གྷོ་གྷལ་ཕྱིར་པེ་ཅིན་ལ་ལོག་པ།

ཕྱི་ཚེས་ ༩ ཉིན་གྷོ་གྷལ་གྱིས་གསལ་བསྒྲགས་སྤེལ་བ་ལྟར་ན། པེ་ཅིན་གྱིས་གྷོ་གྷལ་མུ་མཐུད་ནས་རྒྱ་ནག་ཏུ་སྡོད་ཆོག་པའི་ཆོག་མཆན་ཡིག་ཆ་སྤྲད་འདུག

ང་ཚོ་སྔོན་ཆད་གྷོ་གྷལ་ལ་དགའ་མྱོང་ལ། ཁྲོ་ཡང་མྱོང་། ད་ལོའི་ལོ་སྟོད་ནས་བཟུང་གྷོ་གྷལ་གྱིས་རྒྱ་ནག་གི་དྲ་འབུའི་བསུན་གཙེར་འོག་ནས་དྲ་རྒྱའི་འཚོལ་ཞིབ་མ་ལག་དེ་ཕྱིར་འཐེན་བྱེད་རྒྱུ་ཡིན་ལུགས་བཤད་པ་དང་། དྲ་ཚིགས་དེ་པེ་ཅིན་ནས་ཧོང་ཀོང་ལ་གནས་སྤར་བ་སོགས་ཀྱི་སྐབས་སུ་ང་ཚོ་གྷོ་གྷལ་ལ་དུང་བ་སྐྱེས་ཤིང་། གྷོ་གྷལ་ལས་ལྷག་ཅིག་མི་འདུག་ཅེས་བཤད།

གྷོ་གྷལ་དང་པེ་ཅིན་བར་གྱི་རྩ་བའི་འགལ་འདུ་དེ་མུ་མཐུད་དུ་ཡོད་རུང་། ད་སྐབས་གྷོ་གྷལ་ཕྱིར་པེ་ཅིན་དུ་ལོག་པ་དང་། པེ་ཅིན་གྱིས་གྷོ་གྷལ་དྲ་ཚིགས་མུ་མཐུད་ནས་རྒྱ་ནག་ནང་བསྡད་ཆོག་པའི་ཡིག་ཆ་སྤྲད་འདུག་ལ། ང་ཚོའི་མང་པོ་ཞིག་སླར་ཡང་གྷོ་གྷལ་ལ་ཁོང་ཁྲོ་ལངས་མགོ་བཙུགས།

གྷོ་གྷལ་གྱི་ཚོགས་གཙོས་བཤད་དོན། རྒྱ་ནག་གཞུང་གིས་ང་ཚོའི་དྲ་ཚིགས་མུ་མཐུད་ནས་རྒྱ་ནག་ཏུ་སྡོད་ཆོག་པའི་མོས་མཐུན་ཡིག་ཆ་བསྐྱར་བཟོ་བྱས་པ་དེར་ང་ཚོ་ཧ་ཅང་གི་དགའ་བོ་བྱུང་། ང་ཚོས་རྒྱ་ནག་ནང་གི་དྲ་བ་སྔོག་མཁན་ཚོར་དྲ་ཐོག་གི་འཚོལ་ཞིབ་དང་ས་གནས་ཀྱི་ཅ་དངོས་དྲ་ངོས་སུ་མཁོ་སྤྲོད་བྱེད་པའི་ལས་དོན་དེ་ཚོ་མཇུག་སྐྱོང་རྒྱུར་སྟ་གོན་བྱེད་ཀྱིན་ཡོད་ཅེས་བཤད་འདུག

ཡིན་ཡང་། པེ་ཅིན་དང་གྷོ་གྷལ་གཉིས་ཀྱི་བར་གྱི་རྩ་བའི་རྩོད་རྙོག་གི་ཐད་ནས་གྲོས་འགྲིག་ཅི་ཞིག་བྱུང་ཡོད་མེད་གསལ་བཤད་བྱས་མེད།

རྒྱ་ནག་གཞུང་གིས་གྷོ་གྷལ་དྲ་ཚིགས་སྟེང་གློག་འཕྲིན་ཁ་བྱང་བཟོས་ཡོད་མཁན་གྱི་རྒྱ་ནག་གི་འགྲོ་བ་མིའི་ཐོབ་ཐང་རྩོད་ལེན་པ་དང་། ཁྲིམས་རྩོད་པ། དྲུག་བཞིའི་ལས་འགུལ་ལ་རྒྱབ་སྐྱོར་བྱེད་མཁན་བཅས་ལ་དྲ་འབུ་སྣ་ཚོགས་བཏང་སྟེ་སོ་མྱུལ་དང་འཇིགས་སྐུལ་སོགས་བྱས་པར་བརྟེན་གྷོ་གྷལ་གྱིས་རྒྱ་ནག་གཞུང་ལ་བྱེད་སྟངས་དེ་ཚོ་མཚམས་འཇོག་བྱ་དགོས་པ་དང་། དྲ་ཐོག་གི་རང་དབང་དང་བདེ་འཇགས་སྲུང་སྐྱོབ་ལ་འགན་ལེན་བྱེད་དགོས་པའི་རེ་སྐུལ་བཏོན་ཡང་། པེ་ཅིན་གྱིས་དེར་ངོས་ལེན་བྱས་མེད། རྩོད་གཞི་འདི་དག་ལ་བརྟེན་འདས་པའི་ཟླ་ཤས་གོང་གྷོ་གྷལ་གྱི་དྲ་ཚིགས་དེ་པེ་ཅིན་ནས་ཧོང་ཀོང་ལ་སྤར་བ་རེད།

འགྲོ་བ་མིའི་ཐོབ་ཐང་རྩོད་ལེན་པ་སོགས་ཀྱིས་དེར་དགའ་བསུ་དང་བཅས་རྒྱ་ནག་ནང་གི་གྷོ་གྷལ་ཡིག་ཚང་གི་ཕྱི་ལོག་ལ་མེ་ཏོག་བཞག་པ་སོགས་བྱས་ཡོད།

གསར་འགྱུར་སྤེལ་མཁན། ལུང་རིགས།