ཕྱི་རྒྱལ་དུ་ང་ཚོས་ཅི་ཞིག་ལུས་ཡོད།

འདི་ལྟར་གླེང་དགོས་ པའི་དམིགས་ཡུལ་གཞན་མེད་ལ། རང་གི་རིགས་རུས་ཀྱི་འགྱུར་བག་ཁྲོད་དུ་ཤ་གཟེར་ཟུག་གཟེར་གྱིས་ནད་ཚའི་བསླེང་ བའི་འུ་ཐག་ཐབས་ཟད་ཀྱི་སྐད་ཆ་འདི་དག་མི་བཤད་ཐུ་མེད་དུ་གྱུར་སྟབས་དེ་རིང་འདི་ ནས་གླེང་རྒྱུ་སེམས་ཐག་བཅད་པ་ཡིན།
སྤྱིར་ན་ངས་བོད་རིགས་ སྤུན་ཟླ་ཡོངས་ལ་འཕྱ་དམོད་དང་ཟུར་ཟ་དམའ་འབེབས་སོགས་གང་ཡང་མ་ཡིན་པར། རང་གི་མྱོང་བ་དང་བརྒྱུད་མྱོང་བའི་ལམ་ཕྲན། བསམ་མྱོང་བའི་རྟོགས་གཟུགས་ཀྱི་རི་མོ་འདི་ཉིད་ཁོག་དུ་སྤས་དེ་བསྡོད་པ་ལས། རང་གི་རིགས་རུས་གཅིག་པའི་སྤུན་ཟླ་ཁྱེད་ཅག་ལ་སེམས་གཏིང་ནས་བཤད་འདོད་ཀྱི་ཡིན།

ཁྱེད་རང་ཕྱི་རྒྱལ་དུ་ འབོད་པའི་མི་རིགས་གཞན་ཞིག་གི་ཁོར་ཡུག་ལ་རེ་སྙེགས་བྱེད་པའི་རྨི་ལམ་དང་བསམ་ གཞིགས་ཇི་ལྟར་འགོ་བཙུགས་པ་ཡིན། ཐོག་མར་ངས་དེ་ལྟར་ཞུ་འདོད་བྱུང་།
ང་རང་ལྟ་བུའི་ཞིག་གིས་སེམས་གཏིང་ནས་ཁྱེད་རང་ལ་དྲི་བ་འདི་ལྟར་འདྲི་དོན་ནི། རང་ཉིད་ལས་ལྷག་པའི་དམིགས་ཡུལ་ཞིག་གི་ཆེད་དུ་འགྲོ་བཞིན་ཡོད་དམ། ཡང་ན། ཁྱེད་རང་ལས་གཞན་པ་ཞིག་གི་ཆེད་དུ་ཕྱི་རྒྱལ་དུ་འགྲོ་རྩིས་བྱེད་ཀྱི་ཡོད། དེ་མིན་མི་བུ་སྒེར་གྱི་གནད་དོན་གྱི་ཆེད་དུ་བསྐྱོད་ཀྱིན་ཡོད། མིན་ན། རང་རིགས་འདས་གསོན་ཡོངས་ཀྱི་མ་འོངས་མདུན་མའི་ཆེད་དུ་ཁོར་ཡུག་གཞན་ཞིག་གི་ལོ་ རྒྱུས་དང་ཉམ་མྱོང་བརྗེ་རེའི་བྱེད་དུ་ལམ་ལ་འབུད་རྩིས་བྱེད་ཀྱི་ཡོད།
གང་ལྟར་འདི་དག་ལས་གང་ ཡང་མ་ཡིན་པར་མི་བུ་སྒེར་གྱི་ཁ་རྒྱབ་ཁོ་ནའི་ཆེད་དང་། ཟ་ཉལ་སྐྱིད་ཉལ་དང་འདོད་སྲེད་ཀྱི་རེ་བ་ཁོ་ན་ཞིག་བསམ་ནས་འགྲོ་བར་རྩོམ་གྱི་ ཡོད་ན། ངས་མི་དེའི་རིགས་ལ་གང་ཡང་ཞུ་རྩིས་མེད།

