ་ཡི་འདུག ཡིན་ནའང་རྭ་ལོའི་གཅེའི་ལྷག་བསམ་ལ་གོང་བཀུར་ཡོད། ཁོང་གི་རྩོམ་ཡིག་སྔ་གཞུག་གཉིས་ཀྱི་ཤུགས་ན་རྭ་ལོ་ཞེས་པའི་མི་འདི་བོད་གཞུང་ལ་ལྷག་བསམ་རྣམ་དག་ཡིན་པ་མཚོན། སྤྱིར་ད་ལྟའི་གནས་བབ་ཀྱི་ང་ཚོར་མཁོ་བ་དེ་ཡང་དེ་ལས་ཅི་ཞིག་ཡོད། རྭ་ལོ་ལགས་ལ་ཐུགས་རྗེ་ཆེ།