མི་རིགས་ཀྱི་འདས་གསོན་ ཡོངས་ཀྱི་ཆེད་དུ་ཁྱེད་རང་ཕྱི་རྒྱལ་དུ་བཅར་རྩིས་ཡོད་པ་ཡིན་ན། ཕྱི་རྒྱལ་བ་དེ་དག་གི་ཕྱི་ནང་གང་དུ་བོད་མི་རིགས་ལ་ཕན་པའི་ལག་རྗེས་དང་ཉམས་ མྱོང་གང་ཞིག་ང་ཚོར་མ་ཐོབ་པར་ཡོད་དམ། ཁོང་ཚོས་ང་ཚོའི་ཆེད་དུ་མ་འགུལ་རང་འགྲུབ་ཀྱི་བདེན་མཐའ་གསལ་བའི་ཐབས་ཇུས་གང་ ཞིག་རྒྱབ་སྐྱོར་བྱེད་སྲིད་ཀྱི་རེད་དམ། དེ་མིན་ན་ཁྱེད་རང་གིས་ཁོང་ཚོའི་གམ་དུ་སོང་དེ་གང་ཞིག་སློང་རྩིས་ཡོད། ཅི་ཞིག་སློབ་དེ་འོང་ནས་རང་རིགས་ཀྱི་སྤུན་ཟླ་ཡོངས་ལ་ཞབས་འདེགས་ཞུ་རྩིས་ཡིན།
ཁྱེད་རང་ལས་གཞན་པའི་མི་ ཞིག་གི་ཆེད་དུ་ཕྱི་རྒྱལ་གང་རུང་དུ་འགྲོ་རྩིས་བྱེད་ཀྱི་ཡོད་པ་ཡིན་ན། དེ་ནི་སུ་རེད་དམ། རང་གི་ཕ་མ་རེད་དམ། ཉེ་དུ་ཡིན་ནམ། སྙིང་གྲོགས་དང་བཟའ་ཚང་ཡིན་ནམ། ཕ་མའི་ཆེད་དུ་ཡིན་ན། ཕ་མ་དག་ལ་དཔལ་འབྱོར་དཀའ་ངལ་ཆེན་པོ་ཡོད་པ་དེ་ཡིས་ཁྱེད་རང་དཔལ་འབྱོར་འཚོལ་ སྒྲུབ་བྱེད་དུ་འགྲོ་བཞིན་ཡོད་ན། ཁྱེད་རང་གི་ཕ་མ་དག་ལ་དཔལ་འབྱོར་མ་འབབ་གང་ཙམ་ཞིག་བསྡུ་གཉེར་བྱེད་དགོས་སམ། ཉེ་དུ་དང་སྙིང་གྲོགས་བཟའ་ཚང་གི་ཆེད་དུ་འགྲོ་རྩིས་ཡོད་ན། ཁོང་ཚོས་ཁྱེད་རང་གཞན་ཡུལ་དུ་བཏང་ནས་གཞན་ཡུལ་ནས་ཁོང་ཚོས་ཁྱེད་རང་གི་རྔུལ་ ཆུའི་ཐིགས་པ་གསགས་པའི་ཡོང་བབས་དེ་དག་གིས་ཁྱེད་རང་ལ་ཐོབ་དགོས་པའི་བྱ་དངོས་ དག་འཁོ་སྒྲུབ་བྱེད་ཐུབ་བམ། ཡང་ན། ཁྱེད་རང་གིས་ཁོང་ཚོས་འདོད་བློ་ཡོངས་རྫོགས་སྐོང་ཐུབ་པར་རང་གིས་རང་ལ་གདེང་ ཚོད་ཡོང་གི་འདུག་གམ། ཁྱེད་རང་གིས་རྒྱུས་མངའ་མེད་པའི་ཕྱི་གླིང་དེར་དེ་འདྲའི་རེ་སྙེགས་བྱེད་ཆོག་ ཆོག་གི་ཁོར་ཡུག་ཞིག་ཡིན་པ་སེམས་གཏིང་ནས་ཇི་ལྟར་ངེས་ལེན་བྱེད་ཐུབ་སོང་།

རང་ཉིད་ལས་ལྷག་པའི་ དམིགས་ཡུལ་ཞིག་གི་ཆེད་དུ་ཕྱི་རྒྱལ་དུ་འགྲོ་བཞིན་པ་འདྲ་ཡིན་ན། རང་ཉིད་ལས་ལྷག་པའི་དམིགས་ཡུལ་དེ་ཡི་ཅི་ཞིག་མཚོན་པར་ཁྱེད་རང་གིས་རྟོགས་ གཟུགས་ཀྱི་རི་མོའི་ཁྲོད་དུ་ཁ་དོག་གང་ཞིག་ལ་ངེས་བཟུང་དེ་ཡོད། ཁ་དོག་དེ་ནི་རང་ཉིད་ལས་ལྷག་པའི་དམིགས་ཡུལ་དུ་འགྲུབ་དོན་གང་རེད། རང་གི་སྐད་ཡིག་ལས་ལྷག་པའི་ཤ་གསེང་རུས་གསེང་དུ་ཟུག་པ་ད་ལྟའི་བར་དུ་ཁྱེད་རང་ ལ་གཞན་མེད་ཀྱང་། དེ་ཉིད་ཀྱི་སྟེང་ནས་ལག་རྗེས་ཤིག་ཙམ་སྟོན་རྒྱུ་མེད་པར་དམིགས་ཡུལ་དེ་འདྲ་ཞིག་ ཁྱེད་རང་གི་སེམས་ཁོང་དུ་སྤས་སྐོང་བྱེད་པའི་གདམས་བསྔགས་དེ་སྤྲོད་མཁན་རང་ཡིན་ ནམ། ཁོར་ཡུག་གིས་ཁྱེད་རང་ལ་བཙན་གྱིས་སྤྲད་པའམ་ཁྱེད་རང་གིས་ཁོར་ཡུག་སྐྱ་བོ་འདི་ ནས་དང་ལེན་བྱས་པ་ཞིག་ཡིན།

གང་ལྟར། མཐའ་དོན་གྱི་སྙིང་བོ་མདོར་བསྡུས་དེ་ཞུས་པ་ཡིན་ན། བོད་བྱེས་སུ་གྱར་བ་དང་བོད་ནང་དུ་བསྡོད་མཁན་སུ་ཞིག་ཡིན་ཡང་། ད་ལྟའི་བོད་འདི་ཆག་འཇིགས་གཉེན་འཕྲེང་ཆེ་བའི་དུས་ཚོད་འདི་ལ་ང་ཚོས་རང་ཉིད་ བོད་མི་ཞིག་ཡིན་པ་དྲན་སྟངས་མ་ཤེས་པའི་ནག་ཉེས་འདི་ནི། མི་རབས་རྗེས་མ་དག་གིས་འུ་ཅག་ལ་ནམ་ཡང་ལེ་བདའ་རྫོགས་མཐའ་མེད་པ་ཞིག་བྱེད་ཁོ་ ཐག་གི་སྐེས་འཛེགས་ཆག་པོ་འདི་ད་ནས་བཟུང་སྐྱུར་ཐབས་བྱེད་དགོས་ཀྱི་འདུག

དོན་དངོས་ཐོག མི་སུ་ཞིག་ཡིན་ཡང་འཚོ་བ་མ་བསྐྱེལ་ཐབས་མེད་ཡིན་དུས། འཚོ་བ་བསྐྱེལ་སྟངས་ཀྱི་རིམ་པ་དེ་ཡང་འགྱུར་བ་ཞིག་ཏན་ཏན་འགྲོ་དགོས་པ་ནི་ སྨྲོས་མེད་ཡིན་མོད། འོན་ཀྱང་། དེ་ལ་ངེས་ཟིན་ཟབ་མོ་ཞིག་མ་ཐོབ་པ་ཡིན་ན། གོང་དུ་ཞུས་པ་ལྟར་འགྱུར་བར་གདོན་མི་ཟ་བ་ཡིན།

ཁྱེད་རང་ཕྱི་རྒྱལ་གང་ རུང་དུ་མ་འགྲོ་ཐབས་མེད་ལྟ་བུ་ཞིག་གི་གནས་སྟངས་འོག་འཚུད་ཡོད་པ་ཡིན་ན། ཐོག་མར་རང་ཉིད་ཕྱི་རྒྱལ་དུ་འགྲོ་ཐབས་ཀྱི་ཐབས་ལམ་ཆེས་ཡག་ཤོས་དེ་ནི་རིགས་རུས་ གཞན་ལ་མ་ཤོར་བའི་ཐབས་ལམ་ཁོ་ན་ཞིག་བརྟེན་ནས་སོང་བ་ཡིན་ན། ལས་ཀ་དང་ཉམ་མྱོང་ཡང་ཆེས་མི་ཉུང་བ་ཞིག་རེག་ངེས་ཡིན་ལ། རང་གི་དཀའ་ལས་བརྒྱབ་པའི་གྲུབ་འབྲས་དེ་ཡང་རང་དང་རང་གི་རིགས་ཤིག་ལ་བསྟུམ་ཐུབ་ ངེས་ཡིན། དེ་མིན་ཁྱེད་རང་གིས་ཕྱོགས་གང་ཞིག་ནས་ཕྱི་རྒྱལ་མི་རིགས་དང་གཉེན་སྒྲིག་མ་བྱས་ པའི་ཐབས་ལམ་ཞིག་འཚོལ་ཐུབ་བྱེད་རྒྱུ་དེ་ཡིན།

ཁྱེད་རང་དངོས་ནས་དྲང་ གནས་ཀྱི་བརྟེན་ས་དང་བརྟེན་ཡུལ། རྒྱུ་དངོས་ཀྱི་རོགས་རམ་བྱེད་མཁན་གང་ཡང་མེད་པའི་མི་ཞིག་དུ་གྱུར་ཡོད་པ་ཡིན་ན། ད་གཟོད་རང་གིས་བསམ་བློ་ཞིབ་མོ་གཏོང་རན་ཡིན། རིགས་རུས་བཙོང་དེ་ཕྱི་རྒྱལ་དུ་འགྲོ་བ་ལས་ལས་ཀ་གཞན་ཞིག་བྱེད་རྒྱུའི་གོ་སྐབས་ ས་གང་དུ་བསྡད་ཀྱང་ཡོད་པ་དེར་འགན་ཞིག་འཁུར་ནས་བསྡོད་ཐུབ་པ་ཡིན་ཆེས་ཡག་ཤོས་ ཡིན། དེ་འདྲ་བྱེད་མ་ཐུབ་པར་དངོས་ནས་ཕྱི་རྒྱལ་གང་རུང་དུ་མི་འགྲོ་ཐབས་མེད་དང་ཕྱི་ རྒྱལ་ཕོ་མོ་གང་རུང་ལ་གཉེན་བསྡེབས་ནས་འགྲོ་དགོས་ཆགས་ཡོད་པ་ཞིག་ཆགས་ཡོད་ཚེ། གནས་གང་དུ་སླེབས་པ་ཡིན་ན། ཐོག་མར་རིགས་རུས་ཀྱི་འགོ་མ་བཙུགས་པར་ལས་ཀ་དང་ཉམ་མྱོང་གང་ཙམ་བསགས་པ་དང་། རང་གི་གཉེན་གྲོགས་དུ་གྱུར་བའི་མི་དེ་ཡི་ཕྱི་ནང་གསང་གསུམ་ལ་རྒྱུས་ལོན་ཟབ་མོ་ ཞིག་བྱེད་རྒྱུ་དེ་ནི་ཅིས་ཀྱང་མེད་དུ་མི་རུང་བ་དང་། རང་གི་རིགས་རུས་གཞན་ལ་མི་བཙོང་བའི་ཐབས་ལམ་ཆེས་ཡག་ཤོས་སུ་མཐོང་གི་འདུག

དམིགས་ཡུལ་དང་རང་ཉིད་ ལ་གདེང་ཚོད་ཅི་ཡང་མེད་པར་ཕྱི་རྒྱལ་གང་རུང་དུ་འགྲོ་བ་ནི། དུས་རབས་གསར་བའི་བྲན་གཡོག་ཞིག་གི་སྐྱེ་བ་ལེན་དུ་འགྲོ་བཞིན་ཡོད་པ་ལས་གཞན་གང་ ཡང་མིན་པར་ངས་དེ་རིང་འདི་ནས་སེམས་ཐག་གཙང་བཅད་ཀྱིས་བཤད་ཐུབ་ཀྱི་ཡོད།

གསལ་བཤད། ལས་བྲེལ་གྱི་བར་གསེང་དུ་རྡ་སྟེང་མེག་ལོར་ནས་རང་གི་བསམ་ཚུལ་མདོར་ཙམ་ཞུས་པ་ ཡིན། སྤྱིར་ན་རྒྱས་པོ་ཞིག་འབྲི་འདོད་ཆེན་པོ་ཡོད་ཀྱང་། གནས་སྐབས་རིང་འདི་ཙམ་གྱི་འཐུས་པར་བྱས་སོ།